Điện Biên cheix pax lâus tơưs hu zâuv chôngz lênhx ntâu tus kruô tuôx ndis seiz uô si

Hâur jiês xuz thơưx tuôx trâu Điện Biên, zơưv Lê Văn Long, nhoz TP HCM thiêz têx lênhx fôngx zưs tưz xeir muk ndis seiz têx qơư di tích lịch sử nto bê li: Trôngz A1, kror tâuz Đờ cát….đros trâu cêr shir phaz, ndo txos têx tuz lênhv đrav ntêx li côngz txiêx njis, jiês zơưv tuôx Điện Biên no ziv muôx liv đuô thâuv têx ntông pax lâus tsênhv taz tov tơưs pax đơưz vok trâu cxiê qơư, uô yiêz cxuô jêx jok, têx cêr muk lol hâur đrôngs Điện Biên Phủ:

“Điện Biên luz cheix no zos cheix pax lâus tơưs thiêz pêz lok six nhiêv. Seiz njiê pov têx pax lâus tơưs đơưz vok, lênhx tưs cux jông siêz, shir phaz, pov zuk têz qơưk huôv tsar, jông jav, lar heik zos Điện Biên iz suôv qơư zênhz shôngx, muôx chor tuz lênhv tir ntâuk trol châuz viv tsưx phưv têz qơưk thâuv ntêx li côngz đas jos, txiêx njis”.

Nto bê lus zos thax tsav muôx ntâu têx qơư di tích lịch sử reik đros ntâuk zênhx trol châuz Điện Biên Phủ uô luôs cxuô thax tsav qơư sâuv ntiêx têz pâuz txos, tsi tas li co, tuôx trâu Điện Biên hâur luz hli 3 no, tsôngv kruô tsênhv muôx têx pâuz nzir lok ntâu tsar zav jông đros trâu pax lâus tơưs đơưz vok, uô yiêz tox trôngz câuv har thiêz. Niêv lâul Lê Thị Hải Yến, nhoz tỉnh Thanh Hóa tuôx heik:

“Lênhx nênhs nhoz Điện Biên siêz jông, nhiêv kruô. Thiêz lar heik, zos tuôx Điện Biên tsi tâu cxeik đuôz đros têx pax lâus mak cux iz zav li tsi tâu tuôx txos Điện Biên xưz. Cur lok six jông siêz thâuv tuôx txos têx cêr muk lol 2 saz ntus cêr chos thiêz muôx ntâu pax lâus li no”.

Đros trâu chor cêr muôx pax lâus tơưs yiêz jông jav trơưk 2 saz ntus cêr, uô tsôngv kruô sơưr đơưk mul lok đhâu seiz njiê tsi đhuôr, ntênhs hội pax lâus shông no tsênhv muôx ntâu hâux lưv uô jông li: Nthuôr uô tsaz yênhx cêr lov jêv thiêz tuô fov ntơưr; grêk tâus cêr piêr kriê têx txux chi vênhx huôv jông; sik tưr uô zav nox kaz; sik tưr têx txux chi uô si lov….. Pos Nguyễn Thị Thu Hương, Phưv Giám đốc Tsênhv qơư Vênhx huôv đuôz shav tỉnh Điện Biên heik pâuz:

“Shông no tỉnh li jiês tưr thik lênhx nênhs jông gâux pax lâus tưz zos jiês tiv 3, viv li muôx ntâu kror tsi thôngx li 2 shông uô ntêx, co zos chor nênhs sik tưr thik zuôr hluôk đuô, siêz đuô thiêz khax, jông gâux đuô”.

Hli 3 zos six hơưv jông tsôngv kruô tuôx ndis shuôs têz qơưk uô si trâu Điện Biên tsar ndê chôngz lênhx. Trơưk li ngênhx vênhx huôv thêv thao ju lix tỉnh sâu jênhv, hâur hli 3 no, chor kruô tuôx ndis seiz têz qơưk uô si hâur thax tsav tưz tsar ndê ntâu đuô 2 bâus pir li shông uô ntêx. Đros trâu têx pax lâus tơưs yiêz thiêz uô ntâu hâux lưv, txux chi cêr lov jêv, no zos iz cêr shir phaz trâu ju lix Điện Biên hâur têx luz hlik hâur shôngk shông đhâu iz ntuk tax nduô tsês tiv moz Covid-19 uô ruôr hiêv./.

                    (Vũ Lợi-Riê Lâux cxeik, nhênhv)

Hà Thơm- zos iz lênhx nto bê lok sênhr suôz hêik gâux

        Xênhz shông 1992, nhoz jos Cang, xã Chiềng Khoong, huyện Sông Mã, tỉnh Sơn La, hâur chuôz zis tsik muôx lênhx nênhs tưs uô hâux lưv hêik gâux, sênhr chêr; taz sik txix thâuv zâu, Hà Thơm tưz zênhx nhiêv cơưv shâuv hêik gâux, sênhr chêr, nthuôr uô cêr lov jêv. Hà Thơm phêiz kênh:

         (Cur nhiêv uô zav hâux lưv no txix thâuv zâu thiêz thâuv muk cơưv ntơưr cấp 1, cur cux hêik ntâu jax gâux hâur tsêr cơưv. Thâuv cơưv lớp 9, cur muk tưr cơưv trâu tsêr cơưv trung cấp vênhx huôv tỉnh Sơn La. Hâur 4 shông cơưv tiêr, cur cux tâu cưk kriê xêir zuôr lok uô hâux lưv hâur tsêr cơưv hêik gâux tỉnh Sơn La)

           Shông 2016, Hà Thơm cux tâu muk cơưv Đại học trâu tsêr cơưv vênhx huôv tuz lênhv Hà Nội. Đhâu 4 shông cơưv tiêr, lênhx pox niêv co tưz muôx txâuk tsưr ziv txux chi xar tơưv cxuô jax gâux, suôz sênhr hêik gâux, sênhr chêr đhiê pax vuôs huv đros. Lênhx nxêik co, zos iz lênhx muôx luz suôz sênhr hêik gâux jông đros trâu sênhr chêr thiêz uô tiêr cxuô luôs hâux lưv nhoz tsêr cơưv hêik gâux tỉnh Sơn La thiêz muk tưr hêik gâux trâu cxuô tỉnh, Trung ương tâu cxuô lênhx sđ pâuz thiêz kruôk txos:

        (Hâur 10 shông uô hâux lưv hêik gâux, sênhr chêr, đhiê pax vuôs thiêz đhâu iz shông uô hâux lưv, cux muôx cxaz nzir mê njik tsưr ziv, txux chi xar tơưv cxuô jax gâux, suôz sênhr hêik gâux, đhiê pax vuôs, sênhr chêr ...huv đros hâur luz nênhx muôx ntâu hlôngr yiêz nhoz hâur tsêr cơưv hêik gâux)

        Hâur ntu uô hâux lưv hêik gâux, sênhr chêr, lênhx nxêik co cux muk đros tưr hêik gâux trâu cxuô tỉnh faz Bắc tâu hov siêz shông 2019; tưr hêik gâux trâu đrôngl Hà Nội tâu hov 3 shông 2018; tưr hêik gâux tâu côngz mênhx nhiêx hâur 5 luz têz qơưs trâu ntơưv tỉnh Quảng Trị shông 2016; tưr hêik gâux, sênhr chêr ASE AN tâu côngz mênhx nhiêx shông 2019. Đoàn Thế Hùng, Phưv Giám đốc sêiz car Tsêr hêik gâux, sênhr chêr tỉnh Sơn La hêik pâuz nzir:

        (Lênhx muôv Hà Thơm zos hêir nênhs poz ziz nhoz tỉnh Sơn La thiêz lênhx muôv co cux muôx luz suôz sênhr hêik tâu gâux jông. Nhiv no, lênhx muôv ntơư zos iz lênhx muôx luz suôz jông hêik tâu cxuô jax gâux hâur tsêr cơưv hêik gâux, đhiê pax vuôs, sênhr chêr; lar hêik zos hâur cxuô jiês muk tưr hêik gâux cux tưr tâu hov siêz)

Đros trâu siêz nhiêv txux chi, vênhx huôv jông thiêz huôv tsar suôz sênhr hêik gâux, nthuôr uô cêr lov jêv, đhiê pax vuôs huv đros hâur luz nênhx. Lar hêik zos hâur ntu zuôr txos no, lênhx muôv co tsênhv zuôr uô cov tâu tiêr ntâu luôs hâux lưv jông, huôv tsar thiêz khơưk tsês têx txux chi suôz sênhr hêik gâux, sênhr chêr, đhiê pax vuôs coc muôx đros đrêiv hâur luz nênhx tsik chiê pôngz plox nhoz thax tsav faz Bắc pêz têz qơưs./. 

  Tsu cxêik nhênhv-Trấn Long, CQTT Tây Bắc