Uô tâu truôx txix huôv tsar cêr fôngx zưs nhoz jêx jok ntus đriv Lai Châu

         Trơưk ntus đriv Huổi Luông, Cêr ntus đriv ntâu ntu tâu cêv kuôk txix tuk đêx zâu, oz saz nhoz siz jê mak zuôr sik thav, xa xor mông tâu txix luk hêik. Cux tiv thax tsav tox trôngz siz txuôk, viv li cêr coangz siv nhoz pêx xênhv oz saz ntus đriv tsik so truôx jông. Tiv zix, hâur 2 shông đhâu, oz sz ntus đriv tưz tsưr tsix sik côngv oz luz jok Pô Tô (xã Huổi Luông, huyện Phong Thổ) đros jok Cửa Cải, trấn Kim Thủy Hà, huyện Kim Bình, tỉnh Vân Nam, Trung Quốc. Zơưv Cao Hải, Tsưr jok Cửa Cải, trấn Kim Thủy Hà (Trung Quốc) hêik:

“Pêx xênhv oz jêx jok tsik so uô jông coangz siv sik côngv, tsik muôx siz char, siz chês, sik đros cxiv tsa ntus đriv hux fênhx, thôngx ziv, sik côngv thiêz huôv tsar. Oz saz sik paz uô kôngz lôngk, zuz nôngz. Sik paz muôl muôs txir tsơưz thiêz têx hax huv txơưr đuô. Pêx xêhv oz saz li kinh tế ziv hnuz ziv huôv tsar”.

         Hok niêv tix Già Sa Bủn, jok Pô Tô, xã Huổi Luông, huyện Phong Thổ, tỉnh Lai Châu puz pâuz:

“Đhâu thâucv muôx sik côngv thôngx ziv nhoz oz têz qơưk, zos lênhx nênhs nhoz hâur xã, pêz tsik so uô jông lơưr têx cuiz tênhv ntơưv ntus đriv thiêz têx cuiz tênhv lok muôl muôs hax huv thiêz uô jông lơưr Đảng têx cêr chêi lok ntus đriv. Pêz sik sôngv sik paz tuôr chiê hux fênhx nhoz ntus đriv”.

         Chôngz lênhx nênhs nhoz xã Huổi Luông khav tênhv: Thâuv ntêx no tsik tâu muôx sik côngv, sik paz, têx thâuv pêx xênhv oz saz ntus đriv tsênhz muôx siz char siz chês. Txix 2 shông ntâu lok no, pêx xênhv nhoz jok Pô Tô (Việt Nam) cux xưk li pêx xênhv jok Cửa Cải (Trung Quốc) tưz cêir chêx tas nro têx phiv liv tsênhv muôx, tsik chiê têx phiv liv yiêz muôx yưv thiêz sik paz chiê huôv tsar kinh tế. Đại tá Phan Hồng Minh, chính ủy bộ đội pênhz phax tỉnh Lai Châu puz pâuz: Đrâuv oz luz jok Cửa Cải thiêz Pô Tô cir jênhv sik côngv, sik paz, bộ đội pênhz phax tỉnh Lai Châu cux sir jos uô côngz xưv yax kriê, hêik tsôngv box cxuô mênhx cxưx pâuz thiêz uô jông côngz xưv thôngz xor mông đối ngoại:

“Chor shông đhâu bộ đội pênhz phax Lai Châu tưz muôx ntâu tsưr ziv paz trâu pêx xênhv huôv tsar kinh tế-xã hội. Tiv zix ntơưv xã Huổi Luông muôx tsưr ziv pêx xênhv huôv tsar chos tsơưz. Thôngz đhâu sik paz, sik côngv jêx jok thôngx ziv ntus đriv mak saz pêx xênhv Cửa Cải cux tưz sâu zuôr paz trâu pêx xênhv Huổi Luông muôx 10 van ntâu tấn txir tsơưz. Chos tsơưz tưz paz trâu pox nhuôs chor hax huv co muôx qơư muôs truôx. Paz trâu pox nhuôs cxuôv yêiz thiv pluôs”.

        Tsênhv tsênhz tưz puz pov, sik côngv côx phax zos kror jông hâur coang siv côx phax oz tos Việt Nam-Trung Quốc. Hâur co, tsưr ziv sik côngv, sik paz nhoz chor đồn, trạm, jêx jok oz saz ntus đriv; chor huôx tôngv qênhz yuôx, cơưv shâuv uô cê tưz paz uô trâu sik njênhs siêz đuô, paz ntus đriv oz têz qơưk truôx tuk, thôngx ziv thiêz huôv tsar. Thiêz hnuz no, hâur yênhx jiês yêz thâux  pox nhuôs Huổi Luông li chor txir tsơưz, hax huv muk trâu Trấn Kim Thủy Hà lok sik pêx xênhv jok Cửa Cải chor hax huv lok Việt Nam tưz tsik yuôr têx phiv liv, cêr cxơưx tưs. Pêx xênhv oz saz ntus đriv ziv hnuz ziv siz njênhs thiêz sik côngv huôv tsar./.

(TTT-Lik Thox cxêik nhênhv)

Yax kriê lok sâuv tsưr ziv  phax tar têx moz txơưx siz cik ntơưv côngv thôngx

         Cxuô lênhx sơưr đơưk puôr lênhx muôx têx zôngx ziv cik tâu moz, moz siz cik hâur côngv thôngx li: Cêr uô pa, nox hâuk, nyar, nhoz siz jê uô cê....

         Sơn La zos thax tsav muôx ntâu qơư nông thiêz cuz sor, cêr uô nênhx nox nhoz tsi tâu huôv tsar jông, ntâu heir nênhs uô nênhx nhoz uô cê đros trâu phôngz cxưx cêr nênhx, xênhz huôx pôngz kaz, viv li têx moz siz cik tsav phênhv ntâu, hâur niêx shông tưz pov muôx yưv têx zav moz li: Moz vưv, moz hlưz hâu, moz trơưk plaz, moz khâuz thuôs, moz kruô tâuv, moz kos kaz poz njês.....

         Ciês 6 luz hlik hâur shôngk shông 2017, tỉnh Sơn La muôx: 3 lênhx trâus moz thiêz trâul tuôs tiv moz vưv ntơưv huyện Sông Mã, Mai Sơn thiêz Mộc Châu; 6 lênhx nhuôv mok trâus moz njưx txiês ntơưv Sông Mã, Mộc Châu, Vân Hồ, Mai sơn, quỳnh Nhai, tuôs 4 lênhx; 69 lênhx trâus moz hlưz hâu, tuôs 9 lênhx, phênhv ntâu nhoz têx huyện Sông mã, Mường La, TP, Thuận Châu, Yên Châu, Mai sơn, Phù Yên, Bắc Yên. Iz chas ntơư tsênhv sâu jênhv zuôr xar 4.800 lênhx trâus moz trơưk plaz, 7.500 ntâu lênhx trâus moz khâuz thuôs, phênhv ntâu nhoz têx huyện, TP..... Viv li tsôngv box sđ tsuv moz siêz txos iz cxiê kror li đrav kaz chiê bax phax tir thêir têx moz gênhs ntơưv côngv thôngx li:

         1.Thâuv zuk tul khênhx, têx nênhs hâur tsêr trâus moz lok sik tâu xav tiêk trâus moz têx moz txơưx siz cik: Tsi cxoz chiv chir zuôr yuôx lok nox kho moz hâur tsêr, uô nênhz seiz, seiz zêis......mak tsuv chox ciês muk trâu têx qơư y tế chiê tâu heik kriê, seiz njuôk shuôs thiêz kho moz nzor, tsi chiê huôv uô moz lox, txo grêk tsơưs moz siz cik đêz đar hâur côngv thôngx, chuôz zis thiêz txo grêk têx lênhx nênhs trâul tuôs.

          2.Phax tar moz nzor txix cxax yuôx vắc xin:

-Têx nhuôs zâu tsuv tâu cxax yuôx vắc xin phax tar moz cxix cxuô hâur tsaz yênhx cxax yuôx phax tar moz đêz đar ntơưv têx qơư y tế xã tsi so hâur niêx hli trơưk cui tinhv cxax yuôx phax tar moz chiê phax tir thêir têx moz gênhs li: Moz siêz, moz kruô njưk, moz tuôs têk tuôs tơư, moz njưx txiês, moz njưk, moz hlưz hâu.....tiv têx caz moz li: caz moz kruô pax kruô piêk,, Rubella, moz hlưz hâu Nhật Bản uô huôv moz.

-Têx lênhx uô niêv tsênhv nhoz hnuz nhôngs xênhz zus nhuôs lok sik thâuv tsênhv muôx nhuôv hâur chêr tsuv muk cxax yuôx vắc xin AT phax tar moz njưx txiês trâu lênhx niêv thiêz lênhx nhuôv thâuv xênhz zus tâu lok.

-Iz chas ntơư, nênhs lâuk lok sik têx nhuôs zâu tsi tâu cxax vắc xin phax tar moz hâur cxax yuôx phax tar moz đêz đar viv qir tiv li chas puôr lênhx muôx têx cxax yuôx vắc xin phax tar moz, zuk thêv zuk nhiêx ntơưv tsênhv qơư y tế huyện, tỉnh chiê bax phax tir thêir moz.

         3.Phax tar moz ntơưv côngv thôngx txix tsưr ziv:

-Vêv xênhz vax tsêr hur si, luôx, đoz têx đrox iz ndis cov đu lus, khơưz thiêz thoz huk têx cưx đês cov đêx ntưk tâuk. Thâuv pư tsuv đei vix tsav chiê zôngr tsi tov.......

-Vêv xênhz hur si lênhx tiz nênhs, thâuv hnôngk tsuv bos kror ndâux, chox ntâuz bos kror ndâux thâuv trâus muôx moz, tsi tâu tso jik ntơưv têx qơư tsi trơưk cui tinhv.

-Tsuv nox siêr, hâuk bâu, xeir têx zav nox ngaz tuk, pâuz tsênhz qơư, tsi muôz têx tsiêx cxu, shuôz njêl trâus muôx moz thiêz tuôs lok uô nox, thiêz heik trâu hâu nov ntơưv qơư lok sik cơ quan kho moz tsiêx cxu, y tế nhoz jê yax pâuz chiê xưv lik zênhx max.

-Tsơưs mul lok, ndis shuôs têz qơưk uô si txos trâu têx thax tsav qơư tsênhv muôx moz txơưx siz cik huôv xênhz./.

(Hồng Việt-Riê Lâux cxeik, nhênhv)