Suôz Đeix thiêz luz nênhx nhoz tox siêz

          Pos Lò Thị Yên, nhoz xã Nghĩa Lợi, thị xã Nghĩa Lộ, tỉnh Yên Bái zos tsơưs tsơưs têx pox niêv mênhx cxưx Thái tâu chuôz zis tso muk cơưv ntơưr tas têx cấp ntu kuôk nor 50, 60 shông. Tsôngv box jêx jos li lênhx y tá siêz jông tưz so lâuk, nhoz uô nênhx ntơưv niêv đrôngs taz sik cxuô cêr cor cav tsuôk li tsi muôx tul tsi hlôngr yiêz, tiv zix zos mnôngs Đeix nta suôz Việt Nam hâur niêx hnuz.

          Trơưk li pos Yên ndo, têx shông 2000 tror lok no, jos tsôngv box Thái nhoz Mường Lò lok six pluôs, tsôngv box jêx jos tsi khênhr muk đêz. Hnuz tưs thâuv hnor tsaz yênhx Đeix nta suôz VN tso thâuv 5 six sơưr nzor pox nhuôs lok six nhiêv mnôngs. Thâuv co huyện li luz loa lox tâu txuôk ntêr 2,3 cei cêr, tsuôk krêz muôx nhos 2 six ntâu thâuv sơưr nzor, iz six tso thâuv 12 six tar su, xar mnôngs ntâu mak tos txos 4 six 30 phênhz zar hnuz keix txos 9 six tsâus ntux. Đrâuv tos mnôngs têx tsaz yênhx pos Yên li cxuô hâux lưv cux puôr lênhx khov txos suôz Đeix chiê uô. Cxôngx muk uô têz, lor njuôs, muk uô liêx, uô su thiêz muk pư cux trơưk six hơưv chiê tas cik hu mê nhuôs sơưr muk cơưv ntơưr...

          Nhiv no niêv đrôngs muôx chôngz lênhx nênhs đuô, suôz loa tsuôk li zâu đuô, mnôngs tsi tsênhz thiêz, pâuz pos Yên nhiêv mnôngs Đeix, iz tul nhuôs xênhz nzưr tưz muôz trâu pos iz luz Đeix mê ntês tâu ntâu sóng Đeix nta suôz Việt Nam. Muôx Đeix radio, pos Yên mnôngs tâu phênhv ntâu têx tsaz yênhx. Thâuv nox hmo, pos Yên zos lênhx nênhs heik kriê cxaz têx xor mông txos têx tuz nhuôs viv lơưr khưr uô hâux lưv yênhx hnuz, tsi muôx six chênhz mnôngs Đeix. Tiv zix zos ntu nhiv no, thâuv moz Covid-19 tsênhv huôv xênhz txơưr txar.

          “Đeix heik ntâu txos moz Covid-19. Mnôngs thiêz pâuz tâu mak cur ho heik kriê tuz nhuôs, tsuv uô trơưk têx tsưr ziv phax tar moz, tiv zix zos muôx lênhx nênhs txơưr tuôx hâur jos tsuv pov trâu thênhv siêz. Ntu no cux tsuv nhoz tsêr uô nox, tsi muk đêz uô thiêz”.

          Đros thiêz tsôngv box Hmôngz nhoz têx xã tox siêz nhoz Yên Bái, Đeix nta suôz VN li têx tsaz yênhx jông li iz lênhx fôngx zưs hâur luz nênhx. Uô ntêx zos mnôngs zuk mênhx cxưx heik cưr cxiêx, tov kaz zos mnôngs njuôs pov ntux nas chiê muk uô têz jav tâu têx jiês ntux lok nas lox, tsi muk lok thâuv muôx đêx cuôr yôngz, tox poz; lơưr tsiêx cxu lok cơư thâuv ntux xoz, cơưv shâuv tsưr ziv uô nox uô hâuk, cxiv tsa luz nênhx tsâu sor shir phaz... Tix lâuk Lù Xênhv Zax, tsôngv box nhoz xã Chế Tạo, huyện Mù Cang Chải puz pâiz, thâuv ntêx khênhr pov têx lâus gra têx luz Đeix lox, muôx hluô khi đrâuv poz tư chiê mnôngs thâuv muk uô têz. Têx luz Đeix co tsuv muk tsênhv qơư huyện thiêx li zuôr tâu, grê muôs mak bâuv yênhx tul tưv. Nhiv no mak zôngx ziv đuô, chiê mnôngs Đeix nta suôz VN, pox nhuôs tsuôk krêz ciês điện thoại txơưv mnôngs tâu Đeix. Tix lâuk Lù cux puz pâuz, tsôngv box Hmôngz khênhr muk uô hâux lưv cxôngx thâuv tas cik sơưr nzor txos tsâus ntux thiêx li lok tsêr, viv li Đeix zos chuôz zênhx lok six jông chiê muk tưs, uô hâux lưv tưs cux tso tâu mnôngs. Đeix jông li iz lênhx fôngx zưs, uô zuk pov tsi ndo txos têx phêv liv hâur luz nênhx thiêz, sir jos uô lox tôngv xênhz yar...

  Tox siêz Yên Bái nhiv no, luz nênhx jux jus tâu hlôngr yiêz, tsâu sor đuô. Đeix nta suôz VN tưz thiêz tsênhv tsês ntâu six hơưv tso têx thôngz yax lok têx hlôngr yiêz, tôngv vênhx cxơưz cxiz pox nhuôs têx mênhx cxưx tsơưs nênhs sir jos chiê chox tox siêz huôv tsar chuôk thax tsav tiêx đras./.

          (TTTB-Txâur Vax cxeik nhênhv)