Lok tê uô ruôr hiêv txos yênhx châuv héc ta cà phê ntơưv Sơn La

Xar Chiềng Cọ, thành phố Sơn La muôx zuôr xar 1.000 héc ta cà phê. Tiv ntux no njiv, lok tê tưz uô trâu ntâu thax tsav trâus tuôs blôngx, tuôs njil, tuôs pax thiêz jênhs pax tas. Pos Lèo Thị Phượng, nhoz jok Muông Yên hêik pâuz:“Cur chuôz zis muôx 6.000 héc ta cà phê. Chor ntông tuôs li no tas lơưv mak cux tsuôk tsuv txiêr por tsês xưz, tsik pov kaz uô li chak lơưv. Zos tsik txiêr mak zuôr tuôs tas hâur pâuk hur si tsuv chos đuô yiêz xưz”.

3 shông ntâu tror uô ntêx, niêv tix Lò Kim Thanh ziv chuôz zis, nhoz jok Muông Yên li xar muôx 3.000 thiêr ndis têz cà phê trâus tê uô trâu blôngx trâus tuôs tas, tsuv muôz txiêr tsês hâur pâuk cov tror hlar câuk tuôx. Đhâu 2 shông tu, shông nhiv kruôr đhâu tưz txi txir jiês xuz thơưx tâu muôx 3 tấn, sâu tâu lok muôx 60 triệu đêiv ntâu. Cà phê tror txi txir sâu tâu tsik tâu ntêr mak shông no tas nro thax tsav no ho tror trâus tê lok ruôr hiêv txos. Niêv tix Thanh ziv chuôz zis pôngz siêz hlo, viv no zos chuôz zis li phênhv sâu chênhr:“Iz shông pêz tsuôk sâu tâu oz chiv zos txir khơưz đuz thiêz cà phê. Nhiv no cà phê trâus tuôs tas li no mak cux tsuôk pâuz sir jos tror kho đuô xưz. Cux vav tiêk chinhr quyền ntơưv qơư zuôr muôx têx kror paz trâu chor ziv chuôz zis njiz trâus ntux têz ruôr hiêv txos li pêz”.

Cxơưx tsav lok tê lok ruôr hiêv tas nro chor thax tsav cà phê sâu tâu muôx yênhx puô triệu đêiv iz héc ta co; ntâu ziv chuôz zis nhoz no tưz zuôr tax lok sik zôngv têx ntâuz tax kuz chiê vor trâu chor cà phê thiêz zưs đêx trâu thâuv têis cik sơưr nzor, đros siêz xar tiêk zuôr paz txo grêk tsơưs tâu phênhv tưs đâuk tê uô ruôr hiêv txos thiêz cux vav tiêk oz pêz hnuz zuôr txos no ntux zuôr tror sor tuôx. Tix lâus Quàng Văn Cường, nhoz jok Hôm, xar Chiềng Cọ, Thành phố Sơn La hêik:“Vor tax li no mak zos trơưk zuk siêz xar xưz, chiê paz thêir cov đâuk tê tsik uô ruôr hiêv ntâu txos zuk chor cà phê, vor li no mak cux jông đuô, zos tsoz tưs siêz txos sâuv đêiv tax mak cux tsuôk tuôs luz njil xưz, tsik tuôs txos hâur pâuk”.

Lơưr nriêr pâuz xuz thơưx, ntơưv xar Chiềng Cọ, thành phố Sơn La tưz muôx zuôr xar 30 héc ta cà phê trâus tê uô ruôr hiêv txos; tsêx trung ntơưv têx qơư kik, vuôk har nhoz chor jok Ót Nọi, jok Hôm, jok Muông Yên… Nhiv no thành phố tưz hêik têx taz viv cik txos nriêr pâuz, thôngz sâu thax tsav, ntâuk gri têx trâus ruôr hiêv chiê nzor muôx tsưr ziv paz trâu pox nhuôs. Zơưv Cà Trung Hòa, Phưv Chủ tịch Ủy ban xar Chiềng Cọ, Thành phố Sơn La puz pâuz:“Thâuv tưs muôx tê lok mak chor cà phê zos chor tsoz chos trâus ruôr hiêv ntâu đuô. Iz zav li trâus tuôs lưx pax thiêz trâus tuôs blôngx. Zos tiêk tsuv muôz txiêr por tsês cov ntông tror hlar câuk tuôx mak cux trâus pôngz plox ntâu hâur têx shông zuôr txos’./.

                                                                                                 Trấn Long-Lik Thox cxêik nhênhv

Muk đhâu tênhz liêz zaoz thôngz tsi trơưk cui tênhv trâus xưv bluô

li chas?

          Tsênhz mênhx hâur ntu cxaz chuôz zaoz thôngz, tiv zix zos ntơưv têx niêv đrôngs muôx ntâu yêz muk lok, muôx tsi tsơưs têx lênhx nênhs njiz trâus qênhx shênhx tsênhv yuôr six hơưv tênhz njuôz muk, taz sik txơưv hlôngr ciês trâu tênhz liêz. Li iz lênhx tsôngv box đrav kaz no:“Muôx jiês zuk tsi tsưv ziv seiz tênhz yuôr 2-3 giây thiêz txơưv muk đhâu mak tưz yênhx zos muk đhâu tênhz liêz tsi trơưk chei. Muôx têx thâuv trâus ntông, fiêx lok sik yêz đrês tov ntêx their tênhz tas pov lơưr muk zuk cux muk lơưr ho trâus muk cxâuv tênhz liêz tsi zos zuk cxoz txưv uô cxâuv”

          Lok njiêz luv no, Thượng tá Tạ Thị Hồng Minh, Phưv tsar Phongx heik kriê yax mông qênhz yuôx car chêx txiêz nanv zaoz thôngz, Cục cảnh sát zaoz thôngz puz pâuz qir tiv vênhx thix no li đrav kaz:“Zos iz cxiê tênhz tưz kuz tsuv muôx lênhx nênhs seiz car. Lok sik ntơưv iz cxiê tênhz tsênhv hlôngr đuô tsưr ziv tơưk txix kis txos siêz đuô lok sik siêz txos kis đuô viv li muôx têx uô kênhz. Chiê khưx phưx Cục cảnh sát zaoz thôngz tưz muôx ntâuz ntơưr chox kriê công an tiv phaz seiz car, kho đuô têx tênhz hlôngr nzor thiêz têx tênhz kuz”

          Muôx lênhx coaz txos hâux lưv yưr lir uô cxâuv muk đhâu tênhz liêz tsi trơưk chei, ntâu lênhx tsôngv box ho tsi tâu pâuz thâuv tsênhv đrês tênhz liêz tos txos tênhz njuôz muôx yêz tsov cưv nhêv còi yêz zos zuk txar cêr chiê yêz muk đhâu mak pok uô cxâuv chei thiêz trâus xưv bluô. Lok sik tsênhv đrês tênhz liêz taz sik CSGT heik kriê tâu muk đhâu zos li pok trâus xưv bluô nzir. Lơưr Chei zaoz thôngz mak nênhs cxaz chuôz zaoz thôngz tsuv uô trơưk têx li đrav kaz: CSGT li heik kriê, tênhv tênhz zaoz thôngz; fiêx zaoz thôngz cêr ar; caz cêr thiêz têx cêv kuôk sâuv cêr…Thượng tá Tạ Thị Hồng Minh puz pâuz cxaz:“Thâuv uô ntâuz ntơưr xưv bluô mak lưx lươngv phưv txơưx tênhz zuôr sik côngv đros CSGT seiz camera cxeik đuôz nênhs uô cxâuv thiêz qênhz yuôx tsênhz têx uô cxâuv co. Yưr lir nzir mak CSGT cux puz nênhs uô cxâuv seiz video zuk uô cxâuv. Zos tsar yêz tsi trơưk tênhz zaoz thôngz chiê jav cêr trâu yêz tâu tsov cưv, yêz chơưv paz mak tsi trâus xưv bluô”./.

                                                                                           Mạnh Phương-Txâur Vax cxeik nhênhv