Sir jos chox chorr liêt sĩ trâus tuôs saz têz qơưk Lào lok Việt Nam

Thượng úy Hờ Xênhv Shôngx, nhân viên Đội zok nriêr têx nza liệt sĩ, Cục Chinhr triv Quân khu 2 txos nhiv no tưz muôx 10 ntâu shông uô hâux lưv zok nriêr nza chor liệt sĩ nhoz saz têz qơưk Lào lok Việt Nam. Uô kror hâux lưv no, tix lâus thiêz sơưr đơưk tsik so muôx chor jiês muk uô hâux lưv ntêr hnuz, têx thâuv tsênhv nhoz trâu saz têz qơưk Lào txos oz pêz luz hli.

Tix lâus Hờ hêik: Tix lâus Đôiv tâu choz jênhv vưv zok nriêr nza chor liệt sĩ quân zos nênhs Việt Nam trâus tuôs ntơưv 6 tỉnh Bắc Lào. Thax tsav lox đar, phiv liv, hâux lưv zok nriêr cux njiz tsik tsơưs têx cêr txov. Đuô thiêz, chor nênhs pâuz tâu zos chor bôv đôiv lâul Lào cxaz chuôz ntâuk tros châuz đros bôv đôiv Việt Nam mak nhiv no muôx chôngz nênhs cux tưz tas siv nênhx lơưv; iz cxiê lênhx nênhs tsênhv uô nênhx nhoz mak cux tưz lâul tas ndo tsik tsênhz têx qơư pêz chor bôv đôiv trâus tuôs lơưv thiêz, viv li hâux lưv zok nriêr nza chor liệt sĩ co hax zav njiz phiv liv ntâu đuô. Taz sik, yênhx lênhx nênhs hâur đôiv puôr lênhx sir jos, yênhx hnuz hmo pư hâur har jôngr, sir jos uô cov tiêr tâu jông têx jênhv vưv zuk tâu choz zok. “Thâuv pêx txêik tâu xor mông txix pêx xênhv hêik pâuz tiêk muôx xor mông lok têx nza chor liệt sĩ mak tas nro đôiv zuôr piz muk chiê zok nriêr nza chor liệt sĩ co. Iz jiês muk zok nriêr mak truz ntêr txix 7-10 hnuz, têx thâuv tsênhv ntêr đuô thiêz viv li cxuô kror hâux lưv bax uô ntêx zos kror lok six zov chênhr. Thâuv pov tâu têx kror cik txos chor zênhz shôngx liệt sĩ mak lênhx tưs cux jông siêz tsuôk xar sir jos zok nriêr cov tâu thiêz chox lơưr tror lok trâu zuk têz qơưk, txix co tsuv  uô jông khơưz, xuôk têk thoz huk ar jux juk cov khơưk tâu tas lơưr têx poz cxa tsik chiê sênhv kror tưs hlo txơưv tiêk zos têx tuk hniêr xưz”.

Xav txix thâuv yênhx lix trâu kaz shông 1994 txos nhiv no, Đôiv côngz xưv tiv zix Quân khu 2 uô jênhv vưv sâuv thax tsav 6 tỉnh Tây Bắc têz qơưk Lào tưz xav jênhv, nriêr pâuz tâu 4.200 ntâu xor mông lok nza chor liệt sĩ; zok nriêr, chox tâu lok Việt Nam zuôr xar 1.800 nza chor liệt sĩ. Ciês ntu chêix ntux kruôr shông 2021-2022, lưx lươngv tưz zok nriêr pov tâu 20 nza liệt sĩ, hâur co muôx 8 liệt sĩ xav jênhv tâu bê thiêz qơư nhoz thiêz tưz choz zok trâu chor nênhs cxênhz jê nhoz 6 tỉnh, thành phố hâur têz qơưk Việt Nam.

Thiếu tướng Trần Ngọc Tuấn, Phưv Chính ủy Quân khu, Trưởng Ban Chox kriê lok zok nriêr nza chor liệt sĩ Quân khu 2 (Ban chox kriê 515) puz pâuz:“Pêz tsênhv uô hâux lưv sik thav, chuôr yuô, uô tsâus Ban côngz xưv tiv zix têx tỉnh Bắc Lào thiêz chor nênhs hâur Ban côngz xưv tiv zix têx tỉnh puôr lênhx sir jos uô zuk txơưx jênhv chiê nros Ban chox kriê 515 Quân khu 2 thôngx ziv têx tsênhv njiêz zov chênhr. Tiv zix zos hâux lưv yax kriê đêz đar nriêr pâuz xor mông txix chor bôv đôiv lâul nhoz bôv đôiv Pathet-Lào, chor lâul jok, tsar jok, pêx xênhv têx tỉnh Bắc Lào. Txix co thôngx ziv phuôx huiz siêz tiv zix txơưx jênhv chiê uô lơưr 2 Đảng, 2 têz qơưk têx tsưr ziv, cêr chêi”.

Ntơưv tỉnh Điện Biên, ntu 2013-2020, thax tsav qơư tưz txêik jênhv, uô đaz uô kruô trâu 270 ntâu lênhx liệt sĩ zos nênhs Việt Nam trâus tuôs ntơưv Lào zos Đội zok nriêr nza liệt sĩ (Cục Chinhr triv Quân khu 2) chox lok choz zok. Ciês shông 2021 thiêz 7 luz hli hâur shôngk shông no, Điện Biên tưz txêik jênhv, uô đaz uô kruô trâu 25 lênhx liệt sĩ tâu chox lok têz qơưk tso trâu ntơưv qơư kuô nza Liệt sĩ Tông Khao.

Lơưr zơưv Bằng Xênhv Vưx, Phưv Chủ tịch Ủy ban tỉnh Điện Biên, Trưởng Ban Chox kriê 515 tỉnh puz pâuz:“Tỉnh tưz xav jênhv têx tsưr ziv, jênhv vưv tsênhv tsênhz chiê sik côngv đros têx taz viv, ban, tiv zix zos đros 6 tỉnh Bắc Lào chiê paz tâu jông tiv zix trâu chor nênhs nhoz đôiv zok nriêr uô tâu jông jênhv vưv tâu choz. Txix xav jênhv tâu qơư, nriêr pâuz têx xor mông, txix co zuôr sik côngv jông đros Bôv Tư lệnh Quân khu 2 li chor taz viv uô hâux lưv cux xưk li Bôv Côx phax muôx têx tsưr ziv uô jông, huv đros, cê taz por tâu jông hâux lưv zok nriêr têx nza, cê taz por xav jênhv tsênhz mênhx tâu qơư ntâuk tros châuz nhoz cxuô ntu cách mạng chiê zok nriêr cov tâu chor nza têx liệt sĩ”.

Tỉnh Điện Biên zuôr sir jos uô cov txos shông 2030 zuôr uô tâu tiêr Chính phủ li Đề án lok hâux lưv zok nriêr nza chor liệt sĩ.

Chiê uô tâu luôs hâux lưv no, tsưr ziv chênhr zos tror sir jos yax kriê, zoz zux chax chês thiêz cách mạng trâu canr bôv, đảng viên thiêz cxênhx hluôk; paz trâu yênhx lênhx nênhs gra siêz đuô jênhv pâuz, txơưx jênhv hâur zok nriêr nza chor liệt sĩ, txêik tok chox chor liệt sĩ co txix Lào lok trâu hâur têz qơưk Việt Nam./.

(Vũ Lợi-Lik Thox cxêik nhênhv)

"Gra" yuôx muk txos têx jêx jos tox siêz

          Iz thôngz por coar yuôx vắc xin, iz luz naz balo đros ntâu chuôz zênhx y tế, têx naz thax uô huv trâu mê nhuôk….tâu khi jông sâuv luz yêz meir zos têx chuôz zênhx thâuv têx y bác sĩ nhoz qơư y tế xã Mường Và, huyện Sốp Cộp, tỉnh Sơn La gra lơur thâuv sơưr cêr muk cxax yuôx phax moz thiêz seiz njuôs đas jos.

          Luz hli tưs cux trơưk hnuz 17 thiêz 18, iz đraz ntâu lênhx nênhs nhoz qơư y tế Mường Và ho sik pheiz muk 4 jêx jos tox siêz ntus đriv. Nhoz no, jos kuôk jos 2,3 six hơưv muk cêr, ziv kuôk ziv 2,3 luz đơưv, tox trôngz siêz, viv li qơư cxax yuôx tâu tso cxuô qơư txix tsêr vênhx huôv txos tsêr cơưv ntơưr, lok sik yênhx ziv chuôz zis, yênhx luz tsêr tax…uô li chas chiê zôngx ziv tiv zix trâu pox nhuôs.Tix lâuk Lậu Bả Dênh, nhoz jos Huổi Dương thiêz niêv lâuk Thào Thị Dợ nhoz jos Phá Thóng pheiz kênh: " Têx bác sĩ txix qơư y tế tuôx ciês ntơưv jêx jos cxax yuôx phax moz trâu mê nhuôs, cur lok six jông siêz, xar njôngr mê nhuôs muôx jông đas jos. Zos têx bác sĩ tsi tuôx mak zuk tsuv chox mê nhuôk muk qơư y tế, cêr lok six lax muk thiêz lok six khưr"

          "Cur hnor thôngz pov tiêk muôx bác sĩ tuôx jêx jos cxax yuôx trâu mê nhuôs viv li tas cik no cur nhoz tsêr tos tsi muk uô têz thiêz. Têx bác sĩ cxax yuôx thiêz heik kriê cur tsưr ziv tsoz phưz mê nhuôs đhâu thâuv tâu cxax yuôx. Mê nhuôs muôx jông đas jos mak tov kaz cur zuôr tror chox mê nhuôs muk cxax yuôx"

          Lơưr bác sĩ Nguyễn Thị Giáng Hương, Tsar qơư y tế xac Mường Và, zos tsi muk txos ciês ntơưv qơư chiê vênhv tôngv, heik kriê thiêz cxax yuôx phax moz mak lok six tsơưs mê nhuôs nhoz têx jêx jos nhoz đêz tâu cxax yuôx phax moz trơưk six hơưv, tsưr ziv. Tiv yênhx tưv kis, đros muôx ntâu phongz cxưx, cêr uô nênhx pôngz kaz, ntâu lênhx uô niêv uô txir đhâu thâuv mê nhuôk mak cxax yuôx lok, phưx txuôx mak ho tsi xar chox mê nhuôk muk cxax yuôx thiêz, lok sik thâuv muôx moz gênhs mak tsês nhoz tsêr chiê uô nênhz hu plis xưz, tsi puz zôngv yuôx. Đros co zos cêr tsi jông muk lok, pox nhuôs lax muk lok tâu, tiv zix zos mê nhuôs zâu… Viv li, chiê pox nhuôk tox siêz tâu sơưv têx qênhx tâu tsoz phưz đas jos, têx y bác sĩ thôngx ziv muk txos ciês têx jêx jos chiê cxax yuôx, seiz njuôs đas jos trâu mê nhuôs thiêz pox nhuôs: "Txix qơư y tế muk txos iz jêx jos tox siêz mak đêz 20 cei cêr taz sik thâuv muk mak pôngz txos 3 six hơưv, cêr nhav, tsi jông muk, yêz ô tô muk tsi tâu, tsuv muk yêz meir. Cêr lax muk lok li ntơưv pêz tsuv sơưr cêr muk nzor, chiê tsôngv box tsi tsuv tos ntêr, lơưr ho muk uô têz. Muôx têx thâuv muk txos njiz tsi tâu lơưr mak hnuz tov kaz ho tror tuôx. Đrâuv co, yuôx vắc xin cux lax por coar viv têx jêx jos tsi nhoz jê uô cê, yuôx gra muk muôx têx hưx tsuv cxax trâu 20 lênhx mê nhuôk, taz sik tsuôk cxax tâu trâu 3,4 lênhx iz jêx jos, gra tsi tâu muk jêx jos txơưr thiêz…"

          Tsi taz cxax yuôx vắc xin phax moz trâu mê nhuôk mak tsênhv cxax trâu pox niêv xênhz tuz ci hâur chêr, cxax phax moz Covid-19, seiz njuôs đas jos trâu nênhs muôx hnuz nhôngs siêz…cux tâu 100 phênhv puô têx qơư y tế nhoz huyện Sốp Cộp krêz uô. No cux tâu seiz zos iz tsưr ziv jông chiê chuôz ndê mê nhuôs, lênhx nênhs tâu cxax yuôx phax moz, uô têx tsưr ziv hâur tsaz yênhx têz qơưk li qơư tsov txos lok y tế, tsoz phưz đas jos tsôngv box sâuv thax tsav tsênhv yuôr ntâu phêv liv: Zơưv Lường Văn Xuân, Giám đốc Tsênhv qơư y tế huyện Sốp Cộp, tỉnh Sơn La puz pâuz: "Sốp Cộp zos iz huyện tox siêz đêz đrôngs, muôx KTXH txov nhêv, cêr ntus đriv ntêr, muôx 4 xã nhoz buôk ntus đriv, cêr lax muk lok, tsôngv box li yênhx tưv kis…Ntu đhâu, tsênhv qơư y tế tưz chox kriê têx qơư y tế, đros lênhx nênhs y tế jêx jos muk txos yênhx ziv chuôz zis, qênhz yuôx lênhx nênhs tsi tâu cxax yuôx chiê krêz uô hâux lưv cxax yuôx. Tsuôk tsưr tsix cxax yuôx phax moz thiêx li muôz siêz lênhx nênhs tâu cxax yuôx sâuv thax tsav tas nro tỉnh".

          Taz sik, hâux lưv muk cxax yuôx phax moz tsuôk zos iz hâur lok six ntâu qơư y tế li côngz xưv. Jênhv vưv no uô trâu têx qơư y tế txu grês lênhx nênhs, txu grês six hơưv trâu côngz xưv chuyên môn txơưr, tsi tâu heik txos têx phêv liv lok chuôz zênhx chuôz tas, txos chor cán bộ y tế li chinhz yênhx, đas jos. Lok lêx ntêr, tsuv muôx tas nro cxix luôk chính trị sik côngv đros uô, muôz siêz pox nhuôs li yênhx tưv, siêz xar lok por vêv đas jos, gôngr phênhv txu grês cxaz têx phêv liv trâu nganhx y tế./.

Lê Hạnh- Txâur Vax cxeik nhênhv