Pêx xênhv Phong Dụ Thượng (Lào Cai) cxơưx hlo muôx ar poz thâuv txos chêix ntux nas chuô

            Pos Trần Thị Điều nhoz jok Làng Chạng, xar Phong Dụ Thượng, tỉnh Lào Cai puz pâuz: Jiês đêx ngaz cuôr lox thâuv hli 10 shông 2025 tưz cuôr tas muôx 8 thiêr ar ntus đêx Ngòi Hút, buôs ti chuôz zis kror ar, uô poz vâu tas nro chuôz zis iz luz tsêr, tsêr mor thiêz tas nro côngz trinhx vêv xênhz.

           Nhiv no, txơưv tưz sir jos kho đuô chiê muôx qơư xênhz huôx uô ntêx taz sik luz plas tsêr cux tsênhv nhoz jê ciês ntơưv ntus đêx. Đros qênhx shênhx ar poz ziv hnuz ziv ntâu, pos chuôz zis luz nênhx njiz ntâu phiv liv. Thâuv tưs cux lok six cxơưx: “Cxơưx hênhr, nhiv no tsuôk vav tiêk têz qơưk sêi đrơưv cxiv tsa thêir kror qơư no chiê por vêv tâu cxuô zav thiêz txox siê. Nhiv no thâuv tưs muôx lok nas chuô mak pêz puôr lênhx khiêr gâuv xưz”.

         Trơưk pos Hà Thị Đông, iz ziv chuôz zis uô nênhx nhoz ntêr shông ntơưv Làng Chạng, chiê tuôr tâu chor ar trơưk ntus đêx, pos chuôz zis tưz chos shôngz thiêz chor ntông jiz ntêr shông, chor ntông nhiv no tưz lox tas lơưv. Taz sik, jiês đêx ngaz cuôr lox thâuv kaz hli 9, hâur hlik hli 10 tsêiz no tưz cuôr tas nro chor shôngz ntông co.

         Đros qênhx shênhx ntus đêx tror muôx chor qơư ar xưz poz phiv liv, pos Đông hêik vav tiêk têz qơưk zuôr nzor yưv pênhr cxiv tsa njưs thêir, chiê đơưk kho cov tiêr têx qơưk muôx ar xưz poz: “Thâuv tưs muôx lok nas chuô mak tsik car nhoz hâur tsêr lơưv. Lok six cxơưx thiêz nyêi. Vav tiêk Têz qơưk zuôr paz đơưk kho trâu pêx xênhv tso siêz đuô luz nênhx cov uô tâu nox truôx jông”.

           Trơưk chor nênhs sâu xor xưv nriêr pâuz, đhâu chor jiês lok nas chuô đêx ngaz cuôr tsik so hâur oz shông 2024 thiêz 2025, qênhx shênhx ar poz trơưk ntus đêx Ngòi Hút tsênhv txơưx txar phiv liv. Nhiv no, đêx ngaz cuôr tưz uô ar xưz poz iz ntu ntus đêx ntêr xar muôx 750 thiêr, xưz poz ntâu trâu pêx xênhv chor ar têz thiêz chor côngz trinhx cxiv tsa. Ntâu luz tsêr hâur jok tưz muôx têx qơư xưz poz lox, zôngx ziv trâus xưz poz trâu hâur tuk đêx.

         Trơưk zơưv Hoàng Văn Khoa, Phưv Chủ tịch Ủy ban xar Phong Dụ Thượng, chiê por vêv tâu txox siêz thiêz cxuô zav trâu pêx xênhv, uô ntêx chêix ntux nas chuô shông no, Ủy ban xar tưz muôz iz phênhv nhiêx txiêx têz qơưk ntơưv qơư tsiv gri muôx 550 triệu đêiv chiê cxiv tsa njưs thêir uô ntêx, đros ntêr muôx 100 ntâu thiêr ndis. Taz sik tsuôk zos tsưr ziv tir tar uô ntêx, lok tsưr ziv muk ntêr, xar hêik cov cxiv tsa njưs thêir sêi đrơưv ntơưv jok Làng Chạng: “Ciês đhâu muôx jiês đêx ngaz cuôr thâuv hli 10 shông 2025, chinhr quyền thax tsav qơư cux tưz muôx ntâuz ntơưr hêik trâu Ủy ban tỉnh pâuz, xa trâu chor sở, nganhx cov cxiv tsa njưs thêir ntơưv thax tsav jok Làng Chạng chie por vêv lênhx nênhs thiêz cxuô zav trâu pêx xênhv”.

           Tưz tror txos chêix ntux nas chuô đêx ngaz cuôr shông no, pêx xênhv jok Làng Chạng vav tiêk dưv anr cxiv tsa njưs thêir zuôr nzor tâu kriz uô. Hâur ntu nhoz tok, pox nhuôs nhoz no hêik chinhr quyền ntơưv qơư paz cov sêi chor tsưr ziv đơưk kho uô ntêx li: Uô tơưz poz jêz, kho đuô cưx ha trâu đêx ntưk lok sik cxiv poz jêz thêir, chiê paz txo grêk tsơưs têx trâus ruôr hiêv./.

Đinh Tuấn-Lik Thox cxêik nhênhv

Tsưr ziv phax tar moz kror ndâux-têk-tơư

         1.Moz kror ndâux-têk-tơư têx muôx yưv:

        -Xuz thơưx zos mê njik uô cuz uô no, tsi xar nox hâuk, gênhk, moz chax đaz, tơưv uô têx luz poz hlưr đêx.

        -Chor poz hlưr đêx hâur kror ndâux khênhr tơưv ntơưv pok hniêr, blêis thiêz saz hâur kror ndâux. Xuz thơưx zos tơưv têx luz poz liêz đhâu 1-2 hnuz uô cuz uô no, jux juk yênhx poz hlưr đêx thiêz tơưs, moz tuôx.

        -Têx poz li heik co cux muôx yưv ntơưv têx tơưr grêix, khênhr tơưv ntâu ntơưv têx xiz têk, xiz tơư.....

          -Moz zôngx ziv siz cik tâu txix tus no trâu tus tov:

          Đhâu cor tâu têx cuô njưs, kâuz ndâus, têx cuô đêx poz hlưr trâus tơưs.

        Đhâu têx nhuôs zâu nhoz uô si siz jê lok sik đhâu têx chuôz zênhx uô si, trôngx tos jâuv, plas tsêr....lo tâu caz moz.

          Đhâu cêr nox hâuk tiv nox hâuk tâu têx zav nox muôx caz moz.

             2.Tsưr ziv phax tir thêir moz:

          Nhiv no tsi tâu tâu muôx yuôx vắc xin phax phôngz moz, cxuô lênhx sơưr đơưk tsuv uô jông trơưk têx li đrav kaz:

          -Niêx hnuz tsi so muôz xaz phôngx thiêz đêx hur nzuôr mê nhuôv têk ntâu jiês, lar heik zos uô ntêx thâuv zuôr nox hâuk thiêz đhâu tơưv trôngx tas.

           -Lênhx nênhs tu mê nhuôv cux tsuv nzuôr têk ntâu jiês, tiv zix zos thâuv uô jâuz mor nox, uô ntêx thâuv zuôr muôz mê nhuôv nox mor thiêz đhâu thâuv vêv xênhz trâu mê nhuôv tas.

           -Tsi chiê mê nhuôv nox têk lok sik muôz têx chuôz zênhx uô si puôr ntơưv kror ndâux.

            -Muôz trâu nhuôs nox siêr, hâuk bâu, nhiêk zôngv nhiêk iz traz điêr, iz luz ntiv.

          -Qêz suô, nzuôr hur si thiêz gra mê nhuôv têx kiêk nênhs por tsês trâu iz kro.

       -Tsi so muôz xaz phôngx lok sik cuô đêx yuôx nzuôr, so plas tsêr, mê nhuôv têx chuôz zênhx uô si cov hur si.

         -Thâuv pov mê nhuôv uô cuz uô no thiêz tơưv têx luz poz hlưr đêx liêz ntơưv xiz têk, xiz tơư lok sik saz hâur kror ndâux mak tsuv chox zênhx max lênhx nhuôv ntơư muk qơư y tế, chiê tâu seiz njuôk shuôs đas jos thiêz kho moz huv đros./.

Trạm Y tế Gia Viễn, tỉnh Ninh Bình-Riê Lâux cxeik, nhênhv