Tỉnh tox siêz Sơn La sir jos phax tar zax zênhz hâur tsêr cơưv ntơưr

Uô ciês têx zav muôz pir, hêik pâuz lok cxuô zav zax zênhz yiêz jêik hâur têx zav nox, đêx hâuk, têx chuôz zênhx uô si, zênhz gaz ntơưr điện tử, txos trâu chor nênhs thav luk hêik txos qênhx shênhx phiv liv txix zax zênhz… co zos cưk kriê ntơưr thiêz shux xênhz Tsêr cơưv cxênhx oz Làng Chếu, xar tox siêz Tà Xùa, Sơn La li têx tsưr ziv chiê hêik kriê lok chêi têz qơưk tưz zos kror sưv jê, zôngx ziv pâuz, zôngx ziv ndo tâu. Cưk kriê ntơưr Nguyễn Hữu Tùng, Nênhs sêiz car Tsêr cơưv Cxênhx oz Làng Chếu puz pâuz: “Shux xênhz hâur tsêr cơưv mak 100% zos tsôngv box mênhx cxưx tsơưs nênhs, chiê chor shux xênhz pâuz tâu jông đuô, côngz xưv phax tar zax zênhz cux li yax kriê piêr pâuz chêi têz qơưk tâu tsêr cơưv kriz uô đros ciês hâur chor môn cơưv pêv lớp”.

Nhoz tox siêz, kuôk đêz têx đrôngs, pox nhuôs thiêz chor shux xênhz li txux chi, chênhz zênhv tsênhv tsơưs, muôx thax tsav qơư thâuv ntêx tưz zênhx phiv liv lok zax zênhz thiêz txiêz nanv xar hôiv….hâux lưv yax kriê, piêr kriê têx txux chi trâu chor shux xênhz tâu chor tsêr cơưv ntơưr sir jos kriz uô. Tiv zix zos paz trâu chor shux xênhz muôx tâu tsưr ziv, txux chi chiê por vêv zuk thâuv trâus chor nênhs fêv nziêk đas, hâuz nziêk sir zôngv zax zênhz, txar đêz, hêik pâuz chor nênhs fêv… Thắng Xênhv Lâux, shux xênhz lớp 8A2, Tsêr cơưv Cxênhx oz Làng Chếu hêik pâuz: “Cur tưz tâu chor cưk kriê ntơưr kriê têx txux chi lok six jông chiê pêz pâuz txar đêz zax zênhz, thiêz muk tsêr mak yax kriê trâu chor fôngx zưs sơưr đơưk nhoz hâur jok sik đros phax tar zax zênhz chiê por vêv tâu jông trâu zuk”.

Chiê uô tâu jông hâux lưv yax kriê, paz trâu chor shux xênhz pâuz, muôx txơưx jênhv thiêz uô jông lơưr têx chêi têz qơưk, ntâu luz tsêr cơưv tsênhv sik côngv đros chor cơ quan chuyên môn, li Viện Kiểm sát, Tòa anr, Công an… nhoz sâuv thax tsav tso canr bôv, chiến sĩ, kiểm sát viên tuôx kriê ciês têx tsưr ziv thiêz piêr kriê têx chêi ntơưv tsêr cơưv trâu shux xênhz pâuz.

Cưk kriê ntơưr Hoàng Mạnh Cường, Phưv Hiệu trưởng Tsêr cơưv Cxênhx oz Tô Hiệu, phường Chiềng Cơi (Sơn La) puz pâuz, tsêr cơưv ntơưr nhiv kruôr sik côngv đros Viện Kiểm sát thax tsav I tsưr tsix jiês yax kriê phax tar zax zênhz trâu 750 lênhx shux xênhz, chor shux xênhz cê tâu cxaz chuôz thik tưr Rung chuông vàng, cê nus têz, thav đros ciês chor kiểm sát viên… “Hâur qênhx shênhx zax zênhz tsênhv muôx jux juk trâu hâur tsêr cơưv ntơưr txix ntâu tsưr ziv, tâu mnôngs ciês chor kiểm sát viên thav, phêiz kênh tưz paz trâu chor shux xênhz pâuz tsênhz đuô lok têx phiv liv txix zax zênhz thiêz jênhv pâuz tâu têx phiv liv muôx nhoz iz ndis zuk. Đros zoz zux pháp luật zos têx jax cơưv hâur luz nênhx thiêz txơưx jênhv, paz cxiv tsa tênhv qơư cơưv ntơưr ngaz tuk, hur jông, tsik muôx zax zênhz thiêz tsik muôx ntâuk tsiv”.

Đros cxuô tsêr cơưv ntơưr têx sir jos, chor cơ quan, taz viv sik côngv đros, tỉnh Sơn La nhiv no cux tsênhv kriz uô jông 90 ntâu câu lạc bôv, tôv, đôiv, chor nênhs yax kriê chêi têz qơưk, đros xar muôx 3.300 hôiv viên, đoanx hluôk nênhs đros uô. Ntâu  tsưr ziv tưz thiêz tsênhv kriz uô tâu jông, li “Câu lạc bôv paz muôx tâu luz nênhx jông”, “Thax tsav qơư nhoz tsik muôx chor hluôk nênhs trâus têx txiêz nanv xar hôiv”; “Ntu cêr hluôk nênhs sêiz car”; “Tsêr cơưv ntơưr ngaz tuk-tsik muôx zax zênhz”… Têx tsưr ziv uô jông, txơưx xar tơưv tưz paz trâu chor shux xênhz, hluôk nênhs muôx tâu têx txux chi, chênhz zênhv thiêz tsưr ziv, sik côngv têk phax tar thiêz tir tar tâu jông zax zênhz hâur  tsêr cơưv ntơưr thiêz tas nro hâur côngv thôngx./.

Lê Hạnh-Lik Thox cxêik nhênhv

Uô ntêx nyuôk hâur luôs hâux lưv cxiv tsa jêx jok yiêz nhoz Sơn La

Zos thâuv ntêx, tsôngv pêx xênhv Sơn La cêr uô nox phênhv ntâu zos khov trâu tsưr ziv thiêz lênhx nênhs đas jos, mak nhiv no, têx têz nxaz, por tox đo tưz muôx meir paz, phưx vưv huôv tsar uô kôngz. Têx luz yêz za tsi zuôr nênhs tsar tsuôs yuôx tuô đrox, lok sik đhok uô qơư zưs đêx thiêz seiz kaz txix meir cxeik đuôz tsênhv paz pêx xênhv txuôs tâu six hơưv, hnuz nhôngs, nhiêx txiêx, por hưv đas jos thiêz huôv tsar uô tâu jông đuô. Tix lâus Cù Quốc Minh, uô hâux lưv hâur HTX Phương Nam, xã Lóng Phiêng heik: “Pêz cux zôngv yêz za tsi zuôr nênhs tsar ntơư tsuôs yuôx tuô đrox, caz hmoz trâu tsoz chos. Xưk li thâuv ntêx, mak tsuôs yuôx li no zos lênhx nênhs tsuôs viv li tas ntâu côngz đas jos, iz hnuz tsuôs tâu 1-1,5 ha xưz, taz sik sir zôngv yêz za tsi zuôr nênhs tsar li no, cur muôx têx tsuôs tâu txix 5-7 ha têz”.

Têx hlôngr yiêz li heik sâuv zos muôx Hội Nôngx mênhx cxuô cấp đros uô thiêz paz tsênhv tsênhz. Tsưr ziv “côngv têk đros paz pêx xênhv-huôv tsar truôx”, Hội nôngx mênhx tỉnh Sơn La tsi so hlôngr yiêz tsênhv njiêz, tsưr ziv uô hâux lưv, moz siêz txos ntơưv qơư, txoz cxơưx luz nênhx xênhz huôx, paz pêx xênhv huôv tsar uô nox uô hnar. Txos nhiv no, tas nro tỉnh muôx 169 cxênhz ntâu lênhx pêx xênhv, 74 tsưr tsix hội cấp xã; 18 cxênhz ntâu chuôz zis tâu côngk nhav zos chuôz zis huôv tsar uô nox uô hâuk coz. Zơưv Cà Văn Minh, nhoz xã Chiềng Mung heik pâuz: “Pêz cux xar cov tâu kêr txeik pênhr chiê krêz đar tsưr ziv huôv tsar uô nox, iz chas ntơư, pêz tror moz siêz txos huôv tsar ntâu zav hâux lưv cux li tsưr ziv sir zôngv pênhr txeik huôv tsar uô nox trâu pêx xênhv tâu tsưr ziv”.

Tsi tiêk sir jos khưr, xar tơưv tsưr ziv jông huôv tsar uô uô nox uô hâuk, tsôngv pêx xênhv Sơn La tsênhv zos têx lênhx uô ntêx nyuôs hâur phôngz yaox cxiv tsa jêx jok yiêz ntơưv qơư. 5 shông đhâu, yênhx châuv cxênhz chuôz zis tưz muôz ar têz, paz 116 cxênhz ntâu hnuz côngz đas jos lox tôngv, đros trâu yênhx puô trâur nuv por hưv tênhx qơư tâu fuô uô, li “Vax tsêr, jêx jok, qơư tu zus tsiêx hur si, đu lus” thiêz heik tsi sir zôngv “hnaz tax”, “qơư trâu têx vuôz tsuôz, kiêk nênhs huv đros tênhx qơư”. Zơưv Nguyễn Văn Hiền, nhoz xã Mai Sơn, tỉnh Sơn La heik: “Đros thiêz têz qơưk têx côngz trênhx, hâur co muôx tsaz yênhx jêx jok yiêz, pêz puôr lênhx seiz lax, heik tsênhz mênhx txos trâu cxuô lênhx pêx xênhv pâuz txix tsưr ziv cxiv tsa, txos nhiêx txiêx, hnuz côngz đas jos paz, thâuv pêx xênhv to tâuz, pâuz tsênhz lơưv, sơưr đơưk zuôr jông siêz, thôngx ziv đros uô”.

Tsôngv pêx xênhv Sơn La nhiv no tưz hlôngr yiêz tsưr ziv, siêz xar, cêr uô nox. Txix huôv tsar uô tsơưs iz kro mê njik chiê chuôz zis tâu zôngv, tâu nox, lơưr tưz bax uô trơưk têx tsưr ziv uô nox yiêz, sik côngv têk, siz paz chiê uô tâu ntâu, sâu tâu nju, muôs tâu grik trâu tuz luôv ciêz đrôngs thiêz yênhx hâux lưv zov chênhr hâur cxiv tsa jêx jok yiêz. Zơưv Bạc Cầm Khuyên, Phưv Chủ tịch Thường trực Hội Nôngx mênhx tỉnh Sơn La heik pâuz: “Pêz tror uô jông Hội nôngx mênhx têx luôs hâux lưv zok muôz, yax kriê Đảng, têz qơưk tsưr ziv, tsênhv chei, hâur ntơư huôv tsar kôngz nuv, cxiv tsa jêx jok yiêz, lar heik zos cxơưz tiês uô trơưk hlôngr yiêz sôr, khoa học kỹ thuật lok huôv tsar uô nox chiê cxiv tsa ngênhx kôngz nuv huôv tsar sei thiêz truôx”.

Đros trâu moz siêz khưr, txơưx xar tơưv tsưr ziv jông, tsôngv pêx xênhv Sơn La ziv hnuz ziv huôv tsar uô kôngz tâu trơưk têk, tsưr ziv xar, cxiv tsa jêx jok yiêz, cxơưz cxiz uô lơưr cêr uô nox yiêz, paz uô tâu truôx têx hâux lưv tso tơưv, cxơưz tỉnh Sơn La yênhx tsênhv qơư kinh tế-xã hội hâur thax tsav Tây Bắc lok shông 2030./.

Thanh thủy-Riê Lâux cxeik, nhênhv

THÊV NHIÊX TRÂU CHOR CHUÔZ ZIS  TSƯX PHƯV JÔNGR

Grê 81. Ziv chuôz zis, tiz nênhs tâu Têz qơưk choz jôngr phax phưv li qênhx thiêz jênhv vưv

1. Ziv chuôz zis, tiz nênhs tâu Têz qơưk choz jôngr phax phưv muôx qênhx li đrav kaz:

a) Muôx qênhx lơưr cui tênhv ntơưv Grê 73 Chêi no;

b) Tâu têz qơưk paz nhiêx txiêx por vêv thiêz huôv tsar jôngr;

c) Kriz uô ntông hâur jôngr phax phưv lơưr Grê 55 Chêi no li cui tênhv thiêz tâu phêiz têx kror liv txix jôngr lơưr têz qơưk li tsênhv chêi;

d) Tâu hlôngr đuô thax tsav jôngr tâu choz trâu ziv chuôz zis, tiz nênhs nhoz đros hâur xar, phường, thị trấn; tâu tsês vax huôv sir zôngv jôngr trâu nênhs hâur chuôz zis lơưr chêi têz qơưk li cui tênhv.

2. Ziv chuôz zis, tiz nênhs tâu Têz qơưk choz jôngr phax phưv muôx jênhv vưv lơưr cui tênhv ntơưv Grê 74 hâur Chêi no.

Grê 82. Ziv chuôz zis, tiz nênhs tâu Têz qơưk choz jôngr uô nox li qênhx thiêz jênhv vưv

1. Ziv chuôz zis, tiz nênhs tâu Têz qơưk choz jôngr uô nox muôx qênhx li đrav kaz:

a) Têx qênhx tâu cui tênhv hâur Grê 73 Chêi no;

b) Đros jôngr uô nox zos jôngr zênhx muôx uô ntêx, tâu kriz uô têx ntông lơưr cui tênhv ntơưv Grê 58 Chêi no thiêz phêiz têx kror liv txix jôngr lơưr Têz qơưk têx tsênhv chêi;

c) Đros jôngr uô nox zos jôngr chos, tâu kriz uô ntông lơưr cui tênhv ntơưv Grê 59 Chêi no; tâu phêiz têx kror liv txix jôngr lơưr têz qơưk tsênhv chêi; tâu uô tsưr tsoz chos, tsiêx tu zus thiêz têx zav txơưr muôx hâur jôngr zos tsưr jôngr yưv pênhr uô;

d) Tâu hlôngr đuô thax tsav jôngr tâu choz trâu ziv chuôz zis, tiz nênhs nhoz đros hâur xar, phường, thị trấn; tiz nênhs tâu tsês vax huôv sir zôngv jôngr trâu chor nênhs hâur chuôz zis lơưr Chêi têz qơưk li cui tênhv.

2. Ziv chuôz zis, tiz nênhs tâu Têz qơưk choz jôngr uô nox muôx jênhv vưv lơưr cui tênhv ntơưv Grê 74 hâur Chêi no./.

Tuyết Lan-Lik Thox cxêik nhênhv