Seiz car jông niêv ciêz nhoz tox siêz Sơn La hâur kaz shôngk shông

Hâur têx hnuz kaz shôngk shông, hâux lưv muôv muôs, thâux xa hax huv ntơưv huyện tox siêz Thuận Châu thiêz thax tsav huyện muôx niêv pas đêx Quỳnh Nhai muôx chôngz lênhx tuz luôv sâu zuôr hax huv phưx vưv Tsiêz 2023.

          Tâu Tuêv seiz car niêv ciêz số 5, Cục seiz car niêv ciêz tỉnh Sơn La yax kriê, phênhv ntâu têx tuz luôv puôr lênhx uô hâux lưv muôv muôs lơưr chêi têz qơưs li cui tênhv; cxuô zav hax huv tsik tâu tas hax sir zôngv, muôx ntâuz ntơưr zuôr muôs, heik kriê tsênhz mênhx qơư tsiv uô. Niêv lâuk Vũ Thị Hương, tsưr qơư muôv muôs hax huv Hương Vững nhoz tiểu khu 2, thị trấn Thuận Châu, huyện Thuận Châu pheiz kênh: “Tsiêz shông no tsôngv kruô li zoz qơưx chuôz ndê siêz, cur zuôr hax huv cux ntâu chiê muôs; ntâu qơư cungz hax huv cux tuôx heik zuk zuôr chiê muôs; taz sik cur cux tsuv xeir têx qơư muôs hax huv tsơưr lươngv lok sik têx công ty, taz viv taz por lok tsơưr lươngv hax huv chiê muôs”

          Đhâu hâux lưv qênhz yuôx, yưr lir uô cxâuv, txix hâur shôngk shông txos nhiv no, Tuêv seiz car niêv ciêz số 5 tưz qênhz yuôx 220 ntâu txuz, yưr lir 160 ntâu txuz, tas nro nhiêx txiêx bluô, viv uô cxâuv cêr chei zos 480 tsov đeiv. Zơưv Đào Vũ Hoàng, Phưv Tuêv tsar Tuêv seiz car niêv ciêz số 5, Cục coar lik niêv ciêz tỉnh Sơn La puz pâuz: Têx zav hax huv chuôr, hax huv tsi txâuk tsơưr lươngv khênhr nhiês muôv muôs hâur ntu no zos: Zênhz gaz ntơưr, trik yo, chơưr, fov ntơưr, thax nduôr, yuôx plênhr jông gâux…đros ntâu tsưr ziv nhiês muôv muôs chiê jeik tsi chiê têx lưx lươngv pâuz: “Thax tsav Thuận Châu muôx 29 xã, 1 thị trấn, hâur co muôx 6 xã tox siêz txov nhêv tiv zix, chiê phưx vưv pox nhuôs nhoz têx xã tox siêz, tuêv seiz car niêv ciêz số 5 tưz chuôz tsar côngz xưv qênhz yuôx, yưr lir têx hâux lưv uô cxâuv lok zuôr muôs hax huv chuôr sâuv niêv ciêz thiêz muôx têx xor mông hêik lok têx lênhx nênhs fêv nhiês muôv muôs hax huv chuôr li huôx tôngv chiê yax mông trâu pox nhuôk, paz pox nhuôk nox iz luz tsiêz taz por, sor si, lov jêv”

          Hâur jiês muk qênhz yuôx, seiz car phax tar nhiês muôv muôs hax huv chuôr hâur ntu zuôr txos tsiêz thiêz đhâu nox tsiêz tas, Cục coar lik niêv ciêz tỉnh Sơn La chuôz tsar sik côngv đros têx lưx lươngv muôx txơưx jênhv hâur côngz xưv qênhz yuôx, seiz car niêv ciêz, pov, yưr lir txos qơư têx lênhx nênhs nhiês muôv muôs hax huv trâus txưr, hax huv chuôr, hax huv tsi txâuk tsơưr lươngv…

          Zơưv Nguyễn Viết Thông, Phưv Cục tsar Cục seiz car niêv ciêz tỉnh Sơn La puz pâuz: Krêz uô luôs hâux lưv qênhz yuôx txix hnuz 15/11, đhâu 2 ciêz, Cục seiz car niêv ciêz tưz qênhz yuôx zuôr xar 100 txuz, yưr lir 60 ntâu txuz uô cxâuv, tas nro nhiêx txiêx xưv bluô zos 500 tsov đeiv ntâu; đros co tưz tso tơưv Công văn số 557, lok hâux lưv chuôz tsar qênhz yuôx têx qơư muôv muôs nhoz tox siêz, ciêz đrôngs, gôngr phênhv paz tsôngv box tos iz luz tsiêz shir phaz lul. “Cục seiz car niêv ciêz tưz chuôz tsar muk qênhz yuôx, yưr lir têx hâux lưv uô cxâuv li thâux gra muôv muôs fov ntơưr cxuô zav; tsưr tsix seiz car jông hâux lưv muôv muôs trox yêz, tsi chiê muôx yưv hâux lưv chuôz ndê gri, khơưk tsês trox tos thâuv tưs ndê gri mav li muôs, chiê gôngr phênhv taz por niêv ciêz phưx vưv tsiêz trâu tsôngv box, tiv zix zos tsôngv box nhoz tox siêz” 

          Đros têx lưx lươngv muôx txơưx jênhv li sir jos uô, côngz xưv phax tar nhiês muôv muôs hax huv chuôr, hax huv tsi txâuk tsơưr lươngv tưz muôx ntâu hlôngr yiêz jông; taz sik txos nhiv no hâux lưv qênhx shênhx cux tsi tâu tir thêir tâu truôx jông. Têx luz hlik kaz shôngk shông thiêz ntu zuôr txos tsiêz 2023, huôx tôngv muôv muôs hax huv chuôr zuôr ziv muôx ntâu, njuôs xav grê hax huv trâus chuôz ndê siêz, zuôr trâus têx hax huv tsi pâuz tsênhz qơư tsiv uô…

          Nênhs sir zôngv cux tsuv muôz siêz jênhv pâuz hâur hâux lưv chiv chir por vêv thiêz uô trơưk cêr chei thâuv zuôr muôs hax huv, tir thêir cov tâu têx nênhs fêv muôv muôs hax huv trâus txưr, hax huv chuôr, paz phênhv ngaz tul niêv ciêz./.

(Trấn Long-Txâur Vax cxeik nhênhv)

Lênhx nênhs xar tơưv uô cxuô zav paz trâu pêx xênhv nhoz tox siêz

Muôx 89 shông-zos hnuz nhôngs mak cxuô lênhx nênhs tưz zênhx puôr lênhx nhoz so trâu zar lâul lơưv, sik zơưv Vũ Hữu Lê cux tsênhv yênhz hnuz, yênhx six hơưv sir jos uô têx zav mêir, chuôz zênhx zuk xar tơưv tâu chiê phưx vưv trâu pox nhuôs hâur uô nox, uô kôngz jôngr nuv… Zơưv Lê thâuv ntêx no zos Giám đốc Công ty cơ khí tỉnh Yên Bái, txos shông 1990 tâu têz qơưk chiê so lâul.

Đros siêz xar tiêk tsênhv muôx đas jos mak tsênhv zuôr sir jos uô lox tôngv chiê huôv tsar kinh têr chuôz zis thiêz paz trâu xar hôiv, đhâu iz ntu sir jos uô ntâu kror hâux lưv thiêz nhênhz chơưv, tsês chiê nhiêx txiêx, shông 1997, zơưv Lê Cuêz tênhv yênhx lix Công ty TNHH Cơ khí thiêz cxiv tsa lôngx đhok Hồng Hà, uô têx zav mêir phưx vưv hâux lưv uô kôngz jôngr nuv: “Cur piz txix lênhx pêx xênhv viv li pâuz tâu tsênhz txos pêx xênhv têx cêr khưr. Viv li thâuv uô muôs trâu uô kôngz nuv, pêx xênhv thiêz jêx jok mak cur uô lơưr tsưr ziv: gri muôs kik, khor truôx jông, zôngx ziv sir zôngv, zôngx ziv kho, thôngx cxix muôx têx paz thiêz co zos chiê pox nhuôs max mav thêv jux juk viv pox nhuôs tsik muôx nhiêx, tsênhv txov nhêv lok ntâu kror”.

20 ntâu shông đhâu, yênhx puô zav mêir phưx vưv trâu uô kôngz jôngr nuv tưz tâu zơưv Lê thiêz chor nênhs đros uô hâux lưv kriz uô, tâu Cục Sở hữu trí tuệ, Bôv Khoa học-Công nghệ cungz qênhx uô, li: mêir uô yuôx zêx, mêir uô cuô car zâux cuêv fix, mêir uô cuz thaz kruôr, kror kra kôngz nuv… tưz tsik zos tâu pêx xênhv hâur thiêz đrâuv tỉnh Yên Bái zuôr ntâu tiv gri muôs kik, khor jông, zôngx ziv sir zôngv, zôngx ziv kho, cxuô zav mêir zơưv Lê uô tâu co tsênhv tâu muôs muk trâu saz têz qơưk Lào. Đros chor nênhs njiz cêr txov lok nhiêx txiêx, zơưv Lê tsênhv muôs lơưr tsưr ziv chiê pêx xênhv thêv jux juk thiêz tsik zuôr nhiêx liv. 

Hâur oz shông muôx caz moz Covid-19 phiv liv, ntâu công ty, qơư uô tsuv cơưv kror trôngx taz sik đros zuk suôz bê, zơưv Vũ Hữu Lê luz công ty cux uô tsik tas têx hâux lưv hlo; taz por muôx hâux lưv uô trâu zuôr xar 30 canr bôv, công nhân viên đros phênhv sâu txix 7-10 triệu đêiv iz lênhx nênhs iz hli. Tix lâus Bùi Quang Biên, công nhân công ty puz pâuz: “Zơưv Lê lok six sir jos, hêik thiêz paz trâu sơưr đơưk chiê sơưr đơưk sir jos khưr uô nox chiê paz thơưz huôv tsar thiêz kruôz kriê sơưr đơưk uô hâux lưv cov txos qơư chiê uô chak cov uô tâu têx hâux lưv siêz tiv zix”.

Txix zuk li têx gôngr côngv, zơưv Vũ Hữu Lê tưz tâu Trung ương khơưk muôz ntâuz ntơưr kruôk, khơưk kruôk lok xar tơưv khoa học công nghệ; ntâu shông zơưv tax tâu giải iz Giải khơưk kruôk Khoa học xar tơưv zos tỉnh Yên Bái tsưr tsix. Shông 2021, công ty TNHH Cơ khí thiêz lôngx đhok Hồng Hà tưz txêik tâu qix sik tưr trâu taz viv uô tâu hâux phongz yaox uô tâu hâux lưv jông hâur zos Chinhr phuv khơưk kruôk; zơưv Vũ Hữu Lê tâu Chủ tịch têz qơưk khơưk muôz Huân chương Lox tôngv hov 2. Hêik lok zơưv Vũ Hữu Lê, zơưv Võ Thiện Cảm, Phưv Bí thư Đảng ủy phường Nam Cường, thành phố Yên Bái puz pâuz: “Zơưv Vũ Hữu Lê zos iz lênhx nênhs lâul lok six sir jos khưr uô nox. Zơưv chor hax huv tưz tâu cxuô cấp, cxuô nganhx ntâuk gri siêz. Đros sir jos uô lox tôngv, cơưv shâuv thiêz uô lơưr zơưv hloz Hôx li cêr uô nênhx jông, zơưv zos lênhx nênhs uô ntêx hlo hâur Đảng bôv, chinhr quyền thiêz pêx xênhv ntơưv thax tsav qơư”.

Zơưv Vũ Hữu Lê phêiz kênh, tsênhv yuôr đas jos mak zơưv tsênhv zuôr sir jos uô, tror nriêr pâuz, xar tơưv uô têx zav mêir chiê paz trâu pêx xênhv hâur uô nox thiêz gra siêz phênhv sâu; paz trâu kinh têr ntơưv thax tsav qơư huôv tsar./.                           

(Đinh Tuấn-Lik Thox cxêik nhênhv)