Huôv tsar chos txir nho Hạ đuz sâuv thax tsav Than Uyên

Tâu chos ntơưv chor liêx iz chiv nhoz xar Hua Nà, huyện Than Uyên (Lai Châu), vax txir nhoz Hạ đuz zos chor hluôk nênhs ntơưv thax tsav qơư uô tsưr tsênhv txos trâu ntu chor txir zuôr jông sâu đê muôs chiv xuz thơưx ciês. Tsik tâu muôx jiês tưs pêx xênhv nhoz ntơưv no xar tiêk zav tsoz chos no ho huôv tsar jông thiêz paz muôx tâu kinh têr siêz li no.

Niêv tix Chang Thị Nhung, mênhx cxưx Thái, nhoz jok Đán Đăm, xar Hua Nà, huyện Than Uyên hêik: đros chor liêx uô iz chiv ntơưv thax tsav qơư, txơưv pox nhuôs sir jos khưr uô nox luôx tưs lok cux tsuôk uô tâu iz chiv blêx, sâu tâu lok cux tsuôk txâuk nox xưz. Vax txir nho tưz tâu cơ quan uô hâux lưv huyện lok chos siv thiêz xav jênhv zos huv đros qiv hơưv, đêx ar ntơưv no. Txir kaz jiz, hâur thax tsav 1.000 thiêr ndis ar têz mak zuôr sâu tâu muôx 1,6 tấn txir thiêz njuôk xav gri muôs zuôr tâu muôx nhos 200 cxênhz đêiv iz cir:

“Đhâu tsưr ziv chos txir nhoz no cur pov lok six jông thiêz cur vav tiêk zuk chuôz zis zuôr tâu kruôz kriê chiê uô lơưr tsưr ziv no. Cur cux lok six vav tiêk zuôr tâu têz qơưk paz, tsov cưv txos thiêz kriz uô ntâu tsưr ziv chos têx zav tsoz chos txơưr li tsưr ziv no chiê paz trâu pox nhuôs huôv tsar kinh têr”.

Tiv chor ar uô kôngz nuv ntơưv thax tsav qơư muôx tsơưs, viv li ntâu shông lok no Hua Nà tưz xav jênhv zok nriêr zav tsoz chos yiêz chiê paz gra siêz tsiv gri kinh têr trâu pêx xênhv. Txix tỉnh, huyện têx tsưr ziv uô, txos nhiv no chính quyền ntơưv qơư tưz kriz uô chos ntâu zav tsoz chos sik txơưr muôx tsiv gri kinh têr siêz li: blêx Séng cù, điz bao tử, điz Hoàng kim, txir chuôz thox Hua Nà… paz trâu pox xênhv jux juk muôx nzir tâu phênhv sâu.

Pos Lê Thị Hạnh, Chủ tịch Ủy ban xar Hua Nà, huyện Than Uyên puz pâuz: Thax tsav qơư tsik xav jênhv huôv tsar chos iz zav tsoz chos mak zuôr cxiv tsa, huôv tsar zos thax tsav chos têx ntông nox txir muôx tsiv gri kinh têr siêz. Tsênhv tsênhz txix chor tsưr ziv chos têx zav ntông nox txir yiêz, pox nhuôs tưz kriz uô đêz đar thiêz huôv tsar zos yênhx têx zav tsoz chos thiêz hax huv kaz jông ntơưv thax tsav qơư li txir chuôz thox Hua Nà cux lok six nto bê. Tsưr ziv chos txir nho Hạ đuz cux tưz tâu chos trâu ntơưv thax tsav ar Hua Nà đros muôx 450 tsoz chos sâuv chor ar liêx iz chiv thiêz xuz thơưx cux tưz huôv tsar jông thiêz chor txir cux lok six kaz:

“No zos shông xuz thơưx ciês pêz sâu tâu chor txir nho Hạ đuz no. pêz cux pov tâu no zos kror tsưr ziv tax tâu kinh têr lok six siêz. Hâur ntu zuôr txos mak pêz cux muôx tsưr ziv zuôr kriz đar đuô thax tsav chos; đuô li cux kruôz kriê kỹ thuật trâu pox nhuôs sơưr đơưk cov sơưr đơưk kriz đar chos nzir”.

Đros tsưr ziv chos txir nho Hạ đuz, txos nhiv no sâuv thax tsav huyện Than Uyên, tỉnh Lai Châu tưz muôx yênhv châuv tsưr ziv chos, tu zus chor zav zuz nôngz tsoz chos tsiêx tu zus yiêz paz muôx tâu kinh têr siêz. Chor tsưr ziv no xuz thơưx kriz uô zos chor hluôk nênhs ntơưv thax tsav qơư uô tsưr li: tu zus njêl hâur vax thêir, chos txir chuôz thox, txir lưk jôngr, txir nho… Đhâu thâuv chor tsưr ziv no uô tâu jông, pox nhuôs ntơưv thax tsav qơư cux thôngx ziv đros, cơưv shâuv mak thiêx li zuôr kriz đar trâu chor chuôz zis chos thiêz uô trơưk. Txos nhiv no têx tsưr ziv uô nox puôr lênhx paz muôx hâux lưv uô thiêz phênhv sâu truôx tuk trâu yênhx puô lox tôngv zos nênhs nhoz ntơưv thax tsav qơư.

Tix lâus Đỗ Văn Tuấn, Phưv Bí Huyện Đoàn Than Uyên, tỉnh Lai Châu puz pâuz:

“Hâur ntu zuôr txos saz Huyện đoàn Than Uyên zuôr tror sik côngv truôx jông đros Ủy ban xar Hua Nà cux li têx taz viv txơưr chiê tror kriz đar đuô tsưr ziv chos chor txir nho Hạ đuz no. Đuô li, Huyện đoàn cux kriz uô chor tsưr ziv uô kôngz nuv công nghệ siêz txơưr đuô trâu chor hluôk nênhs hâur huyện chiê huôv tsar kinh têr; paz muôx hâux lưv uô trâu chor hluôk nênhs thiêz pêx xênhv sâuv thax tsav”.

Khov uô huv zos li kỹ thuật, li uô qơư thêir vor, cxiv luôs zưs đêx jông trâu yênhx tsoz chos, sêiz shuôk, tu jông hâur yênhx ntu huôv tsar… viv li chor txir nho huôv tsar jông, siz luôs. Đrâuv txir nho Hạ đuz, nhiv no ntơưv vax muôx 50 tsoz nho Mẫu Đơn thiêz nhoz Móng Tay tsênhv huôv tsar jông. Vax txir nhoz Hạ đuz tsênhv tâu kriz trôngx chiê sơưr đơưk tuôx ndis shuôk, nriêr pâuz, cê piêr pâuz lok têx hax huv, cê paz trâu tsôngv kruô hâur thiêz đrâuv tỉnh cux li pêx xênhv sâuv thax tsav tuôx ndis shuôk, uô si, cơưv shâuv chiê kriz đar uô thiêz chos nzir hâur ntu zuôr txos no./.

(Khắc Kiên-Lik Thox cxêik nhênhv)

Cao Bằng: Huiz tôngv pênhr jos chiê chor nênhs muôx côngz trâu têz qơưk muôx vax tsêr truôx nhoz

Shông no muôx 88 shông, pos Triệu Mùi Sai, nhoz jok Lũng Ỉn, xã Vũ Minh, huyện Nguyên Bình, tỉnh Cao Bằng nhiv kruôr muôx tâu iz luz tsêr khor truôx, tiêk zos zuk luz chiê đros luôs nhoz. Pos muôx 2 tus tuz taz sik 2 lênhx tuz ntơư puôr lênhx tâu tas siv nênhx hur si, hâur co tix lâus Đặng Văn Chuổng zos tuz lênhv tâu tas siv nênhx thâuv ntu tir ntâuk trol châuz tsưx phưv đriv têz faz Bắc hâur thax tsav Cao Bằng. Pos chor nxeik muôx kênh tus cux tâu tas siv nênhx, têx tus mak mul zuôr txir lơưr muôx lơưr chuôz zis nhoz đêz, luz nênhx cux txov viv li nhiv no pos Triệu Mùi Sai đros iz lênhx nhuôv xênhz nzưr hâur xã nhoz, lênhx nhuôv no luz nênhx cux txov nhêv. Tâu Cục Kỹ thuật Hải Quân paz 80 tsov đeiv nhiêx, hli 5 nhiv kruôr đhâu tưz qir cxiv uô pos luz tsêr thiêz zuôr sir jos uô cov tiêr lok hli 7 no:

“Zuk tsi muôx tsêr nhoz mak txov nhêv cơưk, thâuv ntêx cur cux uô tsêr nhoz tov, vor vuôk, ndêx ntông taz sik 2, 3 shông têx ndêx tsêr ho tsi khor, shôngz ntông tsi jông tas, tsi jông  nhoz lơưv.  Tov kaz no lênhx nhuôv xênhz nzưr cux đros kho đuô thiêx jông nhoz, iz jiês ntux lok nas đêx ho ntưk lol ntuz tsêr tas. Khov Đảng, têz qơưk, Cục Kỹ thuật Hải quân paz, cur li uô tâu luz tsêr lok nhoz gâuv nas gâuv yar li no, zos tsi li mak pos uô tsi tâu tsêr nhoz”.

Pos Sai luz tsêr tâu uô tiêr tsênhv khov muôx hâu nov xã, tsôngv cưr tix nênhx tsa sơưr đơưk hâur jok paz hnuz côngz thiêz. Pos Lương Thị Ngư, Phưv Chủ tịch Uỷ ban xã Vũ Minh, huyện Nguyên Bình, tỉnh Cao Bằng heik pâuz: Thâuv pos Sai luz tsêr uô tâu tiêr mak tas nro zuôr xar 40 chuôz zis muôx côngz têz qơưk hâur xã puôr lênhx tưz muôx tsêr khor truôx nhoz tas:

“Xã phênhv ntâu phênhv ntâu paz hnuz côngz, iz zav li paz hnuz côngz fax thâux têx chuôz laov, chuôz zênhx uz no. Tiv xã tsênhv txov nhêv viv li hu zâuv sơưr đơưk sik đros paz nhiêx txiêx cux lok six phiv liv, taz sik têx shông đhâu, khov muôx cêr sik thôngx siêz, siz hluz siz paz, hâu nov, tsôngv pêx xênhv sik paz hnuz côngz, paz zuz nôngz tsoz chos, qir zuôv huôv tsar uô nox, tsi chiê têx chuôz zis muôx côngz têz qơưk trâul txov. Chuôz zis tưs muôx lênhx nênhs moz, pêz huiz tôngv cơ quan, đoanx thêv li: Hluôk nênhs, chor bôv đôiv lâul, pox niêv vir ndâuk….tuôx paz chiê lơưr têx kôngz uô tâu ndar cheix chiv, lơưr chuôs sơưr đơưk”.

Đros trâu têx cêr shir phaz li pos Triệu Mùi Sai, zuôr xar 10 shông đhâu, 9.300 ntâu chuôz zis zos têx lênhx nênhs muôx côngz têz qơưk, chor tuz lênhv tâu tas siv nênhx thâuv ntu tir ntâuk trol châuz li nênhs hâur tsêr, têx lênhx tuz lênhv trâul moz trâul saz thâuv ntu têz qơưk tsi tâu tiêx tuk….., txov nhêv lok tsêr nhoz tưz tâu paz max uô tsêr lok sik cxiv kho têx vax tsêr cov khor truôx, tsi trâul uô nênhx nhoz hâur têx luz tsêr đaz tuôs, kâus kêz jik. Iz chas co, yênhx puô luz tsêr niêv côngv siêz, cux tưz tâu Uỷ ban MTTQ VN cxuô cấp, têx hội đoanx thêv, nênhs siêz jông, lar heik zos Hôiv bôv đôiv lâul Cao Bằng hu lơưk sơưr đơưk sik đros paz cxiv tsa. Iz chas paz max nhiêx txiêx, cxuô thax tsav qơư, tsưr tsix đoanx thêv tưz muôx têx nuv uô paz tsênhv tênhz li: Paz hnuz côngz, paz chuôz laov cxiv uô vax tsêr…chiê txo grêk tsơưs nhiêx txiêx zuôr têx chuôz zênhx, suôz jêz, shôngz ntông….uô vax tsêr. Pos Hoàng Thị Mỹ Hảo, Giám đốc Sở Lox tôngv, Xaz pênhz thiêz xã hội Cao Bằng heik pâuz: Đhâu qênhz shuôs, tas nro tỉnh yuôr 279 chuôz zis muôx côngz têz qơưk txov nhêv lok tsêr nhoz, phênhv ntâu zos têx lênhx nhiv kruôr trâul txov tsi ntêr no:

“Tỉnh li tsưr ziv zos txix nhiv no txos tas shông 2023, zuôr cxuôv cov tas têx tsêr đaz tuôs, lav uô lav nhoz hâur thax tsav tỉnh, hâur co tsov cưv uô ntêx trâu têx chuôz zis, lênhx nênhs muôx côngz têz qơưk. Txơưv tỉnh txov nhêv lok hinh tế, xã hội, taz sik tỉnh tsưr ziv co zos tsuv uô ntêx hlo, zuôr trâul txoz cxơưx chiê têx chuôz zis muôx côngz têz qơưk muôx luz nênhx jông đuô, tsâu sor xưv luôs lưv tus hâur thax tsav qơư”.

Shông 2021, Thủ tướng Chính phủ tưz xeir Cao Bằng chiê uô siv luôs hâux lưv cxuôv têx tsêr đaz tuôs lav uô lav nhoz. Iz chas T.Ư têx nhiêx txiêx muôz, ntâu cơ quan, đoanx thêv thiêz chor nênhs siêz jông têx sik đros paz, hâu nov thiêz  tsôngv pêx xênhv tỉnh Cao Bằng puôr lênhx sir jos cov txos shông 2023, tas nro chor nênhs muôx côngz têz qơưk puôr lênhx muôx qơư nhoz truôx. No cux zos hâux lưv uô tsênhv tsênhz heik lol cêr sik thôngx siêz thiêz nênhs Việt Nam cêr uô nênhx jông ndo txos chor lâul li côngz txiêx njis lox./.

(VOVĐB-Riê Lâux cxeik, nhênhv)