Lào Cai: Phax tir thêir chor nênhs muk lol đhâu đriv têz tsi trơưk chei

Txix hâur shôngk shông txos nhiv no, têx zênhx pênhz phax nhoz tỉnh Lào Cai tưz uô yênhx puô qơư seiz jor cêr  nhoz thax tsav ntus đriv. Đhâu ntơư, tưz lênhk nhav tâu yênhx cxênhz lênhx nênhs muk uô hâux lưv saz đrâuv luôs 2 chas têz qơưk tror lol hâur thax tsav tsi trơưk chei. Chor nênhs no, tâu lưv lươngv muôx vax huôv pênhz phax chox muk ciês trâu qơư kuôk cêv chiê sox seiz đas jos. Zênhx pênhz phax Tả Gia Khâu nhoz hâur thax tsav huyện Mường Khương muôx 4 qơư seiz jor thơưv hnuz thơưv hmo chiê qênhz shuôs têx lênhx nênhs muk lol đhâu đriv têz tsi trơưk chei. Thiếu tá Ngô Xuân Lợi, nhoz qơư seiz jor cêr ntơưv tus ndêx cxok kuôv cêv đriv têz 169 heik pâuz: Thâuv tưs tưz muôx 3 lênhx chiến sỹ siz hlôngr njo seiz jor  nhoz trơưr ntơưv co siz jor hâur niêx hnuz hmo.“Tênhv lok tsi tơưk, đêx lok tsuv muk thâux, êr pêv zênhx tuôx, têx hnuz ntux yar mak tưz zôngx ziv muk, chor hnuz ntux nas gok njuôr mak mul tsi tâu, ntâu ntu tsuv chaz yêz muk đhâu. Phênhv ntâu canr bôv, chiến sỹ txix hâur shôngk shông txos nhiv no tưz tsi tâu so hlo”.

Huyện Mường Khương, tỉnh Lào Cai muôx 70 cêik ntâu cêr đriv têz nhoz buôk chiêv Trung Quốc. Hur si huyện muôx zuôr xar 1.400 lênhx nênhs muk uô jos saz đrâuv luôs 2 chas têz qơưk, txos nhiv no muôx 800 ntâu lênhx tror lok. Thiếu tá Ngô Đức Tiềm, Phưv Tsar Công an huyện Mường Khương, heik pâuz: Tưz qênhz pov, xưv bluô 14 lênhx nênhs Trung Quốc tuôx hâur VN tsi trơưk chei. Iz cxiê lênhx nênhs tsuôk zos viv siêz hloz, tưz chox kriê cêr trâu têx lênhx nênhs muk lol đhâu hâur thax tsav tsi trơưk chei.“Luôs hâux lưv muk lol đhâu hâur thax tsav tsi trơưk chei cux tsênhv muôx yưv. Hnuz 17/7, pêz nhiv kruôr xưv bluô 5 lênhx nênhs muk lol đhâu hâur thax tsav qơư tsi trơưk chei thâuv tsênhv ntiêr yêz taxi cheix, lar heik zos cxov tâu iz lênhx nênhs chox kriê cêr trâu chor nênhs saz đrâuv tuôx hâur thax tsav qơư. Nhiv kruôr tsi ntêr no, ntơưv xã Bản Lầu cux cxov tâu 9 lênhx nênhs thâuv lơưr tuôx txos hâur thax tsav”.

Đhâu qênhz yuôx shuôs, seiz kaz thax tsav ntus đriv, nhiv kruôr no lưv lươngv pênhz phax tỉnh Lào Cai cux nhiv kruôr yơưz phơưz 2 txuz, ntêk tâu 5 lênhx nênhs chox kriê cêr trâu luôs lưv tus muk lol đhâu ntus đriv tsi trơưk chei. Trung tá Nguyễn Phúc Long, Zênhx tsar Zênhx pênhz phax Mường Khương, ntâuk grê:“Chiê seiz car tâu jông thax tsav đriv têz mak pênhz phax zos têx lênhx lok six zov chênhr. Taz sik, tsuv muôx cxuô ngênhx cêr paz max, công an seiz car truôx thax tsav qơư nhoz. Hâu nov hâur jêx jok tsuv muôx vax huôv thâuv qênhz pov luôs lưv tus saz đrâuv tuôx hâur thax tsav mak heik pâuz zênhx max chiê muôx tsưr ziv đơưk uô têx li heik co”.

Hâur hli 7, Công an TP Lào Cai tưz yơưz phơưz, ruôr por tsês 3 txuz, chox kriê cêr yênhx châuv lênhx nênhs saz têz qơưk đrâuv tuôx đhâu hâur thax tsav tsi trơưk chei. Nzaz nzơưv têx cêr mê, cêr lus muk lol, thax tsav nhoz đêz tsênhv qơư nênhs chox kriê cêr chor nênhs saz têz qơưk đrâuv muk lol đriv têz, đhâu ntơư ntiêr yêz thâux xa muk trâu Nha Trang, TP HCM, ntiêr iz jâuk yêz zos txix 20-25 tsov đeiv. Thượng tá Đỗ Tuấn Sơn, Tsar Công an TP Lào Cai heik: “Hâur six hơưv nhiv kruôr đhâu, luôs hâux lưv qênhz yuôx seiz kaz chor nênhs saz đrâuv tuôx hâur thax tsav tâu uô ntov jông nhoz têx qơư tsôngv box nhoz thiêz têx tsêr tok kruô. Heik têx qơư, tsêr tok kruô tuôx nhoz so ntơư tsuv cir ntơưr nhav....., têx thax tsav công nghiệp muôx chor nênhs nhênhz chơưv saz têz qơưk đrâuv, mak tax tsi tâu chiê tuôx trâu chor thax tsav co”.

Lào Cai muôx 180 ntâu cêik cêr muk lol sâuv ar đhâu têx xuz jôngr har tsuôs thiêz cêr đêx nhoz buôk chiêv tỉnh Vân Nam-Trung Quốc, luôs hâux lưv qênhz shuôs nênhs muk lol đhâu hâur thax tsav tsi trơưk chei njiz lok six ntâu phiv liv. Đros trâu lưv lươngv pênhz phax têx hâux lưv uô co, tsôngv px sđ tsuv sik côngv têk đros phax tir thêir têx lênhx nênhs li heik sâuv. Zos tsi uô li, cxuô cấp, cxuô ngênhx, tas nro tsôngv px têx sir jos phax tar moz Covid-19 zuôr uô tsi tâu trơưk li tsưr ziv, siêz xar./.

(Mạnh Phương-Riê Lâux cxeik, nhênhv)