Txiêz nanv zoz thôngz nhoz Lai Châu: Qơư phiv liv, 5 shông muôx yưv oz txuz txiêz nanv lox

Qơư phiv liv lok txiêz nanv zoz thôngz ntơưv cêik cêr 57+400, txox cêr 4D thax tsav jos Tiên Bình, thị trấn Tam Đường, huyện Tam Đường, tỉnh Lai Châu. Hâur shông 2013, ntơưv no muôx yưv iz txuz txiêz nanv zoz thôngz lok six zov chênhr, thâuv iz luz yêz ô tô tải thâux njuôs, muôx biến số nhoz Hà Nội phênhk tsik tâu, luz yêz tưz trâus nzênhr thiêz pôngz hâur kaz qox Tiên Bình, uô 5 lênhx nênhs nhoz sâuv yêz trâus tuôs. Ciês hnuz 15/9, cux ntơưv kror qơư no ho muôx yưv iz txuz txiêz nanv thâuv luz yêz ô tô thâux xi măng đrâu luz yêz thâux kruô, uô tas nro oz luz yêz pôngz trâu hâur cưx ha đêx, uô 16 lênhx nênhs trâus tuôs. Zơưv Từ Hữu Hà, chủ tịch UBND huyện Tam Đường, tỉnh Lai Châu puz pâuz:

“Kror qơư no zos kror qơư phiv liv lok txiêz nanv zoz thôngz nhoz huyện. Thiêz ntu cêr no zos nhoz trâu txox cêr 4D tâu Bôv zoz thôngz vận tải sêiz car. Xưk pêz njiê pov tâu mak kuôk no 5 shông, đhâu luz yêz thâux njuôs njiz txiêz nanv mak Bôv tưz khưx phưx. Taz sik, ntơưv kror qơư no tsuv cxiv kho đuô cov huv đros, yêz thiêz tsik muk chênhr hênhr thiêz tiv 2 mak tsuv uô cêr chiê txar jav njiz txiêz nanv zoz thôngz”.

Lơưr pêz njiê pov, zos muk txix thành phố Lai Châu mak ntơưv cêik cêr 57+400, txox cêr 4D nhoz thax tsav jok Tiên Bình, thị trấn Tam Đường, huyện Tam Đường zos njiê đhâu mak cux tsik muôx phiv liv tưs, 2 saz cêr đar muôx 40 thiêr txâuk oz lênhx yêz muk đhâu. Taz sik, tiv pêv hâur ntu cêr grêk har, zos iz ntu cêr ndax ntêr, nênhs tsar yêz tsik so muk chênhr, têx thâuv txos thâuv muk grêk har, ho phanh tsik tâu luz yêz thiêx uô yêz trâus txiêz nanv pôngz kaz cê, tos tox. Zơưv Nguyễn Ngọc Phương, Giám đốc Sở zoz thôngz-vận tải tỉnh Lai Châu puz pâuz:

“No zos ntu cêr lok six phiv liv, tiv zix zos chor nênhs tsar yêz tsik tâu sưv cêr mak zôngx ziv njiz trâus txiêz nanv. Ntơưv kror qơư no oz pêz shông lok no tưz muôx yưv ntâu txuz txiêz nanv zov chênhr. Uô ntêx mak pêz zuôr khưx phưx đuô tas nro têx ndêx cxok, fiêx hêik pâuz lok cêr lơưr cuiz tênhv. Thôngx cxix nhênhz chơưv uô nzir cêr txar jav txiêz nanv chiê txo grêk tsơưs têx phiv liv lok txiêz nanv zoz thôngz”.

Cux lơưr zơưv Phương, uô cêr txar jav txiêz nanv cux tsuôk zos iz kror tsưr ziv phax tsav luz yêz tưs njiz phiv liv lok kỹ thuật mak zuôr muk trâu txox cêr co chiê tsik njiz trâus txiêz nanv xưz. Hok qênhz yuôx txiêz nanv zoz thôngz mak khov lok six ntâu trâu chor nênhs tsar yêz muk lok tâus cêr. Vi li, hêik trâu chor nênhs tsar yêz pâuz thâuv muk đhâu ntu cêr no mak tsuv tsov cưv txos têx fiêx hêik pâuz, thax tav chiê xưv lik tâu huv đros. Đros co, uô ntêx thâuv zuôr tsar yêz muk lok tâus cêr, tsuv qênhz shuôk đuô tas nro zuk luz yêz sêz puôk ngaz tuk mav li sir zôngv chêix tsar muk lok./.

(TTTB-Lik Thox cxêik nhênhv)

Têz- nus lok moz tso jis thax

          Nus: Cur tsênhv muôx mê nhuôs hâur chêr tâu 31 ciêz thiêz ndê cir fênhx yax. Taz sik, jiês mul seiz njuôs jê ntơưv no, mê nhuôs nhiv kruôr muôx 1,7 cir, thiêz ho muôx jis thax. Bác sĩ heik cur tsuv uô jông nox hâuk taz sik cur pov lok six cxơưx, zos cur uô jông nox hâuk tsơưs đuô mak zuôr tsi ndê cir. Zos nox thiêz hâuk ntâu cuô mis mak nyei thax chuôz ndê. Bác sĩ heik kriê cur tsưr ziv nox hâuk huv đros. Zos iz hnuz cur hâuk 3 khoz cuô mis pok ntâu?

          Têz: Uô ntêx cox tsuv tror njuôs siv đuô chor cuô jis, siv thax hâur nyar chiê xav tênhv tâu seiz cox pok trâus muôx jis thax. Zos trâus muôx jis thax mak mê nhuôs khênhr lox đuô fênhx yax, lok sik zôngx ziv trâus nquôr mê nhuôs. Zos tsi trâus moz tso jis thax mak tsưr ziv nox hâuk huv đros zos lok six zuôr trâus đros thiêz lênhx niêv tsênhv muôx mê nhuôs hâur chêr. Đrâuv nox mor, hâuk cuô mis, nox greix...tsuv nox cxaz jâuz, txir ntông chiê muôx txâuk tsơưr pưr trâu mê nhuôs...Zos tsi trâus moz tso jis thax mak iz hnuz hâuk 3 khoz cuô mis cux tâu. Zos trâus moz tso jis thax, cox tsuv hâuk chor cuô mis tsês trâu nênhs moz tso jis thax.

          Nus: Cur shông no muôx 55 shông, tưz hâuk yuôx kho moz tso jis thax lơưr bác sĩ heik kriê tâu 3 luz hlik no. Cur cux nox hâuk lơưr tsưr ziv bác sĩ heik kriê. Nhiv no, cur xar hlôngr tsưr ziv kho moz zos zôngv yuôx njuôz chiê cxênhx txuôk đuô. Li ntơưv pok tâu? Thor bác sĩ paz heik kriê seiz zôngv yuôx têz qơưk lok sik yuôx njuôz kho moz mak zuôr jông đuô?

          Têz: Moz tso jis thax zos zav moz hnhar, tsuv zôngv yuôx ntêr. Vênhv thix nhiv no cox pok zos trâus moz tso jis thax tiês? Zos tưz xav tênhv trâus moz, tsuv zôngv yuôx li bác sĩ heik kriê. Tsi cxoz zôngv yuôx njuôz lok sik têx zav yuôx txơưr. Têx co tsuôk zos paz chơưv kho mê njik xưz.

          Tsôngv cưr tix fôngx zưs hmor yuô! Moz tso jis thax zos iz zav moz uô tuôs lênhx nênhs siêz sâuv ntiêx têz. Zos tsi tâu njuôs pov nzor chiê kho moz zuôr uô muôx têx moz yưv riêz nênhs. Tsôngv cưr tix fôngx zưs tsuv yax six mul seiz njuôs moz chiê pov nzor têx moz yưv thiêz ciêr chênhr kho moz cov nzor./.

( Thu Thùy- Txâur Vax cxeik nhênhv)