Nênhs La Hủ nhoz Bum Tở, Lai Châu iz siêz muk lơưr Đangv,

 Hloz Hôx

Công an yax mông, vênhv tôngv tsôngv box

          Tsôngv box La Hủ iz txưv zos mênhx cxưx siêz jông, viv li pox nhuôs nhoz no muôx iz ntu trâus nênhs fêv liv zôngv hâuz zâuv muôv muôs zax zênhz, tsir têz tsir qơư thiêz muk lơưr vax tsưr tsik trơưk chêi. Khov lưx lươngv công an sir jos yax kriê, vênhv tôngv thiêz tơưv txênhz tir tar têx nênhs fêv co thiêz xav txos trâu nhiv no txiv ngaz nhoz Bum Tở tưz muôx têx hlôngr yiêz jông. Tror ndo txos ntu thâuv ntêx, chor ziv chuôz zis trâus yeiz pluôs ntâu, tix lâuk Phùng Vạ Hừ, nhoz jos Phìn Khò, xã Bum Tở thav tiêk: Zos tsi muôx lưx lươngv công an tuôx yax kriê thiêz tsi truôx siêz tơưv txênhz têx nênhs fêv no mak pox nhuôs luz nênhx tsi pâuz shor zuôr jông li chas. Thâuv hlôngr yiêz thax tsav, pox nhuôs tsi taz tso tsês tsi hâuk zax zênhz, tsi mnôngs lơưr nênhs fêv, lơưr vax tsưr mak tsênhv tâu cán bộ công an paz uô tsêr nhoz, paz txưv uô kôngz lôngk....

          “Thâuv ntêx qênhx shênhx txiv nhaz, zax zênhz thiêz huôx tôngv vax tsưr nhoz no lok six phưx txuôx. Cxôngx thâuv muôx công an tuôx yax mông vênhv tôngv pox nhuôs, paz pox nhuôs txos nhiv no jos li txiv ngaz tưz ngaz tul”.

          Chiê paz tsôngv box hlôngr yiêz siêz xar thiêz huôx tôngv, lưx lươngv công an xã tưz pheiz côngz lưx lươngv sêiz car yênhx jêx jos. Hnuz tưs cux muk sik côngv đros lưx lươngv txiv ngaz jêx jos muk txos yênhx ziv chuôz zis, seiz car yênhx lênhx nênhs chiê yax mông, vênhv tôngv. Chiê pox nhuôs njênhs thiêz uô lơưr, thâuv muôx hâux lưv tul tsi têx cán bộ chiến sĩ công an puôr lênhx truôx siêz đros pox nhuôs uô. Truôx siêz paz max tsôngv box, đros yênhx puôk hnuz côngz đros thiêz uô hâux lưv yax mông, qênhx shênhx txiv ngaz nhoz Bum Tở jux jus ngaz tul tuôx:

          “Pêz tưz muk txos ciês thax tsav, yênhx jêx jos khiêz phêv yax mông txos yênhx ziv chuôz zis lok zax zênhz li txux hiêv, lok vưv qiv chuôz zênhx zôngx ziv cuz tơưs...Khov co txos nhiv no hâur xã tưz txu gris chor nênhs phamv cxâuv no, têx zav chuôz zis tsôngv box tso siêz uô lox tôngv kôngz nuv”.

          Đhâu 3 shông chox công an chính quy muk uô đề án hlôngr yiêz jêx jos muôx txiv ngaz phưx txuôx, zuôr xar 100 ziv chuôz zis muk lơưr vax tsưr Xè A tâu yax mông vênhv tôngv cir ntơưr, tror txi côngv pos zơưs lơưr mênhx cxưx La Hủ li phongz cxưx, tsi mnôngs lơur vax tsưr. Thôngx cxix, yênhx châuv txuz tuz saz tuz nhiês thiêz muôv muôs sir zôngv zax zênhz tưz trâus lưx lươngv công an qênhz pov, tơưv txênhz tir tar. Trung tá Pờ Anh Viễn, Phưv tsar Công an huyện Mường Tè, tỉnh Lai Châu puz pâuz: Hnuz chox công an chính quy lok xã, phêv liv tiv zix zos hâux lưv tsir têz tsir qơư, sir zôngv vưv qiv, chuôz zênhx cuz tơưs chiv chir uô, viv tsôngv box La Hủ muôx cêr cor cav muk ntês tuô tsiêx cxu pêv har jôngr. Xar pox nhuôs nhoz truôx têz truôx qơư, tso siêz uô nox uô hâuk mak tsuv paz pox nhuôs muôx tsêr nhoz, muôx hâux lưv uô, muôx tâu phênhv sâu. Cxôngx co têx cán bộ công an tưz yênhx lênhx nênhs txơưx cơư ntông, uô kôngz lôngk, cê paz pox nhuôs uô, cê vênhv tôngv, yax mông chiê tsôngv pox nhuôs uô lơưr:

          “Đhâu 3 shôngk krêz uô mak qênhx shênhx txiv ngaz nhoz Bum Tở tưz muôx têx hlôngr yiêz jông. Uô ntêx zos iz cxiê vax tsưr Xè A pêz tưz yax mông vênhv tôngv tâu 88 chuôz zis tsi muk lơưr vax tsưr. Thâuv lưx lươngv công an cux xưk li têx ban nganhx, đoanx thêv krêz uô đề án mak zav nênhs phamv cxâuv lok zax zênhz cux tưz txu gris tsênhz mênhx”.

          Truôx siêz nhoz truôx qơư, paz max pox nhuôs huôv tsar uô kôngz lôngk, têx cán bộ chiến sĩ công an tâu pox nhuôs seiz zos lênhx nênhs nhoz côngv jêx côngv jos, côngv iz chuôz zis. Cxôngx co hâux lưv pâuz tâu pox nhuôs li siêz xar cux zôngx ziv đuô. Têx txuz hâux lưv cuz nxor lok txiv ngaz yênhx trus tâu yưr lir txos qơư, pox nhuôs tso siêz uô nox uô hâuk thiêz iz siêz muk lơưr Đangv, lơưr Hloz Hôx./.

(Khắc Kiên-Txâur Vax cxeik nhênhv)

Muôx phênhv sâu tâu truôx txix tsưr ziv tu zus yis nôngz thiêz yis grêix

Yis tu zus hâur guôx

Muôx nhos 20 shông sơưr cêr ntơưv qơư mul zok nriêr cêr huôv tsar uô nox nhoz đrôngl HCM, zơưv Nguyễn Văn Bé tâu muk ndis seiz, cơưv shâuv luôs lưv tus nhoz ntâu thax tsav qơư têx tsưr ziv huôv tsar uô nox trơưk tsưr ziv siêz xar. Hâur iz jiês muk tỉnh Bến Tre, zơưv pov iz chuôz zis px hâur thax tsav co luôs hâux lưv tu zus yis muôx phênhv sâu nhiêx txiêx mak zơưv lok six nhiêv thiêz nyơư. Thâuv tror lok txos tsêr, zơưv tưz muôz siêz truôx bo qir huôv tsar uô trơưk faz tsưr ziv no. Chox pêz muk ndis seiz chuôz zis luôs hâux lưv tu zus yis, zơưv Bé heik pâuz, 2, 3 hnuz uô ntêx ntơư, chuôz zis nhiv kruôr muôs zuôr xar 10 tus yis nôngz trâu tsôngv kruô. Nhiv no hâur guôx yuôr zuôr xar 60 tus tsênhv tâu zus cơư hâur 3 luz guôx. Zơưv qir uô luôs hâux lưv tu zus yis txix shông 2016 lok, xuz thơưx zos 10 tus xưz:

“Thâuv nhiv kruôr qir huôv tsar tu zus, lênhx tưs cux txov nhêv. Ciês ntu xuz thơưx mak cur cux tsi car muôz ntâu liêx têz chos caz tsiz ntơư hlôngr chos tâux. Cur tsuv muk lêis jâuz, lêis đrox kror cxiê qơư lok trâu yis nox, hâur nhos iz shông. Thâuv zuk tưz pov uô tâu trơưk tsưr ziv mak thiêx car muôz têx liêx têz hlôngr chos tâux. Xuz thơưx cux nyei tsav chuôz zis muôx txâuk nox, tsi txâuk hnar, chênhr viv li zuk tsuv chos têx caz tsiz, max mav mul lêis têx jâuz, đrox uz no ntơưv têx lok trâu yis nox.  Thâuv xuz tsuv txov nhêv, tsi pâuz shor pok uô tâu trơưk li zuk xar”.

Cê zus cê cơưv shâuv luôs lưv tus zus yik, ntu nhiv kruôr qir huôv tsar zus têx yis co zơưv Bé chuôz zis cux njiz tsi tsơưs têx phiv liv. Taz sik, đros têx sir jos, gruôs khưr huôv tsar uô nox, zok nriêr, cơưv shâuv tsưr ziv tu zus yis sâuv đeix, ti vi, ntơưr pov tsir, lar heik zos sâuv mạng XH, tsuôk đhâu iz ntuk tsi ntêr, zơưv Bé tưz jux juk pâuz tâu têx tsưr ziv zus thiêz tu, txix ntơư, zơưv chor yis iz hnuz vav ntâu jux juk tuôx đhâu têx jiês sha mê nhuôv, yis hloz lox sei. Zơưv Bé heik pâuz, muôx kênh jiês, chuôz zis chor yis muôx txos 100 ntâu tus. Đhâu têx uô tâu xuz thơưx trơưk tsưr ziv xar, zơưv Bé quyết tinhv muôz iz cxênhz xưv phaz ar têz chos caz tsiz hlôngr chos tâux, chiê muôx txâuk jâuz trâu yis nox, paz yis hloz lox jông. Zơưv cux krêz đar thiêz cxiv uô nzir qơư cơư têx yis. Nhiv no, zơưv paz yis muôx muôs hâur niêx shông. Iz chas ntơư, iz hlik, zơưv puôr lênhx muôx yis nôngz thiêz yis grêix muôs, xav hur si têx nhiêx txiêx txix muôs yis, iz shông tâu nhos 200 ntâu tsov đeiv. Lok sâuv ciêz đrôngs, qơư sâu zuôr, têx yis grêix mak zơưv muôs trâu têx qơư uô jâuz uô mor nox, hok chor yis nôngz, zơưv muôs trâu tsôngv cưr tix nênhx tsa sđ nhoz đêz, jê hâur cxuô thax tsav qơư. Iz chas co, zơưv tsênhv muôx têx qir muôs trâu tsôngv px ntơưv qơư chiê lơưr fmông trâu têx kôngz thiêz:

“Nhiv no tsôngv cưr tix nênhx tsa lơưr tuôx zuôr ntâu, zuôr nôngz mak cur muôs nôngz. Hok chor lâus mak cur muôs trâu têx qơư uô jâuz uô mor nox. Têx hlik muôs tsơưs thiêz tsi yuô tâu gri mak cux tâu nhos 15 tsov đeiv iz hlik. 15 tsov no mak iz zav li 4 tus niêv yis xưz, tsi tâu xav txos têx yis grêix”.

          Nhiv no, zơưv Bé chuôz zis tưz muôx tsi txâuk yis grêix thiêz yis nôngz chiê muôs trâu têx tuz luôv, tsôngv kruô, viv luôs sđ pov tâu zơưv tsưr ziv huôv tsar tu zus yis co uô tâu jông, ntâu lênhx px tưz zok nriêr cêr tuôx zuôr têx nôngz yis muk zus. Zơưv Nguyễn Văn Đắc, Phưv Tsar Phongx Kôngz nuv thiêz huôv tsar tox siêz huyện Cù Lao Dung heik pâuz, tu zus yis trơưk li zơưv Nguyễn Văn Bé mak lol six jông thiêz fiv đros trâu tsưr ziv kriê hlôngr yiêz zuz nôngz tsoz chos, tsiêx tu zus ntơưv qơư. Viv no zos têx tsiêx zôngx ziv tu zus, pênhr mak tas tsơưs, muôx qơư sâu zuôr truôx, ho muôx phênhv sâu tâu hâur niêx shông. Seiz mak co zos iz tsưr ziv huôv tsar uô nox, jông trâu chuôz zis muôx tsơưs ar liêx têz, lar heik zos têx chuôz zis pluôs. Zơưv Nguyễn Văn Đắc heik pâuz nzir:

“Chuôz zis pluôs chos caz tsiz mak zuôr truôx tuk tsi tâu. Huyện thiêz têx xã tưz kriê hlôngr yiêz tsưr ziv huôv tsar nox li: Tu zus nhux, tiv 2 zos zus yis lok sik yus keiz. Huyện tsưr ziv zos têx chuôz zis pluôs zuôr sir jos trâu luôs hâux lưv huôv tsar tu zus têx tsiêx cxu”.

Đros trâu têx cêr moz siêz, sir jos khưr huôv tsar uô nox, zơưv Bé 4 cxênhz xưv phaz ar têz chos caz tsiz hâur shông no txơưv tiêk trâul ntux uô ruôr hiêv, taz sik zơưv Bé cux sâu tâu liv txix 6 tsov đeiv tror zar sâuv iz côngk. Txơưv li ntơư, taz sik trơưk li zơưv Bé, txix ntux têx txơưr txar ziv hnuz ziv phiv liv, têx đêx hur ziv hnuz ziv tsơưs, tsi yuô muôx zôngv...., luôs hâux lưv chos caz tsiz zuôr ziv njiz ntâu phiv liv, chênhr zos li heik co, hlôngr yiêz tsoz chos, tsiêx tu zus fiv đros trâu ntux têx txơưr txar ntơư zos kror zơưv tsuv uô iz jiês no. Iz chas co, zơưv njuôk xav zuôr tror muôz têx ar têz chos caz tsiz hlôngr chos tâux, krêz uô đar tsưr ziv tu zus yis hâur ntu zuôr txos. Zơưv Bé heik, pir li zus yis, muôx phênhv sâu tâu ntâu đuô chos caz tsiz, iz chas ntơư, yis zôngx ziv tu zus, qơư sâu zuôr thiêz gri truôx tuk./.

(TTĐBSCL-Riê Lâux cxeik, nhênhv)