Sơn La thox cxov lênhx nênhs trâu têx tỉnh Bắc Lào

          Shông cơưv 2016-2017, Tsêr cơưv Đại học Tây bắc muôx 460 ntâu lênhx shux xênhz zos nênhs Lào tsênhv cơưv têx lớp chuyên nganhx thiêz lul Việt. Thâuv têx shux xênhz tuôx Việt Nam cơưv ntơưr tsi pâuz lul Việt, tsi tâu shưv đros tênhx qơư xênhz huôx thiêz cơưv ntơưr viv li tsi tâu car sik côngv đros cxuô lênhx shux xênhz txơưr. Tsêr cơưv thâuv tưs cux tsov cưv, muôz theox chênhv trâu têx shux xênhz Lào cơưv ntơưr jông tiv zix, muôz siêz pênhr xưv heik lul Việt. Đros hâux lưv pheiz côngz cưk kriê muôx pênhr xưv, tsêr cơưv tsênhv tsưr tsix têx huôx tôngv sik njiz vênhx huôv, vênhx ziv, thik nriêr pâuz lok lul Việt trâu têx mê nhuôs shux xênhz Lào. Khov co, têx shux xênhz Lào tưz car sik côngv đros cxuô lênhx fôngx zưs nênhs Việt, tso siêz cơưv ntơưr, xênhz huôx. Cưk kriê Lê Thị Hà, khoa ngữ văn, tsêr cơưv Đại học Tây Bắc puz pâuz: “Têx cưk kriê tưz chuv tôngv njiz têx shux xênhz Lào chiê pheiz kênh luz nênhx, chinhz yênhx, paz têx shux xênhz no txơưx sâu, txơưx nhênhv ntơưr Việt. Thôngx cxix paz têx shux xênhz sik côngv huôx tôngv hâur lớp cơưv, hâur khoa chiê têx shux xênhz no xênhz huôx tâu đros têx shux xênhz Việt Nam”.

          Tsêr cơưv Cao Đẳng Sơn La zos taz viv xuz thơưx tâu tỉnh choz jênhv vưv thox cxov têx shux xênhz Lào. Cxôngx shông 2001 txos nhiv no, tsêr cơưv tưz tos jênhv thox cxov lul Việt trâu 1000 ntâu lênhx shux xênhz nênhs Lào nhoz 8 tỉnh Bắc Lào; hâur co muôx zuôr xar 500 lênhx cơưv chuyên nganhx ntơưv tsêr cơưv. Tsêr cơưv tưz yênhx lix Chi hội hữu nghị Việt Nam- Lào shông 2013, cxôngx co txos nhiv no chor shux xênhz Lào tuôx cơưv ntơưr ntơưv tỉnh Sơn La ziv hnuz ziv chuôz ndê. Zơưv Nguyễn Văn Minh, Phưv hiệu trưởng Tsêr cơưv Cao đẳng Sơn La heik:“Tsêr cơưv tsov cưv tiv zix txos côngz xưv tsưr tsix, coar lik chiê têx shux xênhz Lào cơưv ntơưr. Uô cxix cxuô têx tsênhv chei zos tỉnh cui tênhv, taz por trâu têx shux xênhz Lào lok luz nênhx nox nhoz, thâuv xênhz huôx, cơưv ntơưr hâur tsêr cơưv. Thâuv tưs cux muôz theox chênhv jông tiv zix chiê têx shux xênhz Lào sâu jênhv têx yênhx tưv thâuv cxaz chuôz cơưv têx chuyên nganhx tưz đăng cir”.

          Tsi taz tâu paz max chiê muôx theox chênhv cơưv ntơưr jông tiv zix, têx shux xênhz Lào tsênhv tâu têx cưk kriê, têx fôngx zưs shux xênhz Việt Nam tsov cưv, pheiz kênh têx siêz xar, têx phêv liv hâur luz nênhx, xênhz huôx... Têx tsêr cơưv puôr lênhx muôx qơư so trâu têx shux xênhz Lào, tsi tsuv khiêz nhiêx ntiêr qơư nhoz, đros ntâu chế độ txơưr. Thâuv txos tsiêz Việt Nam thiêz Lào, têx tsêr cơưv puôr lênhx tsưr tsix sik njiz, muôz theox chênhv trâu têx shux xênhz tâu tos Tsiêz lov jêv. Cxôngx têx cưk kriê thiêz shux xênhz Việt Nam li têx hâux lưv uô co tưz paz têx shux xênhz tso siêz đuô cơưv ntơưr. Shux xênhz 2 têz qơưk VN-Lào sik đros nhoz uô nênhx thiêz cơưv ntơưr hâur iz tsêr cơưv. Shux xênhz Phon Thíp Kẹo Mạ Ni Kon, lớp K54, khóa quản trị kinh doanh, tsêr cơưv Đại học Tây Bắc puz pâuz: “Thâuv nhiv kruôr tuôx nhoz no cur njiz lok six ntâu phêv liv viv tsi txơưx heik lul Việt, cơưv chuyên nganhx njiz ntâu phêv liv. Taz sik tâu têx cưk kriê thiêz fôngx zưs Việt Nam paz max cur tưz truôx siêz đuô cơưv ntơưr”.

          Nhiv no, tỉnh Sơn La muôx 4 tsêr cơưv chuyên nghiệp uô jênhv vưv thox cxov shux xênhz Lào, co zos: Tsêr cơưv Đại học Tây Bắc, Tsêr cơưv Cao Đẳng, Tsêr cơưv Trung cấp y tế Sơn La thiêz Tsêr cơưv Trung cấp vênhx huôv nghệ thuật thiêz ju lix đros 1000 ntâu lênhx shux xênhz Lào tsênhv cơưv ntơưr. Đrâuv co, tỉnh Sơn La tsênhv tsưr tsix ntâu lớp kriê cxaz nghiệp vụ côngz xưv tsưr tsix cán bộ, côngz xưv đoanx thêv, thox cxov lul Việt trâu cán bộ têx tỉnh Bắc Lào. No zos têx cán bộ tsênhv nhoz 8 tỉnh Bắc Lào, cux zos tul qox chuôz cxaz cêr coaz siv jông Việt Nam- Lào cov ziv hnuz ziv truôx vênhs./.

                                                                                                                  (Hồng Việt-Txâur Vax cxeik nhênhv)

PHÊNHV PIÊR KRIÊ TÊZ QƠƯK CHEI TÊZ QƠƯS

Sâu cxaz nzir xênhv thiêz bê hâur ntơưr krêz xênhz

Pos Nguyễn Thị Ngọc nhoz huyện Yên Châu, tỉnh Sơn La nuk: Hâur shông 2002, zơưv Nguyễn Hữu Dẹn, nox nhoz đros pos Võ Ngọc Diễm xưk li niêv txir, xênhz zus tâu iz tuk mê nhuôv. Taz sik thâuv ntơư, pos Diễm khiêr lơưv, zơưv Dẹn ho muk nhoz cêr cxâuv têz qơưs, viv li niêv pos muk uô ntơưr krêz xênhz trâu tuk nhuôv co. Ủy ban xã tưz uô ntơưr krêz xênhz tsi muôx niêv txir bê. Nhiv no, zơưv Dẹn xar cxaz nzir zuk bê trâu tuk nhuôv heik sâuv đeiv ntơưr krêz xênhz têx. Uô li tâu lok tsi tâu?

Uô ntêx, viv zơưv Dẹn thiêz pos Diễm nox nhoz uô cê xưk li niêv txir tsi muôx ntơưr siz zuôr viv li zơưv Dẹn tsuv uô ntâuz ntơưr lênhk nhav niêv thiêz txir trâu tuk mê nhuôv, zos tiêk lênhk nhav niêv thiêz txir, mê nhuôv, sơưr đơưk  tưx jông siêz thiêz tsi muôx đaz tsi lok sâuv siz txênhz....têx lơưr cui tinhv ntơưv grê 32 Nghị định số 158/2005/NĐ-CP, Nghị định số 06/2012?NĐ-CP kho đuô cxaz nzir Nghị định số 158/2005/NĐ-CP lok đas cir thiêz seiz car têx ntơưr.

Grê 32. Uô ntơưr lênhk nhav niêv, txir, mê nhuôv zos li chas.

1.Lênhk nhav  niêv, txir, mê nhuôv trơưk li cui tinhv ntơưv grê no tâu uô lơưr, zos tos lok jênhv thiêz tos tâu lênhk nhav niêv thiêz txir, mê nhuôv tsênhv uô nênhx nhoz thâuv luz six hơưv uô ntơưr jênhv siz jênhv mê nhuôv thiêz niêv txir; 2 tos siz jênhv, lênhk nhav co zos chiv chir jông siêz, thôngx ziv thiêz tsi muôx đaz tsi siz txênhz nhoz têx lênhx muôx vax huôv thiêz têx tuk tsi cik txos cêr siz jênhv, lênhk nhav ntơư.

2.Lênhx nhuôv hloz tiêr nênhs lok sik lênhx paz tu tuk nhuôv hloz tsi tâu tiêr niêv, tiêr txir co lok sik tưz hloz tiêr nênhs taz sik tsi muôx vax huôv lok đơưl lênhk têx li heik no cux tâu uô ntâuz ntơưr jênhv thiêz lênhk nhav niêv, txir trơưk cui tinhv ntơưv grê no, zos lênhx niêv thiêz txir tưz tuôs tas;  zos tiêk jênhv thiêz lênhk nhav niêv, txir zos sơưr đơưk chiv chir jông siêz, thôngx ziv, tsi muôx đaz siz txênhz nhoz têx lênhx muôx vax huôv...cik txos siz jênhv thiêz lênhk nhav niêv txir.

Đhâu thâuv uô tas têx ntâuz ntơưr li heik sâuv trâu tuk nhuôv, zơưv tâu uô  cxaz thiêz hlôngr đuô fâu ntơưr đas cir krêz xênhz thiêz tuk nhuôv đeiv ntơưr krêz xênhz trơưk cui tinhv ntơưv grêix 1 grê 35 Nghị định số 158/2005/NĐ-CP kho đuô, cxaz nzir Nghị định số 06/2012/NĐ-CP lok đas cir thiêz seiz car têx ntâuz heik sâuv.

Grê 35.Cxaz nzir, hlôngr đuô fâu ntơưr krêz xênhz thiêz tuk nhuôv đeiv ntơưr krêz xênhz.

1.Trơưk li Quyết tinhv côngk nhav lok sâuv siz jênhv, lênhk nhav niêv thiêz txir, mê nhuôv, Ủy ban cấp xã, kror qơư zuk tưz đas cir krêz xênhz trâu lênhx nhuôs sâu cxaz nzir phênhv krêz lok sâuv niêv thiêz txir hâur fâu ntơưr krêz xênhz thiêz tuk nhuôv đeiv ntơưr krêz xênhz, zos tiêk phênhv krêz lok sâuv niêv thiêz txir thâuv ntêx tsês chiê nưk nhoz nưk li ntơư tsi krêz li chas trâu.

Zos tiêk fâu ntơưr krêz xênhz ntơư tưz muôx iz fâu tsês ntơưv Ủy ban huyện, quận, thị xã, TP hâur tỉnh (tov kaz no zos hu uô ủy ban cấp huyện), mak ủy ban cấp xã heik trâu ủy ban cấp huyện pâuz chiê tror sâu cxaz nzir trâu./.

                                                                                                  (Thanh Thủy-Riê Lâux cxeik, nhênhv)