Chủ tịch têz qơưk Trần Đại Quang phôngv tsiêz Trung thu nhuôs zâu hur si têz qơưk

Ndaz ndơưv tsiêz Trung thu 2017, Chủ tịch têz qơưk Trần Đại Quang tưz muôx ntơưr xa trâu chor nhuôs zâu sâuv thôngz têz qơưk. Chủ tịch têz qơưk sâu:

         Cxuô lênhx nhuôs zâu hmor yuô!

         Tsiêz Trung thu tưz txos. Cur thor xa txos trâu cxuô lênhx nhuôs zâu sâuv thôngz têz qơưk, cxuô lênhx nhuôs zos nênhs Việt Nam nhoz saz đrâuv têz qơưk thiêz cxuô lênhx nhuôs zâu nênhs saz đrâuv têz qơưk nhoz Việt Nam têx kror jông tiv zix. Tsiêz Trung thu shông no, cxuô lênhx nhuôs muôx nzir têx kror huv tsiv gri, co zos chêi nhuôs zâu tâu uô lơưr txix hnuz 1/6/2017 đros ntâu cuiz tênhv yiêz, cxix cxuô thiêz tsênhz mênhx lok qênhx nhuôs zâu, cơ quan, tsưr tsix, qơư zoz zux, chuôz zis, tiz nênhs li txơưx jênhv hâur uô lơưr qênhx nhuôs zâu.

Cur lok six shir phaz thâuv chor nhuôs sir jos cơưv ntơưr, cơưv shâuv, uô ntâu hâux lưv jông, tiv zix zos chor nhuôs nhoz têx qơư trâus ntux têz uô hiêv tưz sir jos đhâu têx phiv liv hâur luz nênhx thiêz cơưv ntơưr. Cur yax kriê sơưr đơưk zuôr tâu xêir zos chor nhuôs zâu hâur thôngz têz qơưk tâu cxaz chuôz Diễn đàn nhuôs zâu têz qơưk jiês tiv 5 nhiv kruôr đhâu tưz sik truôx siêz njôngr, sik đros thav thiêz tso tơưv têx ziv chênhv xa trâu pêz sơưr đơưk, chor nênhs lênhx tov chor bộ, nganhx, cơ quan, tsưr tsix lok phax, tar nto tsiv, uô hiêv txos nhuôs zâu.

Cur hênhr kruôk sơưr đơưk tưz sir jos chiê zos yênhx nhuôs ciêz, shux xênhz cơưv ntơưr txơưx; vav sơưr đơưk tror sir jos cơưv shâuv lơưr Hloz Hôx 5 lo luk kriê, uô lơưr chor nênhs jông, chiê tov kaz no zos yênhx nênhs jông, paz cxiv tsa têz qơưk Việt Nam ziv hnuz ziv jông, bluôx nux đuô.

Cur thor phôngv côngz jông trâu chor nhuôs sơưr đơưk hla trâu shông cơưv yiêz uô tâu ntâu luôs hâux lưv jôngz thiêz tok tsiêz Trung thu lov jêv, shir phaz./.

(Lik Thox cxêik nhênhv)

Trung thu jông trâu têx nhuôs zâu thiêz cêr siz hluz siz paz, sik pheiz kênh têx cêr txov

         Ntâu lênhx đros uô tsaz yênhx “Trung thu trâu têx nhuôs” ntơưv tsêr kho moz K Trung ương tưz uô sơưr đơưk tâur tsi tâuk cuô muôs thâuv mnôngs lênhx nhuôs Hoàng Quỳnh Trang, 13 shông, nhoz Phú Thọ hu jax gâux heik txos lênhx niêv. Njiê tuk nhuôv lok six zuôs, yuôr iz tsuôs cxa, jâuv hâur luz yêz đor têk lok zos yêz lăn, flu đuz txis thiêz sâuv tâuz hâu tưz tsi yuôr iz txox plâuz hâu hlo, viv trâus moz trưx phax, uô trâu lênhx nhuôv Trang co tsi muôx cêr chiê siêz, shir phaz đros luôs lưv tuk fôngx zưs txơưr đuô đros zuk iz fâuv. Lênhx nhuôs co siêz xar njôngr iz jiês no cov tâu đros tơưk tênhz lov jêv uô si hâur hmo hli đra Trung thu:

“Cur xar njôngr cov cur tuk moz jông sei chiê tâu muk tsêr đros niêv. Cur 2 cxeik tơư tưz muk tsi tâuk cêr; viv li cur cux xar cov muôx 2 tuk pak đris, cxênhv 2 saz chiê shâuv muk cêr”.

         Tsi tâu seiz njiê têx fôngx zưs nthuôr uô cêr lov jêv hâur tsaz yênhx trung thu trâu têx nhuôs zâu, lênhx nhuôv Hoàng Tiến Mạnh, muôx 9 shông, nhoz Tả Thanh Oai, Thanh Trì, Hà Nội nhoz thiêz jâuv, pư iz pơưs sâuv txax; viv trâus moz trưx hâur têx sâur nyar . Mạnh siêz xar cux zos xar njôngr cov zuk tul moz jông, mul lok tâu li ntu đrav ntêx, lok sik xar cov tâu iz luz tos hâur ndông puôs chiê tso tơư thiêx tsi yuô moz. Niêv lâuk Trần Thị Hạnh, tuk nhuôv Mạnh niêv heik pâuz:

“Shông uô ntêx, tuk nhuôs tsênhv tâu uô si lov jêv Trung thu thiêz tok tsiêz, taz sik txix thâuv hâur shôngk shông txos nhiv no, tuk nhuôv đas jos tưz ntâus lơưv ntâu, cux tsi pâuz shor zuôr uô li chas, tsuôk xar cov tuk nhuôv tâu jông moz xưz. Nhoz no pêz chor uô niêv uô txir cux tsuôk xar cov têx nhuôs muôx đas jos chiê uô si lov jêv…. Iz hnuz tưs chor nhuôs trâus tso pêz tsês, zuk hluz têx nhuôv cơưk, tưz hluz tsi txơưx tas”.

         Yuôr đros thiêz “Trung thu lov jêv” trâu ntơưv tsêr kho moz nhuôv zâu T.Ư, ntâu lênhx nhuôv zâu tsênhv sir jos nhoz chơưv kho moz, txơưv tiêk têk tưz tuôr tsi tâu têx huv muôz puz zos tênhz tơưk hâur hmo hli đra lok sik têx zav huv txơưr đuô….taz sik seiz njiê chor nhuôs cux shir phaz, njêx muôs luôs nxi thâuv tâu niêv thiêz txir muôz chor huv mak têx nênhs siêz jông muôz puz trâu têx nhuôs . Tix lâus Nguyễn Quốc Việt nhoz Ý Yên, Nam định puôs tuk nhuôv muôx zuôr xar 4 shông cxaz chuôz Hội ciêz trung thu hâur tsêr kho moz nhuôv zâu T.Ư li qơư tsês chiê trâu chor nênhs moz jâuv, nhoz uô si heik:

“Tuk nhuôv tâu tuôx ndis uô si, pov kror uz kror no, ntâu txux chi uô si lov jêv. Uô tsâus ntâu tsaz yênhx tưz tsưr tsix hnuz hội uô si lov jêv trâu têx mê nhuôv”.

         Pos Dương Thị Minh Thu, Tsar phongx hâux lưv XH, tsêr kho moz mê nhuôv zâu T.Ư heik pâuz, iz chas têx huv Trung thu, chor nhuôs trâus moz hâur tsêr kho moz no tsênhv tâu seiz nthuôr uô cêr lov jêv ntơưv yar tiêx thiêz ciês hâur qar tsêr nênhs moz nhoz, pư hâur tsaz yênhx gra cêr shir phaz trâu tsêr kho moz:

“Txix 3 ciêz lok no, tas nro chor nênhs moz tuôx nhoz kho moz ntơưv tsêr kho moz mê nhuôv zâu, xar muôx 1.800 lênhx nhuôs tưz lênhl txeik tâu têx huv Trung thu. Muôx yênhx puô lênhx nênhs moz muôx luz nênhx txov nhêv tâu têx nênhs siêz jông paz nhiêx txiêx chơưv kho moz. Muôx têx taz viv paz yênhx puô tsov đeiv. Chor nênhs siêz jông thiêz têx lênhx nênhs uô têx nuv jông siêz tưz gra cêr shir phaz Trung thu tuôx trâu tsêr kho moz”.

         Txơưv tiêk uô tsi tâu tas trơưk têx nhuôs zâu li tsưr ziv, siêz xar taz sik chor nênhs siêz jông tưz gra cêr shir phaz tuôx trâu  têx nhuôs hâur six hơưv tsiêz Trung thu. Lênhx nhuôv Mạnh mak muôx tos hâur ndông puôs chiê ties tơư, lênhx nhuôv Trang muôx nzir nhiêx chiê zuôr pak đris, shâuv muk cêr. Lok six ntâu lênhx nhuôs zâu txơưr đuô cux muôx hâur têk luz tênhz tơưk hâur hmo hli đra, tâu muôz puz têx zav huv uô si, nduôr thax ….hâur cêr sik pheiz kênh têx phiv liv, txov nhêv đros têx lênhx nhuôs tsi muôx txox hmông jông li luôs lưv tuk./.

(TTT-Riê Lâux cxeik, nhênhv)

Têx muôx yưv qir moz tso jik kaz jiz

          Muôx yưv têx tsik jông:

          Chor pox niêv muôx suôz thax ntâu hâur luz chêr txix ciêz tiv 6 txos ciêz tiv 8, đhâu luz chêr ntak tas hnuz suôx câuv, zos tus pox niêv cox xênhz mê nhuôv, mê nhuôv zuôr zôngx ziv trâus muôx yưv ntâu zav moz. Hâur ntu ntơư, tus mê nhuôv hâur lênhx niêv luz chêr tsênhv taz tov lox hloz, chor suôz thax zuôr uô ruôr hiêv tsik jông txos tus mê nhuôv luz chêr; lar hêik zos uô ruôr hiêv hnhar txos tus mê nhuôv cox têx plơưr, trâuv, hlưz cxa, poz cxa hâur luz chêr.

          Đax tơưr grêix:

          Thâuv tus pox niêv cox trâus moz tso jik kaz jik, zos xênhz zus tâu mê nhuôv lok, muôx têx jiês tus mê nhuôv co cux trâus đax tơưr grêix. Taz sik, đhâu xênhz zus oz pêz hnuz tov kaz, têx tơưr grêix đax co cux plox lươv jux juk.

          Mê nhuôv tuôs hâur lênhx niêv luz chêr:

          Zos tus niêv trâus moz tso jik kaz jiz, hâur ntu xênhz mê nhuôv hâur chêr, cux zôngx ziv uô trâu tus mê nhuôv cox trâus tuôs hâur tus niêv luz chêr.

          8% lênhx pox niêv hâur ntu xênhz mê nhuôv hâur chêr, zos moz tso jik kaz jiz, cux zôngx ziv uô trâu sâur nyar ndê siêz thiêz muôx yưv têx zav moz li đrav kaz:

          -O têx xiz têk, o njêx muôs.

          -Ndê cir

          -Moz tâuz hâu

          -Tso jik muôx ntâu đạm

          -Xênhr siêz, moz plaz

          Zos chor pox niêv xênhz mê nhuôv hâur chêr muôx yưv têx kror li hêik sâu, tsuv zênhx max chox muk sêiz njuôk shuôk trau tsêr kho moz; zos tsik chơưv kho zênhx max, zuôr uô yưv ntâu zav moz trâu tus mê nhuôv hâur niêv luz chêr.

          Đhâu xênhz zus, uô trâu tus niêv gênhk gênhk:

          Thâuv tus mê nhuôv tsênhv nhoz hâur lênhx niêv luz chêr, têx trox nya…zav puôr lênhx muk đhâu mê nhuôv luz yo hâur lênhx niêv chêr. Chênhr zos li hêik ntơư, thâuv tsênhv taz tov xênhz tuz ci hâur chêr, lênhx niêv tsuv nox cov txâuk cxuô zav jâuz mor, grêix muk zus tus mê nhuôv haur lênhx niêv luz chêr cov thiêx khênhx hloz./.

                                     (Tsu cxêik nhênhv-Thu Thuỳ)