Yên Bái muôz siêz luz nênhx shir phaz cxôngx yênhx ziv chuôz zis

          60 shông ntâu sik đros nhoz uô nênhx, zơưv Phạm Bá Học thiêz pos Đặng Thị Phượng nhoz xã Thịnh Hưng, huyện Yên Bình thâuv tưs cux sir jos zos đeiv iêr chi cax luk chiê tuz nhuôs, jêx jos cơưv shâuv uô lơưr hâur cxiv tsa chuôz zis tsâu sor, shir phaz. Zos chuôz zis muôx chôngz mê nhuôs, zơưv oz niêv txir thâuv tưs cux kruôz kriê tuz nhuôs tuôr truôx cêr vênhx huôv chax chês, cxênhx nênhs tov ntêx tsês chiê. Tiv zix zos cưr tix, nus muôk hâur chuôz zis thâuv tưs cux tsuv sik côngv siêz, nhoz uô nênhx shir phaz, tsi phênhz têx nhuôv tuz nhuôv nxeik, txir nênhx, pox niêv. Khov co, zơưv oz niêv txir li têx tuz nhuôs puôr lênhx yênhx têx lênhx nênhs tsiv txiêx, cxiv tsa chuôz zis nhoz uô nênhx shir phaz.

          Ntu jê lok no, đhâu seiz shuôk qênhx shênhx moz covid-19 muôx têx huôv xênhz txơưr txar, zơưv oz niêv txir yax six heik têx tuz nhuôs tsuv uô jông têx cui tênhv lok phax tar moz, tsi nhoz chôngz lênhx nênhs, tsuv chox đeiv bos kror ndâux thâuv muk lok hâur thax tsav, chiê gôngr phênhv đros tiv phaz tir tar moz covid-19. Pos Đặng Thị Phượng pheiz kênh:

          “Niêv txir uô tul tsi cux heik tuz nhuôs chiê sik đros pheiz kênh, tul tsi phêv liv paz tâu mê nhuôs mak paz. Cưr tix nus muôk hâur iz chuôz zis tsuv siz hluz, siz paz max, thâuv tưs cux sik côngv siêz”.

          Moz Covid-19 tưz thiêz tsênhv uô zênhr shar ntâu txos ntâu chuôz zis li luz nênhx, taz sik đros thiêz zơưv Phạm Quang Hưng nhoz xã Thịnh Hưng, huyện Yên Bình chuôz zis mak no cux zos jiês chiê zơưv oz niêv txir cux xưk li tuz nhuôs muôx ntâu six hơưv nhoz uô cê, sik đros tsoz phưz niêv txir, tuz nhuôs cxôngx têx hâux lưv mê hâur niêx hnuz. Cxôngx co, cxiv tsa cêr shir phaz hâur chuôz zis. Zơưv Phạm Quang Hưng heik:

          “Chiê tax tâu ploz tsênhr chuôz zis vênhx huôv, cux xưk li chuôz zis shir phaz, cur zos iz lênhx txir hâur chuôz zis thâuv tưs cux kruôz kriê tuz nhuôs ciêz, sir jos cơưv ntơưr, thôngx cxix sir jos huôv tsar uô nox uô hâuk, chuôz cxaz phênhv sâu, chiê luz nênhx tâu jông đuô”.

          Đros ntâu tsưr ziv uô jông, xar tơưv jông, hâur têx shôngk đhâu côngz xưv chuôz zis sâuv thax tsav tỉnh Yên Bái tưz muôx têx hlôngr yiêz jông thôngz đhâu têx phongz yaox tưr thik li: Phongz yaox “Pox niêv sir jos cơưv shâuv, uô lox tôngv, cxiv tsa chuôz zis shir phaz”; phongz yaox “Tas nro tsôngv box sik côngv siêz cxiv tsa luz nênhx vênhx huôv nhoz thax tsav qơư nhoz”; phongz yaox “Cxiv tsa nôngx cxênhz yiêz”.... Shông 2020, tas nro tỉnh muôx 80% ziv chuôz zis tax chuôz zis vênhx huôv; cxiv tsa tâu 270 ntâu trâur nuv phax tar ntâus tsiv chuôz zis; 146 câu lạc bộ chuôz zis huôv tsar truôx vênhs; 1 cxênhz 600 ntâu tuêv tu txuz plâuz hâur côngv thôngx...

          Tiv zix, ntơưv Đại hội teiv plor Đảng Bộ tỉnh Yên Bái jiês tiv 19 jiês xuz thơưx tưz xav tênhv iz ploz tsênhr ntâus grê chêx cuk huôv tsar KTXH tỉnh, co zos “Tsôngv box li luz nênhx shir phaz”. No zos ploz tsênhr tsuv tâu tas nro cxix luôk chính trị thiêz cxuô cxênhx nênhs sik côngv đros uô, hâur co xav tênhv côngz xưv chuôz zis, cxiv tsa chuôz zis shir phaz zos tsênhv chiê uô zênhx liv ploz tsênhr no. Zơưv Nguyễn Lâm Tới, Phưv giám đốc Sở vênhx huôv thiv thao thiêz ju lix tỉnh Yên Bái puz pâuz:

          “Chiê muôz siêz tsơưr lươngv côngz xưv chuôz zis hâur ntu zuôr txos, pêz xav tênhv tror heik Ban chox kriê tỉnh cxiv tsa tsaz yênhx, tsưr ziv heik kriê, chox kriê tsênhz mênhx jênhv vưv, tsưr ziv tsênhv tưz tâu xav tênhv hâur Nghị quyết Đại hội Đảng bộ tỉnh Yên Bái jiês tiv 19 thiêz Đảng li Nghị quyết Đại hội jiês tiv 13. Tsênhz mênhx co zos cxiv tsa tsiv grê vênhx huôv thiêz lênhx nênhs reik đros tuôr tsês, huôv tsar chuôz zis VN hâur ntu yiêz; cxiv tsa lênhx nênhs Yên Bái siêz jông, xar tơưv jông, sik côngv jông, đhâu co muôz siêz tsôngv box Yên Bái li luz nênhx shir phaz”.

          Txơưv moz Covid-19 tsênhv muôx têx huôv xênhz zov chênhr nhoz ntâu qơư, taz sik têx ziv chuôz zis hâur tas nro têz qơưk heik cxuô thiêz tỉnh Yên Bái heik taz tsênhv sir jos phuôx huiz chinhz yênhx sik côngv siêz, pheiz kênh thiêz mênhx cxưx VN li cêr chax chês sik paz max, hla đhâu têx phêv liv đros thôngz yax “Chuôz zis ngaz tul- xã hội shir phaz”./.

(TTTB-Txâur Vax cxeik nhênhv)