“Tsêr sor Công đoàn” sor siêz nênhs lox tôngv pluôk nhoz Yên Bái

Tâu nhoz hâur luz tsêr cấp 4 tâu cxiv uô truôx jông, tix lâuk Lã Ngọc Sơn nhoz tuêv 1, phường Yên Thịnh, TP Yên Bái lok six jông siêz, viv no zos tix lâuk oz niêv txir li siêz xar njôngr txix nzor. Chuôz zis tix lâuk Sơn zos chuôz zis pluôk, txir pôngz lơưv nzor, niêv muk uô hâux lưv nhoz SaPa, tỉnh Lào Cai viv li tix lâuk Sơn đros niêv teik nhoz txix thâuv tsênhv zâu. Shông 2017, tix lâuk SƠn zuôr pox niêv. Pox niêv tsi muôx hâux lưv uô truôx, mê nhuôk tsênhv zâu, ho tsoz phưz teik tưz muôx hnuz nhôngs siêz zuôr xar 80 shông, viv li luz nênhx lok six khưr. Phênhv sâu tsênhv tsuôk khov njôngr lok tix lâuk Sơn li nhiêx shar uô công nhân viv li cxiv uô tsi tâu luz tsêr yiêz jông nhoz. Pâuz tâu nênhs lox tôngv li têx phêv liv, shông 2023, Liên đoàn lox TP Yên Bái thiêz Công ty CP cxiv tsa zaoz thôngz Yên Bái- qơư tix lâuk Sơn uô côngz xưv tưz paz tix lâuk chuôz zis cxuôv uô iz luz tsêr zâu: “Đros phênhv sâu li nhiv no cur oz niêv txir tsuv pôngz 10 txos 15 shông thiêz thiêx li cxiv uô tâu tsêr nhoz. Cur oz niêv txir uô tsâus lok six ntâu txos chiz coaz, đoàn thêv tưz paz cxiv uô tâu luz tsêr đreiv tâu ntux yar ntux nas, chiê oz niêv txir tso siêz uô nox uô hâuk”

          Yuôr đros tix lâuk Hoàng Văn Hải, nhoz jos 11, xã Động Quan, huyện Lục Yên, tỉnh Yên Bái- công nhân Công ty TNHH Hapaco Yên Sơn cux muôx luz nênhx lok six txov nhêv, thâuv iz lênhx tsoz phưz iz lênhx niêv trâus moz trưx phax, txir trâus moz hnhar. Ntâu shông đhâu chuôzz is tsuv nhoz uô nênhx hâur luz tsêr greiv tưz trâus puôk tsuôx ntâu, thâuv txos cheix ntux nas tsêr lok six xơư nas. Pheiz kênh đros đoàn viên Công đoàn Hoàng Văn Hải li luz nênhx, Liên đoàn lox tôngv tỉnh Yên Bái, Công đoàn Công ty Yên Sơn, Công đoàn têx qơư công nghiệp tỉnh…tưz paz txưv tix lâuk Hải cxiv uô luz tsêr yiêz truôx jông tsiv grê 160 tsov đeiv: “Iz luz tsêr nhoz sor si lok six muôx ziz njiêz đros cur, paz chuôz zis their tâu ntux yar ntux nas thâuv cur niêv cur txir muôx mox gênhs li no; paz cur tso siêz chiê shông zuôr txos zuôr pox niêv, cur uô tsâus Ban lênhs tov Công ty thiêz têx nganhx”.

          Têx shôngk đhâu, tỉnh Yên Bái tưz chêx chôngk pênhr jos muôz siêz tsơưr lươngv thiêz chêx cuk uô Công đoàn li txơưx jênhv, cxiv tsa công đoàn truôx tul. Txix co muôz siêz têx tsưr tsix công đoàn, nênhs sir zôngv lox tôngv li jênhv pâuz, txơưx jênhv lok hâux lưv cxoz cxơưx luz nênhx, por vêv đoàn viên công đoàn li liv zix huv đros. Zơưv Nguyễn Văn Hồng, Chủ tịch Công đoàn Công ty CP cxiv tsa zaoz thôngz Yên Bái puz pâuz: “Hâur ntu zuôr txos Công đoàn công ty zuôr tror phuôx huiz têx hâux lưv uô tâu jông thiêz sir jos đuô tsov cưv txos nênhs lox tôngv, tiv zix zos têx lênhx nênhs muôx luz nênhx txov nhêv”

          Têx luz tsêr sor truôx jông tâu cxiv uô txix tsaz yênhx “Tsêr sor Công đoàn” têx shôngk đhâu tưz paz ntâu lênhx đoàn viên, nênhs lox tôngv muôx luz nênhx txov nhêv nhoz Yên Bái tso siêz nhoz uô nênhx, chuôz cxaz đas jos chiê lơưr sir jos đuô hâur luz nênhx./.

Thừa Xuân- Txâur Vax cxeik nhênhv

Phongz yaox “Bôv đôiv lâul uô ntêx hlo” nhoz Gia Lai: paz cxơưz cxiz huôv tsar uô nox

Muôx 74 shông, bôv đôiv lâul Nguyễn Đức Thành, nhoz phường Cheo Reo, thị xar Ayun Pa, tỉnh Gia Lai cux tsênhv sir jos huôv tsar uô nox sâuv ziv chuôz zis thax tsav ar têz đar xar muôx 1 héc ta thiêz sâu tâu muôx 130 triệu đêiv txos 150 triệu đêiv nhiêx liv iz shông. Kror qơư no tâu phêiz uô têx qơưk tu zus, pak njêl, ntông nox txir thiêz chos jâuz tâuv, paz muôx tâu phênhv sâu yênhx shông. Lơưr zơưv Nguyễn Đức Thành, đros muôx tâu kinh têr trâu chuôz zis, kror zơưv oz niêv txir tsênhv sir jos khưr uô nox li no, zos viv xar tâu gôngr côngv trâu Hôiv bôv đôiv lâul thị xar li phongz yaox cxuô: “Xưk hloz Hôx tưz hêik, lâul taz sik tsik so, viv li tsuv sir jos huôv tsar kinh têr vax, pak, guôx. Zuk đros chor hôiv viên sir jos uô cov sơưr đơưk hâur jêx jok huôv tsar tâu kinh têr iz zav”.

Hnuz nhôngs cux tưz siêz, bôv đôiv lâul Nguyễn Văn Tuyến nhoz phường Hòa Bình, thị xar Ayun Pa tsênhv uô tâu truôx phênhv sâu yênhx puô triệu đêiv iz shông txix zuk li đas jos sir jos khưr uô nox. Kuz qơư nhoz huyện Hương Sơn, tỉnh Hà Tĩnh, muôx tsưr ziv thiêz ntâu shông tu zus muôk lưx zuôr cuz viv li chuôz zis sir jos uô kror hâux lưv no. Zơưv Tuyến phêiz kênh, zus muôk lưx mak zov chênhr zos tsuv txơưx zus, muôx txâuk zav nox, ho tsik tas ntâu đas jos tu zus: “Tu zus muôk lưx li cur no mak tsuôk tas kror pênhr xuz thơưx xưz, đhâu co mak chos tâux, txiêr blôngx lok trâu muôk lưx nox. Chor mâuv muôk lưx mak 1 shông sha iz tuk mê nhuôv mak cux muôs tâu muôx 12-13 triệu đêiv. Hok lâus muôk lưx mak iz shông txiêr cuz oz jiês, jiês xuz thơưx mak tâu xar muôx 7 las, jiês tov kaz tâu muôx 3 las mak iz shông cux sâu tâu muôx iz cir lơưv”.

Phongz yaox “Bôv đôiv lâul uô ntêx hlo” tưz tsik zos huôv tsar uô kinh têr trâu ziv chuôz zis xưz, mak tsênhv zos uô têx phongz yaox txơưr li “Bôv đôiv lâul siz paz txo grêk yêiz pluôs, uô nox uô hâuk txơưx”, “Bôv đôiv lâul sik côngv cxiv tsa jêx jok yiêz”. Chôngz lênhx bôv đôiv lâul tưz muôz ar, côngz đas jos, paz trâu chor cuiv xar hôiv lok six ntâu… Iz zav li bôv đôiv lâul Ksor Khoan, tưz muôz muôx 500 thiêr ndis ntâu ar chiê uô cêr muk lok hâur jêx jok nhoz xar Chư Băh, thị xar Ayun Pa. Zơưv cux uô ntêx hlo chiê pox nhuôs hâur jok cơưv shâuv thiêz uô trơưk hâur phongz yaox cxiv tsa jêx jok yiêz ntơưv thax tsav qơư: “Zuk tưz uô nênhx đhâu hâur tênhv qơư quân đôiv tror lok ntơưv qơư nhoz mak uô ntêx tsuv uô jông hâux lưv yax kriê pox nhuôs sir jos khưr uô nox, txo grêk yêiz pluôs chiê muôx nzir phênhv sâu. Cxaz chuôz cxix cxuô têx phongz yaox, uô vêv jênhx jêx jok cov hur si”.

Txix ntâu sir jos, phongz yaox “Bôv đôiv lâul uô ntêx hlo” nhoz thị xar Ayun Pa tưz uô tâu ntâu kror jông li: 100% hôiv ntơưv têx thax tsav qơư puôr lênhx uô tâu tiêr têx hâux lưv tror sâur, chor hôiv viên sir jos uô ntêx hlo muôx 90% ntâu, chor chuôz zis vênhx huôv muôx 85% ntâu.

Đros phongz yaox “Bôv đôiv lâul uô ntêx hlo” tưz zos yênhx iz kror paz cxơưz chor hôiv viên bôv đôiv lâul nhoz thị xar Ayun Pa, tỉnh Gia Lai sir jos khưr uô nox, cxaz chuôz chor phongz yaox sik tưr, muôx pưk txux zov chênhr hâur luz nênhx xar hôiv. Lơưr tưz thiêz tsênhv sir jos đros cxiv tsa Ayun Pa cov ziv huz ziv jông jav, vav mênhx đuô./.

VOVTN-Lik Thox cxêik nhênhv