Tsôngv box Poz Ziz zav nox kaz txix tơưr tưv

Chiê muôz tơưr tưv uô tâu têx zav nox kaz, tsôngv box xeir chor tơưr tưv tuôz, zôngx ziv hlêis cxôngr. Tơưr tưv tâu muôz hlêis uô têx đưz đeiv mê tsơưr, đhâu co muôz hlaz đêx cuz, cuôv chor plâuz cov hur si, thiêz trâur tơưk chis lox, muôz hlơưr, cuôv cov đax, tsư ha li muôz tsâu đêx txiêk. Thâuv co tsôngv box muôz chor tơưr tưv ntơư nzuôr, cuôv hur si tso trâu hâur lâux câuz hâu cov siêr, mav muôz bo lok cxôngr uô têx đeiv nhiêk tsơưr, jông nox. Xuz thơưx, tsôngv box zuôr muôz chor tơưr tưv li heik sâuv chox muk vâuv, tsâu uô tơưr tưv kâuz. Tsưr ziv uô zos, thâuv cxôngr tâu têx tơưr tưv, tsôngv box zuôr bax têx txux lov li: Njêr, cuô txoz kruôr lok sik cuô txoz nhôngk, kix, kriêr tox kênhz, hmôngr cxur tuôr lưx. Hur tiz si chor tơưr tưv, txux lov muôz đo siz shơưk, zos kruôr hênhr muôx têx tso mê njik đêx râuz bâu tsês txiêk trâu, đhâu ntơư li muôz ntiv hâur têik tsês muôx 4 txos 5 hnuz. Thâuv chor tơưr tưv tưz kâuz jông nox, zos sơưr đơưk muôz lok nox mak tso nzir têx jâuz cxưz trâu cov tsư ha, nox kaz đuô. Pos Lò Thị Doan, khênhr uô zav nox co nhoz jok Lầu, phường Tô Hiệu, tỉnh Sơn La heik pâuz:

“Cur khênhr zav nox heik sâuv chiê tâu nox hâur chuôz zis, lar heik zos têx hnuz tsiêz mak thâuv tưs tưz tsuv muôx zav nox tơưr tưv kâuz. Uô zav nox co tsi phiv liv, taz sik tsuv max mav uô iz kro jux juk txix xeir tơưr tưv, cuôv uô hur, lar heik zos tsuv muôz hlơưr, cuôv cov đax, zos tsi uô li co mak zuôr tsi tsư ha. Iz chas ntơư, têx txux lov cux lok six zov chênhr cơưk”.

Tsi tiêk uô nox kâuz, têx tơưr tưv thâuv muôz hâu siêr cux muôx têx cxôngr uô têx đeiv nhiêk chiê đo shơư pax tsơưz, têx txux lov li: Jâuz cxưz, puv huz, kix, cuô txoz, cuô njuôs kâuz lok sik txir lưk kâuz....thiêz tâuv cuôz xênhz nox mak cux kaz cơưk. Zos lênhx tưs tâu nox zav nox co mak ndo njôngr hâur đruôz siêz tsês.

Tsi tas li, chor tơưv tưv thâuv tưz muôz chi siêr cux muôx têx cxôngr uô têx đêiv mê hâu shơư kok đêx cov muôs, tso mê njik têx jâuz cxưz, txux lov cux zos tsôngv box iz zav nox lok six kaz thiêz. Zơưv Lò Văn Hợp, nhoz xã Chiềng Pấc (kuz), nhiv no zos xã Thuận Châu, tỉnh Sơn La heik pâuz:

“Pêz muôz chor tơưr tưv hlêis uô têx đeiv mê tsơưr tsês kra kruôr sâuv tsuôr nzêix. Thâuv tưs zuôr nox txos mav muôz lok chi, cxiêz siêr, đhâu ntơư muôz tsông cov muôs, cuôv hur si têx cuz hnhiêz saz đrâuv por tsês, cxôngr uô têx đêiv jông nox tso tsâu cuô njuôs kâuz, thâuv tưs jôngx nox tâu mak tuôr cuô txoz kix lok njư cux zos iz zav nox kaz cơưk.....”.

Nhiv no têx zav nox li heik sâuv tsi tiêk zos tsôngv box Poz Ziz zav nox hâur niêx hnuz, tsênhv tâu têx qơư uô tsôngv box heir nênhs tsơưs chor jâuz mor nox uô phưx vưv kruô thiêz yênhx zav nox sưv đros thâuv txeik tok têx lênhx kruô tuôx ndis shuôs têz qơưk uô si trâu thax tsav tox siêz Sơn La. Niêv lâul Nguyễn Thị Thùy, nhoz Hà Nội tuôx heik pâuz:

“Tsôngv box Poz Ziz Sơn La muôx lok six ntâu zav nox kaz li: Tơưr tưv kâuz, grêix caz puôz thiêz lok six ntâu zav nox kaz txơưr đuô zos tsôngv box uô. Iz zav li tsôngv box nhoz no zav nox tơưr tưv kâuz, mak nox kaz cơưk. Iz jiês tuôx txos Sơn La, cur puôr lênhx zuôr têx zav nox co gra muk tsêr puz trâu chor nênhs cxênhz jê”.

Hâur têx hnuz so ntênhs, cxuô zav nox tâu muôz tơưr tưv uô, hâur co muôx zav nox tơưr tưv kâuz zuôr uô tsôngv box Poz Ziz pluôk nox muôx nzir cxix cxuô têx zav nox đuô./.

Lường Huyền-Riê Lâux cxeik, nhênhv

Niêv lâuk Tẩn Mý Xuân gôngr đas jos tuôr tsês vênhx huôv mênhx cxưx txix hâux lưv xơưk pax ntâuz uô tsôngs tiêz tsôngs yo chax chês

          Tsôngv box Cho Khâu li chêr tsôngs yo chax chês khênhr tâu tsôngv box chiv chir xơưk viv li pôngz lok six ntâu six hơưv. Pox niêv nênhs Cho khâu li chêr tsôngs yo đros têx pax ntâuz tâu uô jông xơưk, têx luz khơưv nhiêx, hlơưk txos têx hlaz tư….chiê uô tâu tsuv pôngz 6 luz hlik. Niêv lâuk Tẩn Mý Xuân pheiz kênh:

          “Txix thâuv tsênhv zâu, tâu têx pos, têx niêv kriê uô zuk li tsôngs yo chax chês. Chiê uô tâu chêr tsôngs yo li no mak pôngz lok six ntâu six hơưv, nênhs xơưk tsuv lok six txơưx uô. Taz sik grê muôs nhiv no tsi siêz, tuôv zênhv tsi tâu nênhs uô li têx côngz xơưk”.

          Jênhv pov tsênhv tsênhz nhiv no phongz yaox vênhx huôv vênhx ziv nhoz têx xã, jêx jos muôx ntâu thiêz zoz qơưx lok tsôngs yo chiê muk piêr kriê ziv ntâu đuô, niêv lâuk Xuân tưz krêz uô hâux lưv xơưk tsôngs yo chax chês yiêz ntơưv tiv phaz:

          “Tsôngs yo yiêz tâu xơưk lơưr mênhx cxưx li tsưr ziv uô chax chês mak cur tưz xar uô tix nzor viv cur lok six nhiêv xơưk pax ntâuz. Cur li tsưr ziv zos xar sik côngv vênhx huôv chax chês đros têx hlôngr yiêz nhiv no, cux xưk li chox têx xiv huv txos niêv ciêz pâuz ntâu đuô, chuôz cxaz phênhv sâu trâu zuk thiêz têx pox niêv nênhs Cho”.

          Chiê uô tâu têx siêz xar co, niêv lâuk Tẩn Mý Xuân tưz sâu zuôr têx xiv huv pax ntâuz chax chês txix pox nhuôk tiv phaz, đhâu co xar tơưv tsưr ziv xơưk yiêz têx xiv huv co. Txu grês six hơưv xơưk tsôngs yo mênhx cxưx Cho, niêv lâuk Xuân yênhx lix iz paz lênhx nênhs nhiêv xơưk pax ntâuz, hâur co muôx têx lênhx uô fuôv ntông, têx lênhx mak xơưk trik, ho muôx têx lênhx xơưk yo. Xiv huv thâuv uô tiêr tsuv taz por tuôr tsês tâu têx chax chês jông taz sik tâu hlôngr yiêz cov huv đros zoz qơưx sir zôngv nhiv no đuô. Pos Chẻo Mý Lù, nhoz xã Sìn Hồ, tỉnh Lai Châu heik:

          “Thâuv ntêx chiê uô thiêz hnar iz chêr tsôngs yo mênhx cxưx Cho Khâu mak tsuv pôngz lok six ntâu six hơưv uô. Tsôngs yo tâu uô yiêz nhiv no cur pov zôngx ziv đuô. Chêr tsôngs yo chax chês thâuv ntêx thâuv tsi tâu tâu xơưk yiêz muôx grê muôs 10 tsov đeiv ntâu, nhiv no tâu uô yiêz mak muôx grê muôs huv đros đuô, pox niêv li iz chêr tsuôk txix 2 txos 3 tsov đeiv”.

          Tsi taz gôngr phênhv lok hâux lưv tuôr tsês vênhx huôv mênhx cxưx Cho Khâu, nhiv no, niêv lâuk Tẩn Mý Xuân li qơư muôv muôs tsôngs tiêz tsôngs yo yax six muôx 5 lênhx pox niêv uô hâux lưv đros nhiêx shar zos 5 tsov đeiv iz luz hlik. Niêv lâuk Tẩn Phàn Mẩy, nhoz Tả Phìn, xã Sìn Hồ, tỉnh Lai Châu pheiz kênh, niêv lâuk lok six jông siêz viv tưz gôngr iz phênhv đas jos đros niêv lâuk Tẩn Mý Xuân chiê tuôr tsês zuk mênhx cxưx li hâux lưv xơưk pax ntâuz chax chês:

          “Niêv lâuk Xuân tưz yênhx lix thiêz pôngz ntâu đas jos chiê xar tơưv tsôngs yo mênhx cxưx Cho. Hâur ntu zuôr txos pêz zuôr tror uô têx xiv huv yiêz chiê tuôv zênhv tsôngv kruô li zoz qơưx, xar njôngr pêz li xiv huv uô tâu zuôr tâu chôngz lênhx nênhs pâuz txos đuô, tiv zix zos chox lok phênhv sâu trâu pox niêv thiêz paz tuôr tsês mênhx cxưx li hâux lưv xơưk pax ntâuz chax chês”./.

(Chẻo Thu-Txâur Vax cxeik nhênhv)