Sơn La: Bax jông trâu jiês tưr thi cơưv tas ntơưr lớp 12 thôngz têz qơưk shông 2019

          1/ Nhoz jông, uô ntêx thor cox puz pâuz, chiê jiês tưr thik cơưv tas ntơưr lớp 12 thôngz têz qơưk shông 2019 no ntơưv tiv phaz tax chêx cuk jông, Sở tưz chox kriê têx tsêr cơưv tsưr tsix cơưv shâuv trâu shux xênhz li chas?

          Zơưv Nguyễn Duy Hoàng: Chiê bax trâu jiês tưr thik cơưv tas ntơưr lớp 12 thôngz têz qơưk shông 2019 sâuv thax tsav tỉnh Sơn La, ciês thâuv suôv câuv jiês cơưv tiv 1 thiêz krêz uô tsaz yênhx jiês cơưv tiv 2, Sở zaoz zux thiêz thox cxov Sơn La tưz chox kriê têx taz viv muôx tsưr ziv trâu côngz xưv kriê cxaz trâu shux xênhz khối lớp 12, chuôz tsar trâu têx shux xênhz tâu cơưv shâuv lơưr Bộ zaoz zux thiêz thox cxov li tsưr ziv chox kriê lok chuyên môn; hâur co tsov cưv tiv zix txos têx shux xênhz zos mênhx cxưx tsơưs nênhs nhoz thax tsav txov nhêv....Iz hâux lưv thiêz zos lơưr Bộ li đề thi siv, tỉnh tưz tsưr tsix trâu shux xênhz khối lớp 12 thik siv chiê shux xênhz shưv đros tsưr ziv, njiêz luv thik, kriê uô ntêx trâu têx shux xênhz cui chế thik shông 2019.

          2/ Tsêz no iz cxiê tiv phaz hâur têz qơưk, hâur co muôx Sơn La tưz muôx têx uô cxâuv hâur jiês tưr thik cơưv tas ntơưr lớp 12 thôngz têz qơưk, uô tas nro xã hội tsi jông siêz. Shông no, lok saz nganhx zaoz zux mak tưz chuv tôngv krêz uô têx tsưr ziv li chas chiê tir tar têx uô cxâuv cui chế tưr thik, chuôz tsar trâu jiês tưr thik tâu tsưr tsix jông?

          Zơưv Nguyễn Duy Hoàng: Chiê jiês tưr thik cơưv tas ntơưr lớp 12 thôngz têz qơưk shông 2019 sâuv thax tsav tỉnh Sơn La tsưr tsix taz por, uô jông trơưk cui chế, pêz tưz chox kriê têx taz viv tsêr cơưv, tiv zix zos têx cán bộ coar lik zaoz zux, têx cưk kriê cxaz chuôz jiês thik no thiêz têx mê nhuôs shux xênhz lớp 12 hâur tỉnh cơưv shâuv, heik kriê jông Bộ zaoz zux thiêz thox cxov li cui chế 04 shông 2017 tâu kho đuô shông 2018 thiêz cxaz nzir ntơưv cui chế 03 shông 2019, chiê tas nro têx đồng chí co njuôs xav zuôr cxaz chuôz jiês thik no puôr lênhx pâuz thôngz tas nro Cui chê li têx cui tênhv; truôx siêz tsi chiê muôx yưv têx uô cxâuv. Thôngx cxix đros tsưr ziv no, pêz cux chuôz tsar côngz xưv yax mông txos shux xênhz li têx lênhx uô niêv uô txir chiê shux xênhz li niêv txir thôngx ziv paz max nganhx zaoz zux hâur six hơưv tsưr tsix thik. Iz tsưr ziv thiêz zos pêz chuôz tsar têx tsưr ziv taz por txiv ngaz lok kỹ thuật; hâur co chuôz tsar têx meir camera lơưr Cui chế li cui tênhv, phưx vưv trâu hâux lưv seiz thik, coar lik jax thik thiêz côngz xưv in đề thi.

          3/ Cux viv uô cxâuv hâur jiês tưr thik tsêz no, iz cxiê cán bộ uô côngz xưv seiz car tưr thik hâur nganhx tưz trâus tik cêr cxâuv. Zos li, côngz xưv xeir tsov lênhx nênhs uô têx hâux lưv co hâur jiês tưr thik shông no  tâu Sở tsov cưv li chas, thor cox puz pâuz?

          Zơưv Nguyễn Duy Hoàng: Lok lênhx nênhs mak pêz tưz sik côngv đros têx cấp têx nganhx chuv tôngv pâuz tsênhz lok têx cán bộ coar lik, têx cưk kriê zuor cxaz chuôz côngz xưv seiz tưr thik shông 2019 li pênhr xưv chuyên môn, lok siêz xar txơưx jênhv, lok siêz xar chinhr trị, sâuv chinhz yênhx xeir têx đồng chí muôx txâuk pênhr xưv chuyên môn, siêz đơưz thiêz tâu ntâus grê uô jông jênhv vưv ndê muk thiêx tâu cxaz chuôz jiês thik.

          4/ Zos tiv phaz muôx chôngz tsôngv box mênhx cxưx tsơưs nênhs nhoz uô nênhx: phiv liv lok kinh têr, lok saz tỉnh thiêz nganhx mak muôx têx tsênhv chêi paz txưv li chas chiê shux xênhz zos mênhx cxưx tsơưs nênhs tưr thik tâu jông tiv zix?

          Zơưv Nguyễn Duy Hoàng: Pêz tưz heik thiêz sik côngv đros têx cấp, têx nganhx, têx tsưr tsix lênhx nênhs paz txưv trâu têx mê shux xênhz qơư nox nhoz. Thôngx cxix sir jos heik trâu tỉnh thiêz têx nganhx sik côngv đros nganhx zaoz zux chuôz tsar côngz xưv taz por zaoz thôngz, taz por txiv ngaz ntơưv têx qơư mak têx shux xênhz zuôr cxaz chuôz tưr thik, cux xưk li taz por vêv xênhz zav nox ntơưv têx qơư zuôr tsưr tsix thik sâuv thax tsav tỉnh. Tiv zix zos huiz tôngv shux xênhz li niêv txir sâuv thax tsav tỉnh paz max, tsi chiê têx mê nhuôs shux xênhz muôx luz nênhx txov nhêv tsi tâu tuôx cxaz chuôz thik.

          Thor uô cox tsâus ntâu!

(Thu Thùy-Txâur Vax cxeik nhênhv)

Lâm Đồng: Txix xar pluôs 30a, Đạ Rsal uô tiêr luôs hâux lưv cxiv tsa jêx jok yiêz jông

Xar Đạ Rsal, huyện Đam Rông zos iz hâur tỉnh Lâm Đồng chor xar nhoz thax tsav tox siêz đêz đrôngl, kuôk thành phố Đà Lạt xar muôx 100 cêik cêr. Thax tsav tox trôngz, cêr muk lok đaz tuôs, ntâu dịch vụ li tênhv tênhz têz qơưk, thôngz xor mông, nta suôz-đhuôz shav… puôr lênhx khov trâu tỉnh Đắk Lắk. shông 2009, thâuv tâu xêir uô xar cxiv tsa jêx jok yiêz, Đạ Rsal nhiv kruôr uô tâu 3 luôs hâux lưv, chor chuôz zis pluôs xar muôx 34%, phênhv sâu xav lênhx nênhs tsuôk tâu muôx 8 triệu đêiv ntâu. Uô lơưr phongz yaox sik côngv têk cxiv tsa jêx jok yiêz, ntơưv jok Pang Pế Đơng, pêx xenhv tưz ntor cà phê, ruôr nja vax muôz ar chiê cxiv uô tsêr cơưv ntơưr, uô cêr muk lok. Txơưv tiêk chuôz zis tsuôk muôx zuôr xar 1 ha ar têz chos cà phê, luz nênhx tsênhv txov nhêv, taz sik thâuv tâu hêik kriê, tix lâus Bon Krông Y K’Nai, jok Pang Pế Đơng tưz muôz 1000 yiv ndis ar têz chiê cxiv uô tsêr cơưv ntơưr nhuôs zâu.“Pov chor nhuôs muk cơưv njiz ntâu phiv liv, têx tuz nhuôs tsik muôx qơư cơưv ntơưr, viv li tsar jok thiêz UBND tuôx hêik cov muôz ar. Zuk cux shir phaz viv tưz paz tsar tov trâu têx tuz nhuôs tâu cơưv ntơưr”.

Zơưv Bon Krông Y Boong-Bí thư chi bộ Pang Pế Đơng puz pâuz, thâuv ntêx, txos chêix ntux nas, ntâu ntu cêr hâur jok gok, nhav jơưk, bluô, muk lok phiv liv nhiv no tưz tâu uô cêr bê tông. Muôx tâu li co, đros muôx têz qơưk paz chuôz lov cxiv tsa, pox nhuôs tưz muôz ar thiêz sik đros cxaz chuôz hnuz côngz uô.“Thâuv tsik tâu muôx tsaz yênhx jêx jok yiêz, pox nhuôs luz nênhx nox nhoz, muk lok njiz ntâu phiv liv. Nhiv no pox nhuôs lok six shir phaz thâuv muk uô lox tôngv xênhz yar, thâux xa hax huv. Chor nhuôs gruôs muk cơưv ntơưr thiêz sir jos đuô”.

Đhâu thâuv tâu uô cêr bê tông, ntâu ntu cêr ntơưv xar Đạ Rsal, huyện Đam Rông tưz tâu đoanx hluôk nênhs uô côngz trinhx “tơưl tênhz chis pov cêr”. Thôngx ziv uô tsưr ziv no, xar muôx 300 ziv chuôz zí snhoz jok Liên Hương tưz sik côngv muôx 100 triệu đêiv ntâu chiê cxiv uô cxiv luôs tơưl tênhz chis pov cêr thiêz jênhv thêv nhiêx tênhv yênhx hli. Zơưv Võ Xuân Lộc-Tsar jok Liên Hương puz pâuz, côngz trinhx no tưz tsik zos paz trâu muk lok zôngx ziv đuô thâuv hmo ntux mak tsênhv paz tuôr truôx ngaz tuk.“Nhiv no cêr muôx, tênhv tênhz tâu tơưl pov cêr, pox nhuôs lok six shir phaz. Cê taz por ngaz tuk tsiv ngaz ntơưv tiv phaz. Txos chêix cà phê, yêz muk lok cux zôngx ziv đuô. Lok luz nênhx vênhx huôv mak pêx xênhv muôx luz nênhx jông đuô, vav mênhx đuô”.

Lơưr UBND xar Đạ Rsal, huyện Đam Rông, tỉnh Lâm Đồng, tas nro chor nhiêx muôz cxiv tsa jêx jok yiêz nhoz tiv phaz hâur têx shông đhâu zos 232 tiv đêiv, hâur co pêx xênhv gôngr côngv xar muôx 5 tiv đêiv thiêz 4.600 hnuz côngk đas jos uô. Đhâu co, tưz muôx 45 cêik cêr ntâu tâu uô txix bê tông, luôv poz jêz. Ntâu tsưr ziv uô xênhz yar kôngz nuv paz muôx tâu phênhv sâu yênhx puô triệu đêiv iz shông, pêx xênhv luz nênhx tâu hlôngr yiêz ntâu. Txix muôx 34% chuôz zis pluôs, nhiv no tsuôk yuôr 5%; phênhv sâu xav lơưr lênhx nênhs ndê xar muôx 4 jiês pir li 10 shông đrav ntêx. Zơưv Thái Viết Phước, Chủ tịch UBND xar Đạ Rsal khav tênhv, uô tâu hâur cxiv tsa jêx jok yiêz, đros cấp ủy, chính quyền li sir jos, pêx xênhv li têx gôngr côngv muôx tsiv gri cuêz tênhv.“Tiv phaz zos xar pluôs, chiê kriz uô cxiv tsa jêx jok yiêz mak njiz ntâu phiv liv. Taz sik, đros yax kriê, hêik pâuz thiêz muôx pêx xênhv thôngx ziv tưz uô tâu tiêr cxiv tsa jêx jok yiêz. Tiv zix, muôx lok six ntâu ziv chuôz zis txơưv tiêk tsêhv txov nhêv taz sik cux muôz ar, shôngz ntông, nhiêx txiêx chiê paz cxiv uô cêr muk lok hâur jêx jok yiêz. Co zos chính quyền tiv phaz li sir jos hâur hâux lưv yax kriê hêik pâuz thiêz pêx xênhv cux thôngx ziv siêz đros tiv phaz chiê cxiv tsa jêx jok yiêz jông hâur ntu zuôr txos”./.

(TTTN-Lik Thox cxêik nhênhv)