Jax sâu, hnuz thưr 5, hnuz xiêz 01/12/2016:

Lâm Đồng: Uô jông trơưk Lâuk jok li pưs txux hâur gra siêz tsưr ziv por hưv jôngr

         Trơưk li Công an huyện Đam Rông, tsuôk xav hâur thax tsav xã Đạ Long tưz muôx tsơưs tsơưs 100 chuôz zis tsôngv box khiêr muk uô têx tsêr fênhz suôz nhoz trâu têx thax tsav jos 26 thiêz 27 hâur thax tsav Vax têz qơưs Bi-đúp Núi Bà, huyện Lạc Dương, ntor luôx jôngr uô hiêv têx jôngr ntông thiêz nav ar har jôngr uô liêx têz, qơư nhoz  tsi trơưk chei. Têx li heik no uô ntâu phiv liv txos hâux lưv seiz car thiêz por hưv jôngr, cux li uô ruôr hiêv txos qênhx shênhx txiv ngaz hâur thax tsav. Txix muôx yưv têx li hêik ntơư, Công an huyện Đam Rông tưz đros hâu nov cxuô cấp, têx đoanx thêv ntơưv qơư cxơưz tiês uô jông hâux lưv yax kriê, vênhv tôngv thiêz heik cov têx ziv chuôz zis tsôngv box heir nênhs tsơưs no tror kaz lok nhoz zuk kuz têz kuz qơư. Zơưv Ha Neh, tsar Công an xã Đạ Long, huyện Đam Rông heik pâuz:

      “Uô luôs hâux lưv no mak khov lok trâu têx lênhx muôx txux chi tsưr ziv jênhv pâuz, 2 zos têx lênhx nênhs ntơư chuôz zis, chuôz xênhv, lar heik zos têx lênhx txir ndâux txir luk cxênhz jê lơưr chiê yax kriê, vênhv tôngv. Đhâu uô luôs hâux lưv li no mak tưz muôx ntâu ziv chuôz zis tror lok nhoz hâur zuk kuz qơư, đhâu co nhênhz chơưv paz trâu hâu nov ntơưv qơư chiê têx chuôz zis no sâu ntơưr nhav tsi tror uô têx nuv tsi trơưk chei li heik sâuv”.

     Đros faz tsưr ziv uô no, têx lênhx lâuk jok, tsar jok, txir ndâux txir luk hâur jêx jok tưz sik thôngx siêz đros hâu nov ntơưv qơư, cxix luôs chính trị ntơưv thax tsav qơư thiêz công an uô jông hâux lưv yax kriê, vênhv tôngv tsôngv box sđ uô jông trơưk Đảng, têz qơưs têx chei, cui tinhv. Lơưr mục sư Ha Bông, nhoz xã Đạ Long, huỵên Đam Rông,  luôs hâux lưv uô tâu no tsi tiêk paz uô truôx tuk luz nênhx nox nhoz trâu tsôngv box heir nênhs tsơưs sâuv thax tsav, mak tsênhv tuôr truôx txiv ngaz, ngaz tuk XH ntơưv qơư. Mục sư Ha Bông heik:

      “Tâu ntêr lok no, têz qơưs tưz yưv pênhr lok six ntâu trâu uô truôx tuk pêz tsôngv box sđ luz nênhx nox nhoz, nhiv no sđ ho xar muôz zuk têx qơư nhoz tso tsês chiê khiêr muk nriêr qơư nhoz yiêz, uô li ntơư zos tsi trơưk chei. Pêz tsôngv px uô tsâus txos Đảng, têz qơưs tưz paz lok six ntâu trâu tsôngv box li: yưv pênhr uô têx côngz trênhx, cêr muk lok, chaz xor tênhv tênhz, cxiv uô qơư cơưv ntơưr trâu sđ têx tuz nhuôs…. Iz chas ntơư, tsôngv box ho siz zâuv khiêr, siz zâuv tror lok nhoz kuz qơư, hâur ntơư tsuôk muôx har jôngr, tưz tsi muôx đaz tsi, uô chas zuôr  muôx tâu luz nênhx truôx”.

     Zos iz hâur têx lênhx tưz muôx jiês đros sđ khiêr muk uô tsêr nhoz jê hâur têx jông ntôngr thiêz nav ar har jôngr uô liêx têz tsi trơưk chei, nhiv no, zơưv Liêng Hót Ha Sưng, nhoz xã Đạ Tông, huyện Đam Rông tưz pâuz tsênhz, pâuz thôngz lok Đảng, têz qơưs chei, cui tinhv tsưx phưv jôngr ntông, por hưv tênhx qơư nox nhoz. Viv li, nhiv no zơưv thiêz ntâu lênhx tsôngv box nhoz thax tsav co tưz lênhk nhav por hưv, seiz car têx jôngr ntông thiêz seiz no zos phênhv sâu tâu nzir chiê truôx tuk luz nênhx. Zơưv Liêng Hót ha Sưng, heik pâuz:

     “ Zos lênhx tiz nênhs tưs jêl tơưk, uô hluôr tơưk txeik cuz jôngr mak lênhx nênhs ntơư zuôr trâus tik cêr cxâuv. Zuk tsi  so  fuô kriê trâu tsôngv box sđ pâuz li ntơư. Chiê tsôngv px por hưv tâu jôngr ntông, mak muôx jôngr li muôx đêx zôngv, sđ luz nênhx thiêx tsi txov. Heik cxuô, hur tiz si têx tsiêx, chiv xênhz đrox tsuôs, jôngr ntông uz no…., zuk tsuv por hưv jông hur si”.

Trơưk li Công an huyện Đam Rông, khov muôx têx lênhx lâuk jok, tsar jok thiêz chor txir ndâux txir luk hâur jêx jok li têx sir jos sik đros paz yax kriê, phênhv ntâu tsôngv box tưz tror lok nhoz trâu zuk kuz têz kuz qơư thiêz moz siêz huôv tsar uô nox chiê jux juk truôx tuk luz nênhx. Chênhr viv li, qênhx shênhx tsôngv box khiêr muk zok nriêr qơư nhoz jê trâu têx thax tsav har jôngr ntơưv qơư tưz txo grêk tsơưs pir li đrav ntêx. Heik lok têx cêr sik hux jos uô luôs hâux lưv no, thượng tá Lê Văn Trúc, Phưv Tsar Công an huyện Đam Rông heik:

       “ Đros thiêz têx lâuk jok, txir ndâux txir luk mak lơưr tsênhv tsênhv zos têx lênhx zov chênhr, uô tâu hâux lưv no. Lơưr pâuz tiêk, tsuv sir jos yax kriê, vênhv tôngv thiêz paz têx Công an heik chor chuôz zis khiêr muk nhoz jê thax tsav har jôngr cov sđ tror lok zuk kuz qơư nhoz chiê truôx tuk luz nênhx”./.

(TTTN-Riê Lâux cxeik, nhênhv)

Phênhv thưr 5.1.12.2016:

LÊNHX POX NIÊV NÊNHS CHO SIR JOS HÂUR LUZ NÊNHX

          Xênhz shông 1988, nhoz jos pluôs Bó Mi 1, xã Tân Phượng, huyện Lục Yên tỉnh Yên Bái, niêv lâuk Trịnh Thị Thành thâuv nhiv kruôr muôx 4 shôngk tưz trâus uô njuôs niêv, 12 shông tưz trâus uô njuôs txir viv niêv thiêz txir tưz tâu tas siv nênhx. Cxôngx co, niêv lâuk tsuv tso tsês hâux lưv mul cơưv ntơưr, hlôngr co zos đros pox thiêz zơưv mul uô liêx têz.

          Shông 2006, niêv lâuk Trịnh Thị Thành zuôr tix lâuk Trịnh Tiến Hiến, zos lênhx nênhs đros nhoz hâur jos. Zos iz lênhx njuôs nos cxôngx thâuv tsênhv zâu, niêv lâuk pâuz thôngz txox cêr khưr, cêr yeiz pluôs. Viv li, ciês thâuv nhiv kruôr zuôr txir, niêv lâuk oz niêv txir tưz qir tês cxiv tsa kinh têr chuôz zis. Nhoz tưs muôx trâur nuv uô jông, huv đros theox chênhv chuôz zis mak niêv lâuk mul cơưv shâuv uô lơưr. Niêv lâuk Trịnh Thị Thành pheiz kênh:

          “Pov têx qơư txơưr lơưr chos shôngz mak sâu tâu lok six ntâu njuôs shôngz, muôs tâu grê, cur cơưv shâuv uô lơưr. Thâuv ntêx six hơưv no mak uô liêx, leik blêx tas mak tsi pâuz uô tul tsi thiêz, txov nhêv hênhr, nhiv no muôx njuôs shôngz lơưv, cur tsuôk chox mul muôs mak txơưv muôx nhiêx txiêx”.

          Đrâuv zuôr xar 200 hâur pâus shôngz tso lol phênhv sâu muôx nhos 25 tsov đeiv iz shôngk, nhiv no niêv lâuk Thành chuôz zis tsênhv zus 3 tul tưv, 10 tul buô txuôv. Niêv lâuk chuôz zis cux krêz qơư muôv muôs hax huv li qir zuôv, yuôx por vêv đrox tsuôk, nôngz poz cưk, nôngz blêx trâu pox nhuôs hâur thax tsav chiê chuôz cxaz phênhv sâu. Niêv lâuk Thành heik:

          “Mul ciêz zuôr njêr, mix chênhr mak lok six đêz thiêz lax mul; mê nhuôs ho nhiêv nox thax nduôr mul zuôr mak lok six đêz. Chênhr viv li cur chiv chir krêz qơư muôs têx hax huv zuôr trâus, tiv iz zos phưx vưv zuk, tiv 2 zos chiê pox nhuôs tsi tsuv mul đêz chiê zuôr njêr, mix chênhr”.

          Tsi taz gruôs cơưv shâuv, sir jos huôv tsar kinh têr, niêv lâuk Thành tsênhv uô ntêx nyuôk hâur cơưv shâuv thiêz krêz uô têx trâur nuv yiêz zos hội pox niêv têx cấp phuôx tôngv li: trâur nuv tu zus buô, uô qơư por têx vuôz tsuôz kiês nênhs huv vêv xênhz. Niêv lâuk cux cxaz chuôz têx huôx tôngv vênhx huôv, thiv thao ntơưv tiv phaz... Zơưv Bàn Trung Kiên, Tsar jos Bó Mi 1, xã Tân Phượng, huyện Lục Yên, tỉnh Yên Bái puz pâuz:

          “Thành chuôz zis gruôs uô nox uô hâuk, txơưx sir zôngv tsưr ziv yiêz lol uô xênhz yar kôngz nuv, tu zus, cxôngx co chuôz zis tưz huôv tsar thiêz luz nênhx jông đuô tuôx”.

          Gruôs cơưv shâuv thiêz uô lơưr, cxôngx iz lênhx nhuôv njuôs muôx luz nênhx txov nhêv, nhiv no, niêv lâuk Thành tưz muôx phênhv sâu zos zuôr xar 100 tsov đeiv iz shôngk. Cxôngx phênhv sâu co, niêv lâuk oz niêv txir tưz uô tâu luz tsêr jông đuô tsiv grê muôx nhos 500 tsov đeiv, tso mê nhuôs mul cơưv ntơưr jông đuô. Niêv lâuk Thành puz pâuz, zuôr tror sir jos chiê luz nênhx ziv hnuz ziv jông đuô, thôngx cxix truôx siêz pheiz kênh zuk li chênhz zênhv txos cxuô lênhx nênhs, tiv zix zos têx pox niêv tox siêz./.

                     (Thừa Xuân- Txâur Vax cxeik nhênhv)