Paz ngaz tuk zoz thôngz sâuv chor cêr ndê tox knhâuk lêv nhoz Sơn La

           Tỉnh tox siêz Sơn La muôx 18.000 cêik cêr zoz thôngz cêr ar; thax tsav muôx trôngz, vuôk har ntâu, viv li muôx ntâu ntu ndê tox, knhâuk lêv. Tix lâus Cầm Việt Hà nhoz tôv 3, phường Tô Hiệu, thành phố Sơn La kuz-zos nênhs muôx 10 shông tsar yêz muk lok nhoz thax tsav Tây Bắc, tiv zix zos ntơưv tỉnh Sơn La hêik pâuz: “ Njiê cxuô mak cur pov chor cêr muk lok ntơưv Sơn La thiêz Tây Bắc lok six knhâuk lêv, muôx huôz tsâuk, lok nas yâur thiêz cêr bluô. Viv li thâuv muk lok sâuv chor cêr no cur zênhx muk cov huv zos zuk saz cêr, muk trơưk chor fiêx kriê pâuz thiêz sêiz shuôk jông cov ngaz tuk trâu zuk, chor kruô thiêz chor nênhs cxaz chuôz zoz thôngz”.

           Tiv thax tsav, qiv hơưv phiv liv, viv li txơưv tưz uô ntâu tsưr ziv, taz sik chor txuz txiêz nanv zoz thôngz, yêz siz yar, siz đrâu sâuv têx cêr ndê tox, knhâuk lêv nhoz tỉnh Sơn La cux tsik so muôx, hâur co muôx têx txuz txiêz nanv zoz thôngz zov chênhr, riêz nênhs. Iz zav li hmo 21/2 thâuv hâur shôngk shông no, ntơưv thax tsav xar Sặp Vạt, huyện Yên Châu (kuz), tỉnh Sơn La, luz yêz thâux xa kruô muk txix Sơn La trâu Hà Nội, thâuv tsênhv muk grêk har, txos ntu cêr lêv, cêr ho bluô tiv muôx nas lok, luz yêz kruô no tưz siz yiêr đros luz yêz lox muk tos cêr tor tuôx. Uô trâu 6 lênhx nênhs zos nênhs tsar luz yêz lox thiêz 5 lênhx kruô trâus tuôs, 9 lênhx nênhs txơưr trâus saz. Chiê phax tar chor txuz txiêz nanv zoz thôngz, chor lưx lươngv muôx vax huôv tỉnh Sơn La nhiv no tsênhv tror chuôz cxaz uô côngz xưv qênhz yuôx, xưv lik têx uô cxâuv hâur hâux lưv zoz thôngz cêr ar; phênhv ntâu zos uô jông chêi têz qơưk têx cui tênhv lok kinh doanh vận tải; yêz thâux ntâu, ngaz tuk sâuv cêr ar… Đros co zos sir jos yax kriê chêi têz qơưk trâu chor tsưr yêz thiêz nênhs tsar yêz muk lok sâuv cêr pâuz.

            Thượng tá Nguyễn Trung Kiên, Phưv Trưởng Phòng Cảnh sát Zoz thôngz, Công an tỉnh Sơn La puz pâuz: Phòng tưz uô lok six ntâu chor fiêx muôx tênhz chis pov cêr chiê kriê sơưr đơưk pâuz yênhx hnuz hmo; kho đuô 180 ntâu qơư siêz kik sâuv têx cêr cov chor yêz tsik muk chênhr, cêr tsik bluô… Taz sik tiv muôx nas lok, muôx huôz tsâuk ntâu, nênhs tsar yêz muk lok sâuv cêr tsik uô jông sêiz mak cux zuôr zôngx ziv muôx yưv ntâu txiêz nanv: “Lưx lươngv Cảnh sát Zoz thôngz, Công an tỉnh tưz tsưr tsix yax kriê, tiv zix zos ntơưv chor ntu cêr muôx huôz tsâuk ntâu mak tsưr tsix đôiv qênhz yuôx tsik so, zôngv têx tênhz, còi thiêz loa chiê kriê trâu chor nênhs tsar yêz pâuz thâuv muk txos têx ntux cêr co mak tsuv muk kênhz, huv zos zuk saz cêr thiêz muk jông lơưr têx cui tênhv thâuv tsar yêz muk lok sâuv cêr”.

            Uô jông lơưr tsưr ziv ngaz tuk zoz thôngz 2025 sâuv thax tsav đros tsênhv njiêz “Muk lok ngaz tuk jông-paz trâu ntu nênhx tov ntêx”, sir jos txo grêk tsơưs tas nro lok chor txuz, chor nênhs tuôs thiêz chor nênhs trâus saz tiv txiêz nanv zoz thôngz, txix ciês thâuv hâur shôngk shông, nganhx zoz thôngz, cxiv tsa tỉnh Sơn La tưz kriz uô ntâu tsưr ziv, li chuôz cxaz chor lưx lươngv qênhz yuôx, xưv lik truôx chor nênhs uô cxâuv, chor yêz tsik ngaz tuk thâuv muk lok sâuv têx cêr. Zơưv Nguyễn Văn Chính, Phưv Giám đốc Sở Cxiv tsa tỉnh Sơn La puz pâuz nzir: “Nganhx Zoz thôngz sik côngv đros chor nganhx muôx vax huôv chuôz cxaz qênhz yuôx, sêiz car chor yêz cxaz chuôz zoz thôngz cov txâuk têx kỹ thuật, kho đuô chor yêz tsik muôx kỹ thuật huv đros, thâux ntâu. Hok chor cêr mak kror zov chênhr zos qênhz shuôk, hêik pâuz, xưv lik chor qơư phiv liv, têx qơư zôngx ziv uô tsik ngaz tuk zoz thongz chiê txo grêk tsơưs txiêz nanv zoz thôngz sâuv chor cêr ar hâur ntu zuôr txos”./.

Trấn Long-Lik Thox cxêik nhênhv

Điện Biên cxơưz tiês huôv tsar cơ sở cxuô zav KTXH lơưr tsaz yênhx têz qơưk li qơư tsov txos lok cxiv tsa nôngx cxênhz yiêz          

         Tsaz yênhx têz qơưk li qơư tsov txos lok cxiv tsa nôngx cxênhz yiêz sâuv thax tsav tỉnh Điện Biên, ntu 2021-2025 tâu krêz uô đros 11 njiêz luv. Hâur co, njiêz luv số 2 zos huôv tsar cơ sở cxuô zav KTXH yiêz jông, taz por sik côngv nôngx cxênhz, niêv đrôngs thiêz cxuô thax tsav qơư.

          Khov têx cấp, nganhx thiêz têx tiv phaz sir jos krêz uô, viv li chêx cuk tax tâu lok six jông. Tsênhz mênhx li đrav kaz:

         Lok zaoz thôngz: Txix shông 2021 txos nhiv no, tưz uô yiêz, kho đuô 263 côngz tsinhx cêr zaoz thôngz nôngx cxênhz, đros ntêr tas nro 764 cei cêr; muôx 7/115 xã tax ploz tsênhr số 2 lok zaoz thôngz.

          Lok đêx liv: Tas nro côngz tsinhx tâu kho đuô, cxiv yiêz zos 101 côngz tsinhxl 164 cei cêr ntâu njưs đêx cưx đês tâu cxiv truôx, chuôz ndê chor xã tax ploz tsênhr lok đêx liv zos 114/115 xã, zưs trâu 108 cxênhz hecta ntâu mênhv chêx tsêz chos hâur tas nro tỉnh.

          Lok tênhv tênhz: Zuôr xar 5 shông đhâu, sâuv thax tsav tỉnh tưz yưv pênhr uô 46 trạm biến áp 35kv; cxiv yiêz zuôr xar 200 cei cêr xor tênhv 35 kv thiêz 0,4kv trâu 48 jêx jos đros zuôr xar 2 cxênhz 300 ziv chuôz zis txix ntâu pênhr jos txix têx tsaz yênhx, dự án, chuôz ndê ziv chuôz zis tsôngv box tas nro tỉnh tâu sir zôngv tênhv tênhz têz qơưk ndê txos 93% ntâu.

         Lok tsêr cơưv ntơưr: Ntu no, tas nro tỉnh tưz cxiv yiêz 3 luz tsêr cơưv ntơưr thiêz 27 qar cơưv; kho đuô 19 tsêr cơưv, gôngr phênhv chuôz ndê chor xã tax ploz tsênhr lok tsêr cơưv nhoz tỉnh txos 94/115 xã.

          Lok cơ sở chuôz zênhx vênhx huôv: Txix shông 2021 txos nhiv no, tas nro tỉnh Điện Biên muôx 114 luz tsêr vênhx huôv jêx jos tâu cxiv yiêz, kho đuô. Taz sik chuôz zênhx ntơưv têx tsêr vênhx huôv no tsi tâu muôx cxix cxuô, chor cán bộ uô hâux lưv tsi tâu đhâu thox cxov lok chuyên môn nghiệp vụ, nhiêx phí huôx tôngv tsơưs viv li tsi tâu phuôx huiz tâu chêx cuk jông.

         Lok cơ sở muôv muôs nôngx cxênhz: Txix shông 2021 txos nhiv no, txix nhiêx txiêx tsaz yênhx têz qơưk li qơư tsov txos, tas nro tỉnh tưz cxiv tsa kho đuô 13 luz ciêz đrôngs, gôngr phênhv chiê 114/115 xã tax ploz tsênhr lok cơ sở cxuô zav muôv muôs nôngx cxênhz.

           Lok thôngz xor mông: Txos nhiv no, 100% chor xã hâur tas nro tỉnh muôx qơư phưx vưv bưu chính; 81 xã muôx jix vuv viễn thông, internet; tas nro 115 xã muôx cxix luôk loa nta suôz txos têx jêx jos, viv li 100% chor xã puôr lênhx tax ploz tsênhr lok thôngz xor mông./.

Thu Thùy-Txâur Vax cxeik nhênhv