Heik lol têx nhuôs zâu tsi tâu muôx 5 shông trâul tuôs nhoz Điện Biên Đông, Điện Biên

Trơưk li Tsênhv qơư Y tế huyện Điện Biên Đông thông sâu, shông 2017, tas nro huyện muôx txos 90 lênhx nhuôs zâu tsi tâu muôx 5 shông trâul tuôs, hâur co ntâu yax nhoz trâu têx xã li: Phì Nhừ, (17 lênhx), Pú Nhi (10 lênhx). Txos shông 2018 tas nro huyện tsuôk txo grêk tsơưs tâu 2 lênhx nhuôs trâul tuôs tsi tâu muôx 5 shông pir li shông 2017 thiêz têx xã muôx ntâu lênhx nhuôs li heik sâuv trâul tuôs cux zos chor xã muôx cêr mul lok phiv liv, kinh tế tsi yuô huôv tsar li: Phì Nhừ-14 lênhx, Háng Lìa 11 lênhx; Phình Giàng 10 lênhx.... Tsuôk xav ciês hâur 7 luz hlik hâur shôngk shông no, tas nro huyện Điện Biên Đông tưz muôx txos 48 lênhx nhuôs zâu tsi tâu muôx 5 shông trâul tuôs. Hâur têx lênhx nhuôv zâu tsi tâu muôx 5 shông trâul tuôs ntơưv thax tsav Điện Biên Đông,  phênhv ntâu zos chor nhuôs zâu tsi tâu muôx iz shông, xav kror đruôz đraz hâur niêx shông zos 80%. Qir tiv phênhv ntâu tâu xav zos trâus moz njưk, uô tsi tâuk pa, nox tsi txâuk têx jâuz mor.... Zơưv Vax Quốc Minh, Chủ tịch Ủy ban xã Keo Lôm, huyện Điện Biên Đông heik pâuz, xav kror đruôz đraz iz shông hâur xã puôr lênhx muôx txix 5-7 lênhx nhuôv tsi tâu muôx 5 shông trâul tuôs. Qir tiv phênhv ntâu puôr lênhx zos txix tsôngv box sđ tsi yuô tâu muôx txux chi jênhv pâuz, tu têx nhuôs tsi yuô jông:

“Tsênhz tiês têx li heik no zos viv tsôngv box sđ tsi yuô moz siêz tu, seiz shuôs zuk têx mê nhuôv jông. Lơưr lok six moz siêz khưr huôv tsar uô nox, niêx hnuz muk uô liêx têz tsâuk ntux mav lok tsêr, ntâu jiês mê nhuôv tưz muôx moz lơưv, taz sik tsôngv box cux six max muk uô liêx têz, tsi tâu tâu chox mê nhuôv muk tsêr kho moz. Tsês ntêr hnuz, mê nhuôv tưz moz hnhar mav chox tuôx tsêr kho moz, thâuv ntơư tưz lis đhâu, chơưv kho tsi tâu”.

Txix têx tsênhz tiês ntơưv huyện Điện Biên Đông, đros trâu têx thax tsav nhoz jê tsênhv qơư, chuôz zênhx seiz njuôk shuôs moz jông đuô, tsôngv box txux chi tsưr ziv cux siêz đuô, chor nhuôs tsi tâu muôx 5 shông trâul tuôs cux tâu txo grêk tsơưs ntâu. Iz chas ntơư, têx xã nhoz đêz tsênhv qơư, tsi tâu muôx qơư thiêz têx chuôz zênhx jông seiz njuôk shuôs moz li: Phì Nhừ, Phình Giàng, Xa Dung, Háng Lìa, thâuv tưs cux muôx chôngz nhuôs trâul tuôs đuô hur si. Txix ntơư, muôx têx tso pov ntơưv thax tsav qơư ntơư nhiv no, chor thax tsav tox siêz đêz đrôngs cux tsênhv yuôr ntâu kror tsi tâu muôx txâuk. Têx xã thax tsav tox siêz đêz đrôngs thiêz nhoz jê tsênhv qơư, cêr mul lok phiv liv tưz uô hiêv txos têx pox niêv xênhz tuz ci hâur chêr thiêz nhuôs zâu tsi tâu muk cxax yuôx phax tar moz cxix cxuô. Bác sĩ Nux Xênhv Lik, Tsar Khoa kho moz nhuôs zâu, tsênhv qơư Y tế huyện Điện Biên Đông heik pâuz, iz cxiê lênhx pox niêv thâuv muôx mê nhuôv hâur chêr tsi tuôx trâu qơư y tế chiê seiz njuôk shuôs mê nhuôv trơưk cui tinhv, cxax têx yuôx phax tar moz cxix cxuô. Nhoz ntâu thax tsav qơư, tsôngv box muk uô liêx têz tsênhv chox mê nhuôv đros muk hur si, taz sik tsik muôz tsôngk tril yo sor trâu mê nhuôv hnar.  Xênhz zus tuk nhuôs tiv 3 tror zar sâuv cux muôx, uô trâu ntâu chuôz zis muôx mê tuz mê nhuôv chôngz, tu thiêz seiz shuôs tsi tâu cxix cxuô têx nhuôv, muôx têx thâuv nhuôs muôx moz gênhs lok cux tsi yuô moz siêz txos. Lok six ntâu lênhx nênhs tâu chox tuôx trâu Tsênhv qơư Y tế thâuv moz lok six hnhar, tsik zôngx ziv chơưv kho tâu. Sik thav lok têx li heik no, zơưv Hơưx Xênhv Vax, Phưv chủ tịch Ủy ban huyện Điện Biên Đông heik: Hâu nov ntơưv qơư cux lok six lax trâu têx li heik co thiêz tsênhv tso tơưv ntâu faz tsưr ziv chiê txo grêk tsơưs chor nhuôs zâu tsi tâu muôx 5 shông trâul tuôs. Taz sik, têx phiv liv li heik sâuv zos thax tsav kinh tế tsênhv txov nhêv, cêr muk lok phiv liv, tsôngv box sđ tsi yuô tâu muôx cêr thôngx siêz, uô têx lênhx canr bôv y tế tsuv njiz trâus phiv liv chiê yax kriê gra siêz txux chi tsưr ziv jênhv pâuz trâu tsôngv box. Txơưv tiêk têx qơư y tế tưz tâu muôz têx chuôz zênhx seiz njuôk shuôs moz lok six jông, taz sik zos tsôngv box tsi yuô moz siêz txos zuk têx tuz nhuôs mak têx tsi jông li heik sâuv cux txo grêk tsơưs tsi tâu.

“Chor nhuôs trâul tuôs cux tsênhv ntâu thiêz pêz cux tưz choz trâu Tsênhv qơư Y tế huyện zos tsuv uô đreiv iz tsưr ziv, hâux lưv txo grêk tsơưs chor nhuôs zâu tsi tâu muôx 5 shông trâul tuôs, iz chas ngênhx y tế tsưr ziv. Taz sik nhiv no hâux lưv yax kriê txos trâu tsôngv box cux tsênhv zos kror phiv liv yax. Nhiv no pêz tsênhv chox kriê, zos shông no tsơưs tsơưs tsuv txo grê têx nhuôs zâu tsi tâu muôx5 shông trâul tuôs pir li shông uô ntêx, co zos tsưr ziv zov chênhr”.

Nhiv no Ủy ban huyện Điện Biên Đông cux tsênhv fuô uô tsưr ziv yênhx lix đoanx qênhz yuôx, buôk ti qênhz shuôs đuô hur si têx nhuôs tsi tâu muôx 5 shông trâul tuôs têx ntâuz ntơưr đhâu yênhx shông chiê seiz canr bôv y tế tsưr ziv đơưk kho têx moz gênhs, uô têx nuv co li chas, đhâu ntơư muôx têx tsưr ziv uô cov tau truôx đuô luôs hâux lưv sêiz njuôk shuôk moz trâu tsôngv px. Iz chas ntơư txix cxuô faz tsưr ziv tsuv txo grêk tsơưs chor nhuôs zâu tsi tâu muôx 5 shông trâul tuôs tsênhv zos iz luôs hâux hâux lưv thiêz têx zov chênhr lar heik txos li nhiv no./.

(Vũ Lợi-Riê Lâux cxeik, nhênhv)

PHÊNHV NRIÊR PÂUZ LOK CÊR CHEI

   Zơưv Cầm Văn Hòa nhoz huyện Phong Thổ, tỉnh Lai Châu nus: Tsênhv chêi paz txưv hlôngr hâux lưv uô trâu ziv chuôz zis tsôngv box mênhx cxưx tsơưs nênhs pluôs thiêz ziv chuôz zis pluôs nhoz thax tsav tsôngv box mênhx cxưx tsơưs nênhs, nhoz thax tsav tox siêz txov nhêv tâu cui tênhv li chas?

Tsênhv chêi paz txưv hlôngr hâux lưv uô trâu ziv chuôz zis tsôngv box mênhx cxưx tsơưs nênhs pluôs thiêz chuôz zis pluôs nhoz ntơưv thax tsav mênhx cxưx tsơưs nênhs thiêz tox siêz txov nhêv tiv zix tâu cui tênhv ntơưv ntu 5 grê 3 Thông tư 02/2017/TT-UBDT heik kriê uô cuiz tênhv 2085/QĐ-TTg thôngz đhâu tsênhv chêi paz txưv huôv tsar KTXH thax tsav mênhx cxưx tsơưs nênhs thiêz tox siêz ntu 2017-2020 zos Bộ trưởng, sêiz car UB mênhx cxưx tso tơưv, muôx txux zôngv cxôngx hnuz xiêz 07/07/2017. Tsênhz mênhx zos:

          Đros trâu têx tiv phaz tsi yuôr ar uô kôngz lôngk chiê choz trâu tsôngv box uô kôngz nuv, UB cấp xã tsov lơưr bê đăng cir sơưv  tsênhv chêi chiê uô hâux lưv paz txưv hlôngr hâux lưv. Phênhv paz txưv cxôngx nhiêx txiêx ntâu tiv zix zos 5 tsov đeiv iz chuôz zis thiêz tâu txeik pênhr Zênhx hangx tsênhv chêi xã hội lơưr cui tênhv ntơưv Grê 6 thông tư no. Nhiêx txiêx paz txưv thiêz pênhr txeik zênhx hangx chiê hlôngr hâux lưv uô tâu zôngv chiê yưv pênhr uô kôngz nuv, hâux lưv muôv muôs trơưk cêr chei li (zuôr têx zav meir, chuôz zênhx uô kôngz, jix vuv kôngz nuv, tsêz chos, tu zus....) chiê muôx phênhv sâu tâu txix hlôngr trâu ar uô kôngz nuv.

Tsov lơưr cui tênhv heik sâuv, nhoz têx tiv phaz tsi yuôr ar uô kôngz nuv chiê choz trâu tsôngv box mak uô hâux lưv paz txưv hlôngr hâux lưv uô trâu tsôngv box. Hâur co, phênhv paz txưv cxôngx nhiêx txiêx ntâu tiv zix zos 5 tsov đeiv iz chuôz zis. Iz chas co, chuôz zis muôx zoz qơưx txeik pênhr chiê zuôr ar, hlôngr hâux lưv uô lok sik yưv pênhr huôv tsar muôv muôs hax huv cxuô zav, tâu txeik ntơưv Zênhx hangx  tsênhv chêi xã hội lơưr phênhv paz txưv tâu txeik đros phênhv liv kis.

          Chiê pâuz cxaz xor mông cov tsênhz mênhx, zơưv Hòa tsuv nriêr pâuz ntơưv Thông tư 02/2017/TT-UBDT./.

(Thanh Thủy- Txâur Vax cxeik nhênhv)