Grêix ol Lục Yên zos iz zav grêix nox kaz

Nhoz xar Lâm Thượng, huyện Lục Yên, tỉnh Yên Bái, chuôz zis tưs zus tsơưs cux zus oz pêz tuk ol, ntâu mak yênhx châuv tul txos yênhx puô tul. Yưx têx hnuz chos kôngz lôngk mav muôz têx ol ntơư cơư cov tsik ruôr hiêv têx kôngz; đhâu co pox nhuôs tso chor ol muk zus đrav têx liêx, cưx đêx. Chor ol sik tưr zok nriêr nox, hloz lox jông. Chor ol zus no zos ol muôx ntơưv tiv phaz tưz tâu pox nhuôs tuôr chiê nôngz txix fâuv nênhs no trâu fâuv nênhs tov kaz. Zav ol no muôx tơư đax thiêz lur; chax đaz lur, hâur siêz ntus, blâuz bưl, iz tuk hnhar txix 1,6 txos 2,2 cir. Niêv tix Hoàng Thị Duyên, nhoz jok Tâm Pớt, xar Lâm Thượng puz pâuz:

“Chor ol no thâuv zâu mak chiê nox cxur, nox mor, hloz lox mak nox blêx. Puz tas mak tso muk đrav têx đêx, têx liêx chiê uô si zok nriêr nox nzir. Thâuv zus muôx 1,5 cir tror sâur mak jông tuô nox grêix. Nhiv no pêz cux tsênhv six zus lơưr cxênhx nênhs thâuv ntêx li tsưr ziv tu zus”.

Ol ntơưv no tâu pox nhuôs zus muôx nhos 4 hli mak jông nox grêix, taz sik kaz đuô mak zos chor ol zus muôx 5 txos 7 hli. Txos têx hnuz ntênhk hội ntênhk tsiêz, Pox nhuôs cxuô mênhx cxưx nhoz Lục Yên tưz muôz grêix ol chox lok uô tâu ntâu  zav nox kaz li: plaz hnhur ol, ciz shơư jâuz iêz (iz zav blôngx ntông tuôx ntơưv têx trôngz jôngr poz jêz, lok sik hâur har shôngz iêz); đros ntơư cux muôz têx chax đaz, tik, tơư ol ntov mok shơư đros nôngz ntông đaz, jâuz luôv lơưk, tâux đuz, hmôngr cxur ciz gis… đhâu co muôz blôngx njê krưr chiê ndu lok sik chuz cov siêr. Taz sik kaz thiêz nhiêv nox đuô cux zos grêix ol hâu cxôngr yênhx đêiv nox njư đros cuô kâuz muôx luôv lơưl cxôngr mok tor shơư…Chor nênhs pâuz nox mak tsuôk njiê pov ntiv cuô njư, lok sik têik iz đêiv grêix ol sêiz xưz zênhx pâuz tiêk zos grêix ol Lâm thượng; taz sik chiê uô cov yênhx iz zav nox kaz, tâu tsôngv kruôv nhiêv nox, ndo njôngr txos mak nênhs uô nox cux tsuv pâuz uô. Tix lâus Hoàng Văn Lục, nhoz xar Lâm Thượng, huyện Lục Yên hêik:

“Thâuv tuô uô grêix mak zov chênhr đuô hur si, tsuv uô ol cov hur, muôz njêr jơưr ol cov hur jông mak thiêx tsik tsư. Hok thâuv hâu mak tsuv tsov cưv txos đêx hâu, chiê đêx râuz cov zuôr luôs bâu mak mav muôz ol hâu trâu grêix thiêx li khor, kaz. Hok đêx bâu hênhr lơưv mav muôz ol hâu trâu mak zuôr siêr muôs saz đrâuv tơưr hok hâur grêix mak ho tsik tâu siêr lok sik grêix ol tsênhv liêz”.

Tâu tu zus đrâuv têx liêx, cưx đêx, ol Lâm Thượng tsik tsư nxiêz, muôx trox tsơưs, tâu nênhs hâur thax tsav qơư no sêiz zos iz zav nox kaz chiê tiêv kruô, zos zav huv muôx gri khơưk muôz puz trâu têx fôngx zưs sơưr đơưk. Ol cux zos iz zav nox tâu tsôngv kruô nhoz đêz jê tuôx txos ntơưv Lục Yên tsik so zok nriêr nox thiêz zos yênhx iz hâur tỉnh Yên Bái li câuv zav nox kaz. Tix lâus Nguyễn Đình, iz lênhx nênhs tsik so tuôx trâu Lục Yên zok zuôr têx poz jêz jông gâux hêik:

“Iz jiês tuôx trâu Lục Yên mak tsuv nriêr grêix ol nox li ol Lâm Thượng lok sik Khánh Thiện, viv ol ntơưv no tâu zus hâur têx đêx hur, nox mak lok six kaz, muôx ntâu zav nox lok six nhiêv txix grêix ol, đrâuv nox grêix ol hâu mak muôx zav nox nduôr ol, lơưr zôngv grêix ol tor shơư nduôr thiêz muôz chuz đros têx zav txơưr, nox tâu mak ndo njôngr txos. Iz zav nhiêv nox thiêz zos muôz plaz hnhur ol đho shơư plơưr tsơưz nhôngk lok sik car zưv nox mak lok six lax siêz thiêz kaz”.

Nhiv no, đros ciêz đrôngs li nhiêv zuôr ntâu, ol Lâm Thượng tưz tâu huôv tsar zus ntâu ntơưv têx xar muôx đêx, tênhv qơư iz zav li Khánh Thiện, Khai Trung, Tân Thượng, Mai Sơn….Đros co, cux tưz piz muôx yưv cxiv luôs paz sâu zuôr muôs, tu zus ol lơưr tsiv gri kinh têr siêz./.

(Trinh Xuân-Lik Thox cxêik nhênhv)

Đeiv ntâuz bos kror ndâux tâu xa txos tsôngv box pluôs nhoz ntus đriv Lai Châu

          Jos Sơn Bình, xã Ma Ly Pho, huyện ntus đriv Phong Thổ, qơư muôx trôngx đriv Ma Lù Thàng, hâur ntâu hnuz đhâu lok no tsi pov muôx chôngz lênhx nênhs mul lok li ntu đrav ntêx. Tas nro jos muôx 60 ntâu ziv chuôz zis đros zuôr xar 300 lênhx nênhs tsôngv box Cho nhoz uô nênhx. Tiv ziv, nhoz no muôx ndêx cxok cêv kuôk ntus đriv 67 (2) nhoz jê hâur iz chuôz zis tsôngv box li tos tsêr, tsuôk mul 2,3 truôv txơưv hla trâu ntus đriv saz têz qơưk đrâuv.

          Cxôngx thâuv moz cô-vít 19 huôv xênhz nhoz têz qơưk Trung Quốc, tâu bộ đội pênhz phax yax mông, pox nhuôs jos Sơn Bình cux xưk li xã Ma Ly Pho tưz jênhv pâuz tâu tsênhz đuô lok caz moz thiêz chuv tôngv phax tar. Têx bộ đội cux paz txưv muôz tsi zuôr nhiêx txiêx đeiv bok kror ndâux trâu tsôngv box, tsi chiê moz cik txos tiv phaz.

          Niêv lâuk Tẩn Thị Viên, iz lênhx tsôngv box nhoz jos Sơn Bình, xã Ma Ly Pho shir phaz heik:

          “Hnuz no pox nhuôs mul đhâu cêr lok six jông siêz viv tâu têx bộ đội muôz đeiv bok kror ndâux tsi zuôr nhiêx txiêx. Pox nhuôs lok six uô tsâus ntâu txos têx cán bộ, chiến sĩ tưz paz pox nhuôs. Thiêz xar njôngr têx cán bộ chiến sĩ tror uô têx hâux lưv jông, muôx ziz njiêz li ntơưv”

          Qơư muôz đêiv ntâuz bos kror ndâux puz trâu tsôngv px tsi zuôr nhiêx txiêx nhoz cei cêr số 2 sâuv cêr mul trôngx đriv, têx hnuz đhâu, lưx lươngv bộ đội pênhz phax nhoz Zênhx pênhz phax trôngx đriv Ma Lù Thàng, huyện Phong Thổ tưz muôz tsi zuôr nhiêx txiêx yênhx cxênhz đeiv ntâuz bos kror ndâux trâu tsôngv box mul lok đhâu trôngx đriv. Viv qênhx shênhx moz cô-vít 19 cik cxôngx lênhx nênhs trâu lênhx nênhs, huôv xênhz txơưr txar, hâux lưv zuôr đeiv bok kror ndâux chiê phax tar moz nhoz ntâu qơư njiz phêv liv viv muôx tsi txâuk đeiv bok kror ndâux, hâux lưv muôz đeiv bos kror ndâux tsi zuôr nhiêx txiêx ntơưv no tâu tsôngv box thôngx ziv siêz.       Niêv lâuk Tạ Thị Ngân Hà, cưk kriê tsêr cơưv cxênhx iz mê nhuôs zâu Huổi Luông, huyện Phong Thổ jông siêz heik:

          “Tâu jênhv đeiv ntâuz bos kror ndâux li no lok six jông siêz, viv tsênhz mênhx uô hâux lưv yênhx hnuz mak cur cux chox iz đeiv li no. Viv cur tâu hlôngr ciês đeiv bos kror ndâux, tsi zuôr mul tsêr thiêx li tâu hlôngr yiêz”.

          Uô jênhv vưv tâu choz têx hnuz no zos tir tar tsi chiê caz moz cô vít 19 cik txos thax tsav, têx cán bộ, chiến sĩ Zênhx pênhz phax trôngx đriv Ma Lù Thàng tưz chuv tôngv sik côngv đros têx lưx lươngv truôx siêz yax mông chiê tsôngv box muôz siêz jênhv pâuz, tsưv ziv uô jông têx tsưr ziv phax tar moz. Thôngz sâu txos nhiv no, tsôngv box ntơưv 23 xã ntus đriv sâuv thax tsav tỉnh Lai châu tưz tâu muôz tsi zuôr nhiêx txiêx yênhx châuv cxênhz đeiv ntâuz bos kror ndâux. Thiêz nhiv no, hâux lưv chox đeiv ntâuz bos kror ndâux chiê phax tar moz zos tưz yênhx cor cav thâuv tsôngv box tơưv mul đrâuv jôngr.

          Đại úy Phạm Tuân, chinhr trị viên phưv Zênhx pênhz phax trôngx đriv Ma Lù Thàng huyện Phong Thổ, tỉnh Lai Châu puz pâuz:

          “Hâur six hơưv moz huôv xênhz hâux lưv tsôngv box zuôr tâu đeiv bok kror ndâux njiz ntâu phêv liv. Đros thiêz Cán bộ, chiến sĩ pênhz phax li txơưx jênhv, pêz tưz tsưr tsix muôz đeiv bok kror ndâux y tế tsi zuôr nhiêx txiêx trâu tsôngv box; chiê gôngr phênhv pheiz kênh têx phêv liv đros tsôngv box hâur côngz xưv phax tar moz”./.

(Khắc Kiên- Txâur Vax cxeik nhênhv)