Hải quan Sơn La sir jos tir tar zax zênhz txix thax tsav ntus đriv

          Lơưr tix lâuk Nguyễn Thanh Hùng, công chức Tuêv nghiệp vụ Hải quan Chiềng Khương, nhoz Chi cục Hải Quan tỉnh Sơn La muk đhâu têx txox mêr cêr, muk đhâu têx tul đêx pur siêz txos hâur châuk thiêx li pov tâu lưx lươngv Hải quan nhoz no li têx cêr khưr. Tix lâuk Hùng pheiz kênh: Đros thax tsav đar, tuêv nghiệp vụ Hải quan Chiềng Khương thâuv tưs cux sir jos đros têx lưx lươngv li pênhz phax, Công an, coar lik niêv ciêz thôngz xor mông lok têx lênhx nênhs fêv, têx paz lênhx nênhs muôx lênhx coaz txos huôx tôngv nhiês muôv muôs hax huv, thâux gra zax zênhz...thôngx cxix uô têx tsưr ziv nghiệp vụ seiz car, phax tar zax zênhz huv đros qênhx shênhx tiv phaz, gôngr phênhv tuôr truôx txiv ngaz sâuv thax tsav:

          “Nhoz no lưx lươngv tsơưk, hâux lưv pov tâu têx uô cxâuv cux lok six lax; pêz phênhv ntâu uô ntâu zav hâux lưv, viv li yax six sik côngv đros têx lưx lươngv pênhz phax, công an hâur côngz xưv tơưv txênhz, qênhz yuôx nênhs phamv cxâuv, uô côngz xưv pâuz tsênhz qênhx shênhx sâuv thax tsav chiê phưx vưv trâu hâux lưv phax tar nhiês muôv muôs hax huv, cux xưk li muôv muôs zax zênhz tsi trơưk chei...”

          Chiềng Khương zos xã ntus đriv tỉnh Sơn La, muôx 20 cei cêr ntus đriv nhoz buôk têz qơưk Lào. Lơưr lưx lươngv muôx txơưx jênhv li ntâuk grê, 5 shôngk tror lok no, têx lênhx nênhs nhiês muôv muôs hax huv ziv zov chênhr, muôx têx sik côngv hâur ntâu têz qơưk, jeik tsês zax zênhz, tsơưr trâus txưr hâur hax huv, yêz vênhv teiv...

          Txix têx co, lưx lươngv Hải quan ntơưv Chiềng Khương thâuv tưs cux chuv tôngv pâuz tâu qênhx shênhx, sik côngv jông đros lưx lươngv muôx txơưx jênhv chiê phax tar zax zênhz tâu jeik tsês hâur têx hax huv chiê thâux muk đhâu ntus đriv, mêr cêr lok Việt Nam. Tiv zix seiz jông côngz xưv vênhv tôngv tsôngv box tiv phaz tsi cxaz chuôz nhiês thâux hax huv chuôr, paz jeik thiêz uô têx hâux lưv tsi trơưk cêr chei; heik kriê trâu chiz coaz Hải quan thiêz lưx lươngv muôx txơưx jênhv lok têx hâux lưv nhiês muôv muôs, thâux gra zax zênhz. Txix co, muôz siêz chêx cuk côngz xưv phax tar zax zênhz sâuv thax tsav, gôngr phênhv sik côngv tês por vêv ntus đriv têz qơưk. Pos Nguyễn Thị Thanh, tsôngv box jos Chiềng Khương, xã Chiềng Khương, huyện Sông Mã, tỉnh Sơn La heik:

          “Têx lưx lươngv muôx txơưx jênhv tsi tso chei mak zuk tsi car muk, tsi car uô tul tsi, ntâu lênhx nênhs nhoz no nhiês muk mak tsuv pov ciês trâu lưx lươngv muôx txơưx jênhv pâuz; ntâu jiês cux xar tiêk zuk uô li mak lax xar, taz sik xar muk xar lok pov siêz nhoz tsi kaz viv li tsuv pov trâu lưx lươngv muôx txơưx jênhv pâuz”.

          Txix shông 2018 txos nhiv no, Hải quan trôngx đriv Chiềng Khương tưz sik côngv đros têx lưx lươngv muôx txơưx jênhv qênhz pov 10 txuz ntâu, ntês tâu 14 lênhx nênhs; sâu zuôr xar 30 cxênhz njiêr zax zênhz shơư yuôx, 3 cir zax zênhz poz jêz, 2 đeiv zênhz đơưz thiêz 0,5 cir zax zênhz....Lơưr zơưv Nguyễn Trường Giang, Phưv Chi cục tsar Chi cục Hải quan tỉnh Sơn La, phưv txơưx Tuêv nghiệp vụ Hải quan trôngx đriv Chiềng Khương, jênhv pov côngz xưv phax tar nhiês muôv muôs hax huv  thiêz phax tar zax zênhz li kror coaz tsôngv, chiê ciêr chênhr qênhz pov, tir tar zax zênhz tâu muôz jeik hâur hax huv, Chi cục Hải quan thâuv tưs cux chuv tôngv sik côngv đros têx lưx lươngv cxiv tsa têx tsưr ziv tơưv txênhz, chêx chôngk lok hax huv muôx tsiv grê siêz, ntês têx lênhx nênhs uô cxâuv. Thôngx cxix, chuôz tsar sik côngv đros lưx lươngv muôx txơưx jênhv têz qơưk nhoz buôk co uô lơưr cui chế, thôngx ziv sik hux jos hâur 2 saz; cxơưz tiês côngz xưv vênhv tôngv tsôngv box, yax mông heik kriê cêr chei txos tsôngv box...

          “Pêz taz viv cux yax six uô côngz xưv zaoz zux chinhr trị, siêz xar txos yênhx cán bộ, công chức hâur taz viv, khưx phưx cxuô phêv liv uô jong têx tsưr ziv nghiệp vụ qênhz yuôx Hải quan, pir li muk qênhz yuôx, nhênhz chơưv qênhx shênhx, hâur xênhz huôx muôx têx phêv liv tưs mak tas nro taz viv sik đros côngv siêz khưx phưx têx phêv liv chiê uô tiêr jông jênhv vưv”.

          Chiê tuôv zênhv zoz qơưx jênhv vưv hâur qênhx shênhx yiêz, Tuêv nghiệp vụ Hải quan Chiềng Khương, Chi cục Hải quan tỉnh Sơn La tưz thiêz tsênhv sir jos hlôngr yiêz njiêz luv, tsưr ziv chiê chuv tôngv pâuz tâu xor mông, thôngx cxix krêz uô têx tsưr ziv tơưv txênhz, ruôr por tsês, tiv zix zos hâur têx hnuz kaz shôngk shông, sir jos đros têx lưx lươngv vũ trang sâuv thax tsav tir tar nênhs phamv cxâuv zax zênhz, por vêv luz nênhx ngaz tul trâu tsôngv box./.

(Trấn Long- Txâur Vax cxeik nhênhv)