Tsêr cơưv Chuyên Lê Quý Đôn- qơư chi cax hâur nganhx zaoz zux Điện Biên

          Hâur têx tsêr cơưv cxênhx 3 nhoz tỉnh Điện Biên, Tsêr cơưv cxênhx 3 Chuyên Lê Quý Đôn ntâu shông đhâu tưz khav tênhv pưs txux zos qơư kriê ntơưr truôx jông, zos taz viv xuz thơưx hâur côngz xưv thox cxov tâu têx lênhx shux xênhz cơưv txơưx, gôngr phênhv lok hâur tỉnh Điện Biên li hâux lưv zaoz zux.

          Tsêr cơưv tâu yênhx lix lơưr UB tỉnh Lai Châu (kuz) li Cuiz tênhv số 274 hnuz xiêz 10/6/1995 đros luz bê qir thơưx zos Tsêr cơưv phổ thôngz cơ sở năng khiếu thị xã Điện Biên. Txos shông 2000, tsêr cơưv hlôngr bê yênhx Tsêr cơưv cxênhx 3 Chuyên Lê Quý Đôn. Đrâuv uô tsaz yênhx zaoz zux phổ thôngz tas nro, tsêr cơưv tsênhv uô jênhv vưv zos kriê cxaz pênhr xưv trâu têx shux xênhz têx môn chuyên, paz muôx tâu lênhx nênhs tsơưr lươngv trâu tiv phaz thiêz têz qơưk.

          Txix hâur luz tsêr cơưv ntơưr no, ntâu cxênhx shux xênhz tưz yênhx têx lênhx nênhs jông, tax tâu ntâu yênhx tix jông hâur têx jiês thik shux xênhz cơưv ntơưr hênhr cấp têz qơưk thiêz sâuv ntiêx têz. Shux xênhz Đỗ Mạnh Thái, tax giải iz môn Sinh học cấp têz qơưk shông 2025 pheiz kênh:

          “ Hâur ntu cơưv ntơưr, thâuv pov phêv liv viv yênhx tưv mak muôx lok six ntâu thâuv tưs cux tâu têx cưk kriê tôngv vênhx, paz cưr truôx siêz đuô. Cur pov cưk kriê nhoz no tsi taz txơưx kriê ntơưr mak tsênhv lok six moz siêz đros hâux lưv uô, hluz chor mê nhuôk shux xênhz. Co zos têx chuôz cxaz đas jos chiê cur sir jos đuô”.

          Hâur shông cơưv 2024-2025, thâuv Bộ zaoz zux jiês xuz thơưx tsưr tsix thik xeir zuôr shux xênhz cơưv hênhr lơưr tsaz yênhx zaoz zux phổ thôngz 2018, cưk kriê thiêz shux xênhz Tsêr cơưv cxênhx 3 Chuyên Lê Quý Đôn tưz tax 22 giải. Hâur co muôx 1 giải iz môn Sinh học, 2 giải 2 hla đhâu cấp nhoz têx môn Toán thiêz Tin học lớp 11, 1 giải 2 môn Địa lý lớp 11. No zos têx yênhx tix lox khav tênhv cưk kriê thiêz shux xênhz li pênhr xưv thiêz siêz sir jos.

          Cưk kriê, thạc sĩ Bùi Thị Anh, Hiệu trưởng tsêr cơưv puz pâuz: đrâuv têx yênhx tix lok cơưv ntơưr, phongz yaox sik tưr nhiêv têz nhiêv qơư, hlôngr yiêz, xar tơưv hâur kriê thiêz cơưv ntơưr cux tâu seiz zos đas jos paz tsêr cơưv tuôr truôx tsơưr lươngv:

          “Pêz zuôr paz chiê cưk kriê cxaz chuôz têx lớp kriê cxaz, têx jiês phêv thảo zos têx khối tsêr cơưv chuyên tsưr tsix. Tiv zix zos tôngv vênhx têx cưk kriê sir jos hlôngr yiêz tsưr ziv kriê ntơưr hâur zuk têx tiết cơưv. Txix co paz shux xênhz moz siêz đuô đros thiêz hâux lưv cơưv ntơưr. Chiê muôz siêz tsơưr lươngv pêz krêz đar sik hux jos đros têx tsêr cơưv chuyên hâur tas nro têz qơưk cux xưk li têx tsêr cơưv đại học sâuv ntiêx têz”.

          Ntâuk grê lok Tsêr cơưv cxênhx 3 Chuyên Lê Quý Đôn li gôngr côngv lok phongz yaox sik tưr nhiêv têz nhiêv qơư hâur nganhx, zơưv Cù Huy Hoàn, Phưv giám đốc Sở zaoz zux tỉnh Điện Biên puz pâuz: chêx cuk mak tsêr cơưv tax tâu hâur 30 shông đhâu zos têx tsênhv tsênhz tso pov chinhz yênhx sir jos hla đhâu cxuô phêv liv, car xar tơưv, car hlôngr yiêz. No cux zos trâur nuv jông lok phongz yaox sik tưr “Kriê jông-cơưv jông” chiê têx qơư zaoz zux txơưr hâur tas nro tỉnh cơưv shâuv uô lơưr:

          “ Đhâu 30 shông cxiv tsa thiêz huôv tsar mak têx cxênhx cưk kriê, cán bộ seiz car, shux xênhz hâur tsêr cơưv Chuyên Lê Quý Đôn tưz khav tênhv tâu pưs txux uô ntêx nyuôk hâur côngz xưv kriê shux xênhz thiêz muôz siêz tsơưr lươngv zaoz zux sâuv thax tsav tỉnh Điện Biên. Tsêr cơưv tưz cxiv tsa tâu chor cán bộ seiz car, cưk kriê ntơưr txơưx lok chuyên môn nghiệp vụ, moz siêz thiêz muôx txơưx jênhv hâur uô côngz xưv”.

          Đros têx sir jos thiêz yênhx tix tax tâu, Tsêr cơưv cxênhx 3 Chuyên Lê Quý Đôn tưz 6 jiês tâu Thủ tướng chính phủ khơưk muôz qix kruôk, tâu Chủ tịch têz qơưk khơưk muôz Huân chương lox tôngv hov iz, hov oz, hov pêz đros bê Zênhz shôngx lox tôngv ntu hlôngr yiêz. No tsi taz zos cưk kriê thiêz shux xênhz hâur tsêr cơưv li cêr tshir phaz tsênhv zos kror tsênhv tsênhz tso pov đas jos krêz uô đêz đar phongz yaox sik tưr nhiêv têz nhiêv qơư hâur nganhx zaoz zux Điện Biên thiêz zos qơư muôx chôngz lênhx shuv xênhz cơưv tâu ntơưr txơưx./.

(Vũ Lợi-Txâur Vax cxeik nhênhv)

Lênhx pox niêv bác sĩ nthuôr đar têx hâux lưv uô jông thiêz xar njôngr sir jos cơưv iz siv nênhx hâur côngv thôngx

Zuôr xar 30 shông lês uô hâux lưv seiz njuôk, kho moz gênhk, bác sĩ chuyên khoa I Lê Thị Hiến, tsar Khoa seiz njuôk shuôs, kho têx moz hnhar Phục hồi chức năng tỉnh Sơn La zos tsov iêr chi cax, uô ntêx nyuôs sir jos uô jông hâux lưv seiz njuôk shuôs, kho moz gênhk viv tsôngv pêx xênhv. Đhâu thâuv cơưv tiêr ntơưr lok shông 1997, niêv lâul Hiến tưz lês uô đhâu ntâu hâux lưv ntơưv Tsênhv qơư y tế huyện Yên Châu (nhiv no zos Tsênhv qơư Y tế thax tsav Yên Châu) thiêz tsêr kho têx moz lox, moz hnhar hâur tỉnh. Txix shông 2016 txos nhiv no, zos lênhx thơưx seiz car khoa kho têx moz li heik sâuv, bác sĩ Hiến tưz đros têx lênhx uô hâux lưv cê moz siêz txos cơưv cxaz têx txux chi, tsưr ziv yuôr trâus phưx vưv uô hâux lưv, hlôngr yiêz ntâuz ntơưr, gra siêz tsơưr lươngv seiz njuôk shuôs, kho moz gênhk.

“Cur thâuv tưs tưz tiz jông seiz njuôk shuôs đas jos trâu lênhx nênhs moz chiê uô ntâuz ntơưr xa trâu têx khoa kho moz thiêz sik hux jos đros sơưr đơưk chơưv kho moz gênhk trâu pêx xênhv tâu jông, nzor muôx đas jos truôx tuk”.

Moz siêz lês uô jông têx hâux lưv zok muôz, bác sĩ Lê Thị Hiến tưz seiz car thiêz cxaz chuôz nhênhz chơưv ntâu txux chi tsưr ziv seiz njuôk shuôs, kho moz trâu chor nênhs đhâu trâus moz cxơưs sâur nyar hlưz hâu, kho cxa chax kâuv trâus po thiêz moz poz kix cxa hâur châus. Đhâu nhênhz chơưv, uô trơưk tưz uô tâu ntâu kror jông, paz ntâu lênhx nênhs moz muôx đas jos jux juk.

“Zos iz lênhx cưk yuôx, cur xar “Cơưv iz siv nênhx cơưv tsi tas”, pêz tsuv sir jos cơưv, cơưv têx txux chi jông, cơưv têx muôx liv thiêz ciês pêz ngênhx cưk yuôx mak tsuv cơưv chiê gra siêz tsưr ziv seiz njuôk shuôs, kho moz trâu tsôngv lax pêx xênhv”.

Đros thiêz moz siêz uô jông hâux lưv seiz njuôk shuôs, kho moz gênhk, nhênhz chơưv thiêz hlôngr yiêz tsưr ziv chơưv kho moz, bác sĩ Hiến thâuv tưs  tưz uô trâu nênhs moz njênhs njôngr, tso siêz chơưv kho moz gênhk. Zơưv La Văn Chuyên, nhoz jok 5, xã Quỳnh Nhai, nhoz chơưv kho moz hâur tsêr yuôx heik:

“Cur tsi so tuôx no kho moz gênhk thiêz txix tsêz no txos shông no, muôx bác sĩ Hiến lok six moz siêz txos pêz chor nênhs moz, paz pêz tso siêz nhoz chơưv kho moz gênhk. Cur uô tsâus lok six ntâu txos bác sĩ”.

Sir jos lês uô jông têx hâux lưv zok muôz, moz siêz cơưv cxaz têx txux chi thiêz nhênhz chơưv khoa học, bác sĩ Lê Thị Hiến tưz hmôngr jông tâu Chủ tịch têz qơưk muôz ntơưr kruôs: Cưk yuôx uô tâu hâux lưv jông shông 2024 thiêz tâu Hội cxiz cơưv txơưx njê tỉnh Sơn La kruôs txos zos tsov iêr chi cax, uô ntêx nyuôs “cơưv iz siv nênhx”. Cưk yuôx Quàng Thị Mai Bua, uô hâux lưv hâur khoa kho têx moz lox, moz hnhar, tsêr kho moz Phục hồi chức năng tỉnh Sơn La heik pâuz:

“Cur uô hâux lưv đros bác sĩ Hiến, bác sĩ Hiến siêz lok six jông thiêz paz pêz sơưr đơưk lok six ntâu, kriê txux chi uô hâux lưv, tsưr ziv txeik tok nênhs moz tuôx nhoz chơưv kho moz gênhk thiêz kriê pêz thav, seiz njuôk shuôs đas jos trâu nênhs moz uz no....., pêz tsuv cơưv shâuv têx tsưr ziv uô hâux lưv ntơư lok six ntâu”.

Zuôr xar 30 shông lês uô hâux lưv seiz njuôk shuôs, kho moz gênhk, bác sĩ Lê Thị Hiến, thơưx seiz car khoa kho têx moz lox, moz hnhar, tsêr kho moz Phục hồi chức năng tỉnh Sơn La zos iz lênhx nênhs sir jos uô hâux lưv thiêz cơưv iz siv nênhx cơưv tsi tas, tsi cxuô. Co zos cêr uô nênhx jông, lês uô hâux lưv viv sơưr đơưk. Txix nhênhz chơưv khoa học txos chơưv kho moz gênhk, bác sĩ Hiến tưz nthuôr đar têx txux chi, tsưr ziv, cêr uô nênhx trâu luôs lưv tus cơưv shâuv, uô trơưk./.

Thanh Thủy-Riê Lâux cxeik, nhênhv