Doanh nghiệp tsiv uô kôngz nuv nhoz Yên Bái njiz phêv liv thâuv muôs tơưv saz đrâuv têz qơưk

          Công ty cổ phần yuôx zêx Nghĩa Lộ zos iz hâur têx doanh nghiệp tsênhv nhoz tỉnh Yên Bái hâur hâux lưv sâu zuôr xiv huv trâu pox nhuôs, thôngx cxix tsưr tsix tsiv uô têx xiv huv yuôx zêx đuz phưx vưv muôs tơưv saz đrâuv têz qơưk. Ntu no tsênhv zos six hơưv sâu đê, taz sik xiv huv yuôx zêx đuz, công ty tsiv uô tâu muôs tâu kênhz viv khov txos niêv ciêz saz đrâuv têz qơưk, grê muôs cux txu grês cxôngx 4-5 tsov iz tênhr. Zơưv Nguyễn Thành Vinh, Giám đốc Công ty cổ phần yuôx zêx Nghĩa Lộ puz pâuz: Cxôngx hâur shôngk shông txos nhiv no, doanh nghiệp tsênhv yuôr 200 tênhr, txơưv li ntơư công ty cux chuv tôngv sâu zuôr xiv huv trâu nôngx mênhx đros grê cxôngx 3 cxênhz 300 txos 3 cxênhz 500 đeiv iz cir. Taz sik, zos tror muôs tsi tâu hax huv, doanh nghiệp thiêz tsôngv box nôngx mênhx zuôr njiz ntâu phêv liv:

          “Nhiêx ntiêr yêz thâux chuôz ndê 150 txos 160 tsov đeiv iz container 40 fi, tsov muôx nhos 40 txos 50% tsiv grê hax huv hâur iz container lơưv, co cux zos iz phêv liv. Cxôngx co tsôngv kruô cux heik tsuv sik seiz lax chiê txu grês grê muôs paz txưv nhiêx thâux hax huv, uô li mak zênhr shar txos hâux lưv tsiv uô, muôv muôs yuôx zêx”

          Nhiv no nhoz Yên Bái muôx yênhx châuv taz viv tsiv uô yuôx zêx đuz, xiv huv yuôx kruôr thâuv tsiv uô tax muôx nhos 15 cxênhz tênhr iz shôngk, phênhv ntâu muôs tơưv ciês lok sik choz trâu têx niêv ciêz Trung Quốc, Đài Loan, Tây Á, Trung Đông, Đông Âu thiêz Liên bang Nga. Taz sik, moz Covid-19 tưz uô phêv liv trâu hâux lưv muôv muôs xiv huv. Zơưv Chử Quốc Tuấn, Giám đốc Công ty TNHH Hưng Thịnh, TP Yên Bái puz pâuz:

          “Grê vênhv teiv chuôz ndê, muôx têx siêz đuô 4 txos 8 jiês pir đros tsêz no, tsêz uz. Tiv 2 zos grê yuôx ho txu grês, tsôngv kruô saz đrâuv têz qơưk tso tơưv ploz tsênhr hax huv kis taz sik tsơưr lươngv siêz, hax huv jông tiv zix phênhv ntâu tsi zuôr, muôs tsi tâu. Tiv 3 zos kênhz thêv nhiêx txiêx, muôx têx lênhx yuôr pêz muôx nhos 8 tỷ đeiv”.

          Six hơưv đhâu tsi taz yuôx zêx đuz mak iz cxiê hax huv kôngz nuv nhoz tỉnh Yên Bái li môngr kok ntông, trox ciêv fix cux muôs tơưv tsi tâu. Công ty cổ phần kôngz jôngr nuv zav nox Yên Bái tsiv uô môngr kok ntông zos 30 cxênhz tênhr iz shôngk, tsav muôx nhos 75%, taz sik cxôngx hâur shôngk shông txos nhiv no grê môngr kok ntông saz niêv ciêz Trung Quốc txu grês viv li nhiv no doanh nghiệp no tsênhv yuôr muôx nhos 10 cxênhz tênhr tsi tâu muôs tâu. Zơưv Trần Công Bình, Giám đốc Công ty cổ phần Kôngz jôngr nuv zav nox Yên Bái puz pâuz:

          “Phênhv muôs tơưv hâur shông njiz ntâu phêv liv, pêz thix ziv tâu cungz yax six thiêz ntâu đuô têx xor mông, tiv zix zos xor mông lok hâux lưv muôs tơưv saz đrâuv têz qơưk, têx xor mông ntơưv têx trôngx đriv, ntơưv têx têz qơưk mak pêz muôs tơưv tâu chiê têx doanh nghiệp xeir tâu, xav tênhv tâu zuk li têx liv zix, phêv liv thiêz cxiv tsa têx tsưr ziv jông tiv zix tsiv uô, muôv muôs”.

          Đros têx hax huv nto bê li yuôx zêx đuz, môngr kok ntông lok sik têx xiv huv kôngz nuv txơưr chiê phưx vưv muôs tơưv saz đrâuv têz qơưk, khênhr muôs tsi tâu hâur têz qơưk, viv li vênhv thix tso tơưv nhiv no zos têx chiz coaz ban nganhx tỉnh Yên Bái tsuv muôx têx tsưr ziv tsênhz mênhx chiê car chêx têx phêv liv trâu doanh nghiệp hâur qênhx shênhx moz covid-19 huôv xênhz li no, chiê ngaz tul hâux lưv tsiv uô, muôs tơưv têx xiv huv kôngz nuv trâu tsôngv box./.

(Đinh Tuấn- Txâur Vax cxeik nhênhv)

Lâul jok Y Yơh Kbuôr sir jos moz siêz uô côngv xưv jêx jok

Txix thâuv tror huôv moz Covid-19 jiês tiv 4 nhoz Đắk Lắk, txos yênhx hmo, lâul jok Y Yơh Kbuôr, nhoz jok Kmrơng Prong A, xar Ea Tu, thành phố Buôn Ma Thuột, ho đros tổ trưởng têx tổ liên gia muk trâu yênhx chuôz zis hâur jok chiê hêik sơưr đơưk uô truôx jông têx cui tênhv phax tar caz moz, hêik chor ziv chuôz zis muôx nênhs nhiv kruôr muk đêz lok tsuv muk hêik pâuz y têr thiêz chiv chir cêv kuôk ntơưv tsêr. Pos H’Ó Kbuôr, iz lênhx nênhs nhoz jok Kmrơng Prong A, xar Ea Tu, thành phố Buôn ma Thuột puz pâuz, đhâu xor mông sâuv đaix, pov chir thiêz đhâu chor jiês thav pêm đros lâul jok Y Yơh, chuôz zis tưz pâuz sir jos phax tar caz moz đuô. Thiêz txơưv tiêk kinh têr tsik tâu muôx luôx tưs, taz sik muôx tsơưs paz tsơưs, pos cux paz mê njil trâu Chinhr phủ li cuiv phax tar moz Covid-19:

“Cur cux tsik so tâu mnôngs yax kriê têx tsênhv njiêz lok qênhx shênhx caz moz thiêz phax tar caz moz hâur ziv chuôz zis mak zuk cux uô jông uô trơưk. Thiêz thâuv muôx chor  jiês hêik sơưr đơưk côngv paz mak cux đros paz, muôx tsơưs mak paz tsơưs, muôx ntâu mak paz ntâu khov trâu zuk muôx xưz”.

Jok Kmrơng Prong A nhiv no muôx zuôr xar 550 ziv chuôz zis đros muôx 2.200 lênhx nênhs, phênhv ntâu zos mênhx cxưx Êđê uô nênhx nhoz. Lâul jok moz siêz uô ntêx hlo, Ban chiv chir sêiz car sir jos uô hâux lưv, viv li chor phongz yaox cxiv tsa kinh têr, tuôr chiê vênhx huôv tâu chôngz pox nhuôs thôngx ziv đros uô. Viv li, jok cux tsênhv tuôr tsês tâu ntâu bôv đruôk tôngx, nxêz tôngx jông, ntâuz trâur lâus, têx trik yo cxôngx nzor, hâur đêx, tsêr ntêr. Thâuv tưs hâur jok muôx siz char, siz chês, cxuô lênhx nênhs sik đros jâuv chiê xav kror zos, kror  uô zuôv cov tsênhz mênhx, tsơưs zôngv txos cêr chêi têz qơưk chiê đơưk tu. Lâul jok Y Yơh lok six shir phaz thâuv pov tiêk, txơưv njiz trâus phiv liv txix têx hlôngr yiêz, taz sik jok Kmrơng Prong A cux tsênhv zos luz jok Êđê muôx ntâu vênhx huôv jông:

“Cxuô lênhx nênhs, chor hluôk nênhs hâur jok tưz pâuz tâu thiêz sir jos uô trơưk jông viv li pêz shir phaz hênhr. Tiv oz zos lok tuôr chiê têx phongx cxưx, vênhx huôv cxôngx nzor, txi côngv pox côngz zơưv công lok zos thor muôx đas jos, txi côngv hâur đêx mak pêz, tsar jok, chor tsưr tsix đoanx thêv, hôiv đôngx lâul jok puôr lênhx sik côngv đros uô, hêik cxuô lênhx nênhs hâur jok sik đros por vêv, tuôr tsês chiê”.

Lơưr zơưv Bùi Văn Hượng, cán bộ vênhx huôv xar Ea Tu, thành phố Buôn Ma Thuột, lâul jok Y Yơh tưz muôx ntâu gôngr côngv paz trâu ntơưv thax tsav qơư. Đros muôx 30 ntâu shông uô côngz xưv mặt trận, uô chủ tịch Hôiv đồng lâul jok hâur xar ntâu shông, txơưv uô kror hâux lưv tưs, zơưv Y Yơh cux sir jos sik côngv đros chor cán bộ, hôiv đoanx thêv hâur jok chiê uô tiêr tâu jông têx hâux lưv, phuôx huiz zuk li pưk txux chiê sik côngv pêx xênhv, zos lênhx nênhs uô ntêx hlo hâur cxuô kror hâux lưv. Ciês lâul jok Y Yơh cux zos iz lênhx nênhs uô ntêx hlo lok tuôr tsês chiê vênhx huôv, kruôz kriê têx tuz nhuôs jông. Zơưv “Tsik so hêik đros uô” viv li tâu pêx xênhv njênhs njôngr. Tiv zix, thâuv uô chủ tịch Hội đồng lâul jok, zơưv tưz paz phuôx huiz yênhx thành viên hôiv li pưk txux đros thiêz pêx xênhv nhoz têx jêx jok:

“Hôiv đồng lâul jok cux hêik têx lâul jok, hêik chor lâul jok txơưr kriz uô jông hêik zuk têx tuz nhuôs cov uô nênhx jông tsik trâus cxâuv txos têx txiêz nanv xar hôiv, thiêz uô jông lơưr têx tsưr ziv chiê phax tar moz Covid-19. Hôiv đồng lâul jok cux cxaz chuôz trâu chor hâux lưv tuôr chiê zuk mênhx cxưx têx vênhx huôv, hêik têx tuz nhuôs cov tsik uô cxâuv txos cêr chêi  têz qơưk”.

Uô nênhx nhoz đros pêx xênhv thiêz pâuz tâu pêx xênhv sơưr đơưk siêz xar, 30 shông ntâu đhâu, lâul jok Y Yơh Kbuôr tưz zos yênhx “tsênhv qơư sik côngv siêz” hâur jok Kmrơng Prong A hêik taz thiêz chor jêx jok xar Ea Tu hêik cxuô. Đros tsưr ziv uô “Muk yênhx kror qơư, hêik yênhx chuôz zis”, uô jông hêik, huv cêr chêi, lâul jok Y Yơh hax zav tâu nênhs hâur jok njênhs njôngr, uô trơưk. Khov co tưz paz tâu lok six ntâu trâu hâux lưv hêik sơưr đơưk cxiv uô luz nênhx yiêz ntơưv qơư pêx xênhv nhoz, uô truôx jông đuô cêr sik côngv siêz nhoz cxuô mênhx cxưx hâur jêx jok./.

(TTTN-Lik Thox cxêik nhênhv)