Hâux lưv nriêr têx liệt sĩ li poz cxa nhoz tox siêz ntus đriv

          Txix sâuv trôngz siêz njiê trâu saz hâur, sâuv njik trôngz 350B, xã Bát Xát, tỉnh Lào Cai hnuz no pov trôngz jôngr njuôz jông. Muôx tsi ntâu lênhx nênhs pâuz tiêk, thax tsav qơư no muôx ntu zos qơư tsav txênhz zov chênhr hâur jiês tsav txênhz por vêv ntus đriv faz Bắc. Zuôr xar 50 shông đhâu, ntâu cán bộ, chiến sĩ tâu tas siv nênhx viv por vêv ntus đriv têz qơưk tsênhv tâu phâuk ntơưv no mak tsi tâu tâu nriêr tâu.

          Hâur têx thax tsav jôngr, txơưv cheix ntux sor yar ntux cuz sor thiêz lok six vâuv, taz sik yênhx lênhx cán bộ, chiến sĩ tsênhv max mav nriêr hâur yênhx pơưs ar têx liệt sĩ li poz cxa, yênhx chuôz zênhx tsênhv yuôr. Muôx têx qơư, nhiv kruôr khơưz tưz njiz trâus têx poz jêz lox thiêz tơưr; muôx têx qơư jôngr ntông thiêz têx hmaz chaz lok six ntâu, tsuv luôx tas thiêx xav tênhv tâu têx qơư zuôr trâus nriêr. Đhâu ntâu hnuz truôx siêz uô hâux lưv nriêr zok, Tuêv nriêr liệt sĩ li têx poz cxa Bộ chỉ huiz quân sự tỉnh Lào Cai tưz nriêr tâu 9 liệt sĩ li poz cxa sâuv njik trôngz 350B, nhoz jos Đồng Quân, xã Bát Xát. Đại tá Hoàng Văn Toàn, Phưv chính trị Bộ chỉ huiz quân sự tỉnh Lào Cai puz pâuz:

          “ Thax tsav Lào Cai ar nxaz, qiv hơưv txơưr txar ntâu, yax six muôx têx jiês đêx cuôr yôngz, tox poz. Ntâu luz nza lơưr xor mông njuôs xav cux trâus đêx cuôr yôngz, viv li hâux lưv nriêr njiz lok six ntâu phêv liv”.

          Tsi taz nhoz tox siêz ntus đriv Lào Cai, sâuv njik trôngz 685, xã Thanh Thủy, tỉnh Tuyên Quang, hâux lưv nriêr têx liệt sĩ li poz cxa cux tâu sir jos uô.

          Chiê tuôx tâu ntơưv thax tsav qơư muôx xor mông têx liệt sĩ li poz cxa, têx cán bộ, chiến sĩ tsuv muk đhâu iz tsas tsuô lok six riêz nênhs. Muôx têx ntu cêr tsuôk txâuk tso iz cxeik tơư. Thâuv pov muôx têx qơư thâuv ntêx trâus fov tuô, njuôs xav têx liệt sĩ tâu phâuk ntơưv no, têx tuêv côngz xưv ho zôngv meir yâu poz jêz, xà beng, tsông yênhx luz poz jêz lox đhâu co max mav nriêr hâur têx poz jêz, ar co. Muôx têx ntâu tsuv pôngz ntâu hnuz thiêx yưr lir tâu têx poz jêz, ar chiê nriêr. Muôx têx qơư nhiv kruôr khơưz tưz njiz trâus têx luz poz jêz lox viv li tsuv hlôngr tsưr ziv uô. Tsi taz li ntơưv, yar ntux cuz sor cux zos iz phêv liv. Muôx têx thâuv mak ho njiz ntux lok nas lox uô trâu hâux lưv nriêr liệt sĩ têx poz cxa ziv phêv liv đuô. Txơưv phêv liv li ntơưv, taz sik têx tuêv côngz xưv cux truôx siêz uô zuk li jênhv vưv tâu choz.

          Hâur đraz hli 6 nhiv kruôr đhâu, têx poz cxa liệt sĩ xuz thơưx tưz tâu nriêr pov sâuv njik trôngz 685. Thượng tá Nguyễn Hữu Tiệp, Phưv tuêv tsar Tuêv nriêr zok poz cxa liệt si, Bộ chỉ huy quân sự tỉnh Tuyên Quang puz pâuz:

          “ Nhiv no sâuv njik trôngz 685 tsênhv muôx xor mông lok iz kror tsuô nhoz E2, pêz tsênhv tsưr tsix tuô poz jêz krêz cêr muk nriêr lơưr xor mông txix têx bộ đội lâuk heik kriê. Têx thax tsav txơưr tror tâu qênhz shuôk đros tsưr ziv khơưz txos tưs nriêr txos co chiê chox tâu têx poz cxa liệt sĩ lok kuz têz kuz qơư, lok trâu chuôz zis”.

          Tsi taz krêz đar thax tsav qơư nriêr, têx lưx lươngv tsênhv tror thôngz sâu xor mông txix têx bộ đội lâuk, tsôngv px thiêz ntâuz ntơưr tsês chiê; seiz yênhx thax tsav qơư, yênhx luz kror tsuô, yênhx kror bôngk chiê truôx siêz nriêr têx liệt sĩ li poz cxa. Txix têx thax tsav nhoz siêz ntus đriv Lào Cai, Tuyên Quang txos têx thax tsav nhoz Quân khu 2, yênhx xor mông tâu xav tênhv, yênhx yiv ndis ar tâu seiz shuôk chiê nriêr zok.

          Txos nhiv no, chiến dịch 500 hnuz hmo cxơưz tiês nriêr thiêz xav tênhv xor mông poz cxa liệt sĩ sâuv thax tsav Quân khu 2 tưz nriêr tâu 68 luz nza đros 84 lênhx liệt sĩ li poz cxa; tsưr tsix shov thiêz phâuk 56 poz cxa liệt sĩ ntơưv têx qơư nza liệt sĩ; thôngx cxix muôz mẫu ADN 4 cxênhz 200 hâur tas nro 11 cxênhz 266 luz nza liệt sĩ chiê njuôs siv, hâur co têx tỉnh Tuyên Quang, Lai Châu thiêz Sơn La tưz uô tiêr hâux lưv muôz mẫu ADN.

          Sik côngv đros lưx lươngv uô jênhv vưv, đại tá Khổng Đình Tám, Chủ nhiệm Chính trị quân khu 2 ntâu jiês heik mênhx chiến dịch no li kror coaz tsôngv:

          “ Đros siêz sir jos siêz tiv zix, đros txơưx jênhv, jênhv vưv tâu choz, xar njôngr têx đồng chí sir jos hâur yênhx hnuz, yênhx six hơưv, txơưv yar ntux lok sik lok nas cux truôx siêz nriêr ntơưv tas nro têx thax tsav tưz xav tênhv muôx têx bộ đội tâu tas siv nênhx chiê chox têx liệt sĩ co tror lok kuz têz kuz qơư, lok đros lơưr li nênhs cxênhz jê”./.

(Trịnh Xuân-Txâur Vax cxeik nhênhv)

Njưs tar đêx Sabo Nặm Păm paz phax tir thêir nzir nas lox, đêx huôv hloz ntơưv tox siêz Sơn La

Nặm Păm zos thax tsav tưz muôx jiês trâus đêx nas uô ruôr hiêv hnhar hâur coz nas lox hli 8/2017, muôx 11 lênhx nênhs trâus tuôs, pôngz plox mông, yênhx puô luz tsêr trâus đêx nas cuôr yôngz.

Thax tsav qơư nxaz, lok nas lox đros trâu ntâu ar, poz jêz cuôr yôngz pêv hâur lok uô thax tsav no thâuv tưs tưz zôngx ziv trâus đêx cuôr yôngz, tox xưz poz.

Txix têx li heik ntơư, njưs tar đêx Sabo xuz thơưx ntơưv Việt Nam tâu cxiv puôz sâuv tuk đêx Nặm Păm nhoz Dưv anr “Phax tir thêir, txo grêk tsơưs têx tsi jông tiv đêx nas cuôr  yôngz thiêz tox xưz poz ntơưv thax tsav tox siêz faz Bắc”, sir zôngv Chính phủ Nhật Bản pênhr ODA tsi zuôr pâux nzir thôngz đhâu Cơ quan hux jos ntiêx têz Nhật Bản (JICA).

Côngz trênhx tâu qir cxiv uô txix hli 9/2024 thiêz uô tiêr lok hli 4/2025. Njưs tar đêx tâu nhênhz chơưv cxiv uô trơưk Nhật Bản cui tinhv, ntêr 61 thiêr, njưs siêz 9 thiêr, đar 3 thiêr; muôx 6 qơư tso đêx ntưk đhâu. Đros thiêz cxiv puôz uô truôx khor li ntơư, đêx thiêz têx khâuz mê uz no ntưk tâu đhâu, iz chas co tâur tâu chor poz jêz, shôngz ntông lox ntưk pêv hâur lok, uô đêx ntưk tsi yuô chênhr, txo grêk tsơưs têx trâus ruôr hiêv tiv đêx huôv lox. Đhâu iz ntuk cxiv puôz uô tâu li co thêir đêx, tưz paz por hưv nzir tsôngv pêx xênhv đrav kaz đês tsi yuô njiz trâus phiv liv, tso siêz huôv tsar uô nox đuô hâur cheix ntux nas chuô. Tix lâus Lò Văn Tiểu, nhoz jok Piệng, xã Mường La heik pâuz:

“Iz txix thâuv muôx njưs tar đêx Sabo no, pêz tsôngv pêx xênhv tso siêz đuô lok six ntâu, viv tưz thêir tâu têx ar, poz jêz hur si, tsôngv niêv txir cưr tix nênhx tsa nhoz đrav kaz đês tso siêz đuô”.

Côngz trênhx têx muôx liv thiêz jông tâu pov tsênhz hâur coz nas lox hnuz xiêz 05/7 nhiv kruôr đhâu. Thâuv lok nas lok six hloz, njưs tar đêx tưz tâur tâu phênhv ntâu têx ar, poz jêz, shôngz ntông, khâuz nhaz, tos tơưk uz no ntưk pêv hâur lok, paz txo grêk tsơưs têx trâus ruôr hiêv, đêx ntưk tsi yuô chênhr thiêz por hưv truôx tuk pêx xênhv đrav kaz đês, sơưr đơưk têx chuôz zênhx chuôz tav. Zơưv Nguyễn Chí Thanh, Phưv Chủ tịch Ủy ban xã Mường La, tỉnh Sơn La heik:

“Hâur ntu zuôr txos, Ủy ban xã zuôr buôk ti choz trâu jok Piệng thiêz Phongx Kinh tế uô jông luôs hâux lưv seiz car, cxiv kho, por hưv côngz trênhx; iz chas ntơư heik Sở Kôngz nuv thiêz Tênhx qơư tỉnh heik trâu Bộ Kôngz nuv thiêz Tênhx qơư, tsưr tsix hux jos ntiêx têz Nhật Bản JICA Việt Nam tror paz cxiv tsa têx côngz trênhx njưs tar đêx Sabo xưk li heik sâuv hâur thax tsav xã Mường La chiê thêir đêx nas lox, txo grêk tsơưs têx trâus ruôr hiêv”.

Njưs tar đêx Sabo Nặm Păm têx jông li heik ntơư tso pov, cxiv puôz uô njưs tar đêx li co huv đros trâu thax tsav tox siêz. No cux zos qơư chiê Sơn La tror heik cov yưv pênhr uô nzir têx côngz trênhx iz zav li co ntơưv têx tus đêx zôngx ziv muôx đêx huôv lox, trâus cuôr yôngz, paz txo grêk tsơưs trâus ruôr hiêv tiv đêx nas uô thiêz por hưv truôx tuk trâu tsôngv pêx xênhv./.

Thanh Thủy-Riê Lâux cxeik, nhênhv