Lào Cai: Tsôngv box tok njôngr cxiv kho đuô qơư tso têx đêx kiêk nênhs, vuôz tsuôz Apatit trâus xưz, tơưs tsi jông

2 hnuz đhâu thâuv tsêr meir tuyển Bắc Nhạc Sơn-Công ty Apatit VN nhoz ntơưv jok Củm Thượng 2, xã Đồng Tuyển, TP Lào Cai qơư tso têx đêx kiêk nênhs, vuôz tsuôz trâus xưz, tơưs; têx jêx jok nhoz jê iz ndis đrav kaz kror qơư trâu têx đêx kiêk nênhs, vuôz tsuôz heik sâuv tsi pov kaz uô li chas, đhâu thâuv tsêr meir têx đêx kiêk nênhs, vuôz tsuôz ntưk, cxênhv trâu cxiê qơư. Muôx têx kror qơư, đêx cux tsi tâu ntưk, tsi tâu kruôr tas, muôx kênh thax mak têx cuô ar kiêk nênhs, vuôz tsuôz ntưk lok cxuz tas tsôngv box têx jâuz, liêx têz tuôz iz đok..... Ntâu lênhx tsôngv box cux tsênhv heik uô nyei trưs thiêz cxơưx tiêk, shor zuôr uô li chas thiêx tsi trâus hiêv, viv nhoz jê tsêr meir, trâus uô ruôr hiêv thâuv tưs cux pâuz tsi tâu:

Zơưv Hoàng Văn Hủ nhoz jok 4, xã Đồng Tuyển: “Thâuv cur pov mak tưz qir muôx têx đêx kiêk nênhs mê njik đro thiêz đuz, tsi pâuz shor lênhx tưs tso pak njêl lok uô chas. Txos thâuv cur muk txos pêv hâur mak thiêx pâuz zos njưs thêir têx đêx kiêk nênhs sâuv trâus xưz, tơưs; cur li hu xor tôngx trâu hâu nov ntơưv qơư, lơưr li tuôx qênhz yuôx shuôs”.

Zơưv Vi Văn Tàng, nhoz jok 3, xã Đồng Tuyển: “Cur xar tiêk, uô chas lơưr tso đêx li no, thâuv ntơư qênhz pov mak tir thêir ciês, muôx têx zuôr tsi trâus uô ruôr hiêv, viv thâuv co nhiv kruôr cxênhv tsơưs xưz, taz sik ziv hnuz ziv ntưk thiêz cxênhv ntâu lok”.

Zơưv Ngô Văn Can, nhoz jok 3, xã Đồng Tuyển: “Nhiv no cur têx pak njêl tưz tsês tâu iz shông ntâu lok lơưv tsi ntâuk muôz, nhiv no trâus pôngz tas hur si, tsênhv xar tiêk txos tsiêz zuôr ntâuk muôz têx njêl lok nox, 2, 3 tênhr njêl puôr lênhx trâus pôngz tas”.

Zơưv Vi Văn Tàng, nhoz jok 3, Đồng Tuyển: “Trơưk li cur, tsôngv box nhoz no mak tsi truôx tuk, viv đruôz hnuz mak tsi luôx tưs, taz sik hmo ntux zos muôx đêx nas huôv hloz lok sik xưz, tơưs têx njưs tar đêx mak zuôr uô chas khiêr điv đhâu”.

  Lơưr taz viv muôx têx tsi jông li heik sâuv, zơưv Nguyễn Mạnh Thắng, Giám đốc tsêr meir Tuyển Bắc Nhạc Sơn-Công ty Apatit VN heik pâuz, tiv kror qơư thêir, tso liv têx đêx kiêk nênhs trâul xưz, lor uô ntâu têx đêx kiêk nênhs đros trâu têx cuô ar uz no ntưk, cxênhv lok trâu thax tsav kaz đês. Nhiv no, tưz cxơưk kror qơư tso, liv têx đêx kiêk nênhs ntơư. Taz sik, tsêr meir tsênhv tror muôx tsưr ziv xưv lik chiê taz por truôx tuk trâu uô hâux cux li trâu têx thax tsôngv box nhoz jê iz ndis ntơư. Trơưk li zơưv Thắng, têx tsi jông jâuv no cux zos iz kro trâu tsêr meir cux li Công ty cơưv shâuv, pâuz tâu:

“Pêz tsưr tsix têx tsưr ziv shâuv uô têx nuv lok sâuv phax tar, taz sik cux xar tsi tâu tiêk, zuôr muôx têx tsi jông li no, viv li thâuv muôx yưv têx li heik shâuv cux tsi pov kaz zuôr uô li chas. Đhâu têx tsi jông co, pêz cux pov tâu tiêk, tsuv moz siêz txos uô jông đuô thiêz hâux lưv qênhz yuôx shuôs têx côngz trênhx cik txos qơư tso, liv têx đêx kiêk nênhs, vuôz tsuôz, têx njưs tar đêx...chiê kho tâu zênhx max têx tsi jông”.

Uô ntêx, hâu nov ntơưv qơư cux tsênhv tror muk shuôs, tôngv zênhx, đros tsôngv box khưx phưx têx tsi jông đhâu têx đêx kiêk nênhs, vuôz tsuôz uô ruôr hiêv. Iz chas ntơư, hâux lưv thôngz sâu têx trâus uô hiêv cux tâu 2 tos sik đros paz chiê uô tâu jông. Zơưv Lâm Hoài Vũ, Chủ tịch Ủy ban xã Đồng Tuyển, TP Lào Cai heik:

“Pêz hux jos đros têx phongx ban hâur TP, đros Công ty Apatit VN pheiz uô 2 đoanx muk qênhz yuôx shuôs tsôngv box têx chuôz zênhx, kôngz lôngk trâus uô ruôr hiêv chiê txix ntơư muôx tsưr ziv pâux nzir trâu tsôngv box”.

          Đhâu thôngz sâu, tưz qênhz pov têx tsi jông li heik sâu, thâuv 8 six têik cik hnuz 17/1, taz sik tsuv pôngz nhos 8 luz six hơưv hu sđ tuôx phax tir thêir, cxiv kho thiêx kho tâu, 80 cxênhz ntâu yiv đruôz têx đêx kiêk nênhs, vuôz tsuôz tưz ntưk, cxênhv tas trâu têx ar, uô ruôr hiêv tas ntâu nhiêx txiêx. Cux hmôngr jông têx li heik sâuv muôx yưv thâuv đruôz hnuz, tâu tsôngv box qênhz pov thiêz yeik txar zênhx max viv li tsi muôx lênhx tiz nênhs tưs trâul uô hiêv, taz sik tsôngv box sđ têx cêr cxơưx cux tsênhv nhoz đrêiv hâur niêx hnuz, viv lơưr tsênhv uô nênhx nhoz jê iz ndis qơư tso, liv têx đêx kiêk nênhs, vuôz tsuôz co. Uô li, têx lênhx hlôngr njêx muôs tsêr meir têx luk chos tsês pok  muôx tsênhz tiês lok tsi tsênhz, chiê tsi tror muôx yưv têx jông li heik sâuv? Thiêz chor cơ quan muôx vax huôv pok zuôr sir jos đros qênhz yuôx, uô tsênhz mênhx tsêr meir thiêz công ty li txơưx jênhv lok tsi uô? Têx luk têz lok tsênhv njiêz co tsênhv tâu tsôngv box ntơưv qơư tok njôngr hâur niêx hnuz./.

(An Kiên-Riê Lâux cxeik, nhênhv)

Nguyễn Hồng Siêm, zos iz lênhx cưk yuôx đrox njuôz

Nguyễn Hồng Siêm zos iz lênhx cưk yuôx kho moz txix shông 1975, zos tsưx phưv đas jos trâu tsôngv px hâur thax tsav tox siêz đêz đrôngl tỉnh Laox cai. Đhâu 9 shông uô hâux lưv kho njuôk moz trâu tsêr kho moz thị xã Laox Cai, cưk yuôx Siêm, tâu tso muk uô hâux lưv kho njuôk moz trâu khoa y học cổ truyền, tsêr kho moz đa khoa tỉnh Hà Tây kuz (Nhiv no zos tsêr kho moz Hà Đông). Ntơưv qơư kho njuôk moz no, cưk yuôx Siêm tưz muôz yuôx đrox njuôz thiêz yuôx têz qơưs kho moz trâu yênhx vạn lênhx nênhs. Hâur ntu uô hâux lưv trâu ntơưv Hội đông y đrôngl Hà Nội, cưk yuôx Siêm, tưz xar tơưv ntâu faz tsưr ziv kho njuôk moz thiêz kriê cơưv cxaz nzir txux chi kho njuôk moz trâu hội viên. Xav hâur iz shông, cưk yuôx Siêm tưz kriz tâu ntâu lớp kriê cơưv tsưr ziv txux chi kho njuôk moz trâu 300 ntâu lênhx hội viên thiêz kho njuôk moz trâu 4 cxênhz ntâu lênhx nênhs moz. Xav hâur shông 2016 txos trâu nhiv no, cưk yuôx Siêm tưz chox car thiêz kho njuôk moz, phêiz yuôx tsik tas nhiêx trâu 494 cxênhz lênhx, grê nhiêx tas 1,2 tỷ đêiv. Lar hêik txos đuô zos hâur ntu nhiv no, cưk yuôx Siêm tưz đros tsêr mnov Vạn phúc, huyện Sóc Sơn, cxiv uô iz kror qơư kho njuôk moz trâu chor nênhs muôx côngz têz qơưs, chor nênhs pluôs hâur tsêr mnov.

“Nhiv no tsuv sir jos huôv tsar truôx ngênhx đông y, cur xar, chor hluôk nhiv no tsuv nhênhz chơưv khoa học công nghệ muôz yuôx đrox njuôz kho moz gênhk. Đros ntơư, cur cux xar tiêk, sđ tsuv chos cxuô zav yuôx đrox njuôz, viv njuôx đrox njuôz cux zos iz zav yuôx jông”

Cưk yuôx Siêm sir tas đas jos tsưr ziv sir zôngv yuôx đrox njuôz thiêz yuôx têz qơưs kho moz gênhk, thâuv tưs cux tâu sđ njênhs njôngr thiêz muôz cưk yuôx Siêm sêiz tsiv grê. Cưk yuôx Hà Văn Tiêu, hội viên hội cưk yuôx đrox njuôz đrôngl Hà Nội hêik pâuz tiêk: Cưk yuôx Siêm, zos iz lênhx sir tas đas jos tsưr ziv zok nriêr thiêz xar tơưv ntâu faz tsưr ziv kh njuôk moz. Lar hêik zos muôz yuôx đrox njuôz kho moz đros yuôx têz qơưs.

“Cưk yuôx Siêm, zos iz lênhx muôz siêz truôx bo trâu luôs hâux lưv kho njuôk moz, tâu cxuô lênhx cưk yuôx hâur tsêr kho moz cơưv shâuv thiêz uô trơưk. Txix shông 2008, cưk yuôx Siêm tưz uô tâu tiêr ntâu luôs hâux lưv jông: Ntơư zos đros tsêr cơưv trung học Tuệ Tĩnh kriz lớp cơưv  y sỹ thiêz xav txos trâu nhiv no tưz muôx iz cxênhz lênhx shuv xênhz cơưv tiêr cưk yuôx kho njuôk moz tơưv tsêr cơưv”.

Chênhr zos sir tas đas jos tsưr ziv uô luôs hâux lưv kho njuôk moz trâu tsôngv px sđ, cưk yuôx Siêm tưz tâu têz qơưs muôz côngz hov 3 thiêz tâu Chính phủ, Bộ y tế muôz ntâu ntơưr kruôk./.

                                               (Tsu cxêik nhênhv-TTT)