Quảng Bình sêiz kaz ntâuk gri yax mông côngv thôngx paz uô jông pox niêv txir nênhx vax huôv siz luôs trâu pox niêv mênhx cxưx

Xar Trường Sơn, huyện Quảng Ninh, tỉnh Quảng Bình zos iz hâur 8 xar tâu Trung ương Hôiv Liên hiệp pox niêv Việt Nam xêir tsov uô siv hâur tas nro têz qơưk kriz uô Dưv anr 8. Ntơưv no, Tsưr ziv tôv yax mông côngv thôngx tưz tâu yênhx lix muôx 10 lênhx nênhs. Tôv muôx jênhv vưv yax kriê, hêik pêx xênhv hlôngr yiêz đuô siêz xar, tsưr ziv uô nox, huôv tsar kinh têr, tso tsês têx kror tsik jông hâur chuôz zis thiêz côngv thôngx, têx phôngx cxưx pôngz kaz, tsik jông. Pos Hồ Thị Thư, nhoz jok Đá Chát, xar Trường Sơn, huyện Quảng Ninh, tỉnh Quảng Bình puz pâuz, thâuv ntêx, cov tuk txir chiê niêv tix cxaz chuôz chor huôx tôngv xar hôiv zos iz kror tsik zôngx ziv. Taz sik, txix thâuv muôx tôv yax mông côngv thôngx, niêv tix tuk txir tưz xar tâu thiêz hlôngr yiêz ntâu. Niêv tix tuk txir tưz pâuz paz uô têx hâux lưv hâur tsêr chiê niêv tix muôx nzir six hơưv uô côngz xưv xar hôiv hâur jok:

“Tov ntêx no cur zuôr tsưr tsix cơưv jêx jok chiê yax mông lok pox niêv txir nênhx vax huôv siz luôs. Iz zav li txir nênhx tsuv uô têx hâux lưv tưs paz trâu pox niêv, mê nhuôv hâur chuôz zis. Zos tuk txir tsik pâuz mak zuôr hêik cov pox niêv uô, uô phiv liv ntâu trâu pox niêv, taz sik zos tâu hêik pâuz lok pox niêv txir nênhx vax huôv siz luôs zuôr paz tâu trâu zuk lok six ntâu hâur xar hôiv. Zuk zuôr hêik trâu pox nhuôs sơưr đơưk pauz tiv zix zos chor hluôk nenhs”.

Tưz tsik zos niêv tix Thư xưz mak chôngz lênhx pox niêv txơưr đuô hâur xar Trường Sơn cux phêiz kênhx, đhâu thauv cxaz chuôz tôv yax mông côngv thôngx chor jiês yax kriê ntơưv jok, chôngz lênhx uô txir tưz txơưx xar thiêz hlôngr yiêz ntâu, pâuz phêiz kênh, uô têx hâux lưv mak thâuv ntêx no tsuô zos pox niêv uô xưz. Ntâu kror tâu tso tsês, paz muôx tâu luz nênhx jông đuô thiêz shir phaz trâu chuôz zis thiêz jêx jok. Cux ntơưv xar ntux đriv no, Hôiv Liên hiệp pox niêv tỉnh tso tơưv chor tsưr ziv uô jông, kriê lok pox niêv txir nênhx vax huôv siz luôs ntơưv oz jêx jok thiêz tsưr ziv Câu lạc bộ nênhs sơưr thơưx lok hlôngr yiêz ntơưv Tsêr cơưv phôv thôngz mênhx cxưx niêv txir zus mor cxênhx oz Trường Sơn; đros co, cấp xar cux yênhx lix nzir 6 tôv yax mông côngv thôngx ntơưv 6 jêx jok. Pos Dương Thị Hồng Chuyên, Chủ tịch Hôiv Liên hiêp pox niêv huyện Quảng Ninh, tỉnh Quảng Bình puz pâu, đhâu chor tôv “yax mông côngv thôngx” tưz yax kriê txos pox nhuôs mênhx cxưx Brâu-Vân Kiều lok têx txux chi li: Chêi pox niêv txir nênhx vax huôv siz luôs; pox niêv txir nênhx txơưx sik paz uô têx hâux lưv hâur tsêr; phax tar siz zuôr nzor thiêz siz zuôr cxênhz jê; têx xor mông thiêz tsưr ziv jông chiê paz trâu chor nênhs trâus ntâuk tsiv hâur chuôz zis:

“Ntu zuôr txos, Hội Liên hiệp pox niêv huyện zuôr tror đros Hôiv liên hiệp pox niêv xar chiê chox kriê, tsưr tsix uô chor tsưur ziv tôv yax krie côngv thôngx cov jông đuô. Tiv zix Hôiv zuôr sir jos uô krie nzir txux chi lok pox niêv txir nênhx vax huôv siz luôs, cxiv tsa chuôz zis shir phaz”.

Iz chas hâux lưv yax kriê chor tôv yax mông tsênhv hêik, cxơưz cxiz pêx xênhv cxaz chuôz Dưv anr tiv zix zos txir nênhs đros phêiz kênh, paz uô têx hâux lưv hâur tsêr, paz trâu chor pox niêv muôx luz nênhx siz luôs đuô, txo grêk tsơưs ntâuk tsiv hâur chuôz zis, paz uô tiêr têx jênhv vưv mak têz qơưk Tsaz yênhx huôv tsar kinh têr xar hôiv thax tsav tsôngv box mênhx cxưx tsơưs nênhs thiêz tox siêz tưz tso tơưv, kriz uô. Pos Nguyễn Thị Kim Dung, Trưởng Ban Tuyên Giáo, Trung ương Hội Liên hiệp pox niêv Việt Nam puz pâuz, tsưr ziv “tôv yax mông côngv thôngx” nhoz hâur Dưv anr uô lơưr pox niêv txir nênhs vax huôv siz luôs thiêz đơưk kho têx phiv liv muôx yưv trâu pox niêv thiêz nhuôs zâu zos Hôiv Liên hiệp Pox niêv Việt Nam sêiz car tưz paz trâu 120 lênhx hôiv viên pox niêv xar Trường Sơn, huyện Quảng Ninh pâuz tâu têx txux chi lok pox niêv txir nênhs vax huôv siz luôs, txo grêk tsơưs têx phongx cxưx pôngz kaz, tsik jông thiêz jux juk gra siêz đuô chor pox niêv li qơư sơưr hâur chuôz zis, xar hôiv:

“Pox niêv txir nênhx li vax huôv thiêz têx kror phiv liv tsênhv muôx yưv hâur côngv thôngx thiêz tiv zix zos tsôngv box mênhx cxưx tsơưs nênhs. Viv, pir li kror cxuô mak tsôngv box mênhx cxưx tsơưs nênhs li jênhv pâuz thiêz cêv kuôk tsênhv tsik tâu siz bâus. Pêz cux xar cov lơưr pâuz tâu ntâu đuô chiê txo grêk tsơưs têx kror co, chiê lơưr phuôx huiz tâu zuk têx vax huôv”.

Xav txos hli 5 shông no, tỉnh Quảng Bình tưz yênhx lix 30 tôv yax mông côngv thôngx, 6 Câu lạc bộ nênhs sơưr thơưx lok têx hlôngr yiêz thiêz 19 kror qơư uô jông. Đhâu kri uô xuz thơưx, Dưv anr 8 têx luôs hâux lưv tâu uô jông thiêz kriz uô huv đros têx tsưr ziv tso tơưv, huv đros trâu qênhx shênhx tsênhv tsênhz, paz muôx tâu qênhx liv trâu pox niêv thiêz chor nhuôs zâu nhoz sâuv thax tsav kriz uô, paz hlôngr yiêz ntâu lok jênhv pâuz, siêz xar./.

VOV4-Lik Thox cxêik nhênhv