Cêr txuôk txox cêr lox 163 muk lol hâur tỉnh trâu cêr muk chênhr Nội Bài-Lào Cai uô 2 jiês cux uô tsi tiêr: Tsôngv pêx xênhv cxơưx lok tsưr ziv uô dưv anr

Trơưk li têx chuôz zis pêx xênhv no, uô ntêx thâuv tsi tâu krêz côngz cxiv uô dưv anr txox cêr 163 txuôk cêr muk chênhr Nội Bài-Lào Cai mak lơưr têx vax tsêr, yar tiêx lơưr nhoz siêz đuô cêr txix zuôr xar iz thiêr txos xar muôx 2 thiêr thiêz nhoz jê ntus cêr lox 166. Pêv kâuv tsêr zos trôngz siêz, thâuv tưs lok nas hloz, chor đêx nas ntưk lol lok six lox, taz sik viv têx vax tsêr nhoz siêz đuô cêr, tas nro têx đêx cux ntưk tâus cêr xưz, vax tsêr thiêz côngz trênhx uz no tsi trâus ngaz. Pos Đỗ Khánh Vân, nhoz hâur jok heik qis yưr li no: Thâuv muôx tsaz yênhx krêz uô đar, kho đuô txox cêr mak cêr yiêz njuôk xav đhâu uô tiêr zuôr xưk li iz tus njưs tar đêx muk đhâu têx vax tsêr, tsi tiêk uô ruôr hiêv, tsi jông txos xênhz huôx, tsênhv zôngx ziv uô đêx ngaz:“Thâuv ntêx mak tsêr siêz đuô cêr, tas nro pêz têx côngz trênhx uz no puôr lênhx siêz đuô hur si, taz sik nhiv no pêz têx vax tsêr kis đuô cêr mak zuôr uô tsi jông, ruôr hiêv txos cxuô zav côngz trênhx. Txix thâuv co txos nhiv no, iz hnuz nhiêk heik txơưr nhiêk tsi siz thôngx, mak pêz cux tsi pâuz uô trơưk faz tsưr ziv tưs. Quyết định lok lơưr cux tsi nhênhv, tsi heik mênhx trâu pêx xênhv pâuz hlo, shor fuô uô li chas”.

Cux trơưk li pêx xênhv nhoz no, lơưr tâu pâuz dưv anr thâuv fuô uô zuôr muôx nhiêx txiêx paz têx chuôz zis nhoz kis đuô cêr. Hôiv đôngx pâux nzir cux heik li no trâu têx chuôz zis hur si, taz sik tsuôk zos lo luk heik xưz tsi tâu fuô uô. Chênhr viv li, thâuv taz viv cxiv tsa uô jê txos zuk têx vax tsêr, ntâu chuôz zis tưz tsi thôngx ziv thiêz heik, tsuv chiê cêr muk li kuz xưz, tok cxuô cấp, ngênhx sêz lơưr têz li chas mav fuô uô. Chênhr zos li heik co, uô tuôr thênhv ntêr txos luôs hâux lưv cxiv uô txox cêr ntơư. Pos Nguyễn Thị Thương, hlôngr njêx muôs iz chuôz zis pêx xênhv heik pâuz: Thâuv ntêx mak hnor heik li no, tov kaz ntơư ho heik txơưr tsi thôngx li co, taz sik tsi heik trâu pêx xênhv pâuz tsênhz. Iz jiês pov canr bôv tuôx njuôk hov đuô, lơưr heik txơưr thiêz, tsôngv pêx xênhv tsi pâuz cơ quan muôx vax huôv zuôr uô trơưk faz tsưr ziv tưs, paz li chas, pâux nzir bâuv tưs viv li tsi tâu thôngx ziv:“Pêz tsi tâu heik pâuz zos viv li chas hlôngr ntâu tsưr ziv li ntơư, thiêz pêz tsi pâuz shor têx jiês njuôk hov ntơư pok tsênhz mênhx lok tsi tsênhz? Chor canr bôv têx tsưr ziv uô trâu pêx xênhv tsi to tâuz, tsi pâuz mênhx”.

Txos hnuz xiêz 10/4/2025, tưz muôx 8 hâur 13 chuôz zis pêx xênhv jok Hạnh Phúc trâus uô ruôr hiêv viv dưv anr, tâu hu muk trâu Ủy ban xã Y Can chiê cir ntơưr, gra nhiêx paz. Taz sik, tiv chor nhiêx paz ntơư tsi siz bâus pir li têx chuôz zênhx trâus ruôr hiêv mak thâuv ntêx tsưr chuôz zis đros Hôiv đôngx pâux nzir tưz qênhz shuôs, viv li lơưr tsi jông siêz cir ntơưr, gra nhiêx thiêz heik cov qênhz shuôs đuô chuôz zis têx trâus ruôr hiêv chiê pâux nzir huv đros. Đhâu ntơư, tưz muôx taz viv tuôx njuôk shuôs đuô, taz iz jiês njuôk nưk ho txơưr nưk tsi siz thôngx. Pos Bùi Thị Hoa, nhoz jok Hạnh Phúc heik pâuz: hnuz 29/4, chor chuôz zis pêx xênhv hâur jok tror tâu canr bôv huyện hu muk cơưv chiê mnôngs heik pâuz lok phênhv pâux nzir tiv pêx xênhv têx vax tsêr jê ntus cêr kis đuô txox cêr, taz sik jiês no chor chuôz zis zuôr tâu paz ntơư lơưr muk tsi cxix, tsuôk muôx 5 chuôz zis xưz:“Hnuz xiêz 10/4 mak lơưr tiêk, cur chuôz zis tâu paz zuôr xar 164 tsov đeiv, taz sik tsênhv yuôr têx shôngz ntông, guôx tsiêx cxu, kror đêx tsi tâu krêz viv li lơưr thêv tsi txâuk, cur chuôz zis tsi cir ntơưr. Taz sik txos hnuz 29/4, lơưr ho tror heik pâuz tiêk, cur chuôz zis nhoz siêz đuô cêr 10 phênhz viv li tsi tâu paz lơưv thiêz. Nhiv no zos têz qơưk uô mak cux tsuv muôx ntâuz ntơưr hur si, uô siêz lok sik uô kis li chas pêz tsuv tâu pâuz txos, cux tsuv muôx ntâuz ntơưr trâu pêz”.

Uô hâux lưv đros chor tuz sâu xor xưv, zơưv Nguyễn Đức Mầu, Phưv Chủ tịch Ủy ban huyện Trấn Yên lênhk nhav, dưv anr co nhiv no tsênhv fuô uô kênhz, iz phênhv zos viv pâux nzir zuôr ar uô cêr. Têx tsưr ziv pâux nzir, paz max chor chuôz zis pêx xênhv trâus ruôr hiêv, iz jiês tsi thôngx li iz jiês zos viv hlôngr đuô lok sâuv tsưr ziv uô cêr. Cux lơưr zơưv Mầu, hâur ntu cxiv tsa thiêz tas nro đhâu thâuv uô tiêr dưv anr, huyện zuôr sox seiz njôngr, thôngz sâu chiê tror muôx tsưr ziv paz trâu chor chuôz zis pêx xênhv trâus uô ruôr hiêv.

Uô ntêx co VOV tưz xa mông, dưv anr cêr txuôk txox cêr lox 163 muk lol hâur tỉnh trâu cêr muk chênhr Nội Bài-Lào Cai nhoz dưv anr ntu cêr IC13 muk chênhr Nội Bài-Lào Cai tâu krêz côngz cxiv uô txix hli 12/2021, taz sik txos nhiv no, đhâu zuôr xar 4 shông cux uô tsi tâu tsi tiêr, uô tsi jông, ruôr hiêv lox txos tsôngv pêx xênhv ntơưv qơư luz nênhx. Lok têx li heik co, zơưv Nguyễn Đức Mầu, Phưv Chủ tịch Ủy ban huyện Trấn Yên heik pâuz têx qir tiv li no:“Xuz thơưx zos ntux txơưr txar phiv liv, zos lok nas mak zênhx uô tsi tâu đaz tsi hlo. Tiv 2, xưk li cur tưz heik, hâur ntu xuz thơưx thiêz ntu txuôk lơưr co mak zos njiz trâus phiv liv lok sâuv pâux nzir, sâu zuôr ar uô cêr uô tuôr thênhv txos. Ntu xuz thơưx mak uô tuôr thênhv, tsi jông txos tas nro têx hâux lưv cxiv kho dưv anr hur si”./.

Đinh Tuấn-Riê Lâux cxeik, nhênhv 

Côngz xưv qênhz yuôx, seiz car ciêz muôv muôs hax huv nhoz

 Sơn La tsuv uô cov huv đros

          Ciêz muôv muôs hax huv niêv đrôngs Sơn La đhâu têx hnuz lưx lươngv muôx txơưx jênhv tiv phaz phường Chiềng Cơi sik côngv qênhz yuôx thiêz pov muôx ntâu zav jâuz, kok, txir ntông muôx yuôx por vêv đrox tsuôk siêz đhâu phênhv cui tênhv, nênhs zuôr muôs cux txu grês pir đros têx hnuz tov ntêx. Niêv lâuk Quàng Thị Lan thiêz Hoàng Thị Bun nhoz xã Chiềng Ngân thiêz Hua La, TP Sơn La puz pâuz:“2,3 hnuz no jâuz muôs tsi tâu, chuôz zis cux chos tâu mê njik jâuz phênhv ntâu zos chiê nox, chor tsênhv yuôr mak chox muk muôs. Cux xar njôngr chiz coaz muôx txơưx jênhv qênhz yuôx, uô tsênhz mênhx chiê pêz tror tsêz chos thiêz muôv muôs hax huv”.

          “Cux xar njôngr chiz coaz muôx txơưx jênhv qênhz yuôx ntâu đuô, viv jâuz phênhv ntâu zos tsôngv box Sơn La chiv chir chos. Jâuz cux muôx lok six ntâu zav, tsi zos jâuz, kok tưs cux tsuôk yuôx por vêv đrox tsuôs”.

          Niêv lâuk Lan thiêz niêv lâuk Bun li siêz xar njôngr zos chiz coaz muôx txơưx jênhv tror uô tsênhz mênhx lok tsơưr lươngv taz por vêv xênhz zav nox đros tas nro têx zav jâuz, kok zos tsênhv tsênhz, viv tsi uô li mak nênhs sir zôngv zuôr tsi car zuôr tas nro têx jâuz, kok tâu muôs ntơưv ciêz. Niêv lâuk Nguyễn Thị Cúc, yax six zuôr jâuz chox muk muôs pheiz kênh:“Xor mông cux puz pâuz zos jâuz nhoz no muôx tsơưr tưx mak nênhs sir zôngv cux tsuv phênhz pêx tsơưr tưx zos tul tsi, txix kror tưs, nhoz yuôx tuô caz, qir zuôv lok sik yuôx tuô đrox...Sơưr đơưs cux tsi cxoz cxơưx, tsi car zuôr têx jâuz, kok txơưr uô zênhr shar txos niêv ciêz”.

          Lơưr trung tá Nguyễn Duy Tùng, Tsar công an phường Chiềng Cơi, TP Sơn La, đhâu njuôs siv têx hax huv jâuz, kok, txir ntông nhoz 11 yêz ô tô muôs jâuz ntơưv ciêz thâuv tas cik sơưr nzor hnuz xiêz 7/5 mak tsuôk muôx 1 yêz muôx txâuk têx ntâuz ntơưr côngz jênhv vêv xênhz taz por zav nox, muôx hâur pâus muôs hax huv. Têx yêz txơưr phênhv ntâu zos txix têx tỉnh tiêx đras thiêz iz cxiê xã nhoz huyện Mai Sơn, Sơn La. Hâur têx zav jâuz, kok, txir ntông đhâu qênhz yuôx muôx yuôx por vêv đrox tsuôs lok six siêz zos: tâuz tưs, điz, njik tâuz zax, jâuz njuôz, txir lưs kâuz...Đhâu qênhz yuôx, đoanx tưz tâu têx tsưr qơư muôs hax huv, tsưr yêz thiêz ziv chuôz zis muôv muôs sik côngv jông chiê uô hâux lưv:“Thâuv muk qênhz yuôx, phường cux nhênhv cuiz tênhv, thôngz pov thiêz puz pâuz lok hâux lưv qênhz yuôx no chiê taz por nênhs sir zôngv li đas jos thiêz chiê pox nhuôk tso siêz muôv muôs. Đhâu njuôs siv têx hax huv tưs tsi taz por mak sâu tsês thiêz muôz por tsês, pox nhuôk puôr lênhx thôngx ziv. Pox nhuôk cux heik tiêk txix thâuv ntêx txos nhiv no tsi tâu muôx taz viv tưs, đoanx tưs tuôx ntơưv ciêz uô hâux lưv lok taz por vêv xênhz zav nox viv li thâuv phường thôngz pov qênhz yuôx mak pêz lok six thôngx ziv”.

          Ciêz muôv muôs hax huv jos Mé Ban, TP Sơn La huôx tôngv zuôr xar 20 shông no, đros ntâu hax huv tâu muôs li zav nox, jâuz, kok, txir ntông. Tsôngv box tas nro TP Sơn La li têx pluôk nox taz por tsơưr lươngv lok sik tsi taz por phênhv ntâu zos khov txos têx hax huv tâu muôv muôs ntơưv luz ciêz no. Lơưr co, côngz xưv qênhz yuôx, seiz car ciêz đrôngs cux tsuv tâu sir jos uô jông. Nhiv no, tiv phaz tsênhv muôx lok six ntâu têx ciêz mê, qơư uô jâuz mor tập thể, tsêr cơưv ntơưr, qơư muôs zav nox hâuk....Zos tsi qênhz yuôx jông ntơưv ciêz đrôngs mak hâux lưv qênhz yuôx tov kaz zuôr njiz ntâu phêv liv, tiv zix zos zav nox tsi taz por zuôr uô zênhr shar txos nênhs sir zôngv li đas jos, lav phêv nhiêx txiêx xã hội./.

(Thanh Thủy-Txâur Vax cxeik nhênhv)