Điện Biên: Chor chuôz zis pluôs trâus ruôr hiêv tiv ntux nas chuô, lok six khov vav txos sơưr đơưk paz chiê truôx tuk luz nênhx

Txos nhiv no, niêv tix Lò Thị Bình, nhoz jok Ten Núa, xã Núa Ngam, huyện Điện Biên, tỉnh Điện Biên cux tsênhv ndo njôngr txos ntux têz ruôr hiêv. Thâuv iz tuk ntông lox nhoz jê tsêr trâus chuô yuôz lor vâu lok ciês ntơưv pêz tus niêv tuz xuz nties thâuv tsênhv muk uô têz lok, tưz uô trâu tix ndo njôngr đruôz siêz tsik plox. Hmôngr jông tsik muôx nênhs uô chak, taz sik chor nhiêx chiê kho đuô luz tsêr nhiv no tsênhv uô trâu niêv tix lok six cxơưx, thâuv niêv tix chuôz zis cê zos chuôz zis pluôs hâur jok thiêz 3000 ntâu yiv ndis liêx nhiv kruôr uô tâu ho tror trâus ntux nas chuô ruôr hiêv tas puok tsuox tas.

“ Tas nro sơưr đơưk tsênhv muk uô têz lok tưz tsik tâu muk hâur tsêr mak pov li co lok six nyêir hênhr. Nhiv no vax tsêr tsik jông tas, tror mak tsik pâuz muôz đaz tsi vor. Cur ho zos chuôz zis pluôs, nhiv no cux khưx phưx tsik tâu, cux vav tiêk cxuô cấp nganhx zuôr nzor paz trâu chuôz zis chiê khưx phưx cov tror truôx tuk luz nênhx”.

Jiês chuô lox lok sâuv thax tsav huyện Điện Biên, tỉnh Điện Biên lok six hmôngr jông tsik uô hiêv txos lênhx nênhs. Taz sik, tưz uô puôk tsuôx ntâu luz tsêr nhoz 2 xã Hẹ Muông thiêz Núa Ngam, hâur co phênhv ntâu zos chor chuôz zis pluôs thiêz zuôr xar pluôs. Iz cxiê chuôz zis nhoz jok Tên Núa, xã Núa Ngam tưz tsuv thor txos chor hluôk nênhs xã muk kir txêik vuôk chox lok vor tsêr, viv chor nênhs muôs tsik xar muôz trâu chor chuôz zis pluôs txêik tiv lax thêv tâu nhiêx. Iz cxiê chuôz zis trâus hiêv nhoz xã Hẹ Muông mak zôngv tax lax vor trâu têx kror tsik jông sâuv trur tsêr, chiê tok chính quyền tiv phaz paz. Tix lâus Lò Văn Hiển, phưv bí thư đoanx xã Núa Ngam, huyện Điện Biên, tỉnh Điện Biên puz pâuz:

“Đoanx xar cux tưz côngv đros bí thư chi đoàn jok Ten Núa tso nênhs lok paz khơưk chor vuôk pôngz tơưs, thiêz muk kir txêik vuôk lok trâu hluôk nênhs paz vor tsêr trâu pox nhuôs. Trâus hiêv mak ntâu, ciês nhiêx zuôr vuôk yiêz mak cux tas muôx 4 triệu đêiv”.

Đhâu ciês muôx yưv ntux têz uô hiêv sâuv thax tsav, chính quyền chor tiv phaz tưz tso nênhs muk sêiz nus, paz trâu pêx xênhv. Thôngx cxix tso nênhs qênhz yuôx tas nro têx trâus hiêv chiê muôx tsưr ziv paz trâu pêx xênhv nzor truôx tuk luz nênhx. Zơưv Nguyễn Ngọc Tuấn, Chủ tịch UBND xã Hẹ Muông, huyện Điện Biên, tỉnh Điện Biên hêik:

“Xã mak muôx oz jok zos jok Pá Hẹ thiêz Ta Lét 1 trâus hiêv. Muôx iz cxiê luz tsêr tưz za trur tas. Lơưr thôngz sâu xuz thơưx mak muôx iz cxiê thax tsav têz poz cưk cux trâus hiêv. Txos nhiv no xã cux tưz tso nênhs muk thôngz sâu tiêr thiêz tsênhv bax chiê hêik trâu UBND huyện thiêz cux tso nênhs muk sêiz nus, paz trâu pêx xênhv truôx tuk luz nênhx”.

Ntux têz uô hiêv zos kror tsik muôx lênhx tưs xar njiz trâus. Thiêz đhâu  ntơư, chor chuôz zis pluôs sâuv thax tsav 2 xã Hẹ Muông thiêz Núa Ngam, huyện Điện Biên tsênhv lok six khov vav txos chính quyền thiêz côngv thôngx đros paz chiê khưx phưx têx trâus hiêv chiê nzor truôx tuk luz nênhx./.

                                               (Vũ Lợi-Lik Thox cxêik nhênhv)

Uô hâux lưv trơưk cheix chiv, tsuv zuôr ntơưr bảo hiểm tsi muôx hâux lưv uô

Lò An Toàn nhoz xã Chiềng Đen, TP Sơn La nuk li no: Cur tsênhv uô hâux lưv trâu iz qơư tsiv uô têx xiv huv uz no, taz sik ntơư tsuôk zos hâux lưv uô trơưk cheix. Uô li, cur pok zos lênhx nênhs tsuv tâu  bảo hiểm tsi muôx hâux lưv uô?

Bảo hiểm tsi muôx hâux lưv uô zos cui tinhv chiê pâux nzir iz phênhv tưs lênhx nênhs lox tôngv li phênhv sâu tâu thâuv trâus pôngz hâux lưv tsi muôx hâux lưv uô, paz nênhs lox tôngv muk cơưv txux chi tsưr ziv uô nuv, tuôr truôx hâux lưv uô, zok nriêr hâux lưv thâuv paz nhiêx trâu Cuiv nhiêx bảo hiểm tsi muôx hâux lưv uô.

Chêi hâux lưv uô shông 2013 cui tinhv, nênhs lox tôngv tsuv cxaz chuôz bảo hiểm tsi muôx hâux lưv uô thâuv uô hâux lưv trơưk hux thôngx lox tôngv lok sik hux thôngx uô hâux lưv li đrav kaz:

Hux thôngx lox tôngv lok sik hux thôngx uô nuv tsi xav six hơưv, hnuz nhôngs uô hâux lưv.

Hux thôngx lox tôngv lok sik hux thôngx uô hâux lưv xav six hơưv hnuz nhôngs uô nuv.

Hux thôngx lox tôngv trơưk cheix lok sik trơưk iz hâux lưv tuk tsi xav six hơưv, hnuz nhôngs uô hâux lưv txixx 3 luz hlik txos zuôr xar 12 luz hlik.

Zos lênhx nênhs  lox tôngv cir ntơưr thiêz tsênhv uô ntâu zav hâux lưv hux thôngx mak nênhs lox tôngv thiêz lênhx nênhs sir zôngv lox tôngv hâur hux thôngx lox tôngv tưz siz chos cir ntơưr thôngx ziv xuz thơưx muôx txơưx jênhv zuôr ntơưr bảo hiểm tsi muôx hâux lưv uô.

Têx lênhx nênhs lox tôngv trơưk li têx hux thôngx tưz heik tsênhv tâu sơưv têx nhiêx so lâuk, paz chuôz zis uô hâux lưv mak tsi trâus cxaz chuôz bảo hiểm tsi muôx hâux lưv uô.

Uô li, fôngx zưs Lò An Toàn têx lul nuk sâuv, zos tiêk tưz siz chos cir ntơưr thôngx ziv hux thôngx uô hâux lưv trơưk cheix iz zav li heik sâuv mak tsuv zuôr ntơưr bảo hiểm tsi muôx hâux lưv uô./.

                                (Thanh Thủy-Riê Lâux cxeik, nhênhv)