Lào Cai phuôx huiz chêx cuk Cuiv "Viv nênhs pluôs"

  Cheix ntux yiêz shông no, tix lâuk Đỗ Quang Sính 2 txir tuz nhoz xã Sơn Hải, huyện Bảo Thắng, tỉnh Lào Cai zuôr tâu nox tsiêz hâur luz tsêr yiêz. No zos côngz tsinhx tâu paz txưv txix Mặt trận tổ quốc tiv phaz li têx nhiêx Cuiv "Viv nênhs pluôs". Tsêr truôx jông cux zuôr paz tix lâuk Sính tror truôx siêz sir jos đuô hâur cêr khưr uô nox, cxiv kho luz nênhx. "Cur tul mê nhuôs tsi tâu fênhx yax li têx mê nhuôs txơưr, iz chêr uô cxaz tas, chuôz zis cux chox muk kho moz cxuô qơư, viv li ziv txov nhêv đuô. Luz tsêr nhoz tưz xar poz vâu, tâu paz txưv uô tsêr yiêz mak uô tsâus Đảng, têz qơưk lok six ntâu tưz paz ưz oz txir tuz"

          Lơưr zơưv Lù Văn Din, Chủ tịch UB MTTQ VN huyện Bảo Thắng, ntu đhâu, txơưv njiz ntâu phêv liv tiv moz Covid-19, taz sik Bảo Thắng cux sir jos huiz tôngv, tsês zuôr xar 600 tsov đeiv txix Cuiv "Viv nênhs pluôs" chiê paz txưv kho đuô, cxiv yiêz 20 ntâu luz tsêr "niêv côngv siêz". Tiv muôx tsi txâuk pênhr nhiêx viv li huyện li tsưr ziv uô cux hlôngr yiêz ntâu. "Mặt trận paz txưv tâu muôx nhos 30 tsov; thôngx cxix, uô ntâu tsưr ziv li vênhv tôngv côngv thôngx, cưr tix nênhx tsa sik côngv tês paz max lơưr thiêx li uô tâu"

          UB MTTQ VN tỉnh Lào Cai li thôngz sâu tso pov, hâur shông 2021, đrâuv zuôr xar 500 luz tsêr tâu paz txưv cxiv tsa, kho đuô hâur tas nro tỉnh. Cuiv "Viv nênhs pluôs" nhoz Lào Cai tsênhv paz yênhx cxênhz ziv chuôz zis txeik pênhr chiê huôv tsar kinh tế, tsiv uô, car chêx hâux lưv uô…

          Thiêz hâur têx hnuz nhiv kruôr đhâu lok no, ndax shông yiêz 2022, bax chiê tos tsiêz trâur lâuk 2022, tsaz yênhx "Tsiêz viv nênhs pluôs" tror hu zâuv côngv thôngx sđ siz chos côngk paz cxaz  tâu 17 tỷ đeiv txix têx lênhx nênhs, tsưr tsix siêz jông hâur thiêz đrâuv tỉnh. Pos Bàn Thanh Thảo, Phưv Chủ tịch UBMTTQ VN tỉnh Lào Cai puz pâuz: "Hâux lưv uô Cuiv viv nênhs pluôs tâu thôngz đhâu tài khoản zos MTTQ coar lik. Huôx tôngv no tsuv uô tsênhz mênhx phênhv sâu, phênhv muôz chiê tas nro chor nhiêx txiêx vênhv tôngv tâu muôz trơưk nênhs pluôs, ziv chuôz zis zuôr xar pluôs ntơưv tiv phaz"

          Lơưr ploz tsênhr pluôs ntu 2021-2025, tas nro tỉnh Lào Cai muôx 44 cxênhz ziv chuôz zis pluôs zuôr trâus tâu tsoz phưz, paz txưv. Hâux lưv phuôx huiz Cuiv "Viv nênhs pluôs" li pưs txux tưz khav tênhv tâu tas nro xã hội li têx hâux lưv uô tâu jông tsênhv tsênhz chiê paz têx chuôz zis pluôs sir jos hla đhâu cêr pluôs, ngaz tul luz nênhx./.

(An Kiên-Txâur Vax cxeik nhênhv)