Bôv đôiv uô tsêr, paz trâu pêx xênhv cxiv tsa luz nênhx yiêz ntơưv qơư trâus đêx ngaz cuôr

Yênhx puô lênhx canr bôv, chiến sĩ Bôv Chỉ huy Quân sự tỉnh Sơn La, Sư đoàn 316, Cục Hậu cần-Kỹ thuật (Quân khu 2) thiêz chor lưx lươngv dân quân ntơưv qơư tsênhv sir jos cưr chor shôngz ntông, vuôk vor tsêr, car hlâu… muk đhâu đêx, har jôngr chiê paz trâu pox nhuôs qơư trâus đêx ngaz cuôr nyêis yêv, kho đuô têx vax tsêr, xa têx chuôz lov chiê uô tsêr trâu ntơưv qơư nhoz yiêz.

Chor tuz lênhv zênhx sưv đros cơưv shâuv chiê tsav txênhz, tir tar chor nênhs fêv, nhiv no tưz zos yênhx chor nênhs cxiv tsa, nênhs hav kuôr hlâu, txâus têx shôngz ntông… thiêz zos chor nênhs khơưz ciês têx plas tsêr, cxiv uô tsêr. Đros tơưv hưk lus ntuz tas têx trik yo zos chor tuz lênhv co li têx sir jos, truôx siêz chiê paz trâu pêx xênhv. Tuz lênhv Phình Xênhv Thox, Tiểu đoàn 1, Trung đoàn 754, Bôv Chỉ huy Quân sự tỉnh Sơn La puz pâuz:“Nhiv no pêz chor tuz lênhv tsênhv sir jos paz uô tsêr trâu pox nhuôs, sir jos uô yênhx hnuz hmo cov paz trâu pox nhuôs nzor muôx tâu vax tsêr chiê nhoz cov truôx tuk luz nênhx”.

Đhâu 1 hlik ntâu, xav txix thâuv piz kriz uô txix hnuz 9/8, chor tsêr yiêz, txix tsêr ntông, tsêr cxiv tsa, tsêr lôngx đhok… huv đros pox nhuôs cxuô thax tsav qơư trâus đêx ngaz cuôr li siêz nhiêv, phongx cxưx tưz jux juk tâu uô tiêr, zos kror huv muôx tsiv gri thiêz lox paz trâu pox nhuôs jux juk nzor truôx tuk luz nênhx.

Txix trâus pôngz plox tas hur si đhâu trâus đêx cuôr yôngz, nhiv no, hâur luz tsêr cxiv tsa yiêz, tix lâus Quàng Văn Thơm, jok Nậm Pù, xar Huổi Một, tỉnh Sơn La shir phaz hêik pâuz:“Hnuz no cur chuôz zis muôx tâu tsêr yiêz nhoz, uô tsâus Đảng thiêz Têz qơưk tưz paz trâu cur chuôz zis, tiv zix zos uô tsâus chor bôv đôiv tưz sir jos yênhx hnuz hmo chiê paz trâu chuôz zis txix thâuv trâus đêx cuôr yôngz txos nhiv no… Cur chuôz zis shir phaz hênhr”.

Ciês đhâu muôx Thủ tướng Chinhr phuv li kết luận thiêz Bôv Côx phax li chox kriê, Bôv Tư lệnh Quân khu 2 tưz sik côngv đros tỉnh Sơn La kriz uô cxiv tsa, kho đuô chor vax tsêr paz râu chor ziv chuôz zis trâus đêx cuôr yông. Hâur co, tsêx trung cxiv uô yiêz tsêr nhoz trâu 52 ziv chuôz zis muôx vax tsêr trâus puôk tsuôx tas hur si, 205 ziv chuôz zis tsuv txar qơư nhoz sêi đrơưv thiêz kho đuô tsêr nhoz trâu 61 ziv chuôz zis muôx vax tsêr trâus puôk tsuôx hnhar ntơưv chor xar Chiềng Sơ, Huổi Một, Mường Lầm, Bó Sinh, Sốp Cộp, Mường Lạn. Iz luz tsêr yiêz tâu paz 100 triệu đêiv, tsêr kho đuô tâu paz 30 triệu đêiv; nhiêx paz zos txix Ban hêik sơưr đơưk sik côngv paz tỉnh Sơn La thiêz chor pênhr nhiêx paz txơưr đuô.

Tiv pox nhuôs ntơưv têx qơưk trâus đêx ngaz cuôr uô nênhx nhoz tsik siz jê uô cê, nhoz trâu ntơưv têx qơư tox siêz, nxaz tox, hok trâu đêx ngaz cuôr uô ruôr hiêv… viv li hâux lưv thâux xa chor chuôz lov, kho đuô, cxiv tsa vax tsêr njiz ntâu kror cêr txov, uô phiv liv tsik tsơưs txos trâu hâux lưv paz uô tsêr nhoz. Taz sik, chor quân đôiv đros cấp ủy, chinhr quyền têx xar tưz sir jos, sik côngv, uô cov tâu jông têx tsưr ziv, paz trâu pox nhuôs uô cov tâu sêi têx vax tsêr thiêz muôx tsêr chiê nhoz. Pos Lò Lan Phương, Chủ tịch Ủy ban xar Chiềng Sơ thiêz Trung tá Nguyễn Văn Hiệp, Phưv Chủ nhiệm Chinhr triv Sư đoàn 316, Quân khu 2, hêik pâuz:“Hâur ntu uô jênhv vưv, pêz tsik so sik côngv đros thax tsav qơư, tiv zix zos tsar jok, chiê huiz tôngv pox nhuôs paz đros bôv đôiv uô. Pêz sir jos siêz tiv zix paz trâu pox nhuôs, tsik so hêik chor bôv đôiv sir jos chiê paz trâu pox nhuôs nzor truôx tuk luz nênhx”.

Txos nhiv no tưz muôx pêx xênhv qơư trâus đêx ngaz cuôr Sơn La li 120 ntâu luz tsêr tâu cxiv uô tiêr, nyêis txar thiêz kho đuô. Đros chor tsêr tâu tror kho đuô, cấp ủy, chinhr quyền, lưx lươngv quân đôiv thiêz chor nênhs siêz jông cux sir jos paz trâu chor ziv chuôz zis muôx luz nênhx txov nhêv, zuôr đuô têx chuôz zênhx sir zôngv, xênhz huôx zov chênhr chiê paz trâu luz nênhx nhiv no thiêz muk ntêr… Hâur iz luz tsêr yiêz zos iz ntu nênhx yiêz tsênhv tâu sir jos uô cov jông jux juk, chor jêx jok trâus đêx ngaz cuôr ruôr hiêv ntơưv Sơn La tsênhv tror tâu paz kho đuô cov muôx tâu luz nênhx truôx tuk thiêz jông đuô./.

Lê Hạnh-Lik Thox cxêik nhênhv

Tsôngv pêx tỉnh Lào Cai tsưr ziv jông huôv tsar uô nox

Đhâu ntâu shông muk ntâu thax tsav, suôv qơư zok nriêr thiêz cơưv shâuv tsưr ziv huôv tsar uô nox, tix lâus Hoàng Văn Liêm, 39 shông nhoz xã Yên Thành, tỉnh Lào Cai seiz pov hâur thax tsav muôx jông qơư huôv tsar tu zus tsiêx. Shông 2009, tix lâus tưz sir jos yênhx lix HTX Thiên An, huôv tsar zus nhux tưv trok maz thiêz tu zus nhux tưv sha mê nhuôv. Tas nro cxuô luôs hâux lưv, cêr huôv tsar tu zus tsiêx puôr lênhx tâu tix lâus qênhz shuôs jông, uô truôx txix xeir nôngz nhux tưv txos trâu puz jâuz krâur, phax tir thêir moz ơưk:“Pêz qênhz shuôs jông chor nôngz nhux tưv txix thâuv xeir zuôr, tsuv xeir têx tus muôx jos, nox tâuk jâuz..... Đhâu ntơư, pêz li chaz lok đros chor hâur qơư, thâuv zuôr chaz lok đros box mak pêz cxax phax phôngz moz ơưk 3 côngz yuôx vắc xin. Đhâu 21 hnuz tus tsiêx co muôx jos mav pheiz uô têx qar, muôz nưk  cơư nưk iz kro chiê puz jâuz krâur. Thâuv tưz nox tâuk jâuz krâur jông, pêz zuôr côngz trâu têx tsaz yênhx, dưv anr”.

Nhiv no, HTX Thiên An tsênhv zus đreiv muôx 1.500 ntâu tus nhux tưv. Chiê muôx txâuk jâuz krâur puz, iz chas sâu zuôr luôs lưv tus têx jâuz tâux, HTX tsênhv chos zuôr xar 20 ha tâux thiêz. Khov tu zus jông, qêz suô, tu nyis qơư cơư tsiêx, đhâu iz ntuk puz, iz tus nhux tưv muôx têx tâu liv txix 2,5 txos 3 tsov đeiv. Tsi tas li, qơư sâu zuôr cux tsi tiêk hâur tỉnh xưz, muôs trâu 2 chas tỉnh nhoz jê iz ndis li: Tuyên Quang, Cao Bằng, Phú Thọ thiêz Hà Nội hur si.

Iz hâur têx HTX Thiên An uô tâu yênhx côngz chênhr zos muôz hâux lưv uô truôx trâu tsôngv pêx xênhv. Đros thiêz 13 lênhx nênhs uô hâux lưv chênhr, HTX tsênhv muôz hâux lưv uô tsi so trâu 12 lênhx lox tôngv muôx bảo hiểm, iz hlik tâu 9 tsov đeiv thiêz xar muôx 30 lênhx lox tôngv trơưk cheix chiv, iz hlik 8 tsov đeiv. Niêv lâul Đỗ Thị Ánh, uô hâux lưv hâur HTX shir phaz heik pâuz:“Thâuv ntêx cur chuôz zis zos iz chuôz zis pluôs, tu zus tsiêx cxu tsơưs xưz. Iz txix thâuv tuôx uô hâux lưv hâur tix lâus Liêm HTX no, tâu paz zuz nôngz kôngz, tsiêx cxu thiêz krâur puz, txos nhiv no cur chuôz zis cux truôx tuk thiêz hla đhâu chuôz zis pluôs”.

Tsi tiêk huôv tsar tu zus tsiêx cxu, tix lâus Liêm chuôz zis tsênhv chos 10 ha jôngr ntông, phênhv ntâu zos ntông keo, ntông bạch đàn. Iz jiês ntor cơư muôs, tix lâus chuôz zis cux tâu 600 tsov đeiv ntâu nhiêx. Zơưv Triệu Vũ, Phưv Chủ tịch Ủy ban xã Yên Thành, tỉnh Lào Cai heik, HTX Thiên An têx uô tâu yênhx côngz tsi tiêk zos tix lâus Hoàng Văn Liêm iz lênhs, tưz yênhx iz qơư chi cax, qơư chuôz jos trâu tas nro xã Yên Thành huôv tsar kinh tế:“HTX Thiên An zos tix lâus Hoàng Văn Liêm uô giám đốc, zos HTX lox đuô hur si hâur thax tsav xã Yên Thành, tsi tiêk muôz phênhv sâu tâu trâu chor nênhs uô hâux lưv hâur HTX, tsênhv muôz hâux lưv uô trâu tsôngv pêx xênhv ntơưv qơư hur si. No zos hâux lưv uô jông tâu pêx xênhv hâur qơư nhoz thiêz 2 chas thax tsav nhoz jê iz ndis tuôx seiz shuôs, cơưv shâuv, uô trơưk”.

Đros trâu zuk têx sir jos, tix lâus Hoàng Văn Liêm jux juk tâu kruôs txos zos lênhx pêx xênhv Việt Nam huôv tsar uô nox coz 2021. Shông 2025, jiês tiv 2 tix lâus kruôs txos li heik sâuv thiêz zos lênhx nênhs uô ntêx nyuôs hâur tỉnh Lào Cai zuôr tâu kruôs txos hâur tsaz yênhx “shir phaz lok pêx xênhv Việt Nam huôv tsar uô nox uô hâuk coz” tsưr tsix trâu luz 10 hli zuôr txos no./.

                                                                                                   Đinh Tuấn-Riê Lâux cxeik, nhênhv