Shux xênhz nhoz tox siêz Lai Châu njz ntâu phiv liv hâur cêr cơưv ntơưr

Shông cơưv 2021-2022, Tsêr cơưv cxênhx iz Đoàn Kết, xar Ma Ly Pho, huyện Phong Thổ, tỉnh Lai Châu muôx zuôr xar 460 lênhx shux xênhz mênhx cxưx Cho, Hmôngz, Hà Nhì, nhoz 13 jêx jok ntơưv 2 xar ntus đriv Ma Ly Pho, Huổi Luông tuôx cơưv ntơưr. Têx shông uô ntêx, khov muôx têz qơưk têx tsênhv chêi paz trâu chor shux xênhz nhoz thax tsav txov nhêv, iz lênhx shux xênhz tâu paz 600 cxênhz đêiv thiêz 15 cir cxur iz hli. Nhiv no thax tsav qơư uô tiêr cxiv tsa jêx jok yiêz, chor shux xênhz tsik tâu têz qơưk paz lơưv, uô trâu ntâu chuôz zis njiz trâus ntâu cêr txov thâuv chor mê nhuôs tuôx cơưv ntơưr. Niêv tix Tẩn Sa Mẩy, mênhx cxưx Cho, nhoz jok San Thầu 2, xar Ma Ly Pho, huyện Phong Thổ hêik:“Cur chuôz zis lok six txov nhêv, moz Covid-19 oz pêz shông lok no lơưv cux uô tsik tâu nox hlo. Nhiv no chiê mê nhuôs muk cơưv ntơưr, 2 lênhx nhuôs mak tas 800 cxênhz đêiv thiêz 20 cir cxur iz hli, tsik muôx phênhv paz lơưv viv li tsuv xa thiêz tok mê nhuôv tror lok tsêr xưz. Têis cik no zos thưr 6 tsuôk cơưv iz tos hnuz xưz tưz xar tiêk zuôr tsik chiê mê nhuôv tuôx cơưv ntơưr no, taz sik mê nhuôv ho zuôr tuôx cơưv xưz viv li chox mê nhuôv tuôx”.

Cưk kriê ntơưr Trần Thị Hằng, Nênhs sêz car tsêr cơưv Cxênhx iz Đoàn Kết, xar Ma Ly Pho, huyện Phong Thổ puz pâuz: Shông cơưv no, tsêr cơưv muôx 370 ntâu lênhx shux xênhz zos chor shux xênhz hlôngr txix thax tsav oz, thax tsav pêz lok trâu thax tsav iz; cux zos tiêk chor shux xênhz zuôr tsik tâu sơưv têx tsênhv chêi paz lok têx ntơưr cơưv, ntơưr sâu, nhiêx nox nhoz niêv txir zus mor. Chiê chor shux xênhz tuôx cơưv ntơưr cxix cxuô thiêz taz por tsơưr lươngv kriê ntơưr, hâur shôngk shông cơưv mak tsêr cơưv thôngx ziv tiêk chor shux xênhz nhoz jê ntơưv tsêr cơưv ntơưr, thâuv cơưv tas mak zuôr tror lok tsêr. Chor shux xênhz tsêr nhoz đêz mak chuôz zis zuôr paz uô jâuz mor trâu shux xênh gra tuô nox ntơưv tsêr cơưv thiêz zos lênhx shux xênhz tưs xar nox nhoz so ntơưv tsêr cơưv mak iz lênhx shux xênhz tsuv thêv 400 cxênhz đêiv thiêz 10 cir cxur iz hli:“Tsêr cơưv shông no mak muôx hlôngr yiêz lok hâux lưv tu zus, nox nhoz ntơưv tsêr cơưv tsênhv qơư, zos tsênhv chêi paz trâu chor shux xênhz thâuv xar hlôngr yênhx zos xar thax tsav iz tiv zos xar uô tiêr cxiv tsa jêx jok yiêz. Đros chor xar thax tsav iz mak tsik muôx tsênhv chêi paz trâu shux xênhz niêv txir zus mor thâuv tuôx cơưv ntơưr. Tsêr cơưv cux tưz yax kriê trâu shux xênhz niêv txir pâuz thiêz chor shux xênhz tsêr nhoz đêz zuôr tror muk tsik tâu tsêr mak tsêr cơưv tưz kriz uô lơưr tsưr ziv niêv txir tsuv bax zav nox trâu chor shux xênhz”.

Lơưr Thủ tướng Chính phủ li Cuêz tênhv sôr 861 lok bê ntơưr chor xar thax tsav pêz, thax tsav oz, thax tsav iz nhoz thax tsav tsôngv box mênhx cxưx tsơưs nênhs thiêz tox siêz ntu 2021-2025; Ủy Ban mênhx cxưx li Cuêz tênhv sôr 433 tso  tơưv bê ntơưr chor jêx jok txov nhêv tiv zix thax tsav tsôngv box mênhx cxưx tsơưs nênhs thiêz tox siêz ntu 2021-2025, tỉnh Lai Châu muôx 29 xar tưz tơưv đhâu bê ntơưr xar txov nhêv thiêz txov nhêv tiv zix tiv tâu côngz jênhv uô tiêr cxiv tsa jêx jok yiêz. Kor no, cux zos tiêk ntơưv thax tsav qơư muôx 97 tsêr cơưv ntơưr, đros muôx 17.000 ntâu lênhx shux xênhz zuôr tsik tâu sơưv têx phênhv paz li thâuv ntêx no. Zơưv Đinh Trung Tuấn, Giám đốc Sở Zoz zux tỉnh Lai Châu puz pâuz: Sở tưz chox kriê têx qơư zoz zux nriêr pâuz shux xênhz niêv txir têx siêz xar cux xưk li chor chuôz zis li luz nênhx. Txix co chor tsêr cơưv ntơưr yax kriê trâu shux xênhz niêv txir pâuz;  thôngx cxix uô bê ntơưr muôz trâu Sở, chiê hêik trâu Ủy ban tỉnh pâuz, sêiz shuôk tso tơưv têx tsênhv chêi paz cov huv đros, chiê paz trâu chor shux xênhz co cov tuôx cơưv ntơưr tâu jông tiv zix:“Ciês txix thâuv hâur shôngk shông cơưv yiêz 2021-2022, Sở Zoz zux tưz chox kriê chor qơư zoz zux qênhz shuôk chor shux xênhz muôx luz nênhx txov nhêv hâur ntu xuz thơưx nhiv kruôr hlôngr txix thax tsav pêz, thax tsav oz lok yênhx thax tsav iz. Chiê nzor hêik pâuz muôx nzir têx tsênhv chêi paz trâu chor shux xênhz, Sở cux tưz sik côngv đros têx cơ quan cik txos hêik trâu tỉnh, trung ương pâuz lok iz cxiê tsênhv chêi huv đros trâu kinh têr ntơưv thax tsav qơư; chiê paz tâu jông tiv zix trâu chor shux xênhz cov chor shux xênhz tuôx cơưv tâu ntơưr”.

Txơưv tiêk tưz tâu côngz jênhv uô tiêr luôs hâux lưv cxiv tsa jêx jok yiêz, taz sik cêv kuôk lok chuôz zis pluôs, hla đhâu cêr pluôs nhoz ntâu thax tsav qơư ntơưv tỉnh Lai Châu cux tsik cêv kuôk đêz luôx tưs. Viv li, chiê chor nhuôs tsôngv box li cêr cơưv ntơưr zôngx ziv đuô, lok six khov vav zuôr muôx tâu têz qơưk têx tsênhv chêi paz nzir. Đros co, cấp ủy, chính quyền ntơưv qơư đros chor tsêr cơưv ntơưr tsuv sir jos yar kriê chiê tsôngv box pâuz tsik nhoz tok, khov trâu têx tsênhv chêi paz co./.

(Khắc Kiên-Lik Thox cxêik nhênhv)