JOS NHOZ THAX TSAV QƠƯ YIÊZ

JUX JUS TRUÔX TUK LUZ NÊNHX

          Qơư nhoz yiêz tsês trâu tsôngv box nhoz thax tsav qơư trâus đêx ngaz jos Van Hồ, xã Phìn Ngan muôx 35 ziv chuôz zis tsôngv box txar lol nhoz no. Uô tâu tsêr nhoz, txar lol nhoz qơư yiêz lênhx tưs cux tso siêz viv tsi nyei ntux nas ngaz txos. Niêv lâuk Chảo Mùi Pham, tsôngv box hâur jos pheiz kênh:

          “ Đhâu têx jiês ntux nas têz qơưk paz txưv txar tuôx nhoz ntơưv no. Nhiv no, cur chuôz ziz luz tsêr tưz uô tâu, têx luz tsêr txơưr cux uô tâu tiêr. Nhiv no cxuô lênhx nênhs tso siêz nhoz no mak tsi nyei tox poz thiêz”.

          Yuôr ntơưv qơư nhoz yiêz nhoz jos Trung Chải, 10 ziv chuôz zis txar lok cxôngx thax tsav trâus đêx ngaz Sủng Hoảng cux lok six tso siêz. Txơưv luz nênhx tsênhv yuôr ntâu cêr khưr, taz sik lol nhoz no jê cêr yêz mul lol, tsêr cơưv ntơưr, muôx tênhv tênhz, muôx txâuk đêx xênhz huôx, tul tsi cux jông, ho taz por, pox nhuôs lênhx tưs cux jông siêz. Pox nhuôs tsênhv sir jos sik đros uô xênhz yar lox tôngv, tu zus chiê ngaz tul luz nênhx chuôz zis. Pos Chảo Sử Mẩy, tsôngv box hâur jos yiêz heik:

          “ Thâuv tox poz, tsêr puôk tsuôx tas, Đảng, têz qơưk paz txar lol nhoz tsêr yiêz taz por đuô. Nhiv no tênhv tênhz, đêx hur puôr lênhx muôx, tsêr uô cux tâu tiêr lơưv, tsi cxơưx tul tsi thiêz, tsuôk cxơưx uô nox uô hâuk thiêz xưz”.

          Zơưv Tẩn Láo Tả, chủ tịch UB xã Phìn Ngan puz pâuz, txos nhiv no tas nro têx ziv chuôz zis hâur thax tsav Sủng Hoảng 2 puôr lênhx tâu txar lol nhoz qơư yiêz. Đrâuv ngaz tul vax tsêr, luz nênhx, tsiv uô xênhz yar trâu pox nhuôs, chính quyênx têx cấp tiv phaz cux tsov cưv tiv zix, tsoz phưz luz nênhx trâu pox nhuôs. Zơưv Tẩn Láo Tả puz pâuz:

          “ Đros thiêz têx chuôz zis txar tuôx nhoz qơư yiêz xã Phìn Ngan mak tiv phaz paz txưv iz phênhv nhiêx phir trâu pox nhuôs. Tôngv vênhx pox nhuôs tso siêz, shir phaz tos shông yiêz”.

          Pox nhuôs thax tsav trâus đêx ngaz Sủng Hoảng li luz nênhx tưz truôx tuk jux jus. Lênhx tưs cux shir phaz, xar njôngr iz shông yiêz muôx luz nênhx tsâu sor đuô./.

                         (An Kiên- Txâur Vax cxeik nhênhv)

Tsar jos huôv tsar kinh tế chuôz zis txix chos ntông nox txir

        Shông 1998 thâuv nhiv kruôr tiêr hluôk, tix lâus Nguyễn Đình Phong tưz đros chuôz zis chos siv txir khơưz đuz. Jux juk txix 100 tsoz, 200 tsoz, tov kaz no tix lâus chuôz zis tưz muôx 500 ntâu tsoz txir khơưz đuz. Đros tsar tov ar tox trôngz ntâu, qiv hơưv huv đros, chuôz zis chor txir khơưz huôv tsar jông. Đros tsưr ziv chos, tsoz phưz cxôngx nzor zos xêir tsov tsoz jông tiv zix chiê krưr chês chos, zuôv qir tsik so, đhâu 5 shông ntông tưz txi txir thiêz sâu đê tâu. Tov kaz no, tâu paz txix dự án txiêr chês, paz uô trâu tsoz txir khơưz tsik lâul sêi, tix lâus chor txir khơưz hax zav jông thiêz sâu tâu ntâu đuô. Đros muôx 30 tấn txir khơưz đuz iz shông, tix lâus chuôz zis sâu tâu txix 300 txos 350 triệu đêiv iz shông. Tix lâus Phong puz pâuz:

        “Tsoz txir khơưz đuz lok six huv đros qiv hơưv ntơưv Mộc Châu hêik cxuô thiêz jok Ôn. Cux lok six hmôngr jông trâu jok Ôn zos muôx dự án tsêr cơưv Đại học Pháp choz zok công nghệ trâu pox nhuôs txiêr chês cov tsoz txir khơưz đuz tsik lâul sêi, tsik chiê tsoz txir khơưz lox siêz. Nhiv no, jok Ôn tâu sêiz zos iz hâur chor qơư muôx txir khơưz đuz jông tiv zix huyện Mộc Châu”.

        Jênhv pâuz tsoz txir khơưz đuz tsuôk sâu tâu iz shông iz chiv, hok ar tox trôngz cux tsênhv yuôr, kuôk no 5 shông, tix lâus Nguyễn Đình Phonh ho sêiz lax đros chuôz zis txêik nzir pênhr txix cuiv tín dụng thị trấn Nông trường Mộc Châu yưv pênhr chos txir cam nôngz Hưng Yên. Chos siv pov zav txir no cux huv đros tsar tov, đêx ar, qiv hơưv hâur thax tsav, tix lâus chuôz zis tror nzir thiêz txos nhiv no tưz muôx 1 cxênhz tsoz txir cam. Chiv sâu xuz thơưx trâu kaz shông tsêz no tix lâus chuôz zis sâu tâu 4 tấn, muôs tâu xar muôx 100 triệu đêiv. Phênhv sâu txix chos txir khơưz đuz, txir cam, đros chor poz cưk, tu zus tsiêx cxu, tix lâus Phong chuôz zis tưz zos yênhx chuôz zis muôx hâur thax tsav. Tix lâus Phong puz pâuz nzir:

        “Tsuôk tok tsoz txir khơưz đuz mak hâur iz shông tsuôk sâu tâu iz chiv xưz. Chuôz zis pov tsoz txir cam sâu tâu trâu kaz shông, cux lok six hưv đros đêx ar, aiv hơưv nhoz jok Ôn. Viv li chuoz zis tưz chos shơư trâu thax tsav chos txir khơưz đuz. Hâur ntu chos, tsoz phưz mak cux xơưv shâuv tsưr ziv chos txir chor qơư txơưr đuô li Cao Phong, Hưng Yên”.

        Ntâu chuôz zis nhoz jok Ôn pov tix lâus Phong chos txir khơưz đuz, txir cam muôx chêx cur kinh tế cux cơưv shâuv uô trơưk thiêz hla đhâu cêr pluôs. Iz zav li niêv tix Nguyễn Thị Nhung li chuôz zis chos iz hec ta txir khơưz đuz, cam, đros sâu zuôr têx kôngz lôngk, iz shông cux sâu tâu muôx nhos 300 triệu đêiv. Niêv tix Nhung puz pâuz: Tưz tsik zos paz zuz nôngz, tix lâus Nguyễn Đình Phong tsênhv tsik so kruôz kriê kỹ thuật chos, tsoz phưz trâu tsoz chos txix zuk li chênhz zênhv:

        “Tix lâus Nguyễn Đình Phong zos lênhx nênhs sir jos uô hâux lưv, uô ntêx hlo hâur huôv tsar kinh tế. Tix lâus cux zos nênhs sưv jê pox nhuôs, đros đrêiv sơưr đơưk kriê trâu pox nhuôs uô trơưk lok six muôx chêx cur”.

        Uô ntêx hla hâur phongz yaox cxuô yêiz thiv pluôs, huôv tsar kinh tế ho sir jos uô phongz yaox nhoz tiv phaz, nhiv no tix lâus Nguyễn Đình Phong tâu pox nhuôs hâur jok xêir tsov uô Tiểu khu trưởng jok Ôn./.

(Bích Thủy-Lik Thox cxêik nhênhv)