Jax sâu thưr 5 hnuz xiêz 1/9/2016

Sơn La bax trâu shông cơưv yiêz

Ntơưv cxuô qơư muôs ntơưr cơưv sâuv thax tsav thành phố Sơn La hâur têx hnuz no, muôx chôngz lênhx uô niêv uô txir tuôx zuôr ntơưr, chuôz zênhx cơưv ntơưr trâu chor nhuôs bax trâu shông cơưv yiêz. Niêv tix Phạm Thị Thúy Hồng, thị trấn Sông Mã, huyện Sông Mã puz pâuz: Tưz ntâu shông lok no pêx xênhv tsik cxơưx tsav muôx tsik txâuk ntơưr cơưv trâu chor nhuôs viv têx qơư muôs ntơưr muôs cxix cxuô zav ntơưr cơưv.

“Shông tưs cur cux tuôx zuôr ntơưr trâu mê nhuôs muk cơưv shông cơưv yiêz. Lok gri mak shông no cur pov gri cux truôx tuk li chor shông uô ntêx, hok lok tsơưr lươngv mak pov chor ntơưr muôx ntâu kror đuô thiêz têx zav ntơưr cux jông đuô paz trâu chor nhuôs cơưv zôngx ziv đuô”.

Công ty muôs ntơưr, muôs chuôz zênhx cơưv ntơưr tỉnh Sơn La puôr lênhx muôx qơư muôs nhoz tas nro 11 huyện, thành phố hâur tỉnh taz por phưx vưv trâu pêx xênhv sâuv thax tsav li zoz qơưx lok ntơưr cơưv trâu tas nro pêz cấp. Shông no, gri ntơưr, chuôz zênhx truôx tuk, tsik ndê gri pir li tsêz no.Niêv tix Sùng Thị Ân, giám đốc công ty ntơưr thiêz chuôz zênhx cơưv ntơưr tỉnh Sơn la puz pâuz:

“Bax trâu shông cơưv yiêz taz viv tưz bax cxix cxuô thâuv hli 5 muôz muk txos chor qơư muôs ntơưr hâur 10 huyện. taz viv tưz bax cxix cxuô zav ntơưr trâu shux xênhz cơưv thiêz cưk kriê ntơưr”.

Bax trâu shông cơưv yiêz, tỉnh Sơn la tưz kho đuô muôx 1.800 ntâu qar cơưv ntơưr lav cơưv, qar nhoz trâu shux xênhz niêv txir zus mor, zuôr xar 3.200 bộ trôngx tos cơưv ntơưr trâu shux xênhz, 78 qar nhoz uô hâux lưv trâu cưk kriê ntơưr, 59 côngz trinhx vêv xênhz đêx hur. Đros côngz xưv kruôz kriê nzir chêix so sor, chor tsêr cơưv tưz hêik cưk kriê ntơưr uô vêv xênhz têx tsêr cơưv ntơưr, kho đuô thax tsav iz ndis tsêr cơưv cov tsêr cơưv jông gâux đuô paz trâu shông cơưv yiêz muôx cêr shir phaz. Phiv liv txix coz chuô số 3 nhiv kruôr đhâu, tas nro tỉnh muôx 6 luz tsêr cơưv trâus phiv liv, 9 qar cơưv ntơưr trâus puôk tsuôx tưz tâu chor tiv phaz tso nênhs thiêz sir zôngv chuôz lov ntơưv qơư sêi đrơưv khưx phưx chiê taz por trâu shông cơưv yiêz. Zơưv Nguyễn Duy Hoàng, phưv giám đốc Sở zoz zux-Thox cxov tỉnh Sơn La puz pâuz:

“Lok tsêr cơưv ntơưr mak pêz tưz hêik chor tsêr cơưv qênhz yuôx, sêiz shuôk đuô lơưr tsưr ziv cov txâuk trâu shux xênhz, taz por chor shux xênhz cơưv ntơưr huv li cuiz tênhv; bax xêir zuôr shux xênhz ciês thâuv hli 6 chiê uô jông côngz xưv xêir zuôr trâu shông cơưv 2016-2017”.

Lơưr UBND tỉnh Sơn La li tsưr ziv, tas nro chor tsêr cơưv sâuv thax tsav tỉnh sik đros kriz cơưv trâu hnuz 5/9. xav txos trâu ntu no, cxuô luôs hâux lưv bax trâu hnuz tas nro pêx xênhv chox mê nhuôs tuôx trâu tsêr cơưv tưz uô tâu tiêr, piz bax kriz trâu shông cơưv yiêz 2016-2017./.

                                             (Hồng Việt-Lik Thox cxêik nhênhv)

Phênhv thưr 5 hnuz 1/9/2016

Lâul jok Ê Đê tas siêz njưk viv jêx jok

Shông 2005, Ama Minh thâuv co muôx 53 shông tâu bâux xêir uô tsưr jok M’Duk thiêz chủ tịch hôiv đôngx lâul jok phường Ea Tam. Shông no, muôx 64 shông, zơưv tưz muôx 10 shông uô tsưr jok. Tâu pox nhuôs njênhs njôngr, zơưv tsik so xav jênhv cêr sik côngv siêz viv jêx jok li huôv tsar cxuô zos iz kror zov chênhrtsuv tâu uô cov tiêr uô ntêx. Ama Minh tsik so đros đrêiv yênhx chuôz zis, nriêr pâuz lok siêz xar cux xưk li đros phêiz kênh têx cêr pôngz siêz, cêr shir phaz đros pox nhuôs sơưr đơưk. Zơưv chuôz zis uô ntêx hlo, hêik pox nhuôs sir zôngv kỹ thuật, zuz nôngz yiêz lok chos cov huv chêix chiv, huôv tsar tu zus chiê muôx cxaz phênhv sâu tâu kôngz lôngk. Đảng, têz qơưk li têx tsênhv chêi cux tâu zơưv fuô yax kriê txos trâu tsôngv pox nhuôs sđ pâuz tsênhz mênhx. Thâuv tưs hâur jok muôx yưv siz char, siz chês, kâus chơưr mak khov muôcc Ama Minh li luk hêik thiêz côngz bê, cxuô kror cux tâu cêir chêx huv đros, thiêz sêi. Lâul jok Ama Minh hêik hêik:

“Tas nro cxuô kror cur uô zos viv nhiêv jêx jok, cur sêiz shuôk tas nro sơưr đơưk hâur jok, tưz tsik zos mênhx cxưx nhoz ntơưv qơư xưz mak nênhs tsoz tsiz hur si. Nriêr tsưr ziv uô trâu jêx jok muôx luz nênhx jông đuô. Pox nhuôs li luz nênhx huôv tsar, pâuz ntâu đuô mak txar jev tâu chor txiêz nanv xã hội. Chinhr viv li, hâur jok M’Duk tsik muôx nênhs mnôngs thiêz uô lơưr chor nênhs fêv”.

Đros sir jos, txơưx jênhv, pâuz txos têx phôngx cxưx nhoz tiv phaz, Ama Minh zos nênhs trâu sơưr đơưk khov vav hâur jok M’Duk. Zơưv li sir jos tưz paz trâu jok M’Duk tuôr truôx jông zos jok vênhx huôv hâur ntâu hsông đhâu. Oz pêz shông lok no, zơưv hêik chor nênhs siêz jông, tsưr tsix tôn giáo tsik so khơưk muôz huv paz trâu chor chuôz zis pluôs, paz cxiv uô tâu 5 luz tsêr trâu chor chuôz zis txov nhêv. Nhiv no jok tsuôk yuôr 29 chuôz zis pluôs (tsik tâu muôx 3%) thiêz iz shông bê ntơưr no ho tsơưs jux juk. Hêik lok lâul jok Ama Minh, pêx xênhv jok M’Duk, txơưv zos nênhs tsoz tsiz lok sik nênhs Ê Đê, cux puôr lênhx njênhs njôngr zơưv hur si. Pos Nguyễn Thị Nguyệt,iz lênhx pêx xênhv jok M’Duk, hêik:

“Ama Minh paz lok six ntâu trâu tsôngv box mênhx cxưx, paz txêik pênhr trâu pox nhuôs uô nox hla đhâu cêr pluôs. Zơưv hêik sơưr đơưk gôngr côngv chiê uô 5 luz tsêr siêz jôngz. Chor nhuôs muôx lũ nênhx txov nhêv, tsik muôx hâux lưv uô mak sir jos paz chiê lơưr muôx tâu hâux lưv uô. Co zos iz kror shir phaz thâuv muôx tâu iz lênhx nênhs txơưx sêiz car li co”.

Ami Bích hêik lok lâul jok Ama Minh:

“Ama Minh paz trâu jêx jok lok six ntâu, paz trâu nênhs pluôs thiêz paz trâu pêx xênhv hâur jok huôv tsar kinh tế. Txix luk hêik, kruôz kriê puôr lênhx tâu pêx xênhv hâur jok uô lơưr, xưk li zơưv kriê pox nhuôs tso tsês têx phôngx cxưx  pôngz kaz hâur siz zuôr, luz nênhx yênhx hnuz, uô nênhx huv cêr chêi têz qơưk”.

Hêik lok Ama Minh li pưk txux, zơưiv Y Sêr Mlô, phưv chủ tịch UBND phường Ea Tam, thành phố Buô Ma Thuột, tỉnh Đắc Lắc, hêik:

“Zơưv Y Siu Byă zos iz hâur chor tsưr jok sir jos uô hâux lưv, thôngx cxix zos nênhs muôx suôz bê tưz tâu pêx xênhv xêir tso ntâu shông lok no. Đros pưk txux zos tsưr jok, nênhs muôx suôz bê thiêz zos chủ tịch hội đôngx lâul jok zơưv tưz sir jos hêik pox nhuôs sơưr đơưk uô jông lơưr Đảng, têz qơưk li têx cêr chêi”.

Ama Minh li têx gôngr côngv tưz gôngr phênhv paz cxiv tsa thôngx niêv côngv siêz mênhx cxưx, uô lơưr luôs hâux lưv sik tưr nhiêv têz qơưk, paz uô trâu jok M’Duk huôv tsar lok cxuô zav. Tsuv hêik lâul jok Ama Minh zos jok M’Duk li iz lênhx nênhs Ê-Đê uô tâu truôx cxuô luôs hâux lưv zok muôz, tâu pox nhuôs sơưr đơưk njênhs njôngr, cơưv shâuv uô trơưk./.

                                                                (TTTN-Lik Thox cxêik nhênhv)