Jôngr ntông cuêv fix paz trâu pêx xênhv muôx luz nênhx tsâu sor

Jok Pắc Ma, xar Mường Tè, huyện Mường Tè, tỉnh Lai Châu, qơư muôx 100 ntâu ziv chuôz zis tsôngv box Thái thiêz La Hủ uô nênhx nhoz luz chêix no pov chor ntông cuêv fix njuôz xiêz. Chor Cuêv fix tưz tâu chos ntơưv no txix shông 2016 thiêz tưz jux juk hlôngr trâu chor ar têz đaz tuôs tsik jông thâuv ntêx no. Chor cuêv fix lox njuôz jông tưz zos yênhx tsoz chos chênhr ntơưv thax tsav qơư, paz trâu pox nhuôs txo grêk yêiz pluôs, truôx tuk luz nênhx thiêz sir jos uô bluô nux. Niêv tix Vàng Lò Pứ, mênhx cxưx La Hủ, nhoz jok Pắc Ma, xar Mường Tè hêik pâuz: ziv chuôz zis thiêz iz cxiê ziv chuôz zis hâur jok piz chos cuêv fix txix shông 2016 lơưr xar thiêz huyện hêik kriê. Đhâu chos siv pov chir cuêv fix chiê thiêz hloz lox jông, huv đros đêx ar ntơưv no. Đhâu 4 shông ntâu chos, chor cuêv fix chos siv no tưz jông txiêr chês, sâu blôngx thiêz chuôz zis muôx 1,6 héc ta, iz shông paz sâu tâu muôx 30 triệu đêiv ntâu:

“Cur chuôz zis chos cuêv fix txix shông 2017 thiêz shông 2019. Txos nhiv no ziv chuôz zis trôngz cuêv fix tưz sâu tâu muôx 3 shông lơưv. Khov muôx chor cuêv fix no mak cur chuôz zis tưz muôx đuô thiêz tsik cxơưx li thâuv ntêx lơưv”.

Txix chor cuêv fix chos siv xuz thơưx huôv tsar jông, têx shông lơưr co khov muôx têz qơưk paz chor zuz ntông, qir zuôv, pêx xênhv xar Mường Tè tưz sir jos chos nzir. Chor ar têz đaz tuôs tsik jông kôngz thâuv ntêx no tưz tâu pox nhuôs hlôngr chiê chos cuêv fix. Txos nhiv no, tas nro xar muôx 200 ntâu héc ta cuêv fix thiêz pox nhuôs sâuv thax tsav tsênhv sir jos chos nzir, đros siêz xar muôz cuêv fix zos tsoz chos chênhr ntơưv thax tsav qơư. Zơưv Lý Văn Chánh, Phưv Chủ tịch Ủy ban xar Mường tè, puz pâuz:

“Chor Cuêv fix piz tâu chos siv ntơưv xar txix shông 2016 thiêz xuz thơưx tsuôk chos siv muôx 10 héc ta. Têx shông lơưr co tau xar hêik pâuz pox nhuôs kriz đar nzir thax tsav chos thiêz nhiv no tưz chos tâu muôx 20 ntâu héc ta. Cuêv fix chos ntơưv xar mak huôv tsar jông, cux huv đros trâu đêx ar ntơưv no”.

Cuêv fix tưz tâu chos ntơưv 13 xar, thị trấn sâuv thax tsav huyện ntus đriv Mường Tè thiêz đhâu 7 shông chos, txos nhiv no ntơưv thax tsav qơư tưz muôx 2.300 ntâu héc ta. 50% ntâu thax tsav cuêv fix tưz chos tâu muôs 4 shông ntâu thiêz tưz tâu pêx xênhv txiêr yiz chês, sâu blôngx chiê muôs, đros phênhv sâu tâu muôx 15-20 triệu đêiv iz héc ta iz shông, paz txo grêk tsơưs chor ziv chuôz zis pluôs ntơưv thax tsav qơư muôx 5% ntâu iz shông hâur têx shông jê lok no.

Đros huôv tsar chor ntông cuêv fix, huyện Mường Tè tưz paz zôngx ziv, hêik chor nênhs yưv pênhr tuôx sêiz shuôk, sik côngv chos, sâu zuôr têx hax huv trâu pox nhuôs. Nhiv no tsêr mêir uô têx hax huv txix cuêv fix xuz thơưx ciês ntơưv Lai Châu tưz tâu yưv pênhr cxiv tsa thiêz kriz uô hâux lưv ntơưv Mường Tè. Đros uô tâu muôx 100 tấn chês, blôngx iz hnuz, tsêr mêir no tsênhv paz yênhx cxênhz ziv chuôz zis muôx phênhv sâu truôx tuk txix hâux lưv txiêr chês, sâu blôngx txix zuk ziv chuôz zis chor trôngz ntông cuêv fix. Zơưv Đào Văn Khánh, Chủ tịch Ủy ban huyện Mường Tè, tỉnh Lai Châu puz pâuz nzir:

“Pêz xav jênhv cuêv fix zuôr zos tsoz chos chênhr  thiêz xêir tsov chor nênhs yưv pênhr paz trâu pox nhuôs huôv tsar tsêx trung tsoz cuêv fix sâuv thax tsav tas nro huyện”.

Chor cuêv fix chos sâuv thax tsav huyện Mường Tè, tỉnh Lai Châu tsênhv ziv hnuz ziv kriz đar thiêz zos yênhx tsoz chos chênhr ntơưv ntơưv thax tsav qơư hâur txo grêk yêiz pluôs. Pêx xênhv tưz muôx siêz njênhs njôngr trâu tsoz cuêv fix no txix phênhv sâu muôs chor chês thiêz blôngx chor cuêv fix no. No zuôr zos kror uô tâu truôx jông paz trâu cuêv fix zos yênhx tsoz chos chênhr, paz muôx tâu tsâu sor trâu tsôngv box ntơưv thax tsav qơư./.

Khắc Kiên-Lik Thox cxêik nhênhv