Jax sâu thưr 7 hnuz 1/4/2017

Hêir nênhs cho nhoz Yên Bái li cêr chêi đaz kruô kho nza

   sôngv box Cho nhoz Yên Bái li cêr chêi đaz kruôk kho nza tâu uô trâu thâuv  hâur hlik hli 2, hli 3 zênhz lix. Taz sik, tsik zos tsiêz chênhr hâur shông thiêz ntơư cux zos hêir nênhs Cho têx vênhx huôv jông muôx đros đrêiv hâur luz nênhx. Hêir nênhs Cho li đaz kruôk kho nza tâu uô pêz shông iz jiês lok sik uô 3 shông siz lơư liês, khov lơưr têx chuôz zis bax tâu lok tsik tâu. Zơưv Triệu Tiến Kim, nênhs pâuz lok vênhx huôv mênhx cxưx Cho liêz nhoz xã Phúc Lợi, huyện Lục Yên, tỉnh Yên Bái puz pâuz:“Hêir nênhs cho liêz pêz zênhx xar tiêk tưz uô đaz uô kruô li no mak tsuv kho nza. Tiv iz zos chiê têx tuz nhuôs kho đuô kuô nza trâu chor lâul, tiv oz zos thor chor lâul paz trâu têx tuz nhuôs uô tâu nox, chuôz zis siz hluz, luz nênhx tsâu sor shir phaz. Kror no hêik tơưv hêir nênhs Cho liêz li ndo txiêx pâux njis txix ntêr lok no”.

    Chiê bax trâu jiês kho nza tâu uô huv li six hơưv hnuz nhôngs tưz xav jênhv, chuôz zis tsuv bax cxuô zav zos; Mor blâuv, grêix buô, txir ntông,  pax, shaz ntơưr, tiv zix zos kêiz hâu zos kror thâuv tưs cux tsuv muôx hâur txi côngv kho nza. Tas nro têx zav no, tsuv zos tsưr tsêr tsiv uô tâu. Hêir nênhs Cho nhoz Yên Bái xav tiêk: li co thiêx hêik tơưv tâu têx tuz nhuôs li siêz tsês trâu chor tâu tas siv nênhx. Đhâu thâuv têx zav co tưz tâu bax cxuô sâuv trôngx mor mak txir nênhz đros chor nênhs hâur chuôz zis sik đros gra têx co tso trâu ntơưv nza, zôngv chor chuôz zênhx uô đaz kruôk khoz pêz khoz chiê hêik trâu tus tâu tas siv nênhx ntơư njux plis pâuz, chiê têx tuz nhuôs kho đuô nza, txiêr luôx têx đrox, thiêz khơưz ar cxur nzir trâu nza. Têx tuz nhuôs hlơưr iz poz shaz cxok iz ndis luz nza chiê uô sor trâu pox côngz zơưv côngz.“Hnuz no zos kho nza, hlôngr njêx muôs têx tuz nhuôs hâur chuôz zis muôz cxuô zav trâu pos zơưs, pox côngz zơuv côngz. Têx tuz nhuôs thor tâu kho đuô kuô nza cov jông, thêir ntux yar, ntux nas trâu pos zơưs, pox côngz zơưv côngz tso siêz nhoz so. Thor pos zơưs paz trâu chor tuz nhuôs muôx jos, uô tâu nox”.

    Đhâu txi côngv thiêz kho nza tâu tiêr, zos jiês hêik trâu pox côngz zơưv congz pâuz ntơưv vax tsêr, đros iz tsuv mor txi côngv cux tưz tâu chuôz zis bax uô ntêx. Txir nênhz hlôngr njêx muôs tsưr tsêr hêik pox côngz zơưv côngz lok đros chuôz zis nox. Ntênhk uô đaz uô kruô no tâu uô muôx 30 phênhz thiêz hêik pâuz kror chuôz zis uô đaz kruôk chiê kho nza, tưz uô tiêr kho nza thiêz hu pox côngz zơưv côngz lok đros têx tuz nhuôs hâur  chuôz zis nox hâuk. Phênhv uô ntênhk txi côngv, tâu chuôz zis muôz lok trâu chiê chor nênhs hâur chuôz zis sik đros nox. Pos Lý Thị Phin nhoz jok Khe Giang, xã Trúc, huyện Lục Yê, tỉnh Yên Bái puz pâuz:“Hnuz no chuôz zis uô đaz kruôk kho nza trâu chor nênhs cxênhz jê hâur chuôz zis, zos kho đuô kuô nza trâu chor lâul, luôx têx đrox tsuôs por tsês tưz tâu chuôz zis uô txix ntêr lok no, no zos kror vênhx huôv jông. Cur zuôr tror kruôz kriê têx tuz nhuôs tuôr chiê vênhx huôv no trâu cxênhx nênhs tov kaz”.

    Tsôngv box Cho nhoz Yên Bái li chêi đaz kruôk kho nza, cux chênhr zos iz cêr nênhx vênhx huôv jông tâu tuôr tsês chiê đhâu ntâu tiêv txos trâu nhiv no tsik chiê plox thiêz tsênhv muôx đros đrêiv hâur luz nênhx/.

(Thiều Nghiệp-Lik Thox cxêik nhênhv)

Phênhv thưr 7, hnuz xiêz 1/4/2017:

Lênhx nênhs tuôr truôx hêir nênhs Lok tsuôk nhoz Sốp Cộp têx cêr nênhx vênhx huôv jông

     Shông no, zơưv Lò Văn Thoong tưz muôx 67 shông thiêz zơưv zos tiêv tiv 5, muôx phênhv côngv đas jos đros cxiv tsa jêx jos truôx tuk. Chênhr zos li hêik ntơư, zơưv thiêz chuôz zis cux khơưk tsês chiê tâu ntâu chuôz zênhx, chor lâuk đrav ntêx sir zôngv hâur luz nênhx li: đruôk tôngx, cxêz tôngx, ntax triêv, chor lâuk muôx côngz nto bê đrav ntêx têx tsôngk trik yo …Thiêz hâur niêx shông, thâuv txos têx hnuz ntênhk hội, têx hnuz tsiêz…thâuv tưs zơưv cux gra têx chuôz zênhx đrav ntêx tuôx trâu têx qơư uô ntênhk hội thiêz ntơư cux pir li: Muôz chor lâuk đrav ntêx sêiz tsiv grê.

     Iz chas khơưk tsês chiê cxuô  chuôz zênhx đrav ntêx thiêz nhiv no, zơưv cux zos iz lênhx pâuz tâu hêir nênhs Lok tsuôk têx cêr nênhx vênhx huôv jông. Đros ntơư, zơưv cux huôv njôngr six hơưv hnuz nhôngl yax kriê hêir nênhs Lok tsuôk têx txux chi, vênhx huôv jông trâu têx tuz nxêik hluôk hâur jos cơưv shâuv. Pos Lò Thị Tuyết,nhoz xã Mường Và hêik pâuz: “Hâur têx hnuz ntênhk hội, têx hnuz tsiêz, chor hluôk, lâuk sđ puôr lênhx tuôx muk trâu zơưv tsêr chiê nthuôr uô cêr lov jêv đhiê pax vuôs, kror tưs uô tsik tâu jông chiê siz chos kho cov huv đros”

     Hêir nênhs Lok tsuôk nhoz Mường Và têx vênhx huôv jông tiv 1 zos ntênhk hội Sên Mường. Ntênhk hội no, tâu tsưr tsix trâu đraz hli 2 hli ntux hâur niêx shông. Taz sik, hâur ntu đrav ntêx tir ntâuk tros châuz cxiv kho têz qơưs, hêir nênhs lok Tsuôk ntênhk Hội Sên Mường tsưr tsix tsik tâu hâur niêx shông. Txos shông 1998, thâuv zơưv Thoong tâu tso côngz xưv tsês tsik uô, zơưv thiêx đros chor lâuk sđ tror cxiv kho đuô ntênhk Hội Sên Mường; txix ntơư txos nhiv no thiêx tâu tsưr tsix iz shông iz jiês, chiê ndo txiêx njis txos chor lâuk đrav ntêx sir tas đas jos tsưr ziv cxiv kho têz qơưs. Zơưv Lò Văn Thoong hêik pâuz: “Hêir nênhs Lok tsuôk nhoz Mường Và, Sốp Cộp ntênhk hội Sên Mường, zos iz ntênhk hội jông tiv iz. Hêir nênhs Lok Tsuôk ntênhk hội no, txơưv nhoz trâu kror tưs cux muôx; taz sik, ntơưv Mường Và ho tsưr tsix txơưr , viv thax tsav qơư ntơư no muôx đêx ntưk đhâu tsas tsuô thiêz muôx đuôz mnov thiêz thâuv tsưr tsix uô ntơư, thor cov sđ khưr tâu nox tâu hnar, cxuô hêir nênhs sđ uô nênhx muôx cêr côngv siêz, cxiv kho jêx jos truôx tuk”.

    Jos Mường Và, xã Mường Và, huyện Sốp Cộp đros đrêiv lịch sử Đêx ntưk đhâu tsas tsuô Mường Và thiêz txos trâu nhiv no, txơưv kror qơư ntơư tưz tâu cxiv kho đuô oz jiês; taz sik cux jông zos đrêiv li hâur ntu đrav ntêx. Zơưv Lò Văn Bóng, nhoz jos Mường Và, xã Mường Và hêik pâuz nzir: “Zơưv cux zos iz lênhx khơưk tsês chiê tâu zuk hêir nênhs tsơưs têx txux chi, vênhx huôv jông đrav ntêx. Txơưv li chas, zơưv cux tsưx phưv truôx qơư đêx tsas tsuô cov zos đrêiv li hâur ntu đrav ntêx, tsik chiê trâus puôk tsuôx”.

     Zos iz lênhx lâuk, zơưv Lò Văn Thoong cux muôx côngk đas đros huôv tsar truôx hêir nênhs Lok Tsuôk nhoz Mường Và, huyện Sốp Cộp, tỉnh Sơn la têx txux chi, cêr nênhx vênhx huôv jông tsik chiê plox./.

                               (Tsu cxêik nhênhv-Hồng Việt-Tây Bắc)