Hlôngr yiêz nhoz thax tsav tox siêz Sin Suối Hồ, Lai Châu

           Đhâu muôz iz cxiê xã, thax tsav lok uô cê, xã ntus đriv Sin Suối Hồ, tỉnh lai Châu lox đar đuô, 16 cxênhz ntâu lênhx nênhs, phênhv chôngz zos nênhs Hmôngz, Cho, Poz Ziz thiêz Giáy uô nênhx nhoz. Thax tsav đar, cêr muk lol phiv liv, taz sik txos nhiv no, xã tưz uô tâu 14 hâur 19 hâux lưv tso tơưv lok cxiv tsa jêx jok yiêz, xav kror đruôz đraz iz lênhx nênhs muôx phênhv sâu tâu zuôr xar 38 tsov đeiv iz shông.

         Ntơưv jok Đông Phong, tix lâus Đỗ Sỹ Quân, iz chuôz zis uô ntêx nyuôs hlôngr tsưr ziv huôv tsar uô nox txix uô kôngz hlôngr tu zus yis, chos yuôx zêx, uô chơưr, tu zus buô heik: “Cur chuôz zis huôv tsar tu zus đreiv nênhk txix shông 2017 lok. Zus nênhs cur muôs tâu ntâu nhiêx txiêx đuô, viv zuk tsuôk tas nhiêx zuôr nôngz zus thâuv xuz thơưx xưz, tsi tas côngz đas jos, nhiêx zuôr jâuz, zuôr krâur puz hâur yênhx hli. Iz chas ntơư, cur chuôz zis tsênhv chos yuôx zêx, uô poz cưk, tu zus keiz ok chiê muôx nzir phênhv sâu tâu hâur niêx shông”.

          Hlôngr yiêz zuz nôngz tsoz chos, muôs tâu gri cux tsênhv paz ntâu chuôz zis pêx xênhv hla đhâu yeiz pluôs. Ntơưv jok Dền Thàng, qơư muôx 100% tsôngv box Cho uô nênhx nhoz, luôs hâux lưv uô blêx, chos kok tsư ha, tsoz chos nox txir tsênhv huôv tsar uô tâu jông. Zơưv Nxeik Xênhv Lik, Bí thư chi bộ, uô tsar jok Dền Thàng heik pâuz: “Chiê uô tâu jông luôs hâux lưv cxiv tsa jêx jok yiêz, cur zos bí thư chi bộ, tsar jok thâuv xênhz huôx chi bộ tưz tso tơưv nghị quyết chiê huv đros tsênhv tsênhz hâur thax tsav qơư. Thâuv tso tơưv nghị quyết tas mav cơưv jêx jok, yax kriê trâu tsôngv niêv txir lax pêx xênhv, lar heik zos lok huôv tsar kinh tế mak tsuv uô lơưr tsưr ziv yiêz”.

           Đros trâu tsoz chos nox txir, yuôx zêx cux tsênhv jux juk yênhx tsoz chos chênhr hâur huôv tsar kinh tế nhoz Sin Suối Hồ. Nhiv no tas nro xã tưz muôx zuôr xar 184 ha têz yuôx zêx, hâur co ntâu chuôz zis pêx xênhv tưz muôx luz nênhx truôx tuk txix tsoz chos no. Pos Nguyễn Thị Hồi, nhoz jok Đông Phong heik: “Cur chuôz zis tưz đas cir chos yuôx zêx thiêz txeik mê njik pênhr hâur tsêr nhiêx tsênhv chei chiê huôv tsar uô. Chuôz zis tưz yưv pênhr chos xar muôx 3 ha yuôx zêx thiêz 2, 3 shông lok no, chuôz zis têx têz yuôx zêx tưz tâu sâu đê. Yuôx zêx tưz gra lok phênhv sâu tâu ntâu đuô, viv li tsôngv niêv txir cưr tix nênhx tsa sđ luz nênhx tưz tsi yuô txov nhêv li thâuv ntêx”.

            Zơưv Hà Mạnh Thắng, Phưv Chủ tịch ủy ban xã Sin Suối Hồ, tỉnh Lai Châu heik pâuz, hlôngr yiêz zuz nôngz tsoz chos, tsiêx tu zus, sir zôngv têx pênhr paz tâu trơưk tsưr ziv...zos iz hâux lưv hâu nov xã Sin Suối Hồ tsênhv sir jos fuô uô: “Chiê tror fuô uô luôs hâux lưv cxuz cêr yeiz pluôs hâur thax tsav, hâur ntu zuôr txos, xã Sin Suối Hồ zuôr tror sir jos yax kriê txos trâu pêx xênhv lok Đảng, têz qơưk têx tsưr ziv, chei fuô kriê cik txos tsênhv chei paz tsôngv lax pêx xênhv chiê sơưr đơưk muôx luz nênhx hlôngr yiêz, vav mênhx. Hâur co xã zuôr sir jos trâu iz cxiê hâux lưv huôv tsar kinh tế li: Sir jos huôv tsar uô kôngz, tiv zix zos huôv tsar chos iz cxiê zav tsoz chos yuôx đrox njuôz hâur xuz jôngr, huôv tsar uô têx muôx jông hâur thax tsav li: Chos thiêz tu têx yuôx zêx đros trâu iz cxiê zav kôngz txơưr đuô”.

            Txix têx por tox đo txos trâu cxuô luz tsêr muôx cêr shir phaz, chiê siêz, Sin Suối Hồ nhiv no tsênhv hlôngr yiêz, vav mênhx jux juk. Thâuv Đảng chox kriê huv pêx xênhv, sơưr đơưk muôx cêr jông siêz, thôngx ziv đros, thax tsav ntus đriv txov nhêv thâuv ntêx tsênhv sir jos yênhx qơư chi cax lok cxiv tsa jêx jok yiêz, viv luz nênhx truôx tuk, tsâu sor nhoz ntus đriv./.

Khắc Kiên-Riê Lâux cxeik, nhênhv