Nhuôv tuz thiêz nhuôv nxeik xênhz zus tâu lok tsi siz bâus nhoz Sơn La

           TP Sơn La, tỉnh Sơn La thâuv tưs cux tuôr truôx tsưr ziv huôv tsar jênh số nhoz phênhv 1,1% ; muôx ntâu jêx jok hâur 10 ntâu shông siz lơưr liês tsi muôx gơưv niêv txir tưs uô cxâuv cui tinhv xênhz zus nhuôv chôngz. Taz sik, têx nhuôv tuz thiêz nhuôv nxeik xênhz zus tâu lok tsi siz bâus hâur TP tsênhv ziv hnuz ziv tsar ndê: Shông 2013 zos 116 lênhx nhuôv tuz hâur 100 lênhx nhuôv nxeik, shông 2016 tưz tsar ndê 119 lênhx nhuôv tuz hâur 100 lênhx nhuôv nxeik.

Pos Lò Thị Thu, Phưv Giám đốc Tsênhv qơư jênh số-Tsưr ziv xênhz zus nhuôs TP Sơn La heik pâuz: Thax tsav TP zos suôv qơư muôx ntâu têx qơư seiz njuôk shuôs, kho moz, hâur ntơư muôx 18 qơư seiz njuôk shuôs mê nhuôv hâur chêr. Nhiv no luôs hâux lưv seiz car têx qơư heik sâuv cux yuôr ntâu phiv liv. Pos Lò Thị Thu heik:

         “Tsênhz tiês thâuv muôx lênhx nênhs tuôx seiz njuôk shuôs moz mak têx qơư ntơư heik pâuz lok sâuv muôx pêk tsơưs lênhx nhuôv tuz, nhuôv nxeik. Zos qênhz pov tuk nhuôv hâur chêr zos nhuôv tuz xưk li siêz xar mak lơưr chiê nưk nhoz nưk, zos tuk nhuôv co zos nhuôv nxeik mak txơưv li chas lok cux zuôr muôz thâu por tsês. Qênhx shênhx no pêz cux tsik zôngx ziv qênhz shuôs tâu”.

        Huyện Quỳnh Nhai zos qơư lar heik đuô hur si, têx nhuôv tuz thiêz nhuôv nxeik xênhz zus tâu lok zos 128 lênhx nhuôv tuz hâur 100 lênhx nhuôv nxeik, ntâu đuô pir li tas nro phênhv tsôngz fênhx hâur tỉnh. Qir tiv zos phênhv ntâu tsôngv box cux tsênhv seiz hloz txos têx txir nênhx, xar chiê muôx tuz đros tuôr ndêx đaz, lês car uô têx hâux lưv hnhar hâur chuôz zis. Tix lâus Hoàng Văn Sơn, canr bôv car uô đreiv têx hâux lưv jênh số-tsưr ziv xênhz zus nhuôs xã Chiềng Ơn, huyện Quỳnh Nhai, tỉnh Sơn La heik:

        “Qênhx shênhx txir nênhx thiêz pox niêv tsi siz bâus thâuv xênhz zus tâu lok hâur ntu jê no, tiv iz zos iz gơưv niêv txir tsuôk tâu xênhz zus 1-2 tuk nhuôs, uô trâu phênhv ntâu têx gơưv niêv txir ntơư puôr lênhx xar cov đros luôs muôx tuz chiê lês tuôr têx cêr chei đaz kruôs thâuv ntu zuk lâuk. Tiv 2 nuk lơưr mak lơưr tiêk muk seiz njuôk shuôs kror no kror tov zos nhuôs tuz mak chiê nưk nhoz nưk, zos nhuôs nxeik lơưr muôz thâu por tsês”.

         Thôngz sâu hâur tas nro tỉnh, têx nhuôv tuz, nhuôv nxeik xênhz zus tâu lok nhoz Sơn La xar muôx 120 lênhx nhuôv tuz hâur 100 lênhx nhuôv nxeik. Lar heik zos qênhx shênhx no muôx nhoz cxuô qơư hâur têx huyện, TP hâur thax tsav tỉnh, txix tox siêz txos qơư kis. Iz cxiê huyện têx nhuôv tuz thiêz nhuôv nxeik tsi siz bâus tsi so tsar ndê siêz hâur ntâu shông zos Phù Yên, Sông Mã, Mường La, Mộc Châu, Quỳnh Nhai thiêz TP Sơn La.

        Txix têx li heik no, txir nênhx thiêz pox niêv tsi siz bâus thâuv xênhz zus tâu lok zos iz kro lar heik txos, tỉnh Sơn La tsênhv sir jos cxơưz tiês uô luôs hâux lưv yax kriê, chiê jux juk tir thêir tâu jông têx li heik sâuv. Zơưv Trần Đình Thuận, Chi cục tsar chi cục Jênh số-tsưr ziv xênhz zus nhuôs tỉnh Sơn La heik pâuz:

         “Iz chas tsưr tsix cơưv fuô kriê trâu têx lênhx hâu nov hội, đoanx thêv, têx txir ndâux txir luk hâur côngv thôngx, pêz tror tsưr tsix têx lớp kriê cxaz nzir lok tsưr ziv heik kriê têx tsi jông thâuv txir nênhx thiêz pox niêv tsi siz bâus trâu chor nênhs uô hâux lưv jênh số, canr bôv tư pháp xã. Iz chas co heik kriê trâu sđ pâuz lok têx li heik co ntơưv côngv thôngx, têx tsi jông thâuv xênhz zus tâu txir nênhx, pox niêv tsi siz bâus. Buôk ti yax kriê trâu têx tuz nxeik hluôk zuôr siz zuôr uô txix gơưv lok sâuv xênhz zus nhuôs…chiê lơưr pâuz cxuô, pâuz thôngz”.

         Cux lơưr zơưv Thuận, tỉnh Sơn La sir jos uô luôs hâux lưv no cov jux juk tir thêir tâu jông qênhx shênhx xênhz zus têx nhuôv tuz thiêz nhuôv nxeik tsi siz bâus, txo grêk yuôr 109 lênhx nhuôv tuz hâur 100 lênhx nhuôv nxeik lok shông 2020, paz taz por tsơưr lươngv jênhv số./.

(Hồng Việt-Riê Lâux cxeik, nhênhv)

NGUYỄN THỊ DƯỠNG- ĐẢNG VIÊN MÊNHX CXƯX CHĂM IZ SIÊZ ĐROS TSÔNGV BOX JÊX JOS

          Cxôngx shông 2005 txos nhiv no, pos Nguyễn Thị Dưỡng tâu pox nhuôs jos Văn Lâm 2, xã Phước Nam, huyện Thuận Nam tâu tsôngv box njênhs njôngr bo xeir uô Bí thư chi bộ jos. Jos Văn Lâm 2 muôx zuôr xar 360 ziv chuôz zis đros 1.730 lênhx nênhs. Tas nro tsôngv box nhoz hâur jos no zos mênhx cxưx Chăm. Têx shông jê ntơưv no, tsôngv box hâur jos luz nênhx tâu hlôngr yiêz tsênhz mênhx, cxiv ngaz tâu tuôr truôx, tsôngv box tso siêz uô huôv tsar cêr uô nox, huôv tsar kinh têr chuôz zis. Muôx tâu li hnuz no cux khov têx hâu nov thênhv siêz li tsưr ziv yax kriê thiêz chi bộ jos li hâux lưv uô huv đros tsôngv box li siêz xar, hâur co muôx pos Dưỡng. Pos tưz sir jos yax mông, vênhv tôngv tsôngv box uô têx phongz yaox huôv tsar kinh têr, cxuôv cêr yeiz pluôs, cxiv tsa luz nênhx vênhx huôv truôx jông. Niêv lâuk Thiên Thị Nhạt nhoz jos Văn Lâm 2, xã Phước Nam heik lok pos Dưỡng li no:

          “ Nguyễn Thị Dưỡng- Bí thư chi bộ pêz jos thâuv tưs cux moz siêz đros hâux lưv uô, cxiv tsa luz nênhx trâu tsôngv box jêx jos. Pir li, vênhv tôngv hluôk nênhs cxaz chuôz uô tuz lênhv, vênhv tôngv gôngr côngv nhiêx txiêx chiê tôngv vênhx têx hluôk nênhs sơưr cêr mul uô tuz lênhv...Fâux Dưỡng uô lok six ntâu hâux lưv jông chox cêr shir phaz trâu tsôngv box”.

          Six hơưv đhâu, Văn Lâm 2 zos iz hâur têx qơư trâus zênhr shar hnhar tiv qiv hơưv txơưr txar. Hâux lưv tsiv uô xênhz yar kôngz nuv njiz ntâu phêv liv. Chiê hla đhâu têx phêv liv, ngaz tul luz nênhx trâu tsôngv box, pox Dưỡng đros chi bộ sir jos vênhv tôngv têx ziv chuôz zis hlôngr tsoz chos, tsiêx tu zus, zôngv khoa học kỹ thuật yiêz chox têx nôngz tsoz chos muôx yar lengx, chêx cuk kinh têr siêz huv đros qiv hơưv chiê chos...Tas nro jos muôx 200 hecta ntâu tsoz chos kôngz nuv, tas nro paz tsiêx cxu zos 7000 tul. Cxôngx co, ntâu ziv chuôz zis hâur jos li phênhv sâu fênhx pheiz cxôngx 50 txos 100 tsov đeiv iz shôngk, 60% têx chuôz zis muôx luz nênhx bluô nux. Nhiv no jos chuôk yuôr 5% ziv chuôz zis pluôs. Pheiz kênh lok têx chênhz zênhv chiê jos Văn Lâm 2 tax tâu chêx cuk li co muôx pos Dưỡng li têx côngz lox, pos heik:

          “ Zos iz lênhx đangv viên zuk tsuv zos lênhx nênhs uô ntêx nquôk hâur cxuô phongz yaox, têx cxiv vênhv tôngv. Têx hâux lưv tưs tsôngv box tsi tâu uô mak zuk tsuv uô uô ntêx. Pir li phongz yaox cxiv tsa nôngx cxênhz yiêz, chuôz zis gôngr côngv uô ntêx, lok sik phongz yaox cxiv tsa chuôz zis vênhx huôv, tuôr jông vêv xênhz tênhx qơư mak cur chuôz zis cux uô uô ntêx, pox nhuôs mav uô lơưr”.

          Têx phongz yaox vênhx huôv, vênhx ziv, tưr thêv thao cux xưk li tuôr tsês têx vênhx huôv chax chês tsiv grê thâuv tưs cux tâu hêir nênhs Chăm Văn Lâm 2 tuôr tsês thiêz phuôx huiz. Jos muôx 80% ntâu chuôz zis tax bê chuôz zis vênhx huôv thiêz tưz tâu côngz jênhv zos qơư vênhx huôv cấp huyện. Muôx tâu têx chêx cuk co khov muôx pos Dưỡng li têx gôngr côngv. Zơưv Nguyễn Văn Thái, phưv bí thư Đảng ủy xã Phước Nam, huyện Thuận Nam heik lok pos Dưỡng:

          “ Đ/c Nguyễn Thị Dưỡng- bí thư chi bộ zos iz lênhx pox niêv nênhs Chăm. Zos xã li iz lênhx cán bộ txos thâuv so lâuk, đ/c tror cxaz chuôz côngz xưv tiv phaz hâur 12 shôngk no. Hâur six hơưv huôx tôngv, đ/c Dưỡng thâuv tưs cux sir jos siz jê đros tsôngv box, tâu tsôngv box njênhs njôngr thiêz hluz”.

          Đhâu pos Nguyễn Thị Dưỡng li têx gôngr côngv, ntâu shông siz lơư liês, tưz tâu Đảng ủy xã, huyện ủy Thuận Nam muôz ntơưr kruôk uô tâu truôx côngz xưv cxiv tsa Đangv. Shông 2016, pos Dưỡng zos iz hâur têx bí thư bi bộ jos tâu cấp huyện kruôk/.

(TTHCM- Txâur Vax cxeik nhênhv)