Jêx jok nhoz ntus đêx đas muôx ntâu hlôngr yiêz

Têx hnuz kaz shông, pêz muôx jiês tuôx muk ndis shuôk Quỳnh Nhai-thax tsav qơư jông jav nhoz ntơưv ntus đêx đas. Muk trơưk têx cêr bê tông yiêz txos trâu jok Hua Trai, xar Mường Giàng. Thêir vor tas têx tsêr lơưx ntơưv no zos têx vax txir ntông tsênhv hloz lox, njuôz xiêz pêv têx têz, ntar trôngz. Saz pak đêx tênhv Sơn La pov muôx têx vax thêir xor zus njêl, têx chôngv, têx va yưv plox pliês sâuv blêiv đêx; chor fuôx gox thâux xa pox nhuôs têx kôngz lôngk đros muôx têx cêr shir phaz đhâu ntâu hnuz sir jos tir yar tir nas khưr uô nox.

Pox nhuôs têx shir phaz co xưk li zos paz hêik tơưv tâu têx hlôngr yiêz hâur luz nênhx nhoz yênhx chuôz zis hêik taz, hâur huôv tsar kinh têr-xar hôiv thiêz cxiv tsa jêx jok yiêz ntơưv thax tsav qơư hêik cxuô. Muôx hlôngr yiêz li co phênhv ntâu zos pêx xênhv li sir jos, car xar, car uô chiê paz muôx nzir tâu phênhv sâu siêz, hlôngr yiêz đuô luz nênhx. Zos chuôz zis uô ntêx hlo hâur huôv tsar kinh têr nhoz jok Hua Trai, xar Mường Giàng, pos Tòng Thị Thin hêik pâuz: “Cur chuôz zis tưz yưv pênhr uô tsêr guôx, zuôr buô nôngz lok tu zus. Têx jiês zus chôngz mak txos 30 tuk. Iz shông muôs oz jiês, phênhv sâu tâu muôx 100 triệu đêiv ntâu iz shông, txâuk chiê chuôz zis sir zôngv, chiê têx tuz nhuôs muk cơưv ntơưr cxix cxuô”.

Mường Giàng zos xar jêx jok yiêz xuz thơưx ciês nhoz huyện Quỳnh Nhai thiêz cux zos thax tsav qơư chiê cxiv tsa đô thị vav mênhx. Txos tas shông 2021, phênhv sâu lênhx nênhs tâu muôx 32 triệu đêiv iz lênhx nênhs iz shông, chor chuôz zis pluôs tâu txo grêk tsơưs txos yuôr 2% ntâu. Gra siêz phênhv sâu, gra siêz đuô thiêz luz nênhx trâu pêx xênhv zos iz hâur têx tsưr ziv mak xar tsênhv sir jos kriz uô txix ntâu tsưr ziv tsênhv tsênhz. Zơưv Đặng Sỹ Định, Chủ tịch Ủy ban xar Mường Giàng, huyện Quỳnh Nhai puz pâuz: “Zuôr txos no xar tso tơưv cxiv tsa tsưr ziv, xêir tsov têx tsưr ziv uô; hêik pêx xênhz cxaz chuôz trâu chor hợp tác xã, sik côngv đros chor doanh nghiệp hâur paz trâu pêx xênhv lok kỹ thuật, chos kôngz lôngk, tu zus, sâu zuôr têx hax huv, paz cov pêx xênhv muôx tâu phênhv sâu siêz đuô”.

Txos nhiv no, huyện Quỳnh Nhai tưz muôx 7/11 xar uô tiêr cxiv tsa jêx jok yiêz. Tas nro huyện uô tâu 170 luôs hâux lưv, đros uô tâu ntâu kror jông, paz trâu têx jêx jok tâu hlôngr yiêz, li: 100% jêx jok muôx tênhv tênhz têz qơưk, tas nro 11 jêx jok muôx cêr luôv poz jêz muk lok tâu hâur 4 chêix txos trâu tsênhv qơư xar; chor chuôz zis pluôs tâu txo grêk tsơưs txos yuôr 8% ntâu…Ntâu tsưr ziv uô kinh têr uô tâu jông thiêz tâu kriz uô đêz đar li chos mắc ca, txir suôz câur, ntông nox txir, zus suôz njêl sâuv pak đêx tênhv…

Lơưr Thủ tướng Chính phủ li cui tênhv, huyện uô tiêr cxiv tsa jêx jok yiêz tax tâu oz kror: 100% chor xar tâu cungz jênhv uô tiêr cxiv tsa jêx jok yiêz; tax tâu 9 luôs hâux lưv cxiv tsa huyện jêx jok yiêz. Chiê uô cov tâu zos huyện uô tiêr cxiv tsa jêx jok yiêz trâu shông 2025, zơưv Cầm Văn Huy, Phưv Chủ tịch Ủy ban huyện Quỳnh Nhai puz pâuz, huyện tưz tsêx trung cêv kuôk thiêz cxiv tsa đề án khov lơưr kror liv ntơưv yênhx thax tsav qơư, uô truôx jông lơưr têx luôs hâux lưv cxiv tsa jêx jok yiêz. Nhiv no, tsêx trung chox kriê 4 xar tsênhv uô cov tiêr cxiv tsa jêx jok yiêz; tuôr truôx jông thiêz uô cov jông đuô tsơưr lươngv 7 xar tưz uô tiêr cxiv tsa jêx jok yiêz, hâur co sir jos cov muôx txix 2 txos 3 xar uô tâu tiêr cxiv tsa jêx jok yiêz jông đuô, xar Mường Giàng zos đô thị vav mênhx. Thôngx cxix, kriz uô cxix cxuô têx tsưr ziv chiê phuôx huiz têx kror liv ntơưv thax tsav qơư: “Ủy ban huyện tưz huiz tông cxuô pênhr jos chiê uô cov tâu cêr vax tsêr cxuô zav lơưr Đề án tưz tâu Ủy ban tỉnh tso tơưv, taz por cxix cxuô, siz txuôk tâu đros têx xar thiêz thax tsav qơư. Tsêx trung chox kriê huôv tsar uô nox, phuôx huiz têx hax huv jông ntơưv huyện, uô cov tâu thax tsav uô nox tsêx trung lox đar, taz por muôx txâuk hax huv trâu têx tsêr mêir thiêz muôs tơưv saz đrâuv têz qơưk. Zaz zâuv chor doanh nghiệp lox tuôx yưv pênhr trâu ntơưv thax tsav qơư; cêv kuôk, cxiv tsa thiêz muôz têx qơư công nghiệp lok uô hâux lưv, cxiv tsa tsêr mêir uô nox sâuv thax tsav chiê paz gra siêz đuô tsiv gri hax huv”.

Muôx tas nro cxiv luôs Chính trị đros uô thiêz muôx tâu têx tsưr ziv uô cxix cxuô, tsênhv tsênhz, huv đros zuôr zos kror paz trâu Quỳnh Nhai zos luz huyện uô tâu tiêr cxiv tsa jêx jok yiêz xuz thơưx ciês nhoz tỉnh Sơn La, zos gâuk li Nghị quyết Đại hội Đảng bộ tỉnh thiêz huyện, six cxiv 2020-2025 tưz tso tơưv. Đuô thiêz, zos paz uô hlôngr yiêz jông lok kông nuv, jêx jok, paz trâu tsôngv cxuô mênhx cxưx sâuv thax tsav muôx tâu luz nênhx jông đuô, xưk li tsaz yênhx tsưr ziv têz qơưk cxiv tsa jêx jok yiêz tsênhv sir jos ndar txos thiêz kriz uô nhiv no./.

(Lê Hạnh-Lik Thox cxêik nhênhv)

Cêr sik côngv tsôngv box thiêz tuz lênhv nhoz thax tsav ntus đriv

          Hnuz tưs, uô ntêx thâuv nox mor, cán bộ, tuz lênhv Zênhx pênhz phax trôngx đriv Nam Giang, tỉnh Quảng Nam cux bax iz suất mor muôx cxix cxuô greix njês, greix buô, jâuz thiêz cuô jâuz chiê gra muk trâu pos Hiên Nhia nhoz jos Đắc Ôốc, xã La Dê. Pos Nhia nhoz iz lênhs hâur luz tsêr đar 20 yiv ndis, zos ziv chuôz zis lok six txov nhêv. Đrâuv cxơưx pluôk nox niêx hnuz, têx hnuz xar txos tsiêz, têx tuz lênhv pênhz phax tsênhv muk paz qêz suô vax tsêr chiê paz pos tos Tsiêz yiêz. Pos Hiên Nhia puz pâuz, chor bộ đội lok six jông siêz, paz pos cxiv uô tsêr nhoz. Bộ đội li têx tsoz phưz, siêz jông co tưz paz chôngz lênhx lâuk nênhs tsi muôx qơư khov vav pov sor siêz đuô nhoz tox siêz ntus đriv. Tsiêz no, pos Hiên Nhia tsênhv tâu jênhv ntâu huv tsiêz thiêz tâu seiz njuôs moz tsi pôngz nhiêx txiêx thiêz: “Bộ đội paz ntâu zav, pluôs nox niêx hnuz, cur lok six uô tsâus ntâu, mor lok six kaz. Têx bộ đội tsoz phưz cur tưz tâu 5 shông ntâu lơưv, paz uô tsêr thiêz. Tsiêz cux yax six tuôx seiz cur. Uô tsâus têx cấp chinhr quyênx Đảng thiêz têz qơưk”

          Tsi taz cxơưx pluôk nox hâur niêx hnuz, Zênhx pênhz phax trôngx đriv Nam Giang tsênhv paz txưv cxur nox hâur yênhx hli trâu têx lâuk nênhs tsi muôx qơư khov vav, ziv chuôz zis txov nhêv. Sik côngv đros chính quyênx tiv phaz tsưr tsix cxiv tsa tsêr yiêz khơưk muôz trâu tsôngv box pluôs hâur six hơưv nox tsiêz. Khov co, tsôngv box mênhx cxưx nhoz thax tsav ntus đriv li luz nênhx hla đhâu têx phêv liv. Niêv lâuk Lăng Thị Hề, xã La Dê, huyện Nam Giang nhiv kruôr tâu paz nhiêx txiêx cxiv tsa tsêr nhoz puz pâuz: “Thâuv ntêx chuôz zis lok six txov nhêv, nhiv no tâu zênhx pênhz phax paz txưv uô tsêr mak jông đuô, shông no nox tsiêz lov jêv. Nhiv no, tsuôk cxơưx huôv tsar cêr uô nox. Zênhx pênhz phax tsov cưv khơưk muôz cxur nox thiêz zav nox chiê pêz tâu nox tsiêz”

          Trung tá Zơ Râm Thức, Bí thư Đảng ủy, chính trị viên Zênhx pênhz phax trôngx đriv Nam Giang, tỉnh Quảng Nam puz pâuz: Cán bộ, chiến sĩ pênhz phax tsênhv yax six muk seiz njuôs đas jos thiêz khơưk muôz huv trâu têx ziv chuôz zis pluôs, nênhs lâuk tsi muôx qơư khov vav hâur ntu zuôr txos tsiêz, gôngr phênhv chuôz cxaz cêr sik côngv jông hâur pox nhuôs thax tsav ntus đriv thiêz chiến sĩ pênhz phax, hâux lưv uô txơưv mê taz sik paz lok six ntâu trâu cêr sik côngv siêz jông: “Txix pox nhuôs li luz nênhx tsênhv yuôr ntâu phêv liv, zênhx pênhz phax tưz uô jông vênhv thix nox nhoz xã hội. Têx hnuz tsiêz, hnuz ntênhs puôr lênhx muk seiz nus têx chuôz zis tâu sơưv cêr chei, hâur hâux lưv tsoz phưz nênhs lâuk tsi muôx qơư khov vav, nênhs pluôs. Muôx têx lênhx niêv mak pêz tsoz phưz pluôs nox hâur niêx hnuz, muôx têx lênhx mak pêz paz txưv cxur. Phênhv paz txưv phênhv ntâu zos cán bộ chiến sĩ chiv chir gôngr paz, tso pov bộ đội thiêz tsôngv box li cêr sik côngv siêz jông nhoz thax tsav ntus đriv”.

          Tsiêz shông no, Bộ đội pênhz phax tỉnh Quảng nam tsưr tsix khơưk muôz yênhx cxênhz phênhv huv trâu tsôngv box pluôs, chuôz zis tâu sơưv cêr chei thiêz shux xênhz muôx luz nênhx txov nhêv nhoz têx huyện tox siêz, tas nro tsiv grê zuôr xar 1 tỷ đeiv. Nhoz têx zênhx pênhz phax nhoz sâuv ntus đriv cux tsưr tsix Tsaz yênhx “Cheix ntux yiêz pênhz phax-sor siêz tsôngv box jêx jos” đros ntâu huôx tôngv vênhx huôv, vênhx ziv, thik krơr nduôr txôngv puôz, seiz njuôs moz thiêz muôz yuôx tsi zuôr nhiêx txiêx trâu tsôngv box pluôs. Đại tá Hoàng Văn Mẫn, Chính ủy, Bộ chỉ huy Bộ đội pênhz phax tỉnh Quảng Nam puz pâuz: “Đrâuv jênhv vưv coar lyk por vêv truôx tul tsưr qênhx txiv ngaz ntus đriv, hâur ntu txos tsiêz pêz thâuv tưs cux tsov cưv sik côngv đros tiv phaz chiê paz tsôngv box muôx iz luz tsiêz sor si, cxix cxuô. Tsaz yênhx “Cheix ntux yiêz pênhz phax-sor siêz tsôngv box jêx jos” ntâu phênhv huv paz tsôngv box pluôs nhoz ntus đriv chiê lơưr muôx luz tsiêz tsâu sor. Đros cán bộ chiến sĩ bộ đội pênhz phax uô jênhv vưv, tsi tâu muk tsêr nox tsiêz, đros pox nhuôs ntus đriv nox tsiêz mak lơưr cux pov lok six sor siêz, shir phaz”./.

(VOVMT-Txâur Vax cxeik nhênhv)