Việt-Lào muôx cêr siz paz, sik thôngx siêz nhoz ntus đriv Nậm Núa

Đhâu 20 ntâu shông zuôr pox niêv nênhs VN, tix lâus Lò Văn Phênh (nênhs Lok Tsuôl) nhoz jok Pa Thơm, xã Pa Thơm, huyện Điện Biên (tỉnh Điện Biên) tưz seiz suôv qơư Pa Thơm no zos zuk li qơư nhoz tiv 2. Luz nênhx truôx tuk, chuôz zis tsâu sor, tix lâus tâu niêv têik zơưv txir thiêz têx cưr tix nênhx tsa tos niêv têik zơưv txir lơưr hluz, nhiêv txos. Ziv muôx cêr jông siêz thiêz shir phaz đuô, thâuv hâur shôngk shông 2019, tix lâus tâu têz qơưk côngk nhav uô nênhs VN.

Khov cấp ủy hâu nov ntơưv qơư thiêz têx tuz lênhv pênhz phax nhoz hâur thax tsav li cêr moz siêz, paz max txos, nhiv no tix lâus chuôz zis tưz muôx nox muôx tsês, têx tuz nhuôs tâu cơưv ntâuz cơưv ntơưr txos qơư, nhiv no nhuôv tưz cơưv tas ntơưr cxênhx 3, bax zuôr muk cơưv đại học. Nhiv kruôr muk uô liêx têz lok txos tsêr, hưk tsênhv tơưv si lus, tix lâus Phênh heik: “Cur niêv thiêz txir gơưk tưz trâul pôngz ntêr lơưv, cur zuôr pox niêv saz tov VN, niêv têik thiêz zơưv kriê zuk cêr uô nênhx jông, tsiv txiêx. Cur tưz tâu têz qơưk côngk nhav uô nênhs VN lơưv, zuk tsuv hlôngr tsưr ziv, siêz xar, uô nênhx nhoz hâur têz qơưk VN zos tsuv uô trơưk, njênhs njôngr trâu chei têz qơưk VN”.

Têx li tsôngv pêx xênhv nênhs VN siz zuôr đros nênhs Lok Tsuôl nhiv no ntơưv Pa Thơm tưz tsi zos tsơưs, viv txơưv 2 têz qơưk nhiêk txơưr nhiêk, nhoz cêv iz tus đêx zos đêx Nậm Núa, taz sik Pa Thơm thiêz Na Luông phênhv ntâu zos iz zav nênhs, cxuô lênhx sơưr đơưk puôr lênhx siz hluz siz paz, seiz xưk li iz tsêr nênhs.  Lar heik, txix thâuv jok Pa Thơm thiêz jok Na Luông thôngx ziv sik thôngx siêz uô cưr tix, muôx đaz tsi lok siz paz hâur shông 2013, 2 tos ziv muôx cêr siz hluz siz paz jông đuô.

Zos iz lênhx canr bôv hluôk, moz siêz lês uô jông têx hâux lưv zok muôz nhoz thax tsav ntus đriv, Thượng úy Phạm Văn Minh, thơưx seiz car Zênhx Pênhz phax Pa Thơm li qơư qênhz shuôs sơưr đơưk muk lol đhâu thax tsav no tưz pâuz tsênhz đuô lok 2 jok li têx cêr siz jênhv uô cưr tix nênhx tsa, sik đros paz tsưx phưv truôx 2 têz qơưk thax tsav đriv têz.

Lơưr chor tuz lênhv pênhz phax Điện biên, niêx shông cux tso canr bôv, cưk yuôx tuz lênhv pênhz phax muk seiz njuôk shuôs moz, pheiz yuôx tsi zuôr nhiêx trâu tsôngv pêx xênhv nhoz jok ntus đriv Pa Thơm thiêz Na Luông. Iz jiês muk seiz njuôk shuôs moz, pheiz yuôx li heik sâuv, tuz lênhv pênhz phax thiêz tsôngv pêx xênhv tsênhv sik đros nthuôr uô têx cêr lov jêv ciês ntơưv qơư qênhz shuôs sơưr đơưk muk lol đhâu đriv têz qơưk co thiêz. “Hâur ntu moz Covid-19 huôv xênhz phiv liv, mak cux heik tsôngv pêx xênhv cov sơưr đơưk tax nduô tsês tsi muk lol siz shuôs trâu uz trâu no, tsi so hu xor tôngx siz thav, siz kriê xưz zos muôx hâux lưv đaz tsi. Hok lol sâuv hâux lưv tsưx phưv truôx thax tsav ntus đriv mak tsôngv pêx xênhv cux tsi so đros pêz chor tuz lênhv muk qênhz shuôs têx đriv têz, ndêx cxok kuôk cêv ntus đriv”.

Jok Pa Thơm nhiv no tưz muôx 35 chuôz zis muôx pox niêv lok sik txir zos nênhs Lok Tsuôl. Hur tiz si puôr lênhx tâu têz qơưk VN côngk nhav uô nênhs VN thiêz tâu hâu nov ntơưv qơư moz siêz, muôz jông six hơưv huôv tsar uô nox uô hnar.

Zơưv Lò Văn Hoàn, Bí thư Đảng ủy xã Pa Thơm heik pâuz, têx hâux lưv uz no cux zos lok sâuv siz paz huôv tsar uô nox uô hâuk thiêz iz jiês no zos qênhz shuôs têx chuôz zis txov nhêv hâur têx jok chiê hu zâuv sơưr đơưk sik đros paz trâu têx chuôz zis txov nhêv cov cxuô lênhx cxuô tus puôr lênhx muôx tsiêz nox sor si, shir phaz luk….: “Cik txos huôv tsar uô nox uô hnar, phênhv ntâu tsôngv pêx xênhv saz têz qơưk tov lơưr cux pov pêz tsôngv pêx xênhv saz tov no huôv tsar uô nox  li chas, lơưr cơưv shâuv, uô trơưk li ntơư. Siz heik lul, sik thav txix luk Choz Tsiz, lơưr cux pâuz lok six sei. Thâuv tưs saz Lok Tsuôk lơưr muôx moz gênhk lok sik uô tsêr yiêz, nox yôngz cok, tsuôk hu xor tôngx heik txos xưz, pêz cux muk paz hur si”.

Trung tá Lò Văn Ván, Chính trị viên Zênhx pênhz phax Pa Thơm heik pâuz: “Trơưk li cui tinhv sik hux jos, hâur niêx hli, niêx shông 2 tos zuôr siz chuôs njiz chiê sik thav lok sâuv têx luôs hâux lưv tsưx phưv đriv têz, lok 2 tos li hâux lưv tsưx phưv truôx tuk thax tsav qơư nhoz. Six hơưv jê lok no, tiv muôx moz Covid-19  huôv xênhz phiv liv viv li 2 jok li hâux lưv siz heik kriê têx xor mông mak cux zos sâu ntơưr lok sik hu xor tôngx chiê sik thav, siz heik xưz. Lok sâuv tsôngv box cxuô heir nênhs têx txux chi tsưr ziv jênhv pâuz, hur si saz VN thiêz saz Lok Tsuôl cux tâu gra siêz; tsôngv pêx xênhv uô jông trơưk 2 Đảng, 2 têz qơưk li têx chei fuô kriê thiêz sik đros uô jông hâux lưv tsưx phưv thax tsav đriv têz”.

Nhoz pêv trôngz hâur jok Pa Thơm seiz njiê trâu tus đêx Nậm Núa, saz tiv jok Na Luông nhiv no sơưr đơưk luz nênhx tưz truôx tuk đros trâu têx tsêr vor vuôk tâu cxiv uô jông. Hok saz ntus đêx tiv no, ntâu chuôz zis nênhs Lok Tsuôl jok Pa Thơm cux tsênhv taz tov cxiv uô têx vax tsêr  chiê tok shông yiêz. Nhoz 2 saz ntus đêx Nậm Núa, tsôngv pêx xênhv 2 jok Pa Thơm-Na Luông cux tsênhv sik thôngx siêz, nox nhoz shir phaz luk, siz chos cxiv tsa luz nênhx vav mênhx, truôx njês./.

(Vũ Lợi-Riê Lâux cxeik, nhênhv)

Phax tar no trâu tsoz chos, tsiêx tu zus

          - Thâuv tsêz chos jâuv tâuv chiv tsâux tsuv nriêr pâuz têx zav jâuz huv chos hâur chiv cheix, tir tar tâu ntux nu. Thâuv chos tsuv tsov cưv txos qiv hơưv, xeir têx hnuz ntux sor, jêx tưv chungz fênhx txix 15 tưv ndê muk chiê chos. Thâuv chos tsuv yax six zưs đêx trâu tsoz chos. Zôngv hnhaz blês lok sik xuô blêx, môngr yâur vôngz hâur hâur pâus tsoz chos. Thâuv tưz hlar tuôx mav li zuôv qir kali thiêz lân chiê paz tsoz chos hôx phưx.

          - Thâuv muôx njuôs pov zuôr muôx yưv têx jiês ntux no njiv, jêx tưv grês kis đuô 15 tưv tsuv chêx chôngk sâu jâuv tâuv tưz txos six hơưv sâu, lok sik zuôr xar txos six hơưv sâu. Tsi tsêz chos jâuz tâuv thâuv qiv hơưv no njiv. Đros têx zav jâuz nox blôngx tsuv zôngv naz tax vor, têx hnuz ntux lok tê tsuv zưs đêx thâuv sơưr nzor, uô ntêx thâuv hnuz tuôx cov blôngx tsi trâus kruôr.

          - Đros tsoz chos công nghiệp, ntông nox txir, têx vax tsoz chos tsuv zôngv naz tax their vor tê tas nro, vâuv hâur pâus txix têx tsơưr hữu cơ, têx blôngx ntông kruôr jênhs pôngz hâur hâur pâus. Têx qơư zos uô tâu mak zưs đêx, cxuz pa tơưk lơưr saz chuô ndơưx, their tsoz chos chiê txu grês têx ruôr hiêv tiv ntux no.

          - Kho đuô guôx tu zus, zôngv ntâuz tax their cov jông, tsi trâus chuô njơưx. Taz por muôx txâuk jâuz krâur trâu tsiêx cxu nox. Zos jêx tưv hâur hnuz kis đuô 13 tưv, tsôngv box tsi tso nhux tưv nhux đas muk nox jâuz pêv têx tox trôngz./.

(Tòng Anh-Txâur Vax cxeik nhênhv)