Nênhs tuôr tsês cưr cxiêx then, trax tính nhoz tox siêz Đăk Lăk

          Cxôngx ntâu shông no, suôz trax tính, suôz cưr cxiêx then cxôngx têx lênhx nênhs hâur Câu lạc bộ trax tính tưz lok six shưv jê đros tsôngv box nhoz jos Ea Kanh, xã Dliê Ya, huyện Krông Năng, tỉnh Đăk Lăk. Câu lạc bộ yênhx lix cxôngx shông 2012, nhiv no muôx 20 lênhx nênhs cxaz chuôz. No zos câu lạc bộ uô ntêx nyuôk hâur phongz yaox vênhx huôv vênhx ziv nhoz tiv phaz, cxaz chuôz ntâu tsaz yênhx lox hâur thiêz đrâuv tỉnh, tax tâu ntâu giải lox. Tix lâuk HOàng Văn Quyết lênhx nênhs hâur Câu lạc bộ trax tính, jos Ea Kanh, xã Dliê Ya, huyện Krông Năng puz pâuz:    “Cur cxaz chuôz câu lạc bộ txos nhiv no cux tâu 4 shông lơưv. Cxôngx thâuv tsênhv zâu cur tưz mnôngs cưr cxiêx then thiêz lok six nhiêv. Tâu tix lâuk Tân jông siêz heik kriê cux pâuz jux jus, tiv zix zos tâu heik cưr cxiêx, tiv 2 zos cxênhx hluôk cux xar njôngr tuôr tsês tâu mênhx cxưx Tày, Nùng li vênhx huôv jông”.

          Chủ nhiệm câu lạc bộ no zos tix lâuk Nông Văn Tân, mênhx cxưx Tày xênhz shông 1987. Lơưr chuôz zis mul Đăk Lăk nhoz uô nênhx tưz tâu 30 shông ntâu, txơưv tsi tâu iz jiês tror lok Cao Bằng seiz kuz têz qơưk, taz sik cxôngx thâuv tsênhv zâu tix lâuk thâuv tưs cux lok six nhiêv mnôngs txir thiêz txir nzơưv li suôz trax tính thiêz suôz cưr cxiêx then. Lox mê njik, tix lâuk khênhr mnôngs Đeix, mnôngs băng thiêz shâuv heik lơưr. Jux jus tix lâuk tưz txơưx heik cưr cxiêx then thiêz ziv nhiêv txos đuô. Tix lâuk yênhx lix Câu lạc bộ trax tính, chêx chôngk têx lênhx nênhs cux nhiêv txos cưr cxiêx then, trax tính li zuk nhoz tiv phaz, shâuv thiêz tuôr tsês têx jax trax tính, cưr cxiêx then. Thâuv tsi uô hâux lưv tul tsi, tix lâuk Nông Văn Tân mul cxuô qơư nriêr pâuz cxaz têx jax trax tính, cưr cxiêx then jông. Hâur cheix so sor, tix lâuk khênhr krêz lớp kriê ntâus trax tính, heik cưr cxiêx then tsi zuôr nhiêx txiêx trâu têx lênhx nênhs nhiêv shâuv. Tsi taz hâur jos, hâur xã mak ntâu lênhx hluôk nênhs, txir hloz niêv hloz nhoz têx huyện đêz, muôx têx lênhx nhoz Đăk Nông cux tuôx cơưv shâuv. Tix lâuk Nông Văn Tân heik:    “Cxôngx thâuv yênhx lix câu lạc bộ, krêz lớp kriê trax tính, cưr cxiêx then txos nhiv no pox nhuôs hâur jos, hâur xã tưz heik tuz nhuôs cxaz chuôz chiê tuôr tsês vênhx huôv mênhx cxưx. Cur cux nhiêv uô trax tính thiêz uô tâu luz trax no, uô yênhx hmo tsi zuôr pư, thâuv trax đror huv zuk siêz mak thiêx li tâu. Viv trax zuk chiv chir uô mak tsi xưk li trax nhoz faz Bắc, trax cur uô mak reik tâu mic cxix cxuô, jông trâu hâux lưv mul ntâus trâu tsôngv kruô nhoz cxuô qơư mnôngs”.

          30 shông ntâu đhâu nhoz têz qơưk yiêz, cưr cxiêx then, trax tính zos iz vênhx huôv muôx đros đreiv hâur luz nênhx, zos têx uô trâu ndo txos kuz têz qơưk Cao Bằng, txos nênhs Tày, Nùng nhoz jos Ea Kanh, xã Dliê Ya, huyện Krông Năng. Zơưv Nông Văn Páo, tsar jos Ea Kanh puz pâuz, khov muôx tix lâuk Nông Văn Tân sir jos vênhv tôngv, hla đhâu cxuô phêv liv qir thơưx, câu lạc bộ trax tính ziv hnuz ziv huôv tsar, têx lênhx nênhs cxaz chuôz ziv hnuz ziv chôngz. Đros co, têx hluôk nênhs txơưx heik cưr cxiêx then, ntâus trax tính ziv chôngz tuôx: “Tix lâuk Tân lok six moz siêz tuôr tsês vênhx huôv mênhx cxưx. Nhiv no tix lâuk cê xar tơưv cê uô trax tính tâu pox nhuôs Tày Nùng têx xã hâur huyện Krông Năng thiêz nhoz têx qơư txơưr lok six nhiêv txos”.

Tix lâuk Nông Văn Tân li têx cêr moz siêz tuôr tsês cưr cxiêx then, trax tính tsênhv ziv tsuôk li tâu chuôz cxaz thâuv câu lạc bộ ziv hnuz ziv muôx chôngz lênhx nênhs cxaz chuôz. Tsi taz tuôr tsês thiêz phuôx huiz tsiv grê vênhx huôv sâuv têz qơưk nhoz yiêz, trax tính, cưr cxiêx then tsênhv gôngr phênhv uô thax tsav Đăk Lăk muôx cxaz iz vênhx huôv jông thiêz tsuv tâu tuôr tsês phuôx huiz tsi chiê pôngz plox./.

(H.Xíu- Txâur Vax cxeik nhênhv)

Điện Biên tsênhv yuôr iz ntu ntêr thiêx tror huôv tsar truôx du lix

        Thax tsav qơư lịch sử trôngz A1 (thành phố Điện Biên Phủ), zos iz hâur 7 thax tsav qơư tsênhv taz tov tâu ngành du lix tỉnh Điện Biên huôv tsar uô truôx chiê tsôngv kruô tuôx ndis shuôk. Taz sik, ntơư cux tsênhv muôx tsơưs lênhx tuôx tuôx sêiz shuôk thiêz chor nênhs sêiz car, yax kriê tsuôk puz txix 30 lênhx kruô hâur iz jiês muk lok ndis shuôk uô si hâur thax tsav.

          Chiê cêv kuôk xã hội cov tâu trơưk li Chính phủ Chỉ thị số 19, hur si chor nênhs uô hâux lưv yax kriê thiêz tsôngv kruô tuôx sêiz shuôk têz qơưs, ndis uô si hâur thax tsav, tsuv tâu chox ntâuz bos kror ndâux, muôz yuôx tuô caz moz nzuôr têk, sêiz njuôk moz hur tiz si. Muôx chôngz lênhx kruô tuôx sêiz shuôk thax tsav trôngz A1 hâur têx hnuz đhâu lok no cux hêik pâuz tiêk: Tsôngv kruô tuôx sêiz shuôk têz qơưs txos Điện Biên hâur ntu no cux zos xar pâuz thiêz xar pov thax tsav qơư tir ntâuk zênhx tros châuz nhoz saz kâuv têz pêz têz qơưs. Zơưv Lê Xuân Liêm, iz lênhx kruô nhoz tỉnh Yên Bái tuôx ndis ntux sêiz shuôk têz qơưs hêik pâuz: “Hâur ntu đrav ntêx zos di tích lịch sử, taz sik nhiv no pêz sêiz pov Điện Biên zos iz thax tsav đrôngl lox jông jav. Thiêz trơưk li cur xar mak hâur ntu zuôr txos no, Điện Biên tsênhv zuôr huôv tsar jông đuô, viv ntơưv no tưz muôx yar yêz ntux, zôngx ziv trâu tsôngv kruô muk lok sêiz shuôk têz qơưs”

Kaz hli 4 txos trâu hâur hli 5 xiêz no, cux tâu xav tiêk zos ntu zuôr muôx chôngz lênhx kruô tuôx ndis ntux sêiz shuôk têz qơưs txos Điện Biên; viv txix ciês hâur luz hli 3, Điện Biên tưz kriz uô ntâu ntênhk hội hơưv tok hnuz tir ntâuk zênhx tros châuz Điện Biên Phủ. Ntơư zos ntênhk hội pax lâus; ntênhk hội Hoàng Công Chất…Taz sik, hâur têx hnuz 30/4 thiêz xiêz 1/5 nhiv kruôr đhâu tsik ntêr no, tsuôk muôx txos 2.500 lênhx kruô tuôx ndis shuôk txos Điện Biên. Chênhr zos li hêik ntơư, du lix Điện Biên tsuv yuôr iz ntu ntêr thiêx zuôr tror huôv tsar tâu truôx li têx shông uô ntêx. Ntơư cux zos iz kro chiê têx cơ quan sêiz car, tror cxiv kho đuô cxuô thax tsav qơư du lix cov jông jav thiêz huv đros tsôngv kruô siêz nhiêv: “Trơưk li njuôk xav,  tsuv zos oz pêz luz hli sâuv no thiêz thiêx zuôr muôx chôngz lênhx kruô nhoz oz chas têz qơưs tuôx ndis shuôk txos Điện Bỉên. Chênhr viv li, hâur ntu zuôr txos no, pêz tsênhv zuôr tror cxiv kho đuô cxuô thax tsav qơư uô si thiêz têx tsêr tok kruô cov jông jav, huv đros tsôngv kruô. Đros ntơư, tsuv tso chor nênhs yax kriê hêik lok cxuô qơư uô si trâu tsôngv kruô, tâu muk cơưv cxaz nzir txux chi lok luôs hâux lưv piêr kriê trâu tsôngv kruô pâuz lok têx qơư du lix, qơư tir ntâuk zênhx tros châuz hâur thax tsav tỉnh Điện Biên”

Trơưk li njuôk xav, hâur shông 2020 no, hur si tsôngv kruô ndis ntux sêiz shuôk têz qơưs tuôx trâu Điện Biên zuôr tax tâu 910.000 lênhx, muôx phênhv sâu tâu nhiêx txiêx zos 1.500 tỷ đồng. Taz sik, trơưk li thôngz sâu hâur 3 luz hlik hâur shông shông, chor kruô tuôx ndis ntux sêiz shuôk têz qơưs txos Điện Biên tsuôk tax tâu 9,6%,  phênhv sâu tâu nhiêx txiêx zos 137 tỷ đêiv, xav mak txo grê tsơưs 4 jiês pir li têx shông uô ntêx. Chênhr zos li hêik ntơư, iz chas sđ sik côngv têk tir thêir moz Covid 19, ngênhx du lix Điện Biên tsênhv taz tov sir jos bax cxuô zav chiê tror huôv tsar cov tâu truôx du lix li têx shông uô ntêx./.

                                            Vũ Lợi, CQTT khu vực Tây Bắc