Uô jông côngz xưv yax kriê ngaz tuk zoz thôngz hâur tsêr cơưv ntơưr nhoz tox siêz Thừa Thiên Huế

Tsêr cơưv Cxênhx iz thị trấn Khe Tre nhoz tsênhv qơư huyện Nam Đông, muôx txox cêr 14C muk lok đhâu, chor yêz muk lok đhâu hâur yênhx hnuz lok six ntâu. txos thâuv chor shux xênhz so ntơưr mak zôngx ziv muôx yưv txiêz nanv zoz thôngz. Kror tsuv hêik, chôngz lênhx uô niêv uô txir tuôx tok têx mê nhuôv tsik ntông câuk mov por vêv tâuz hâu, thâux oz lênhx, pêz lênhx, têx thâuv tsênhv thâux 4 lênhx sâuv iz luz yêz uô muôx yưv ntâu kror tsik jông, uô phiv liv txos côngz xưv zoz zux chor nhuôs lok chêi Ngaz tuk zoz thôngz. Txix thâuv kriz uô tsưr ziv “Trôngx vas tsêr cơưv ntơưr ngaz tuk zoz thôngz”, txix ciês thâuv hâur shôngk shông cơưv, tsêr cơưv choz trâu cưk kriê ntơưr sêiz car lớp cơưv kriz uô cir jênhv uô jông lok ngaz tuk zoz thôngz txos tas nro shux xênhz niêv txir thiêz tâu 100% sơưr đơưk thôngx ziv thiêz uô trơưk. Tsêr cơưv ntơưr tsik so sik côngv đros Đôiv Cảnh sát zoz thôngz-Công an huyện Nam Đông chiê yax kriê lok ngaz tuk zoz thôngz trâu chor nhuôs. Nguyễn An, shux xênhz lớp 4/5 tsêr cơưv Cxênhx iz thị trấn Khe Tre, huyện Nam Đông, tỉnh Thừa Thiên Huế puz pâuz:“Thâuv pêz chêix yêz muk lok sâuv cêr mak tsik tâu chêix 3 luz, 4 luz muk uô iz hax, thâux chôngz nênhs thiêz muk chênhr, muk đaz muk tuôs”.

Công an huyện Nam Đông, tỉnh Thừa Thiên Huế puz pâuz, ntu đhâu thâuv qênhz yuôx tưz pov thiêz xưv lik ntâu lênhx hluôk nênhs uô cxâuv lok ngaz tuk zoz thôngz. Chiê txo grêk tsơưs qênhx shênhx no, iz chas chor cơ quan muôx vax huôv li sir jos uô hâur côngz xưv yax kriê mak muôx tsêr cơưv ntơưr, ziv chuôz zis thiêz tas nro xar hôiv sik côngv truôx đros uô. Hâur co, chiê chor nhuôs jênhv pâuz tâu mak chuôz zis li têx sir jos zos kror lok six zov chênhr. Cao Ngọc Phương Dung, shux xênhz lớp 12B2 tsêr cơưv Cxênhx pêz Nam Đông puz pâuz:“Lơưr cur, chiê cxaz chuôz zoz thôngz ngaz tuk mak pêz tsuv ntông câuk mov por vêv tâuz hâu huv zos lơưr cui tênhv. Thâuv muk mak tsik muk ntâu hax yêz uô cê, tsik thâux chôngz nênhs, tsik muk chênhr, muk đaz muk tuôs”.

Chiê cov ngaz tuk, txo grêk tsơưs txiêz nanv zoz thôngz sâuv thax tsav tox siêz Nam Đông mak hâux lưv gra siêz jênhv pâuz trâu chor shux xênhz zos kror lok six zov chênhr. Nganhx Công an huyện Nam Đông tưz sik côngv đros nganhx zoz zux sir jos uô côngz xưv yax kriê, piêr kriê zoz zux chêix zoz thôngz cêr ar, zoz zux vênhx huôv lok tsưr ziv cxaz chuôz zoz thôngz ntơưv 17 tsêr cơưv Cxênhx oz, Cxênhx pêz sâuv thax tsav huyện đros xar muôx 5 cxênhz 700 lênhx cưk kriê ntơưr, shux xênhz cxaz chuôz. Thôngx cxix tsưr tsix cir jênhv uô jông lơưr ngaz tuk zoz thôngz cêr ar nhoz tsêr cơưv đros chuôz zis thiêz shux xênhz tax tâu muôx 100%. Đuô li, nganhx cux yênhx lix chor tôv ngaz tuk chiê sêiz car, chox kriê lok ngaz tuk zoz thôngz ntơưv chor tsêr cơưv ntơưr thâuv shux xênhz so ntơưr, paz uô cov ngaz tuk, muôx luz nênhx jông; uô đêz đar tâu jông tsưr ziv “trôngx vas tsêr cơưv ngaz tuk zoz thôngz” ntơưv 30 tsêr cơưv ntơưr.

Trung tá Nguyễn Tiến Dũng, Đội tsar đôiv cxiv tsa phongz yaox por vêv ngaz tuk chiv chir sêiz car huyện Nam Đông puz pâuz, uô cov zôngx ziv pâuz, zôngx ziv ndo tâu tiv zix zos muôx sik thav nhoz nênhs kriê thiêz chor shux xênhz. Iz cấp cơưv muôx iz tsưr ziv kriê huv đros zos tsưr ziv uô yiêz thiêz paz trâu chor shux xênhz nhiêv cơưv đuô hâur chor jiês kriê txux chi thiêz tsưr ziv cxaz chuôz zoz thôngz ngaz tuk, hêik chor shux xênhz uô jông lơưr chêi ngaz tuk zoz thôngz:“Tôv yax kriê cêr chêi têz qơưk công an huyện tưz muk yax kriê txos trâu têx tsêr cơưv. No zos chor tsêr cơưv muôx 17 qơư tsêr cơưv cxênhx oz, cxênhx pêz thiêz cxênhx iz chiê hêik kriê, yax kriê lok chêi ngaz tuk zoz thôngz cêr ar, tsưr ziv cxaz chuôz zoz thôngz ngaz tuk. Lok chêi phax tar ntâuk tsiv hâur tsêr cơưv ntơưr cux li phax tar têx phiv liv lok zax zênhz txos trâu chor cưk kriê ntơưr cux li chor shux xênhz thiêz chox shux xênhz niêv txir pâuz chiê sik đros uô cov tâu truôx jông”.

Ntu zuôr txos, Đôiv Cảnh sát zoz thôngz, Công an huyện Nam Đông, tỉnh Thừa Thiên Huế tror sik côngv đros chor tsêr cơưv ntơưr sâuv thax tsav sir jos uô côngz xưv yax kriê, zoz zux lok ngaz tuk zoz thôngz trâu shux xênhz, đhâu co paz trâu chor nhuôs jênhv pâuz tsênhz lok zuk li txơưx jênhv thâuv cxaz chuôz zoz thôngz; uô jông lơưr chêi ngaz tuk zoz thôngz cêr ar chiê paz por vêv tâu jông trâu zuk thiêz cxuô lênhx nênhs./.

VOV4-Lik Thox cxêik nhênhv

Zuôr Bảo hiểm xar hôiv txưv zênhv: Tsês thâuv hluôk, shir phaz thâuv lâuk

BHXH txưv zênhv zos Đảng, têz qơưk tsênhv chêi bảo hiểm jông, huôx tôngv tsik so viv kror liv. Zuôr Bảo hiểm xar hôiv txưv zênhv, pêx xênhv tưz tsik zos tâu Têz qơưk paz phênhv thêv, mak tsênhv tâu sơưv ntâu kror liv tsênhv tsênhz li: tâu sơưv nhiêx hli so lâul yênhx hli thiêz tâu paz ntơưr Bảo hiểm y têr tsik tas nhiêx txiêx hâur ntu sơưv nhiêx hli so lâul; chor nênhs cxênhz jê tâu paz nhiêx uô đaz uô kruô thâuv nênhs cxaz chuôz trâus tuôs… Zơưv Trần Đại Nghĩa, canr bôv BHXH huyện Điện Biên puz pâuz, ntu đhâu BHXH huyện Điện Biên tưz tsêx trung yax kriê txix ntâu tsưr ziv chiê pêx xênhv pâuz tsênhz BHXH chiv chir zuôr li têx kror liv no, txix co sir jos cxaz chuôz:“Pêz sik côngv đros bưu điện muk trâu chor chuôz zis chiê hêik kriê lok têx kror liv thâuv cxaz chuôz BHXH, BHYT. Đuô li, pêz cux kriê trâu pêx xênhv pâuz tsênhv chêi lok oz zav bảo hiểm co txix tsưr uô uô cê đros chor jiês cơưv ntơưv xar, jêx jok chiê yax kriê lok tsênhv chêi BHYT, BHXH trâu yênhx hov nênhs, tiv zix zos chor nênhs nhoz đêz, tox siêz, thax tsav txov nhêv tiv zix”.

Đrâuv uô đros ntơưv chor jiês cơưv, hâux lưv yax kriê lok têx qênhx liv, chế độ thâuv cxaz chuôz BHXH chiv chir zuôr, BHYT cux tâu BHXH huyện Điện Biên piêr txos trâu pêx xênhv pâuz đhâu chor qơư sâu nhiêx BHXH, BHYT sâuv thax tsav. Pos Trần Thị Nguyệt-hlôngr njêx muôs qơư sâu nhiêx BHXH, BHYT nhoz xar Thanh Hưng, huyện Điện Biên puz pâuz:“Cur cux hêik kriê trâu pêx xênhv pâuz lok cxuô zav bảo hiểm li têx chế độ, qênhx liv thâuv cxaz chuôz, viv thâuv muôx moz gênhs, muôx ntơưr BHYT thâuv muk njuôk kho moz zuôr paz tsik tas ntâu nhiêx txiêx. Ciês BHXH chiv chir zuôr mak hêik kriê trâu pêx xênhv pâuz thâuv tsênhv hluôk mak tsês mê njil nhiêx chiê cxaz chuôz, nu nênhx tov ntêx no lâul muôx tâu phênhv nhiêx lok zos nhiêx hli so lâul chiê paz trâu zuk luz nênhx”.

Đhâu nriêr pâuz thiêz tưz tâu yax kriê, chôngz lênhx nênhs nhoz Điện Biên tưz pâuz tsênhz têx kror liv thâuv cxaz chuôz BHXH chiv chir zuôr, txix co, sir jos cxaz chuôz. Niêv tixNguyễn Thị Nhung-nhoz jok Mỹ Hưng, xar Thanh Hưng, huyện Điện Biên hêik pâuz:“Thâuv ntêx no uô hâux lưv hâur doanh nghiệp mak cur cux caz chuôz BHXH chiv chir zuôr tâu muôx 2 shông ntâu. Taz sik thâuv tsik muk uô hâux lưv lơưv; thiêz tiv iz cxiê kror txơưx mak cur tsik thêv nzir thiêz tưz thâu chor nhiêx co iz jiês trâu shông 2020. Thâuv tâu yax kriê, hêik pâuz lok qênhx liv thâuv cxaz chuôz BHXH chiv chir zuôr mak cur tưz tror cxaz chuôz tâu muôx 6 luz hli lơưv”.

Pos Tạ Thị Anh-đros nhoz jok Mỹ Hưng, xar Thanh Hưng hêik:“Oz niêv txir cux zuôr zav bảo hiểm no chiê tov ntêx no paz tâu trâu zuk ntu lâul, uô tsik tâu daz tsi lok cux muôx bảo hiểm thêv nhiêx hli yênhx hli, têx tuz nhuôs cux tsik yuô cxơưx trâu niêv txir. Têz qơưk muôx chêi paz BHXH chiv chir zuôr li no mak lok six jông, zuk cxaz chuôz chiê luz nênhx zar lâul tsik yuô txov nhêv”.

Lơưr hâu nov BHXH huyện Điện Biên, tiv luz nênhx tsênhv txov nhêv; iz phênhv tưs pêx xênhv pâuz tsik tâu tsênhz txos têx kror liv thâuv cxaz chuôz BHXH chiv chir zuôr, viv li chor pêx xênhv sâuv thax tsav cxaz chuôz trâu zav bảo hiểm no tsênhv tsik tâu chôngz. Ntu zuôr txos, taz viv zuôr tror sik côngv đros chinhr quyền thiêz chor tsưr tsix xar hôiv sir jos yax kriê, piêr kriê chiê pêx xênhv pâuz tâu tsênhz đuô lok têx kror liv thâuv cxaz chuôz BHXH chiv chir zuôr; tiv zix zos txo grêk tsơưs nhiêx txiêx thâuv muôx moz gênhs tsuv kho moz, lok sik njiz trâus têx phiv liv hâur luz nênhx, txix co sir jos cxaz chuôz trâu BHXH chiv chir zuôr trâu zuk thiêz chuôz zis./.

CVT VOV Tây Bắc-Lik Thox cxêik nhênhv