Têx hlôngr yiêz sâuv thax tsav Tả Lèng

Txox cêr ar txuôs tsênhv qơư xã Tả Lèng đros jos Tả Lèng II, thâuv tsik tâu muôx cêr lênhv poz jêz mak tsôngv px muk lok hâur chêix ntux nas bluô hênhr, nhiv no tưz hlôngr yênhx txox cêr bê tông hur đu. Zos tox siêz nhoz siêz 1200 yiv pir li niêv đêx hiêr, qiv hơưv jông, thâuv ntêx Tả Lèng zos thax tsav chos ntông zax zênhz tiv zix nhoz Tây Bắc. Mênhv chêx ar têz hâur xã tsuôk muôx mê njik ar zos chos kôngz lôngk li blêx, poz cưk, chor tsênhv yuôr zos zos zax zênhz. Zơưv Jêz Xênhv Hav lênhx nênhs thâuv ntêx chos zax zênhz tror thav txos ntu đrav ntêx: Thâuv têz qơưk tsi tâu txưr, pox nhuos chos zax zênhz cxuô jêx jos, pox nhuôs lênhx tưs cux hâuk zax zênhz:“Thâuv têz qơưk tsi tâu txưr chos zax zênhz mak chuôz zis tưs hâur jos cux chos, muôx têx chuôz zis chos tâu 2,3 cir mis zax zênhz. Mis zax zênhz pox nhuôs chox lol zôngv, uô yuôx trâu tsiêx cxu, muôs trâu têx lênhx nênhs muôx zênhs zax zênhz tsi chiv chir chos tâu, viv li pox nhuôs trâus yeiz pluôk ntâu hênhr. Tov kaz no thâuv têz qơưk txưr chos mak pox nhuôs thiêx muôx nox muôx nhnar, mê nhuôs thiêx tâu muk cơưv ntơưr”.

          Zơưv Lưv Xênhv Hav, Tsar công an xã Tả Lèng puz pâuz: Hâuk zax zênhz mak luz nênhx zuôr yeiz pluôk pôngz kaz xưz, txiv ngaz xã hội tsi taz por. Txos shông 2010, sâuv thax tsav tsênhv yuôr 50 ntâu lênhx nênhs muôx zênhs zax zênhz, cấp ủy, chinhr quyênx xã tsuv truôx siêz chox mul chiv zênhs zax zênhz; nhiv no têx lênhx nênhs muôx zênhs zax zênhz nhoz ntơưv tiv phaz tsênhv yuôr 6 lênhx:“Cxôngx têx shông 1990 mak qir đoz luôx tas; tsuôk yuôr iz cxiê ziv lơưr cxoz txưv chos xưz. Thâuv muk vênhv tôngv pox nhuôs đoz luôx mak lơưr cux tsi thôngx ziv. Taz sik tov kaz no pâuz tâu zax zênhz li txux hiêv, ntâu lênhx nênhs trâus mul cơư tux, niêv txir tuôs nzor, mê nhuôs tsi muôx niêv tsi muôx txir, tsi muôx qơư khov vav, tsi muôx tsêr nhoz...pox nhuôs thiêx li thôngx ziv đoz luôx por tsês zax zênhz”.

          Xã Tả Lèng muôx 12 jêx jos, đros 90% zos tsôngv box mênhx cxưx Hmôngz nhoz uô nenhx. Đhâu zuôr xar 30 shông cxôngx thâuv têz qơưk vênhv tôngv đoz por tsês tsoz zax zênhz, khov tsaz yênhx cxiv tsa nôngx cxênhz yiêz, cêr zaoz thôngz mul lol nhiv no tâu luôv trox cxeik; hur đu, njuôz jông. Đras liêx zax zênhz thâuv ntêx nhiv no zos têx liêx blêx, iz shông chos oz chiv, cungz kôngz krâur trâu tsôngv box. Đrâuv co, 3000 cxênhz ntâu hecta jôngr tâu choz por vêv cux chox lol phênhv sâu hâur niêx shông trâu tsôngv box: Zơưv Phạm Văn Kiện, Chủ tịch UB xã Tả Lèng puz pâuz: “Hâur têx shôngk đhâu pox nhuôs sâuv thax tsav tưz txơưx krêz uô têx trâur nuv tsêz chos yiêz li chos yuôx njuôz, chos sa nhân...chos txir tuz ziz chiê huôv tsar uô nox uô hâuk. Tu zus mak huôv tsar zus têx tsiêx cxu huv đros tiv phaz li nhux, nênhk, yik....Txos nhiv no chor ziv chuôz zis pluôk sâuv thax tsav xã tưz txu gris ntâu, pox nhuôs luz nênhx tâu muôz siêz lok six ntâu”.

          Txơưv luz nênhx tsênhv yuôr ntâu phêv liv, taz sik Tả Lèng hnuz no tsi yuôr ziv chuôz zis pluôk, tsi yuôr têx tsêr fênhz suôz lav uô lav nhoz thiêz. Hlôngr co zos têx luz tsêr truôx jông, đros têx côngz tsinhx tâu tez qơưk yưv pênhr uô li tênhv tênhz, cêr mul lol, tsêr cơưv ntơưr, qơư y tế jông. Thax tsav muôx ntu zos qơư chos zax zênhz ntâu tiv zix Tây Bắc nhiv no tsênhz tsênhz tưz muôx têx hlôngr yiêz jông./.

(K.Kiên-Txâur Vax cxeik nhênhv)