Paz sik pheiz kênh têx cêr pôngz siêz, ndo txiêx njis txos chor nênhs tâu tas siv nênhx thâuv ntu tir ntâuk trol châuz nhoz thax tsav tox siêz Lai Châu

Qơư nza chor tuz lênhv tâu tas siv thâuv ntu tir ntâuk trol châuz tỉnh Lai Châu hâur têx hnuz kaz hlik hli 7 nhiv kruôr đhâu, muôx ntâu đoanx canr bôv thiêz tsôngv pêx xênhv ntơưv qơư tuôx hlơưr shaz hơưv chor tuz lênhv tâu tas siv nênhx co. Qơư nza no muôx zuôr xar 500 lênhx tuz lênhv tâu tas siv nênhx thâuv ntu tir ntâuk trol châuz Pháp thiêz Mỹ, têx lênhx txưv zênhv Việt Nam đros paz têz qơưk Lol Tsuôk luôs hâux lưv tir ntâuk trol tsưx phưv têz qơưk….li têx kuô nza. Lênhx tưs tuôx txos no cux hlơưr shaz hơưv shov, ndo txiêx njis txos chor tuz lênhv heik sâuv li côngz đas jos lox viv têz qơưk, viv tsôngv pêx xênhv. Niêv lâul Hoàng thị Thơm, nhoz phường Tân Phong, TP Lai Châu heik: “Đros cxênhx hluôk tov kaz no li txơưx jênhv thiêz phuôx huiz chor lâul thâuv li cêr chax chês uô nênhx jông, pêz-têx lênhx đoanx viên công đoanx zuôr tror uô jông trơưk chor lâul thâuv ntêx li cêr nênhx jông. Thiêz pêz zênhx uô iz siêz muk lơưr Đảng chox kriê cux iz zav li zơưv Hloz thiêz Đảng tsưr ziv xeir tsov”.

Txơưv cêr tir ntâuk trol châuz tưz đhâu ntêr shông, taz sik têx cêr pôngz siêz, moz gênhk cux tsênhv muôx nhoz đros đreiv chor tuz lênhv, têx lênhx đros tir ntâuk trol châuz tsưx phưv têz qơưk thâuv ntu têz qơưk tsi tâu tiêx tuk trâul moz trâul saz, trâul tsơưr tưx da cam. Txơưv li co, đros chênhz yênhx “trâul moz gênhk, taz sik muôx txux chi tsưr ziv jông”, chor tuz lênhv zơưv Hloz Hôx ntu têz qơưk thax zênhz no cux sir jos hla đhâu têx phiv liv hâur luz nênhx, tror paz đas jos, txux chi chiê cxiv tsa chuôz zis, qơư nhoz, têz qơưk ziv hnuz ziv huôv tsar, vav mênhx. Zơưv Khuất Việt Vo, tuz lênhv trâul tsơưr tưx da cam hâur ntu tir ntâuk trol châuz, uô nênhx nhoz ntơưv jok Muông, xã Mường Cang, huyện Than Uyên heik pâuz: “Tâu Đảng thiêz têz qơưk moz siêz txos, chor nênhs muôx côngz têz qơưk puôr lênhx tâu sơưv cxix cxuô têz qơưk têx tsênhv chei paz. Iz chas co, hâu nov ntơưv qơư, thâuv tưs cux moz siêz txos chuôz zis thiêz lênhx nênhs muôx côngz trâu têz qơưk. Txix ntơư, pêz thâuv tưs cux choz kriê chor tuz nhuôs cêr uô nênhx jông, tsiv txiêx, uô lơưr jông Đảng, têz qơưk têx chei, cui tinhv thiêz sir jos khưr huôv tsar uô nox uô hnar cov luz nênhx vav mênhx”.

Tỉnh Lai Châu nhiv no tsênhv seiz car zuôr xar 8 cxênhz chor nênhs muôx côngz têz qơưk thiêz lơưr li chor nênhs hâur tsêr têx ntâuz ntơưr trơưk chei têz qơưk paz trâu chor nênhs muôx côngz. Hâur têx lênhx heik co, muôx zuôr xar 700 lênhx nênhs muôx côngz têz qơưk thiêz chor nênhs muôx côngz li heik sâuv têx lênhx nênhs hâur tsêr tsênhv tâu sơưv têz qơưk têx tsênhv chei paz hâur yênhx luz hlik thiêz đros trâu chor nhiêx muôz paz zos 1,4 tyv đeiv ntâu iz hlik. Ntu đhâu, cxuô cấp, cxuô ngênhx ntơưv qơư thâuv tưs tưz moz siêz txoz cxơưx, paz cxix cxuô trâu chor chuôz zis, lênhx nênhs muôx côngz têz qơưk. Zơưv Trần Đình Tiến, Phưv Chủ tịch Ủy ban TP Lai Châu heik pâuz: “Luôs hâux lưv ndo côngz pâux txiêx njis, tsoz phưz chor nênhs muôx côngz têz qơưk tưz tâu cxuô cấp ủy, hâu nov hâur TP thiêz cxuô thax tsav qơư lok six moz siêz, fuô uô jông. TP cux tsênhv tror chox kriê têx cơ quan, taz viv cik txos uô jông hâux lưv ndo côngz pâux txiêx njis thiêz tsoz phưz đas jos trâu chor nênhs muôx côngz têz qơưs”.

Chiê chor nênhs muôx côngz têz qơưk  thiêz lơưr li têx lênhx nênhs hâur chuôz zis truôx tuk luz nênhx, txix shông 2017 txos nhiv no, Cuiv nhiêx ndo côngz pâux txiêx njis tỉnh Lai Châu tưz paz uô tsêr nhoz trâu 150 ntâu chuôz zis muôx côngz têz qơưk. Iz chas ntơư, cxuô cấp ủy Đảng, hâu nov ntơưv qơư thiêz cxuô đoanx thêv cux paz zuôr xar 100 chuôz zis thiêz nênhs muôx côngz têz quưk li chor nênhs hâur tsêr huôv tsar tu zus tsiêx cxu, huôv tsar cêr uô nox muôx luz nênhx truôx tuk. Zơưv Tần Đỗ Công, Phưv Giám đốc: “Pêz zuôr tror nhênhz chơưv cxiv tsa têx tsaz yênhx, tsưr ziv thiêz tsưr tsix fuô uô jông têx phôngz yaox ndo côngz pâux txiêx njis, tsoz phưz lênhx nênhx nox nhoz trâu nênhs côngz muôx têz qơưk. Tsưr tsix yax kriê, vênhv tôngv cxiv tsa jông cuiv nhiêx ndo côngz pâux txiêx njis thiêz uô jông hâux lưv paz uô yiêz, cxiv kho tsêr nhoz trâu chor nênhs muôx côngz têz qơưk”.

Cxuô cấp, ngênhx thiêz tsôngv pêx xênhv Lai Châu têx luôs hâux lưv uô tsênhv tsênhz, muôx liv tưz fuô uô lok six jông trâu nênhs muôx côngz têz qơưk thiêz chor nênhs li heik co têx lênhx nênhs hâur tsêr. Tsi tiêk paz chor tuz lênhv trâul moz, trâul saz txo grêk iz phênhv tưs têx cêr txov, cêr pôngz siêz, muôx nzir cêr shir phaz đros luôs lưv tus khưr huôv tsar uô nox, têx hâux lưv uô co ziv uô jông, heik lol nênhs Việt Nam li têx cêr nênhx siz hluz siz paz, ndo txiêx njis txos chor lâul, nênhs muôx côngz têz qơưk li côngz đas jos./.

                                         (Khắc Kiên-Riê Lâux cxeik, nhênhv)