Têx lênhx cưk kriê ntơưr nhoz tox siêz Lai Châu

10 ntâu shông đrav ntêx, sơưr cêr txix Phú Thọ tuôx uô hâux lưv trâu Lai Châu, cưk kriê ntơưr Nguyễn Thị Thu Hà tsuôk xar zôngx ziv tiêk, tuôx kriê têx nhuôs zâu cơưv sênhr chêr hu gâux, heik cưr cxiêx uô si, cơưv sâu ntơưr, nhênhv ntơưr xưz. Taz sik tuôx trâu tox siêz njiz trâus lok six phiv liv, cêr muk lol bluô, qơư nhoz kriê, cơưv ntơưr đaz pêk tuôs, ndo vax tsêr, ndo mê nhuôv….

“Thâuv xuz thơưx cur nhiv kruôr tuôx Lai Châu xar tsi txos tiêk zuôr txov nhêv tas bâuv, cêr muk lol phiv liv ntơư. Shông xuz thơưx, mak cêr muk trâu tsêr cơưv cux tsi tâu uô, muk tơư iz ntuk lok six đêz thiêz buô cơưk. Thâuv ntơư chor txir tuz tsênhv nhoz đrav tsêr, lênhx nhuôv hloz  tsênhv zâu, viv li ndo tsêr, ndo mê nhuôv cơưk”.

10 shông nhoz đreiv pêv tox siêz, têx shông tov kaz no zos cưk kriê qơư cơưv cxênhx nhuôs zâu C5-C7, tsêr cơưv cxênhx nhuôs zâu jok Lang, xã ntus đriv Khổng Lào, Lai Châu, nhoz sưv jux juk cux tsi yuô ndo tsêr, hlôngr trâu co zos hluz txos têx nhuôs zâu nhoz tox siêz tsênhv yuôr ntâu txov nhêv. No zos đas jos cxơưz cưk kriê Hà ziv truôx siêz, sir jos hla đhâu phiv liv chiê uô luôs hâux lưv kriê txux chi.

“Kror uô trâu moz siêz lês uô jông hâux lưv zok muôz thiêz cux zos qênhv cur nhoz tox siêz kriê txux chi chênhr zos têx nhuôs shux xênhz nhiêv hluz ntơưv thax tsav no. Têx mê nhuôv txơưv tsênhv yuôr ntâu txov nhêv, muôx tsi txâuk cxuô zav, taz sik lơưr lok six moz siêz cơưv ntơưr, ciêz, mnôngs luk cơưk”.

Tsi tiêk zos cưk kriê Hà iz lênhs, têx lênhx cưk kriê ntơưr txơưr đuô nhoz tiêx đras cux xeir thiêz tuôx trâu thax tsav ntus đriv Lai Châu-suôv qơư tsênhv yuôr ntâu txov nhêv no uô hâux lưv kriê txux chi. Lơưr tuôx trâu thax tsav no muôx ntâu qir tiv, taz phênhv chôngz cux iz siêz nhoz uô hâux lưv trâu tox siêz viv têx nhuôs shux xênhz thiêz thax tsav txov nhêv  no. Cưk kriê Phạm Thị Yến, uô hâux lưv hâur tsêr cơưv Phổ thông Dân tộc niêv txir zus mor cxênhx iz thiêz cxênhx 2 Hua Bum, zos iz hâur têx lênhx li heik sâuv:

“Cur cux tưz kriê ntơưr nhoz Hà Nội lơưv, taz sik cur tuôx no uô hâux lưv, cur pov têx nhuôs shux xênhz muôx tsi txâuk cxuô zav. Têx nhuôs cêr xênhz huôx, nox nhoz cux tsi thôngx li tiêx đras. Cur lok six hluz têx nhuôs shux xênhz nhoz tox siêz”.

Cưk kriê Yến xênhz thiêz hloz lox nhoz thị trấn Quất Lâm, huyện Giao Thủy, tỉnh Nam Định kuz, nhiv zos tỉnh Ninh Bình. Thâuv nhiv kruôr tuôx trâu Lai Châu, cưk kriê Yến uô hâux lưv kriê txux chi nhoz thax tsav txov nhêv Nậm Ban, đhâu ntơư yêik lok trâu Hua Bum. Đros thiêz cưk kriê Yến, têx nhuôs shux xênhz nênhs Mạng, nênhs Hmôngz lok sik nênhs Cho luz nênhx txov nhêv, cêr nziv hluz  zos kror uô trâu cưk kriê Yến truôx siêz sir jos lês uô jông luôs hâux lưv kriê ntơưr nhoz thax tsav tox siêz.

“Têx nhuôs nhoz no phênhv chôngz zos heir nênhs tsơưs, lênhx nhuôv tưs chuôz zis cux txov nhêv. Tas cik chor nhuôs tuôx cơưv ntơưr, taz sik zar hnuz kêix đhâu ccơưv tas ho tsuv muk paz niêv txir uô liêx têz. Chor nhuôs cux tsi muôx six hơưv uô si lok sik cơưv txux chi li luôs lưv tus”.

Pâuz tsênhz txos têx nhuôs shux xênhz cêr txov, cưk kriê Yến đros chor cưk kriê ntơưr txơưr đuô nhoz no thâuv tưs tưz sir jos zok nriêr cxuô faz tsưr ziv paz thiêz cxơưz cxiz têx nhuôs sir jos hla đhâu phiv liv, moz siêz tuôx cơưv txux chi hâur niêx hnuz.

Xã ntus đriv Hua Bum tâu muôz 2 xã Vàng San (huyện Mường Tè) thiêz Hua Bum (huyện Nậm Nhùng kuz) lok uô cê. No zos thax tsav phênhv ntâu tsôngv box Poz Ziz, Mảng, Hmôngz, Cho thiêz Hà Nhì uô nênhx nhoz. Nhiv no tas nro xã muôs 4 tsêr cơưv, 1500 ntâu lênhx shux xênhz.

Tsêr cơưv nội trú 2 cấp nhiv kruôr tâu yưv pênhr cxiv uô yiêz trơưk Bộ Chính trị tsưr ziv paz têx xã ntus đriv cxiv uô tsêr cơưv ntơưr, zuôr zos chor cưk kriê ntơưr thiêz shux xênhz xã ntus đriv Hua Bum cêr vav, chiê siêz tok njôngr. Thâuv uô tiêr, muôz lok sir zôngv, têx lênhx cưk kriê ntơưr thiêz shux xênhz nhoz no zuôr muôx qơư kriê thiêz cơưv ntơưr jông đuô nhoz thax tsav txov nhêv. Zơưv Nguyễn Đức Hiền, Chủ tịch Ủy ban xã Hua Bum, tỉnh Lai Châu heik pâuz:

“Pêz zuôr moz siêz txos chor nhuôs shux xênhz nox nhoz hâur tsêr cơưv, cơưv txux chi niêv txir zus mor thiêz têz qơưk zus mor têx pluôk nox hâur niêx hnuz cux li cêr xênhz huôx. Sir jos qênhz yuôx thiêz yax kriê, hux jos đros chor cưk kriê ntơưr chiê gra siêz tsơưr lươngv zoz zux. Niêx hnuz, xã zuôr choz trâu têx cơ quan li: Phongx vênhx huôv tso lênhx nênhs qênhz yuôx shuôs chiê uô truôx jông luôs hâux lưv zoz zux hâur xã”.

          Têx lênhx cưk kriê ntơưr li cưk kriê Hà, cưk kriê Yến thiêz yênhx cxênhz lênhx cưk kriê txơưr đuô cux tsênhv niêx hnuz hmo sir jos moz siêz lus uô hâux lưv kriê ntâuz ntơưr nhoz tox siêz ntus đriv. Lơưr gra têx txux chi, cêr vav, chiê siêz cxơưz gra têx nhuôs nhoz thax tsav txov nhêv cov ziv hnuz ziv muôx luz nênhx jông, vav mênhx đros luôs lưv lênhx lênhx tus, lưv heir nênhs./.

Khắc Kiên-Riê Lâux cxeik, nhênhv