Hà Giang sir jos hla đhâu cêr pluôs cxiv tsa jêx jok yiêz

Xã Đông Hà, huyện Quản Bạ zos iz xã tox siêz đêz đrôngl ntơưv tỉnh Hà Giang, muôx 10 mênhx cxưx sik đros uô nênhx nhoz, hâur co tsôngv box Hmôngz muôx xar iz đraz. Piz txix thâuv xã Đông Hà kriz cxiv tsa jêx jok yiêz cux uô tsik tâu truôx pês tsơưs, viv xã tsênhv yuôr 300 ntâu chuôz zis pluôs. Chuôs li, chor chuôz zis nhoz xã Đông Hà li phênhv sâu zos khov trâu uô xênhz yar kôngz nuv thiêz jôngr nuv viv li sir jos chiê uô tiêr cxiv tsa jêx jok yiêz tâu sêiz tiêk zos iz kror jông nhoz thax tsav tox siêz ntơưv Hà Giang.

Txos xã Đông Hà thâuv sơưr nzor chêix ntux no, taz sik tsik xưk li têx chuô txiêk mak nhoz no lov jêv đros cêr shir phaz nhoz tox siêz. Pêx xênhv cxuô jêx jok tsênhv sik đros tsông poz jêz, luôv puô cêr muk lok. Lênhx tưs cux lok six shir phaz thâuv tsaz yênhx jêx jok yiêz tưz paz trâu lơưr cxuôv tâu yêiz pluôs, paz muôx tâu tsâu sor. Tix lâus Zax Mí Xay, nhoz jok Thống Nhất, xã Đông Hà hêik:

“Hêik cov uô cêr mak pêx xênhv cxaz chuôz lok six chôngz, uô tâu cêr zuôr paz pox nhuôs sâu poz cưk zôngx ziv đuô. Cur pov mak tsuv uô li no, uô li no pox nhuôs tâu siz njiz cux shir phaz”.

Đhâu 7 shông cxiv tsa jêx jok yiêz, txix shông 2011 txos shông 2017 xã Đông Hà tưz uô tiêr. Muôx tâu chêx cur no zos lênhx tov cxuô cấp, nganhx, ban chox kriê cxiv tsa jêx jok yiêz tưz muôx tâu têx tsưr ziv uô huv đros, jông hâur chox kriê, sêiz car uô huv đros trâu iz luz xã pluôs nhoz tox siêz.

Tâu têz qơưk paz pênhr, kỹ thuật tu zus, uô nox thiêz yênhx ziv chuôz zis li sir jos viv li chor tsưr ziv uô xênhz yar, huôv tsar kinh tế ntơưv xã Đông Hà ziv hnuz ziv tâu uô đêz đar. Ntâu tsưr ziv uô jông li: Nôngz blêx 5 đros (Đros nôngz, đros chêix chiv, đros tsoz phưz, đros phax tar caz hmoz, đros sâu), tsưr ziv uô poz cưk txuôv, tsưr ziv muôz pênhr txêik tror sâu pênhr…Đros thiêz chor xã nhoz qơư kik mak no xưk li zos kror tsik luôx tưs, taz sik đros iz luz xã pluôs nhoz tox siêz mak no zos iz kror hlôngr yiêz lox. Zơưv Nguyễn Hữu Nhiệm, chủ tịch UBND xã Đông Hà puz pâuz: Cxiv tsa jêx jok yiêz nhoz Đông Hà kror phiv liv tiv zix zos uô chak chiê hlôngr yiêz tâu tsưr ziv uô nox, txos nhiv no muôx zuôr xar 100% chor chuôz zis tưz chos blêx, poz cưk lơưr tsưr ziv kỹ thuật.

“Kror phiv liv tiv zix zos pênhr jos, pox nhuôs tox siêz phênhv ntâu zos muôz ar, paz đas jos chiê uô chor côngz trinhx, lok six lax huiz tôngv nhiêx txiêx, phênhv ntâu zos paz hnuz côngz xưz”.

Luôs hâux lưv lok vênhx huôv cux zos iz kor phiv liv trâu xã tox siêz qơư phênhv ntâu zos tsôngv box cxuô mênhx cxưx uô nênhx nhoz. Niêv tix Bùi Thị Vấn, chủ tịch Hội gâux muôv vir ndâuk xã Đông Hà puz pâuz:

“Thâuv ntêx mak pox nhuôs jênhv pâuz kik, tênhv qơư tsik taz por. Cxiv tsa jêx jok yiêz tâu paz xi măng uô tsêr vêv xênhz, cêr muk lok viv li tênhv qơư cux jông đuô, pox nhuôs jênhv pâuz tâu gra siêz đuô. Pêz cux muôx tsưr ziv sâu têx vuôz tsuôz thiêz chor chuôz zis cxaz chuôz cxix cxuô. Pêz muôx tsưr ziv uô jâuz hur, cxuô zav jông gâux, 5 kror tsik tsuv uô, 3 đros uô đros tsaz yênhx cxiv tsa jêx jok yiêz”.

Zơưv Nguyễn Đức Vinh, Giám đốc Sở kôngz nuv thiêz huôv tsar jêx jok, chánh văn phongx điều phối jêx jok yiêz tỉnh Hà Giang puz pâuz, pir li têx luôs hâux lưv cuiz tênhv mak nhoz Hà Giang tsênhv kik pir li chor xã qơư kik viv tsar tov phiv liv, nhiêx txiêx muôx tsik txâuk.

“Xav mak cxiv tsa jêx jok yiêz zos uô trâu pêx xênhv luz nênhx tâu gra siêz đuô, lơưr luz nênhx hlôngr yiêz zos lok six zov chênhr. Uô đaz tsik zos tsuôk uô cov muôx xưz mak lok six phiv liv, pêx xênhv li phênhv sâu zos kror zov chênhr tiv zix”.

Txos six hơưv no ntơưv Hà Giang nhiv kruôr muôx 10% ntâu chor xã hâur tas nro tỉnh uô tiêr luôs hâux lưv cxiv tsa jêx jok yiêz. Uô tâu tiêr têx luôs hâux lưv ntơư, zos tsaz yênhx cxiv tsa jêx jok yiêz tưz tâu cấp ủy, hâu nov ntơưv qơư moz siêz txos.

Kror jông tiv zix zos thâuv cxiv tsa jêx jok yiêz nhoz Hà Giang, co zos hlôngr yiêz tâu tsôngv box cxuô mênhx cxưx tox siêz li tsưr ziv huôv tsar cêr uô nox, paz muôx tsưr ziv uô nox truôx, đhâu co zuôr muôx tâu iz luz nênhx tsâu sor, shir phaz./.

(TTT-Lik Thox cxêik nhênhv)

Bộ chinhr trị li cui tênhv 105: Canr bộ trâus kỷ luật, tsik puz uô hâux lưv sêiz car

           Cui tênhv heik tsênhz mênhx nguyên tắc Đảng thôngx ziv lênhs tov côngz xưv canr bôv thiêz coar lik têx canr bôv, taz por uô cov huv đros, tập thể cuiz tênhv, thôngx cxix phuôx huiz cxix cxuô txơưx jênhv lênhx nênhs, uô ntêx zos sơưr thơưx. Têx vênhv thix lok côngz xưv canr bôv thiêz canr bôv tsuv zos hur si cấp ủy thiêz tsưr tsix đảng muôx qênhx sik seiz lax uô cov huv đros. Zos nênhs sơưr thơưx li ziv chênhv thiêz  hur si cấp ủy, tsưr tsix Đảng, lênhs tov chiz coaz, taz viv txơưr li ziv chênhv mak tsuv pov cov trâu cấp muôx qênhx seiz shuôk, cuiz tênhv. Phưv giáo sư, tiến sỹ Ngô Huy Cương, cưk kriê Khoa luật, Đại học têz qơưk Hà Nội xar tiêk: tsuv kruôk nênhs sơưr thơưx zos uô jông côngz xưv canr bộ thiêz pov thaz huôx nox nhiêx:

          “ Zos yưr lir txơưx jênhv nênhs sơưr thơưx thâuv pov thaz huôz hâur chiz coaz taz viv mak tsênhz mênhx lơưr khênhr nriêr cxuô tsưr ziv chiê jeis. Thiêz Việt Nam li cơ chế nhiv no mak tsi muôx lênhx nênhs sơưr thơưx tưs tsi pâuz, lok sik lơưr tsi xar pâuz lok sik cxoz txưv tsi pâuz. Lơưr cur mak lơưr pâuz tas thiêz pưs txux lênhx nênhs sơưr thơưx lok six coaz tsôngv, viv chế độ thủ trưởng nhoz Việt Nam siêz, chênhr viv li muôx lênhx coaz”.

          Lơưr cui tênhv, six hơưv xêir uô hâu nov zos 5 shông đros canr bộ lênhs tov, coar lik cấp tsar, cấp phưv nhoz chiz coaz, taz viv; hâux lưv xêir uô hâu nov tsi tâu txos 5 shông zôngv đros iz cxiê hâu nov lơưr cui tênhv txơưr. Six hơưv uô hâu nov bo xeir tsov lơưr tsưr tsix co li six cxiv đại hội. Canr bộ, đảng viên thiêz tsôngv box xar tiêk: Nênhs tâu xêir uô hâu nov tsuv taz por ploz tsênhr cxuô, ploz tsênhr lơưr Đảng thiêz chiz coaz muôx qênhx li cui tênhv; tsi uô cxâuv lok têx mak đảng viên, canr bộ, công chức, viên chức tsi tâu uô; muôx hồ sơ ntâuz ntơưr, ntơưr heik kriê chuôz zênhx chuôz tas, phênhv sâu cxix cxuô, tsênhz mênhx thiêz tâu chiz coaz muôx txơưx jênhv muôx qênhx xav tênhv. Zơưv Nguyễn Kỳ, canr bộ Ban kinh têr Trung ương xar tiêk: Hâux lưv heik kriê chuôz zênhx chuôz tas tsuv tâu heik tsênhz mênhx trâu canr bôv, đảng viên thiêz tsôngv box seiz car:

          “ Heik tơưv tsuv muôx tsôngv box seiz shuôk. Lênhx đảng viên siêz đơưz zos lok six coaz tsôngv, zos tsi li mak zuôr tsi jông. Lênhx đảng viên li siêz đơưz zos lok six coaz tsôngv tsuv tsov cưv. Tsưr ziv kỷ luật, xưv bluô hnhar zos zuôr trâus, tsuv uô txos qơư, taz sik thôngx cxix xar uô tâu tsuv seiz car, qênhz yuôx, ntâus grê. Viv chuôz zênhx chuôz tas khênhr tsi car heik tas tsênhz mênhx, lok sik heik puz trâu tuz nhuôs, cưr tix…”

          Lơưr zơưv Bùi Thanh Hà, Phưv tsar Ban tôn giáo Chinhr phuv: Canr bộ têx chiz coaz hâur cxix luôk chinhr trị tâu thix ziv bổ nhiệm lol uô lênhs tov, coar lik jiês xuz thơưx tsuv txâuk hnuz nhôngs chiê uô côngz xưv hâur iz six cxiv. Đrâuv co zos cấp muôx qênhx seiz shuôk cuiz tênhv. Canr bôv tâu bổ nhiệm tsuv muôx txâuk đas jos chiê uô tiêr jênhv vưv tâu choz. Nênhs trâus kỷ luật cxôngx khiển trách ndê mul mak tsi tâu njuôs xav, xeir uô hâu nov hâur six hơưv tsơưs tiv zix iz shông cxôngx thâuv muôx cuiz tênhv kỷ luật. Zơưv Bùi Thanh Hà heik:

          “ Cur xar côngz xưv canr bộ zos côngz xưv lok six coaz tsôngv, pêz tưz muôx têx cui tênhv tsênhz mênhx lênhx coaz txos côngz xưv canr bộ cxôngx njuôs xav, thox cxov, tsưr ziv seiz shuôk xêir uô hâu nov jông, viv li uô hâux lưv co thiêz taz por tsênhz mênhx jênh chuv mak zuôr tax tâu chêx cuk jông. Hâur six hơưv trâus kỷ luật 1 shông tsi tâu xêir uô hâu nov siêz đuô zos huv đros. Uô tul tsi zos công chức, viên chức tsuv muôx đas jos jông, tiv zix canr bộ lênhs tov ziv zuôr trâus muôx đas jos jông đuô. Hâux lưv cui tênhv taz por txâuk đas jos zos hâux lưv zuôr trâus”.

          Đros cui tênhv đảng viên trâus kỷ luật, tsi puz uô nov hâur 1 shông cxôngx hnuz muôx cuiz tênhv, tsi tâu bo xeir lol hâur cấp ủy, tsi bo xeir uô hâu nov. No zuôr zos hâux lưv chiê taz por ngaz tul thiêz huôv tsar canr bộ, muôz siêz têx chiz coaz, taz viv li tsơưr lươngv thiêz chêx cuk huôx tôngv./.

                       (TTT-Txâur Vax cxeik nhênhv)