Kon Tum: Sik côngv đros shux xênhz cơưv ntơưr muôz siêz jênhv pâuz lok jôngr trâu shux xênhz

          Ciês uô ntêx hnuz qir lok trâu shông cơưv yiêz 2018-2019, 355 lênhx shux xênhz tsêr cơưv THCS Lý Tự Trọng, xã Đăk Kan, huyện Ngọc Hồi, tỉnh Kon Tum tâu cxaz chuôz jiês xênhz huôx gra bê “ Sik côngv đros shux xênhz mul cơưv ntơưr” zos Cuiv por vêv thiêz huôv tsar jôngr tỉnh Kon Tum tsưr tsix. Jông siêz cxaz chuôz lớp 9A li hâux lưv sâu đuôz đros thôngz yax por vêv jôngr trâu luz nênhx tov kaz no, shux xênhz Dương Thị Thùy Dung heik tơưv zuk paz shux xênhz li siêz xar tơưv thâuv sâu đeiv đuôz no:

          “ Cur sâu đeiv đuôz no heik tơưv luz nênhx tov ntêx- nhiv no-thiêz tov kaz no. Ntu đrav ntêx tênhx qơư, jôngr thiêz đêx njuôz jông. Cxuô tsiêx cxu, đrox tsuôk puôr lênhx huôv tsar jông. Taz sik viv nhiv no lênhx nênhs tưz thiêz tsênhv ntor luôx jôngr zov chênhr. Pêz zuôr sik côngv chiê por vêv jôngr cxôngx ciês nhiv no. Txơưx jênhv por vêv jôngr tsi zos lênhx tưs li mak zos tas nro cxuô cxênhx nênhs li, lênhx tưs cux zuôr uô tâu cxôngx ciês têx hâux lưv zâu tiv zix”

          Cxaz chuôz tsaz yênhx thôngz xor mông Sik côngv đros shux xênhz mul cơưv ntơưr zos Cuiv por vêv thiêz huôv tsar jôngr tỉnh Kon Tum tsưr tsix, đros thiêz tâu paz txưv yênhx puôk cxênhz pênhr ntơưr sâu muôx thôngz yax lok chính sách thêv nhiêx txiêx jix vuv tênhx qơư jôngr, jôngr li kror coaz tsôngv đros luz nênhx, têx shux xênhz tsênhv tâu cxaz chuôz ntâu huôx tôngv. Shux xênhz Bùi Thị Kiều Loan, shux xênhz lớp 7B Tsêr cơưv THCS Lý Tự Trọng, xã Đăk Kan, huyện Ngọc Hồi jông siêz heik:

          “ Cur pov huôx tôngv hnuz no lok six muôx liv trâu cur, cur pâuz cxaz lok jôngr li têx tsiv grê. Thâuv lol tsêr cur zuôr heik kriê trâu cur niêv cur txir thiêz cưr tix nus muôk tsi cxoz ntor luôx jôngr thiêz tsuv chos ntâu jôngr ntông njuôz”.

          Đros thiêz têx mê nhuôs shux xênhz, khôngz qiv têx jiês huôx tôngv Sik côngv đros shux xênhz mul cơưv ntơưr cux tâu têx cưk kriê tsov cưv txos. Cưk kriê Nguyễn Tài Duệ, Hiệu trưởng Tsêr cơưv THCS Lý Tự Trọng heik lok tsaz yênhx no:

          “ Cuiv por vêv thiêz huôv tsar jôngr tỉnh Kon Tum li tsaz yênhx Sik côngv đros shux xênhz mul cơưv ntơưr muôx 2 ziz njiêz lok six lox đros thiêz tsêr cơưv li têx shux xênhz. Tiv 1 zos đhâu tsaz yênhx no đrâuv cưk kriê kriê ntơưr mak têx shux xênhz tsênhv pâuz cxaz tâu thôngz yax viv li chas pêz tsuv por vêv thiêz tsoz phưz jôngr. Tiv 2 zos tsaz yênhx paz trâu shux xênhz tiv zix zos têx shux xênhz muôx luz nênhx txov nhêv chuôz cxaz đas jos cơưv ntơưr”.

          Jênhv pov Tsaz yênhx li chêx cuk tsênhv tsênhz, hâur shôngk shông cơưv yiêz no Cuiv por vêv thiêz huôv tsar jôngr tỉnh Kon Tum tưz cuiz tênhv krêz đar uô tsaz yênhx. Xưk li shông 2017 tsaz yênhx tsuôk tâu uô ntơưv 105 tsêr cơưv cấp 1 mak shông no tưz chuôz ndê txos 180 tsêr cơưv nhoz tas nro têx cấp cơưv ntơưv 75 xã, thị trấn nhoz hâur thax tsav jix vuv tênhx qơư jôngr. Zơưv Hồ Thanh Hoàng, Giám đốc Cuiv por vêv thiêz huôv tsar jôngr tỉnh Kon Tum puz pâuz:

          “Tsaz yênhx no zaoz zux trâu cxênhx hluôk nênhs lok siêz xar, txơưx jênhv por vêv jôngr. Thôngx cxix thôngz đhâu têx mê nhuôs shux xênhz, têx lênhx uô niêv uô txir, têx cưk kriê thiêz tas nro côngv thôngx cux zuôr pâuz txos. Đhâu co huiz tôngv tas nro côngv thôngx sik côngv tês đros Cuiv por vêv thiêz huôv tsar jôngr uô jông côngz xưv por vêv huôv tsar jôngr thiêz chính sách thêv nhiêx txiêx jix vuv tênhx qơư jôngr sâuv thax tsav tỉnh Kon Tum”.

          CQTT Tây Nguyên- Txâur Vax cxeik nhênhv

Đà Nẵng Đảng hlôngr yiêz tsưr ziv chox car

Kuôk no 5 shông, Ban Thường vụ Thành ủy Đà Nẵng yênhx lix Đảng ủy têx thax tsav Công nghiệp nhoz hâur Thành ủy. Đảng ủy têx thax tsav Công nghiệp tsi so seiz kaz cxuô luôs huax lưv uô ntơưv qơư, paz doanh nghiệp huôv tsar tâu truôx. Đảng ủy tsênhv zos doanh nghiệp qơư txuôk trâu Đảng thiêz hâu nov ntơưv qơư. Zơưv Phạm Văn Hòa, Phưv Bí thư Thường trực Đảng ủy heik pâuz:

“Đảng ủy têx thax tsav công nghiệp siz chos paz têx doanh nghiệp truôx tuk huôv tsar uô nox, uô lax luôv. Iz chas ntơư tsưr tsix Đảng tsuv phuôx huiz jông pưs txux zos qơư txuôk Đảng ủy trâu têx cơ quan muôx vax huôv hâur TP chiê tso tơưv têx faz tsưr ziv tsênhv tsênhz thiêz jông paz trâu doanh nghiệp. Hâur co, têx tsưr tsix Đảng hâur doanh nghiệp phuôx huiz uô jông luôs hâux lưv heik sâuv, têx tsưr tsix cơ sở Đảng tsuv paz têx tsưr doanh nghiệp thiêz nênhs lox tôngv sik đros thôngx ziv tsưr ziv siêz xar, sik thôngx siêz pheiz kênh têx tsưr ziv, hâux lưv, paz doanh nghiệp huôv tsar uô nox”.

Trơưk li zơưv Phạm Nhật Phi, Bí thư Đảng ủy Khối Doanh nghiệp TP Đà Nẵng, phênhv ntâu têx doanh nghiệp puôr lênhx uô tâu jông têx nuv li heik sâuv. Chênhr viv li, tsưr tsix Đảng hâur Doanh nghiệp cux tsuv hlôngr yiêz tsưr ziv chox car cov huv đros trâu ntu hlôngr yiêz nhiv no; Lar heik zos doanh nghiệp muôx pênhr saz têz qơưk đrâuvyưv uô thiêz doanh nghiệp xiz nênhs. Six hơưv đhâu, Đảng ủy khối chêx tsôngk trâu 2 luôs hâux lưv zov chênhr zos, gra siêz Đảng bộ pưs txux chox car thiêz sik côngv têk đros doanh nghiệp. Zơưv Phạm Nhật Phi heik pâuz, zov chênhr zos tsuv hlôngr yiêz tsưr ziv xênhz huôx chi bộ:

 “Muôx ntâu Chi bộ ntơưv qơư, Đảng viên uô hâux lưv nhoz cxuô nro trâu cxiê qơư hâur hur si têz qơưk. Chênhr viv li, chiê muôx Đảng viên trâu têx taz viv heik co, Đảng ủy khối tưz tso tơưv têx tsưr ziv xênhz huôx chi bộ xưk li: Xênhz huôx chi bộ txuôk đros trâu têx taz viv muôx jông qơư, chuôz zênhx uz no, xênhz huôx chi bộ trơưk li muôz 2, 3 chi bộ lok uô cê....”.

Sâuv Đảng têx chei, Nghị quyết lok hlôngr yiêz Đảng tsưr ziv chox car, Ban Thường vụ Thành ủy Đà Nẵng tưz tso tơưv têx tsaz yênhx, tsưr ziv, đêx anr  tsênhv tsênhz fuô uô têx luôs hâux lưv. Zơưv Trần Văn Trường, Bí thư Huyện ủy Hòa Vang heik pâuz, Ban Thường vụ Huyện ủy Hòa Vang thâuv tưs tưz moz siêz txos uô jông Đảng ủy 11 xã têx hâux lưv. Đảng ủy xã ziv hnuz ziv yênhx lênhx uô ntêx nyuôs lok chox car chính trị ntơưv qơư, taz por têx tsưr tsix Đảng sik hux jos, siz paz lok chính trị ntơưv qơư:

“Đảng ủy xã phênhz côngz trâu yênhx lênhx đôngx chir Đảng ủy viên car seiz ntơưv têx jêx jok chi bộ cxaz chuôz xênhz huôx  niêx hli đros thiêz têx chi bộ. Đhâu ntơư pâuz tâu têx phiv liv ntơưv qơư, chox kriê đơưk tu zênhx max, nhênhz chơưv trâu Đảng ủy chox kriê đơưk tu sei têx tsi jông txix ciês ntơưv thax tsav tsôngv box nhoz thiêz hâur côngv thôngx tsôngv box sđ”.

Six hơưv jê lok no, Thường trực Thành ủy Đà Nẵng tưz chox kriê HĐND thiêz Ủy ban TP têx   hâux lưv uô thôngz đhâu Đảng đoanx HĐND thiêz Ban cán sự Đảng ủy TP. Hâur têx hnuz, niêx hli lơưr cui tinhv, lar heik zos uô ntêx têx jiês cơưv Ủy ban TP, Thường trực Thành ủy puôr lênhx tsưr tsix cơưv đros Thường trực HĐND, Ủy ban TP thôngx ziv têx chei, cui tinhv zov chênhr hâur tsaz yênhx têx nuv uô, tsaz yênhx têx jiês cơưv HĐND. Zơưv Trương Quang Nghĩa, Bí thư Thành ủy Đà Nẵng khav tinhv:

“Đros thiêz Ban Thường vụ, pêz tsênhv sik thôngx siêz uô cê, tsuv uô li chas cov zos thiêz trơưk cui tinhv. Bí thư, Ban Thường vụ uô li chas, Chủ tịch Ủy ban TP, Ban cán sự Đảng Ủy ban TP thiêz Đảng đoanx HĐND thiêz HĐND pưs txux zos li chas.... Iz cơ quan muôx iz hâux lưv uô, mak tưz heik txos hâux lưv, tsi muôx đaz tsi hlôngr trâu thiêz lưv tuk hlôngr uô tsi tâu, tsuv uô txix têx li heik co”./.

(VOVMT-Riê Lâux cxeik, nhênhv)