Jax sâu thưr 5 hnuz 6/4/2017

Hluôk nênhs Sơn La côngv jos cxiv tsa jêx jok yiêz

     Đros muôx 250 lênhx hluôk nênhs sik côngv paz, tsuôk hâur iz hnuz txox cêr muk jok Pảng, xã Chiềng Đen, thành phố Sơn La ntêr đuô 1,3 cêik cêr tưz tâu nquôr bê tông, huk ar czuz thiêz kho tâu tiêr. Pêx xênhv hâur jok lok six shir phaz. Zơưv Cà Văn So, jok Pảng, Chiềng Đen, thành phố Sơn La hêik:

    “Hnuz no muôx đoanx hluôk nênhs tỉnh thiêz thành phố paz pox nhuôs uô cêr, chiê sơưr đơưk muk lok zôngx ziv đuô. Thâuv ntêr cêr lok six lax muk lok đhâu, nhiv no mak tưz muk lok zôngx ziv đuô lơưv”.

     Co zos iz hâur chor hâux lưv hâur tsaz yênhx uô ntêx hlo viv ngaz tuk xã hội zos tỉnh Đoàn Sơn La uô ntơưv xã Chiềng Đen, thành phố Sơn La chiê phuôx huiz hluôk nênhs li pưk txux uô ntêx hlo cxaz chuôz cxiv sta jêx jok yiêz. Đros co, câu lạc bộ cưk yuôx hluôk Sơn La thiêz câu lạc bộ txiêr plâuz hâu Sơn La tưz njuôk shuôk moz thiêz txiêr plâuz hâu tsik zuôr nhiêx txiêx trâu 450 ntâu lênhx pêx xênhv thiêz chor shux xênhz; paz 10 ziv chuôz zis cxiv uô tsêr vêv xênhz…Tsaz yênhx tưz zaz zâuv lok six chôngz hluôk nênhs cxaz chuôz. Chiến sĩ Nguyễn Thanh Bình, tiểu đoàn huấn luyện cơ động, Bộ đội pênhz phax tỉnh Sơn La hêik:

    “Tuôx no paz pox nhuôs kho đuô txox cêr no mak cur lok six shir phaz, xar congv paz zuk iz phênhv tưs đas jos trâu pêx xênhv, paz trâu lơưr muk lok tâu zôngx ziv đuô’.

Đros hluôk nênhs li uô ntêx hlo thiêz sir jos, cxuô cấp bọ đoàn tỉnh Sơn La tưz uô ntâu kror li cxaz chuôz cxiv tsa jêx jok yiêz, cxiv tsa luz nênhx vav mênhx đô thị, por vêv tênhv qơư, tir tar qiv hơưv txơưr txar, tsoz phưz paz trâu chor nhuôs zâu thiêz ngaz tuk xã hội. Tiv zix, hâur hli hluôk nênhs iz huyện, thành đoàn, thiêz chor đoàn txơưr đuô muôx tsơưs tiv zix iz côngz trinhx hluôk nênhs; iz cơ sở đoàn uô tsơưs tiv zix oz kror hâux lưv hluôk nênhs cxaz chuôz cxiv tsa jêx jok yiêz, uô cêr bê tông muk lok hâur jêx jok…

     Đoàn hluôk nênhs cxuô cấp li huôx tôngv chênhr zos cxiv tsa chor côngz trinhx “Pov cêr jêx jok”, txix tsưr ziv uô xuz thơưx ntơưv thành phố Sơn La, txos nhiv no tưz tâu uô đêz đar txos chor huyện: Mai Sơn, Sông Mã, Phù Yên… Nhiv no, tỉnh tưz muôx zuôr xar 14 cêik cêr muôx tênhv tênhz tơưl pov cêr zos chor tsưr tsix đoàn jênhv uô thiêz muôz lok sir zôngv, paz trâu pêx xênhv muk lok zôngx ziv đuô. Ciês tsêz no, đoàn viên hluôk nênhs tưz khơưk muôz 3.000 ntâu kror huv, cxiv tsa thiêz kho đuô14 luz tsêr siêz jông đros tsiv gri zuôr xar iz tiv đêiv; tsưr tsix njuôk shuôk moz thiêz muôz yuôx tsik zuôr nhiêx txiêx trâu 3.600 lênhx nênhs; cxaz chuôz uô yiêz xar muôx 50 cêik cêr muk lok hâur jêx jok…Tix lâus Vax A Lả, Bí thư tỉnh đoàn Sơn La puz pâuz:

     “Tiv iz zos cxiv tsa chor tsưr ziv chiê zoz zux shưz xar, luz nênhx jông trâu cxênhx hluôk, cxaz chuôz cxiv tsa jêx jok yiêz… Uô đêz đar chor tsưr ziv chiê kruôz kriê, cxơưz cxiz tsoz phưz trâu hluôk nênhs, tiv zix zos têx kror hluôk nênhs tsov cưv txos nhiv no xưk li hâux lưv uô”.

     Tưz tsik zos hâur hli hluôk nênhs, chor huôx tôngv uô ntêx hlo viv luz nênhx côngv thôngx, sik côngv têk cxiv tsa jêx jok yiêz tsênhv tâu yênhx lênhx hluôk nênhs tỉnh Sơn La sir jos đros uô, đros siêz xar paz đas jos cxiv tsa Sơn La ziv hnuz huôv tsar đuô./.

(Hồng Việt-Lik Thox cxêik nhênhv)

Phênhv thưr 5, hnuz xiêz 6/4/2017:

Canr bôv hluôk moz siêz cơưv txux , sir jos uô nuv viv tsôngv box

     Zax Seo Châu xênhz shông 1986, hâur iz chuôz zis nênhs Hmôngz pluôs ntơưv xã Mản Thẩn, huyện Si Ma Cai, tỉnh Lào Cai. Vax tsêr muôx chôngz lênhx nuk muôs, cưr tix, thâuv tưz muôx 10 shông Châu li qir tâu muk cơưv, taz sik tsênhz tiês muk cơưv txux tưz uô trâu Châu moz siêz lus. Hla đhâu têx phiv liv thiêz cêr txov, sơưr đơưk têx tsưr ziv, siêz xar tsi thôngz thâuv ntêx, Châu tưz sir jos trâu siêz njo muk cơưv txux chiê muôx luz nênhx hlôngr yiêz.

     Cơưv tas ntơưr cấp 3, iz tês tix lâus tưr thik tâu muk cơưv trâu 2 luz tsêr cơưv đại học, thiêz Đại học Kôngz nuv 1 zos qơư mak tix lâus xeir tsov chiê muk cơưv, tov kaz no muôx txux chi, tsưr ziv lok huôv tsar cêr uô nox. Cơưv tas ntơưr Đại học, Châu tror cơưv nzir lok sâuv nhênhz chơưv têx tsưr ziv uô nuv, đhâu cơưv tiêr ntơưr thạc sỹ, quyết tinhv tror lok zuk qơư nhoz, thâuv ntơư tix lâus zos huyện pluôs Si Ma Cai lênhx tuz nhuôs xuz thơưx cơưv tas ntơưr siêz đuô hur si.

Đros thiêz ntâu tsưr ziv, đas jos gôngr paz trâu ntơưv qơư, tix lâus tưz tâu bo xeir chiê hnuz no yênhx lênhx nênhs sơưr thơưx hâur iz xã muôx ntâu nuv zuôr trâul txos tix lâus uô, lês car. Zax Seo Châu heik:

     "Zos iz lênhx hâu nov xã, cur tsi so muk trâu têx jêx jok chiê vênhv tôngv tsôngv box hlôngr yiêz cêr nênhx xênhz huôx, tso tsês têx cêr pôngz kaz, muôz têx zuz nôngz kôngz jông  lok tsêz chos chiê gra siêz phênhv sâu tâu trâu tsôngv box. Iz chas ntơư, pêz cux sir jos phênhz côngz canr bôv, vênhv tôngv tsôngv box sơưr đơưk cxiv uô, kho đuô têx cêr chiê tsôngv box zôngx ziv mul lok".

      Têx luôs hâux lưv mak lênhx Chủ tịch hâu nov hluôk no uô thâuv tưs tưz zos tsênhv tsênhz. Tix lâus zos lênhx gra thiêz kriê tsôngv box sơưr đơưk muôz têx zuz nôngz kôngz yiêz lok tsêz chos li: Yuôx Tam thất, jâuz krưr....chiê cxaz nzir phênhv sâu tâu nju. Ciês têx nôngz poz cưk đrav ntêx, lok tix lâus cux sir jos kriê tsôngv box tiêk cov tso tsês, hlôngr chos thiêz uô đuô lưv zav nôngz thiêx sâu tâu nju. Tix lâus Tẩn Seo Lèng, nhoz jok Sỉn Chú, xã Mản Thẩn, huyện Si Ma Cai heik:

      "Thâuv ntêx mak tsôngv box sơưr đơưk chos têx nôngz cưk đrav ntêx xưz, sâu tsi tâu ntâu. Chủ tịch fuô kriê trâu tsôngv cưr tix nênhx tsa sơưr đơưk cov muôz têx nôngz kôngz jông lok tsêz chos mak cux uô thiêz sâu tâu nju đuô".

     Sir jos uô trâu zuk thax tsav qơư nhoz hlôngr yiêz, Châu cux zos lênhx uô ntêx nyuôs vênhv tôngv tsôngv box muôz yênhx châuv ha ar têz thiêz yênhx puô cxênhz hnuz côngz uô cêr mul lok, paz xã uô tâu tiêr luôs hâux lưv cxiv tsa jêx jok yiêz lok shông 2016. Zơưv Zax Seo Chùa, Phưv Bí thư Đảng ủy xã Mản Thẩn, huyện Si Ma Cai, tỉnh Lào Cai tưz heik lok lênhx hluôk-Chủ tịch hâur zuk xã li no:

      "Đôngx chir uô tâu ntâu luôs hâux lưv jông, zos lênhx hluôk uô ntêx nyuôs hâur cxuô cêr nuv; đôngx chir lok six sir jos, uô ntêx nyuôs hâur chox kriê, vênhv tôngv tsôngv box sơưr đơưk uô trơưk Đảng, têz qơưk têx chei kriê. Đôngx chir cux zos lênhx cơưv tas ntơưr siêz, muôx tsưr ziv chox kriê tsôngv pêx xênhv huôv tsar uô nox".

     Txix têx đas jos, txux chi tsưr ziv muôx tâu, moz siêz lus uô nuv, Chủ tịch xã hluôk Zax Seo Châu tưz thiêz tsênhv paz gra cêr shir phaz lok trâu thax tsav tox siêz Mản Thẩn cov ziv hnuz ziv huôv tsar, truôx jông./.

(An Kiên-Riê Lâux cxeik, nhênhv)