Lai Châu: Krêz ciêz ntơưv tơư trôngz Hoàng Liên Sơn

          Nhoz hâur tơư trôngz Hoàng Liên Sơn, ciêz Tam Đường ntâu shông no zos tsôngv box hâur thax tsav têx huyện Phong Thổ, Tam Đường thiêz thành phố Lai Châu li tsênhv qơư muôv muôs, uô si. Lok hnuz thưr 5 thiêz hnuz ciêz yênhx ciêz, ciêz Tam Đường ho muôx chôngz tsôngv box tuôx muôv muôs, uô si, chôngz tiv zix zos krêz ciêz hâur hnuz ciêz. Tsôngv box têx mênhx cxưx hâur thax tsav tuôx muôv muôs têx xiv huv hâur tiv phaz, zuôr chuôz zênhx phưx vưv uô xênhz yar thiêz njiz fôngx zưs...

          Tix lâuk Nguyễn Tùng Hải, iz lênhx tsôngv box tuôx cxôngx thành phố Lai Châu tuôx car ciêz Tam Đường hnuz ciêz puz pâuz: Đros thiêz huôv tsar niêv đrôngs, ciêz Tam Đường 2,3 shông jê ntơưv no tâu yưv pênhr cxiv tsa lox đuô chiê phưx vưv tsôngv box hâur thax tsav li hâux lưv muôv muôs, uô si. Lênhx nênhs nhiv kruôr tuôx jiês xuz thơưx mak hu zos ciêz San Thàng lơưr bê xã, yuôr lênhx nênhs khênhr tuôx mak hu ciêz Tam Đường. Txơưv hu li chas luz ciêz no cux tsênhv tuôr tsês tâu ciêz tox siêz Tây Bắc li têx cêr cor cav trâur lâuk thâuv ntêx. Tix lâuk Nguyễn Tùng Hải heik:

          “  Nhiv no ciêz Tam Đường zos cur li qơư tuôx thâuv txos kaz ciêz. Cur cux xưk li ntâu lênhx nênhs tuôx zuôr iz cxiê chuôz zênhx. Tiv zix zos tâu chox pox niêv mê nhuôs mul uô si đhâu iz ciêz uô hâux lưv khưr. Thâuv muôx lênhx nênhs cxênhz jê nhoz đêz tuôx, cur ho khênhr chox lơưr mul car ciêz. Nhiv no tsi zos têx lênhx nênhs hloz xưz mak mê nhuôs zâu cux nhiêv mul ciêz thâuv krêz ciêz”.

          Tuôx ciêz Tam Đường nhiv no, tsênhv muôx cxix cxuô têx jông li ciêz tox siêz thâuv ntêx. Têx hax huv phênhv ntâu zos têx xiv huv cxôngx pêv har jôngr lok sik tsôngv box chiv chir uô tâu. Tsi taz zos qơư muôv muôs hax huv, ciêz Tam Đường nhiv no tsênhv zos têx tsôngv box mênhx cxưx sâuv thax tsav qơư sik côngv cxuô cêr vênhx huôv jông. Cxôngx tsôngs yo chax chês, chuôz zênhx xênhz huôx lok sik kênhx, trax....Tix lâuk Trần Văn Tuấn, iz lênhx kruô tuôx cxôngx tỉnh Yên Bái puz pâuz:

          “ Txơưv zos tsôngv box tox siêz taz sik cur pov ciêz San Thàng lok six jông. No zos jiês xuz thơưx cur tuôx Lai Châu thiêz tâu mul car ciêz jông li no. Tsôngv box nhoz no txơưv tsi đros iz mênhx cxưx taz sik lơưr lok six jông siêz. Hâux lưv muôv muôs phênhv ntâu zos hax huv kôngz nuv zos pox nhuôs uô tâu, taz sik grê muôs cux huv đros, pêz cux zuôr tâu ntâu”.

          Ciêz krêz sâuv iz thax ar đar nhoz buôk ciês tul đêx San Thàng thiêz jê jos vênhx huôv San Thàng 1, ciêz Tam Đường ciêz lok hnuz ciêz yênhx ciêz. Ciêz muôx cxôngx pok thâuv tưs cux tsi muôx lênhx tưs ndo thiêz, taz sik đros tsôngv box tox siêz Hoàng Liên Sơn, luz ciêz no lok six coaz tsôngv, viv zos tỉnh Lai Châu li luz ciêz lox tiv zix. Ciêz tsi taz zos tsôngv box mênhx cxưx Cho, Hmôngz, Thái, Giáy, Lự....li qơư muôv muôs hax huv mak tsênhv zos qơư chiê pox nhuôs tâu sik njiz, sik thav.

          Zơưv Hoàng Chí Tình, chủ tịch UB xã San Thàng puz pâuz: Thâuv tros châuz Pháp tuôx txênhz têz qơưk, thâuv tsi tâu muôx Đeix, ti vi, điện thoại, ciêz no zos tsôngv box hâur thax tsav li qơư tuôx lok six coaz tsôngv, muôx tỉnh Lai Châu thiêz Lào Cai nhiv no. Pox nhuôs tuôx no chiê tâu sik njiz, sik thav đhâu ntâu hnuz siz ndeiv. Nênhs hluôk tuôx nriêr fôngx zưs, tul hluz. Nênhs lâuk tuôx chiê nriêr fôngx zưs thâuv ntêx...Cxôngx têx cêr chax chês jông co, xã tưz xeir ciêz zos qơư chiê zaz zâuv tsôngv kruô tuôx ndis shuôk thâuv tuôx txos têx jêx jos. Zơưv Hoàng Chí Tình puz pâuz:

          “ Hâux lưv cxiv tsa krêz đar, kho đuô ciêz San Thàng, qơư tsov txos zos cxiv tsa qơư chiê tsôngv box têx thax tsav tâu muôv muôs hax huv. Thôngx cxix, ciêz zos qơư tuôr tsês thiêz phuôx huiz têx tsiv grê vênhx huôv chax chês jông, cxơưz tiês cxiv tsa jos ju lix vênhx huôv San Thàng 1. Đrâuv co, ciêz San Thàng cux chiê tuôr tsês têx tsiv grê vênhx huôv chax chês jông, gôngr phênhv chiê tsôngv kruô hâur thiêz đrâuv tỉnh tuôx ndis shuôk”.

          Ciêz Tam Đường thâuv ntêx thiêz ciêz San Thàng nhiv no txơưv muôx ntâu hlôngr yiêz, taz sik tsênhv tuôr tsês tâu têx jông li ciêz tox siêz thâuv ntêx. Nhoz ciêz San Thàng nhiv no, tsênhv muôx nênhs lâus tuôx car ciêz, tsi zuôr tul tsi tsuôk mul ndis shuôk iz ndis tsuôk li tuôx nriêr lênhx tưs li, thâuv txos zar hnuz keix tror mul tsêr. Txơưv luz nênhx tưz muôx ntâu hlôngr yiêz, taz sik đros tsôngv box tỉnh tox siêz Lai Châu luz ciêz no tiêv tiêv zos hnuz ntênhs, iz ciêz krêz iz jiês./.

(Khắc Kiên- Txâur Vax cxeik nhênhv)